“Mai na Tarabe ki na Qaqa,” Me iSakisaki ni iTabagone, Jiulai 2023.
Mai na Tarabe ki na Qaqa
Mo kakua ni soro, ena gauna sara mada ga o lutu kina. Vakabauti au.
iTaba mai na Veisisivi ni Tautuba ni 2023 Toyota USATF ena ika 8 ni Jiulai, 2023, mai na USATF
Ena 2022 au a ciciva kina na veitaucici lade ni 3,000 na mita e Amerika. Na veitau e rauta ni vitu veimama na wavoki, ka lima na baikau me rikavi ena dua na wavoki, oka kina e dua ni bera e dua na tobu wai.
Ena ikarua ni wavoki a lutu e mataqu o koya a liu tiko vei au, ka voleka sara me‘u tarabe vua. A lako sivita rawa o koya na itatarovi, ka sega ko i au—au a lutu.
Au a tucake lesu mai vakaberabera vakalailai baleta ni sa via oti na noqu icegu. Au a vakasamataka, “Me‘u sa cegu beka ka kalawa tani mai na vanua ni cici?” Ia au a sa vakarau tu. Au sa navuca taumada ni‘u na toso tikoga ke‘u lutu, ka‘u mani tekivu cici tale. Au se vinakata tikoga me‘u solia na veika kece e tu vei au kevaka mada ga au sega ni qaqa.
E tauri au e rua na wavoki me‘u qai toboki koya yani e tiko e dakudratou na liu tiko. Sega ni dede sa vo e tolu na wavoki me oti ka lai rua yani. Au sa tekivu nanuma ni rawa ni‘u dua vei iratou na lewe tolu e liu. Ia au sa oca sara ga, ka ratou sivi au e vica ni vo e veimama ni wavoki. Au a tiko ena ikava, ia a daumaka sara na iotioti ni noqu ladeva na wai. Au a vakasamataka, “O, au na rawa ni rawata na ka oqo.”
Ni‘u vakacavara na iotioti ni 50 na mita oya, au vakila ni‘u sa na qaqa. E a duatani duadua. Au a vakasamataka, “Oilei, au sa na qaqa dina beka ena ka oqo ena gauna sara ga oqo?” A mani vakakina. Au a qaqa ena veitau ni oti na noqu lutu.
E muri, au qai kila ni tiko eso na lesoni eda rawa ni vulica mai na veika a yaco.
1. Mo Vosoti Iko vakai Iko.
Ni‘u sa lutu, au a vinakata me‘u tobotobo yani ena kena gauna totolo duadua. Ia me‘u tauri au vakamalua me kakua kina ni oti koso na noqu kaukauwa. E tiko e dua na ivolanikalou e tukuna, “Me da ciciva tikoga na cere sa tu e matada” (Iperiu12:1). Ena bula oqo, e sega ni gadrevi mo qaqa ena kena gauna totolo. Ena so na gauna ena taura toka e dua na gauna.
2. Toso Tikoga
E sa matau tu mo vakila ni o via soro ena so na gauna. Ni‘u sa lutu, au sega ni nanuma ni‘u na qaqa, ia au sa lewa me‘u toso tikoga. Ena dau tu ga na inuinui ni o lutu sobu—o na gadreva ga mo tucake ka tovolea tale. Ena vukei iko na iVakabula mai na veibolebole e tu e matamu. Vakanamata ki na veika o kila ni dina, ka dolele yani ka kere veivuke vei ira na tani. Ena qai vinaka cake na veika kecega.
3. Vakararavi vei Jisu Karisito
Au a sega ni vakadeitaki ni‘u na rawata na qaqa ena veitau ni‘u sa lutu. Ia ni da lutu ena kosipeli, ni da caka cala se ivalavala ca, sa rawa ni da lako ga mai vei Karisito, veivutuni vakaidina, ka vosoti. Ena vukei iko o Koya mo laveti cake. Sa tu vei keda na icavacava cecere—na gumatua me da vinaka cake, me da caka vinaka cake. Kevaka mada ga eda dau lutu tale, kevaka eda veivutuni ka tovolea tikoga me da muria na iVakabula, sa yalataka o Koya ni da rawa ni qaqa ena veitaucici ni bula.