Uiraʼa ’e pāhonoraʼa

« ’Aita e ta’ata i te fare ha’api’ira’a hō’ē ā peu mōrare ’e tā’u. Nāhea e noa’a ai te hoa maita’i i reira ? »

« E hina’aro iho ā tātou pā’āto’a i te mau hoa. Tē ’imi nei tātou pā’āto’a i te mau fa’a’itera’a ē, e mau ta’ata faufa’a tātou. Tē rave nei tātou i te mau mā’itira’a e tano i te reira mau hina’aro. E nehenehe te tahi i te fa’aātea ia tātou i te māramarama ’o tā te Atua i pūpū mai ia tātou ’ei arata’i. E nehenehe te tahi e ha’amāramarama mai i teie mārama nā roto i te reira tātou e ’ite mai ai i tō tātou ’ē’a ».

Peresideni Henry B. Eyring nō te Peresidenira’a Mātāmua, « E haere nā te māramarama », ’āmuira’a rahi nō ’Ēperēra 2008 (Ensign ’aore rā Liahona, Mē 2008, 124).

feiā ’āpī tamāhine

« ’A paraparau atu i tō ’outou mau ’ana’anataera’a. ’Aita ’outou e tītauhia e ha’amohimohi i tō ’outou mārama. E ti’a noa ia ’outou ’ia riro ’ei taure’are’a e ’ana’anatae ra i te tahi mau ’ohipa ’ārearea ’o te tahi mau taure’are’a e au nei. ’A pe’e i te mau fa’aturera’a a Iesu Mesia, ’e ’a fa’ata’a pāpū maita’i i te reira i tō ’outou mau hoa ha’api’ira’a i te mau peu mōrare tā ’outou e pe’e nei ».

Jamie Ann B., 18 matahiti, Negros Occidental, Firipino

feiā ’āpī tamāhine

« ’A ’ite mai i te mau ta’ata e hō’ē ā mau piha, mau ’ana’anataera’a, mau tārēni, ’aore rā mau ha’a ri’i. Tē vai nei te mau ta’ata maita’i roa nō te tahi atu mau ha’apa’ora’a fa’aro’o, ’oia ato’a te mau ta’ata fa’ahiahia ’aita tā rātou e ha’apa’ora’a fa’aro’o. E mau tamari’i herehia ato’a rātou pā’āto’a nā te Atua. ’A tāmau noa ai ’outou i te ha’apa’o i tā ’outou mau peu mōrare, noa atu ’aita tō ’outou mau hoa e nā reira nei, e nehenehe tō ’outou hi’ora’a e fa’aitoito ’ia vetahi ’ē ’ia rave i te mau mā’itira’a maita’i a’e. »

Lucy B., 15 matahiti, Lima, Pērū

feiā ’āpī tamāroa

« ’Ia fa’a’oroma’i ’e ’ia vai maheu noa te mana’o. Te auhoara’a e parau ïa nō te maita’i, e ’ere nō te rahira’a, ’e te roara’a i te tahi mau hoa maita’i e nehenehe e riro ’ei mea faufa’a a’e i te tāmatara’a i te fa’aō atu i roto i te naho’avaleur ta’ata ’aita e tū’ati nei i tō ’outou maita’i ».

Adedoyin Alma O., 17 matahiti, Osun, Nītēria

feiā ’āpī tamāhine

« ’A fa’a’ite atu i tā ’outou mau peu mōrare ia rātou. Mai te mea e ’ite rātou i tā ’outou mau peu mōrare, e nehenehe rātou e fa’atura i te reira. E nehenehe ato’a ’outou e ani manihini i tō ’outou mau hoa nō te fare ha’api’ira’a ’ia haere mai i te purera’a ’e/’aore rā i te mau ’ohipara’a a te ’Ēkālesia nō te tauturu ia rātou ’ia māramarama maita’i a’e i te mea tā ’outou e ti’aturi nei. »

Margarett P., 13 matahiti, Texas, Marite

feiā ’āpī tamāhine

« ’Ua ha’api’i mai au ē, e nehenehe e ’itehia mai te mau hoa maita’i maoti te mau muhumuhura’a ’e ’ia riro noa ’o ’oe iho. I te tahi taime e haere mai te ta’ata ia ’oe ra, ’e i te tahi taime e ti’a ia ’oe e hi’o atu, tē vai ra rā te mau ta’ata e riro mai ’ei mau hoa maita’i ’aore rā ’o tei hina’aro i te hō’ē hoa maita’i mai ia ’oe ».

Katie R., 18 matahiti, Nebraska, Marite

’Ua fa’ata’ahia te mau pāhonora’a nō te hōro’a atu i te tauturu ’e ’ei hi’oraʼa ātea, e ʼere rā ’ei fa’ahitira’a parau mana o te haʼapiʼiraʼa tumu a te ʼĒkālesia.

E aha tō ’oe manaʼo ?

« E rave rahi fa’aotira’a rarahi tā’u e rave. « Nāhea vau e fāri’i ai i te heheura’a nō’u iho ? »

’A hāpono mai i tā ’oe pāhonora’a ’e tō ’oe hōho’a nā mua a’e i te 15 nō ’Ātete 2024.

Nā te rata uira ia mātou i te [e-mail]. ’Aore rā ’a haere i ni’a ftsoy.ChurchofJesusChrist.org ’e ’a tāumi « Submit Your Work [Hāpono i tā ’oe ’ohipa] » ’A fa’atū’ati ia ’oe i tā ’oe tomora’a a te ’Ēkālesia ’e ’a mā’iti i muri iho « For the Strength of Youth [Nō te pūai o te feiā ’āpī] » i raro a’e « Choose Magazine [Mā’iti i te ve’a] ». ’A tāumi i ni’a « Add File [mau putu’ite] » nō te mā’iti i tā ’oe putu’ite ’e te mau hōho’a, ’e i muri iho, ’a tāumi « Submit [Hāpono] » nō te fa’auta uira ’e nō te hāpono atu i tā ’oe putu’ite ia mātou ra.

E riro te mau pāhonoraʼa i te taui-ri’i-hia nō te roa ’aore rā nō te māramarama ’ore.