« ’A fa’a’oroma’i i te mau mea ato’a », Nō te pūai o te feiā ’āpī, Tiurai 2024.
’A fa’a’oroma’i i te mau mea ato’a
E tuha’a te ’ati nō te fa’anahora’a a te Metua i te ao ra. E aha rā tā ’outou e rave ’ia fāura mai te reira nā te mau vāhi ato’a ?
Fa’ahōho’ara’a nā Paulina Wyrt
Hau atu i te hō’ē taime, i taua po’ipo’i mana’o ’ore ra, ’ua pāpū roa iā’u e pohe vau. Te ’ite-mata-ra’a i teie toto ato’a—tō’u toto—i te tahera’a i ni’a i te arati’a ’e te ’itera’a i te taehae rahi o te pea tirihiri i ni’a iā’u nā te mau vāhi ato’a, ’e tōna mau niho ’e tōna mau mai’u’u, ’ua hōro’a mai iā’u i te nino’a mana’o o te teimahara’a ’e te tapineva.
E po’ipo’i maita’i roa
E mea ta’a ’ē roa ïa e piti noa hora nā mua atu. ’Ua haere au ma te ’oa’oa nō te hō’ē horora’a roa i te mata’eina’a, i te hō’ē o te mau mahana nehenehe roa ’o tā’u i ’ite i taua pu’e tau māhanahana ra i te tuha’a fenua teitei nō Wyoming, i Marite. E ’ū nīnamu rau māramarama tō te ra’i, ’ua tāpo’i te mau ti’are ’ōviri i te mau hiti mou’a, ’e e mea to’eto’e te mata’i o te po’ipo’i, e mea au rā. E mahana maita’i roa nō te horo e 24 km nā ni’a i te mou’a.
’Ua riro te reira ’ei horohorora’a mātarohia. Tē tamāta nei au i te ha’amaita’i i tō’u pūai ’e tō’u tāpe’ara’a nō te hō’ē horora’a maratoni i roto noa e piti ’āva’e. E fa’arahi te feiā horo i tō rātou pūai nā roto i te horora’a tāmau i ni’a i te mau āteara’a poto. E ha’apūai te reira i te tāpe’ara’a, nā te reira e ha’apūai ato’a i te ’āteura’a.
’Aita ïa vau i ’ite ē, ’aita e maoro roa e hina’aro mau vau i te tōpata tāta’itahi o te ’āteura’a ’e te pūai i roto iā’u, nō te mea e horo atu vau i te horora’a o tō’u orara’a.
Hō’ē ’arora’a tā’ue
’Ia hi’o vau i muri, tē vai a’ena ra te mau tāpa’o. Inaha ho’i, ’ua parau te Fatu ia tātou ē, « e arata’i [’oia] ia [tātou] i te parau mau ato’a ra » nā roto i te mana o te Vārua Maita’i (Ioane 16:13). Mai tā Elder Gary E. Stevenson nō te pupu nō te Tino ’Ahuru ma Piti ’āpōsetolo i ha’api’i mai : « E nehenehe te Vārua Maita’i e tauturu ia ’outou nā roto i te fa’aarara’a ia ’outou nā mua roa i te mau ’ati pae tino ’e pae vārua ». ’E ’ua nā reira ’oia.
Tau minuti noa i muri a’e i te ha’amatara’a o tā’u horora’a, ’ua hi’o vau i raro ’e ’ua ’ite atu vau i te hō’ē mea. ’Ua tūpa’i tō’u māfatu i tō’u ’itera’a atu i te ’atira’a ’āhu’i ’āvae pāpū o te hō’ē pea i roto i te repo i mua iā’u. ’Ua riro ’ei fa’aarara’a pāpū. Ma te ma’ama’a, ’ua mana’o vau ’ua haere mai iho ā te hō’ē pea nā reira, i teienei rā ’aita e fifi nō’u. ’Aita e ha’ape’ape’ara’a, e ’ere ānei ? Nō reira, ’ua horo atu vau.
I raro mai i te hō’ē hora i muri mai, ’ua hemo atu vau i te hō’ē ’āivi na’ina’i ’e ’ua horo atu vau nā ni’a i te hō’ē ’āivi ē tae roa i te hō’ē vāhi āteatea o te uru rā’au. ’A fa’a’ohu ai au i te tīpu’ura’a i raro mai i te ’āivi, ’ua fa’aro’o atu vau i te hō’ē māniania pūai mau, nō te pūai rahi ’ua fa’ataratara te reira i tō’u rouru i ni’a i te upo’o. ’Ua fa’aea vau i reira ra ’e ’ua hi’o marū noa i tō’u pae ’aui. Terā, ’ua oti roa tō’u ri’ari’a rahi. Te māniania, ’o tā’u i ’ite ’oi’oi e mau ’āma’a fatifati, tē tae vitiviti mai ra ïa. ’Ite ihora vau i te hō’ē mea e’ita roa e mo’e iā’u—te hō’ē pea tirihiri pa’ari e horo mai ra i ni’a iā’u !
Te ’arora’a ri’ari’a tei tupu i muri iho, e nehenehe roa vau e pohe. Mea pāpū maita’i e pea taehae mau, ’o tā’u i fa’ahitima’ue i te horora’a i roto i taua vāhi āteatea ra. ’Ātīrā noa atu, i taua taime ra, ’a mana’o ai au e mea pāpū te pohe, ’ua ’āpe’ehia mai e te pure ha’eha’a mau o tō’u orara’a. Pou mai nei te aroha o te ra’i.
