Tō’u tāpūra’a māfatu

Nā Carter Thomas

Fa’ahōho’ara’a nā Adam Nickle

Mea au rahi nā’u te tū’aro, te taorara’a i te pōpō i roto i te ’ete iho ā ra. Mea au noa nā’u e tata’u. ’E i te hō’ē pae, nō reira ato’a vau i fāri’i ai i te hō’ē tāpūra’a māfatu e va’u hora te maoro i te 14ra’a o tō’u matahiti.

’Ua fānauhia vau ’e te hō’ē hape i roto i te hō’ē o tō’u tāpo’i pe’epe’e māfatu. I te ha’amatara’a, tē parau ra te mau taote ē, e tītauhia paha te hō’ē tāpūra’a māfatu ’ia rū’au ana’e au—pēnei a’e i muri a’e i tā’u fa’atuha’ara’a. I te roara’a rā o te tau, ’ua rahi roa mai te fifi, te tumu rahi nō tō’u ïa ha’uti rahi i te tū’aro.

I roto i te hō’ē fārereira’a i te tau ha’apohera’a rā’au, ’ua parau te taote ē, mea pāpū e tītauhia te hō’ē tāpūra’a nō’u i roto i te matahiti ’aore rā e piti matahiti i muri nei. ’A tīai noa ai, e horo vau i te horora’a roa i te fare ha’api’ira’a. Terā rā, ’aita tō’u taime horora’a i maita’i a’e mai, ’ua ’ino roa atu. Mai te reira tō’u ’itera’a ē, tē vai mau nei te hō’ē fifi.

’Ua ho’i fa’ahou mātou e fārerei i te taote i te ’āva’e Māti. I te roara’a o te fārereira’a, ’ua ’ite a’era vau e ti’a ’ia tāpū-’oi’oi-hia vau, ’oi’oi a’e i tei fa’anahohia. ’Ua ha’amata vau i te putapū i te hō’ē nino’a mana’o pae vārua māhanahana i roto iā’u. ’Ua fa’atae mai teie heheura’a ta’ata hō’ē i te hō’ē tāmāhanahanara’a pāpū. I reira iho, ’ua fa’aro’o vau iā’u iho i te paraura’a ē, e hina’aro vau ’ia tāpū-’oi’oi-hia vau. ’Ua ri’ari’a ri’i tō’u nā metua i te ha’amatara’a, ’ua parau atu rā vau ia rāua : « E mana’o hau tō’u. I tei hea taime tātou e nehenehe ai e rave i te reira ? » ’Ua tārena mātou i te tāpūra’a nō te ’āva’e ’Ēperēra.

I roto i te mau taime fifi, ’ua ’ite au tei reira noa Iesu Mesia nō’u. E nehenehe noa vau e pure i te Metua i te ao ra, ’e e mea tauturu mau.

E fa’aro’o tō’u e maita’i te mau mea ato’a, i te mahana rā o te tāpūra’a e mea ri’ari’a mau ïa. ’Ua tupu tā’ue mai te mau mea ato’a i ni’a iā’u, i te tomora’a atu vau i roto i taua piha ra. Tē ha’amana’o ra vau i te rūrūra’a. ’Ua tauturu maita’i mai tō’u taote fa’ata’oto iā’u i taua taime ra. Tē māuruuru nei au i te mau ta’ata ato’a tei tauturu mai iā’u i te roara’a o teie ’ohipa i tupu. ’Ua fāri’i ato’a vau i te tauturu a tō te ra’i. ’Ei hi’ora’a, ’ua ha’apae tā’u pāroita tā’āto’a i te mā’a nō’u, ’e ’ua putapū mau vau i te mana o te ha’apaera’a mā’a ’e te pure.

Hōho’a tei hōro’ahia mai e te ’utuāfare Thomas

I teie mau mahana, mea maita’i roa tō’u māfatu. ’Āhani ’aita vau i tāpūhia, e nehenehe vau e pohe i roto i nā matahiti e piti. I teienei e nehenehe vau e ora maoro.

’Ua fa’ataui roa teie ’ohipa i tupu i tō’u hi’ora’a āte’a. Tē hi’o ta’a ’ē nei au i te ta’ata tāta’itahi, ’a fa’aruru ai rātou i tō rātou mau tamātara’a. Tē putapū nei au i te hō’ē aumāuiui rahi nō rātou. E ’ite au i te tahi taime i te hō’ē ta’ata ’e e au ra iā’u tē fa’aruru nei ’oia i te hō’ē ’ohipa fifi mau, ’e i muri iho e haere au e tauturu iāna.

Nō’u nei, te aura’a mau ’ia riro ’ei pipi nā Iesu Mesia ’o te rirora’a ïa ’ei hi’ora’a maita’i nō vetahi ’ē, ’e te ravera’a i te ta’ata tāta’itahi mai tāna i rave. Tei roto tātou pā’āto’a i teie ’ohipa. ’O te Atua tō tātou Metua, ’e e mau tamaiti ’e e mau tamāhine tātou nāna. E ’ōpuara’a ’e e mea faufa’a tō tātou pā’āto’a. E rave rahi pāto’ira’a, nō reira tē tamāta nei au i te tauturu i te ta’ata ’ia ’ata’ata ’e ’ia vai ’aifaroti’a.

Tē fa’a’ite pāpū nei au ē, e nehenehe au e fāri’i i te arata’ira’a a te Fatu nō’u iho i te mau mahana ato’a. E nehenehe ’oia e fa’ariro iā’u e mea pūai a’e ’ei ta’ata ’e e hōro’a mai iā’u i te ’āteura’a. E nehenehe au e rave i te mau mea ato’a nā roto i te Mesia (hi’o Philipia 4:13).