Tauturu i te orara’a

Tauiha’a nō te aumaita’i i te pae manava

Nā Marissa Widdison

Te mau ve’a a te ’Ēkālesia

Teie te tahi mau parau a’o nō te vai maita’i noa te ea i te pae manava.

Iesu Mesia

E nehenehe paha ’oe e feruri i te rahira’a rāve’a ’ia maita’i noa te ea o tō ’oe tino, ’a pa’ari noa ai ’oe. ’Ua ’ite ’oe ē, ’ua here te Metua i te ao ra ’e ’o Iesu Mesia ia ’oe ’e tē hina’aro nei rāua ’ia ’atu’atu maita’i ’oe i tō ’oe tino. ’E « te aupurura’a i tō ’oe tino, ’o te aupurura’a ïa i tō ’oe ea i te pae nō te ferurira’a ’e i te pae manava » (Nō te pūai o te feiā ’āpī : E arata’i nō te rave i te mau mā’itira’a [2022], 29). Teie te mau mea tā ’oe e nehenehe e rave nō te tauturu ia ’oe, ’ia vai maita’i ’oe i te pae manava !

• niuniu ’afa’ifa’i

  ītona fa’ahōho’ara’a nā Emily E. Jones

  Tū’ati ’e vetahi ’ē. ’Ia oto ana’e iho ā ra ’oe, e hina’aro ’oe e fa’aea ’āta’a noa. Mea maita’i i te tahi taime, terā rā e mea maita’i ato’a ’ia pārahi atu i pīha’i iho i te feiā e fa’aitoito mai. E nehenehe te fa’aea-’āta’a-ra’a e ha’apa’ari atu ā i te fifi.

• ’ufa parau

  ’A fa’a’ite atu i tō ’oe mau mana’o hōhonu. ’A ha’api’ipi’i ia ’oe ’ia vai ha’avare ’ore i ni’a i tō ’oe mau putapūra’a. ’A paraparau nō ni’a i tō ’oe mau mana’o hōhonu ma te rāve’a ta’a ’ē. ’E te parau mau, ’aita e fifi ’ia ta’i ! ’A feruri i te taime ’a ta’i ai Iesu (hi’o Ioane 11:32–35).

• roro

  ’Ia ’ite mai ē, e mau ha’amāramaramara’a te mau nino’a mana’o. Noa atu ē e ’ere te reira i te mea au roa, e’ita te mau nino’a mana’o iho e ha’amāuiui ia ’oe. ’A tāmata i te ’ite mai i tō ’oe iho mau mana’o hōhonu ’e ’ia ’ite mai e aha tā te reira e parau mai ra ia ’oe.

• tuira, pēnitara, purūmu pēni

  ’A ha’api’ipi’i nāhea i te fa’aruru atu. ’Ia oto ana’e ’oe ’aore rā ’ia hirihirina’i, ’a ha’api’i i te fa’atere i teie mau mana’o hōhonu ma te rāve’a maita’i. ’Ei hi’ora’a, e rave rahi ta’ata e hi’o nei e mea maita’i ’ia haere e oriori haere, e fa’aro’o i te pehe, e pāpa’i hōho’a, e pure ’aore rā e pāpa’i i roto i te hō’ē buka ’ā’amu.

• mau ata

  ’A vaiiho atu i te mau mana’o hōhonu au ’ore ’ia haere atu ’e ’ia ho’i mai. ’A huti hōhonu i te aho ’e ’a hāha’anūnui [imaginer] i te mau ata e tere ra i ni’a i te ra’i ’aore rā i te pape e tahe ra i roto i te ’ānavai. ’A ’ite mai i tō ’oe mau ferurira’a ’e tō ’oe mau nino’a mana’o ’e ’a tāmata i te vaiiho i te reira ’ia fa’aātea ’ē atu.

• pāpa’ira’a mo’a

  ’A tāmau noa i te fa’a’amu i tō ’oe vārua. Te mau pāpa’ira’a mo’a, te mau hīmene, te pure, te ’ēkālesia—e tauturu teie mau mea ato’a i te ha’apūai i tō ’oe vārua, ’o tē tauturu i te toe’a o ’oe ’ia maita’i i te pae ea.

• mōhina pape ’e te tīa’a

  ’A tāmata i te tāpe’a noa i te ea pae tino. ’Ua tū’ati tō tātou ea i te pae manava ’e tō tātou ea i te pae tino. Te ’amura’a i te mā’a e fa’aitoito, te ta’oto-nava’i-maita’i-ra’a, ’e te ha’amātaura’a ’ia fa’aha’uti’uti i te tino, e tauturu ia ’oe ’ia vai maita’i a’e te ea i te pae manava ’a pa’ari noa ai ’oe.

• te tamaiti ’e te metua vahine

  ’A ani i te tauturu ’ia hina’aro ana’e ’oe i te reira. E hina’aro tō tātou tino i te tahi taime i te tauturu a te ta’ata tōro’a nō te vai maita’i te ea. E ha’amaita’ira’a teie mau rāve’a tauturu nā te Metua i te ao ra, ’o tē hina’aro nei e tauturu ia tātou. Mai te reira huru ato’a, e hina’aro tātou i te tahi taime i te tauturu a te taote ’e te mau parau a’o nō te vai maita’i te ea i te pae manava. Mai te mea tē ’ite ra ’oe te oto i te roara’a o te tau ’aore rā tē mana’o nei ’oe ē, tē ha’amāuiui nei ’oe ia ’oe iho, ’a ani i te tauturu i te hō’ē ta’ata pa’ari. ’Aita ’oe e tītauhia ’ia ’ora i te reira ’o ’oe ana’e ! ’A mā’imi i te mau ha’amaita’ira’a ato’a tā te Metua i te ao ra i hōro’a mai nō ’oe.

Nō te tahi atu mau rāve’a tauturu, ’a haere i ni’a mentalhealth.ChurchofJesusChrist.org.

’A hi’o te fa’aaura’a rorouira Gospel Living i te roara’a o te ’āva’e nō te tahi atu mau parau a’o nō ni’a i te aumaita’i i te pae manava.