« Mai te turorira’a i te upo’oti’ara’a », Nō te pūai o te feiā ’āpī, Tiurai 2024.
Mai te turorira’a i te upo’oti’ara’a
’Eiaha roa atu e fa’aru’e, noa atu e topa ’outou. ’A ti’aturi mai iā’u.
Hōho’a nō te tata’ura’a va’a ’āi’a a Toyota USATF 2023, te 8 nō Tiurai 2023, nō roto mai te USATF
I te matahiti 2022, ’ua horo vau i te horora’a ti’a’iara’a [obstacles] 3 000 metera i te tata’ura’a va’a ’āi’a nō te fenua Marite. Te roara’a o te horora’a fātata e hitu fa’a’ohura’a ’e te ’āfa ’ati a’e te tahua, ’e tē vai ra e pae ’āti’a [barriere] rā’au i ni’a te fa’a’ohura’a tāta’itahi ’o tā ’oe e ti’a e ’ōu’a atu, tē vai ra hō’ē i muri noa mai i te hō’ē ’āpo’o pape.
Tei te fa’a’ohura’a piti au o te horora’a ’a turori ai te ta’ata i mua iā’u ’e ’ua fātata roa vau e ū atu i ni’a iāna. ’Ua ’ōu’a ’oia te ’āti’a, ’aita rā vau i nā reira—’ua topa vau.
’Ua ti’a mai au ma te marū noa nō te mea tē ’ite ra vau te ’ōtohe-ri’i-ra’a. ’Ua mana’o vau : « E ti’a ānei ’iā’u e fa’aea ’e e haere i rāpae i te tahua ? » ’Ua ineine rā vau. ’Ua fa’aoti a’ena vau nā mua roa ē, e tāpe’a noa vau noa atu e topa vau, nō reira ’ua horo fa’ahou vau. ’Ua hina’aro noa vau e hōro’a i te tā’āto’ara’a, noa atu ē e’ita vau e upo’oti’a.
’Ua tītauhia iā’u e piti fa’a’ohura’a hou ’a roa’ahia ai iā’u te ta’ata i muri i te ’āna’ira’a. ’Aita i maoro roa, e toru fa’a’ohura’a e toe ra, i muri iho e piti fa’a’ohura’a. ’Ua ha’amata vau i te feruri ē, e nehenehe paha vau e tae atu i roto te ti’ara’a toru. ’Ua rohirohi roa rā vau, ’e ’ua hemohia vau e te tahi mau ta’ata i te ’āfara’a o te fa’a’ohura’a hope’a. Tei te ti’ara’a maha vau, i muri iho rā ’ua ’ite a’era vau ’ua ’ōu’a hope’a maita’i au i roto i te pape. ’E ’ua mana’o vau : « E hoa ē, e upo’oti’a paha ’oe i teie ’ohipa ».
I te fa’aotira’a vau i nā 50 mētera hope’a, ’ua ’ite a’era vau ē, e upo’oti’a vau. E mea mana’o-’ore-hia mau. ’Ua mana’o vau : « ’Auē ïa ē, tē upo’oti’a ra ānei au i teie ’ohipa i teie taime ? » ’E ’ua nā reira vau. ’Ua upo’oti’a vau i te horora’a i muri a’e i te topara’a.
I muri a’e, ’ua ’ite a’era vau ē tē vai ra te tahi mau ha’api’ira’a tā tātou e nehenehe e ha’api’i mai nā roto mai i te ’ohipa tei tupu.
1. ’Ia fa’a’oroma’i ia ’outou iho
I tō’u topara’a, ’ua hina’aro vau e tāpapa ’oi’oi atu. ’Ua ti’a rā iā’u ’ia tāmarū iā’u ’eiaha vau ’ia rohirohi. Tē vai nei te hō’ē pāpa’ira’a mo’a e parau ra : « ’A horo tāmau maite ai i teie nei horora’a i mua ia tātou nei » (Hebera 12:1). I roto i te orara’a, ’aita e tītauhia ’ia manuia i te reira iho ā taime. I te tahi taime, e tītau te reira i te tau.
2. ’A tāmau noa
Mea pāpū i te tahi taime e tae mai te hina’aro e fa’aru’e. I tō’u topara’a, ’aita roa vau i mana’o e nehenehe au e upo’oti’a, ’ua fa’aoti rā vau e tāmau noa. Tē vai noa ra te ti’aturira’a ’ia topa ana’e ’outou—e tītau-noa-hia ’ia ti’a mai i ni’a ’e ’ia tāmata fa’ahou. E tauturu te Fa’aora ia ’outou ’ia fa’a’oromai i te mau tāmatara’a tā ’outou e fa’aruru atu. ’A tāpe’a noa i ni’a i te mea tā ’outou i ’ite e parau mau, ’a toro atu i te rima ’e ’a ani ia vetahi ’ē te tauturu. E maita’i mai te mau mea i te pae hope’a.
3. ’A tūru’i i ni’a ia Iesu Mesia
’Aita i pāpū roa iā’u e upo’oti’a vau i te horora’a i muri a’e i tō’u topara’a. Terā rā ’ia topa ana’e tātou i roto i te ’evanelia, ’ia rave ana’e tātou i te mau hape ’aore rā i te hara, e nehenehe noa tātou e haere mai i te Mesia ra, ’ia tātarahapa mau ’e e fa’a’orehia mai tā tātou hara. E tauturu ’oia ia ’outou ’ia ti’a fa’ahou mai. E fāito pūai rahi tō tātou—te pūai ’ia maita’i a’e, ’ia rave maita’i a’e. Noa atu e topa fa’ahou ā tātou ’e fa’ahou ā, mai te peu e tāmau noa tātou i te tātarahapa ’e i te tāmata i te pe’e i te Fa’aora, i muri iho e fafau mai ’oia ē, e nehenehe tātou e upo’oti’a i te horora’a o te orara’a.