Ma te ta’a ’ore, ’ua fa’aea te pea i tāna ’arora’a tāmau ’e ’ua horo atu i roto i te uru rā’au. E parau ’āpī maita’i te reira ! Te parau ’āpī ’ino ’oia ho’i, e 16 puta pēpē fifi tō’u tei fa’atupuhia e te mau niho ’e te mau mai’u’u o te pea, ’e ’o vau ana’e i roto i te uru rā’au, ’ua ’ī roa i te toto ’e e 18 km te ātea te purūmu fātata a’e, ’e ’aita e tauturu ’ati a’e.
E taime nō te fa’aotira’a
Tei te hō’ē taime rahi atu ra vau nō tō’u orara’a. Mai te mea ’aita ā ’outou i ora i te hō’ē taime mai teie, mea pāpū e nā reira ato’a ’outou. E tuha’a te ’ati nō te fa’anahora’a a te Metua i te ao ra. ’Aua’a a’e rā, e ’ere te ’arora’a i te hō’ē pea—nō te rahira’a a’e o tātou ! I te hō’ē rā taime, e teimaha paha ’outou i te ’ati ’o tā ’outou e fa’aruru nei. E nino’a mana’o teie nō te tarapapera’a ’o tā te Fatu i fa’ata’a ’ū’ana mai te « hāmama[ra’a] mai te ta’a nō hade iho i te vaha » ’e « i te tītaura’a ia ’oe na » (Te Ha’api’ira’a Tumu ’e te mau Fafaura’a 122:7).
I teie mau ’āma’ara’a ri’ari’a mau o tō ’outou orara’a, e fa’aotira’a tā ’outou e rave. E nehenehe ’outou e fa’aru’e, e tārava roa ’e ’e pohe roa atu, ’aore rā e nehenehe ’outou e tītau i tō ’outou itoito ato’a ’e tō ’outou pūai ato’a ’e e tāmau ā i te fa’aitoito i te ’arora’a, ma te ti’aturi ē, mai te peu e rave ’outou i tā ’outou tuha’a, e nā reira ato’a te Fatu i tōna pae. ’Ua fa’ata’a mai te Fatu i te tumu nō te mau fifi o te orara’a ia Iosepha Semita, ’a tāpe’ahia ai ’oia i roto i te fare tāpe’ara’a nō Liberty : « E noa’a ia ’oe te ’ite nā roto i teie mau mea ato’a, ’e e riro ho’i ïa ’ei maita’i nō ’oe na » (Te Ha’api’ira’a Tumu ’e te mau Fafaura’a 122:7).
’E e maita’i mau te reira nō ’outou. E fa’a’ina ’e e tāmā te reira ia ’outou, ’a pūai noa ai ’outou ’e ’a fa’ananea ai i tō ’outou ’āteura’a. Nō reira te Fatu i parau ai ia Iosepha—’e i te parau mai ia ’outou—’ia « tāmau noa na ’oe i tō ’oe haere’a » i mua i te mau fifi ’e te mau ’ati (Te Ha’api’ira’a Tumu ’e te mau Fafaura’a 122:9). ’A tāpe’a noa ai ’outou i roto i te orara’a—noa atu i tō ’outou a’e mau mai’u’u—e ’ite mai ’outou ē, noa atu ā te ha’iha’i o tō ’outou pūai e ’āmui mai iho ā tō te Fatu. Mai tei fafauhia, e « pūai [tōna] nō te fa’aora » (2 Nephi 31:19).
Tāpe’a noa
’O te ’ohipa mau tei tupu nō’u. ’Aita e fa’aru’e, ’ua fa’aoti au e ti’a i ni’a. ’Ua hina’aro roa vau e ora, te aura’a ra, tītauhia ’ia ’ite mai i te tauturu. Ma te turori haere i ni’a i te purūmu hau atu i te hō’ē kilometera ’e te ’āfa te ātea, ’ua tāpae atu vau i ni’a i te purūmu o te tahi a’e ta’ata, rātou ana’e i roto i te uru rā’au i taua mahana ra e rave rahi kilometera ’ati a’e. E fa’aora’a nā ni’a te manureva tautau te hope’a o taua fārereira’a temeio ra, ’e e toru taime tāpūra’a rū nō te ora ’e e hāro’aro’ara’a maita’i a’e nō te ha’amaita’ira’a ’ia fa’aoti pāpū e « tāpe’a noa ».
’Ua ’itehia mai ia Elder Dunn te tauturu, ’ua fa’aorahia ’e ’ua tāpūhia e toru taime ’o tei fa’aora iāna.
’Ua fa’arahi teie ’ohipa i tupu i tō’u mana, tā’u fa’aotira’a pāpū ’e tō’u fa’aro’o. ’Ua ha’apūai ato’a te reira iā’u ’e ’ua fa’aineine nō te tahi atu ā mau fifi o te orara’a. ’Ua pāpū roa iā’u ē, mai ia ’outou « [’a fa’a’oroma’i] i te mau mea ato’a, [’a ti’aturi] i te mau mea ato’a, [’a tīa’i] i te mau mea ato’a ra, [’a fa’a’oroma’i] i te mau mea ato’a ra » (1 Korinetia 13:7), e fa’ananea atu te reira i te ’āteura’a ’e te pūai tei tītauhia nō te fa’aruru i te mau fifi. E ’ite ’outou i te rima o te Fatu i te fa’a’aifāitora’a ia ’outou i te mau mea ato’a e tae mai i mua ia ’outou—noa atu ’o te « vaha iho o hade ».