Te reo o te feiā ’āpī

Hi’opo’ara’a huna ’e te pure

Tayana C., 17 matahiti, Abidjan, Fenua ’Īvori

feiā ’āpī tamāhine

Mau hōho’a nā Ebick Ngoma

’Aita i maoro a’enei, ’ua pe’ape’a roa vau nō te mea ’aita i roa’a iā’u te mau nota ’o tā’u i hina’aro roa. ’Ua feruri au i te reira ’e ’ua ’ite a’era vau ē, ’aita vau e pure nei ’aore rā e tai’o nei i te mau pāpa’ira’a mo’a. Nō reira, ’ua fa’aoti au e tai’o i te mau pāpa’ira’a mo’a ’e e pure i te mau po’ipo’i ato’a. ’Aita i maoro roa, ’ua ha’amata tā’u mau nota i te mara’a mai ma’a vāhi iti ’e ma’a vāhi iti. ’Ua tauturu mau te tai’ora’a i te mau pāpa’ira’a mo’a ’e te purera’a iā’u.

I te hō’ē taime, ’ua hōro’ahia mai ia mātou te hō’ē hi’opo’ara’a huna i te fare ha’api’ira’a. ’Aita roa vau i hi’ohi’o a’e te ha’api’ira’a. ’Aita hō’ē ta’ata i hi’ohi’o noa a’e i te ha’api’ira’a—’ua fa’ahitimahuta te ’orometua ia mātou. ’Ua ha’amata te tā’āto’ara’a i te punu i roto i te hi’opo’ara’a. E’ita vau e ha’avare atu—’ua hina’aro mau vau e punu. ’Ua parau mai rā te hō’ē mea iā’u : « E ti’a ia ’oe e pārahi ’e ’ia rave mai tā ’oe e nehenehe i te mea tā ’oe i ’ite ». E reo marū teie. ’Ua pe’ape’a roa ’e ’ua tāmarū te reo i tō’u māfatu. Nō reira, ’aita vau i hi’o i te pae ’aui ’e ’aita i hi’o i te pae ’atau. ’Ua pāhono vau mai tā’u i ’ite. I te pae hope’a, ’o vau ana’e tei fāri’i i te hō’ē nota teitei a’e. ’Ua ’oa’oa roa vau i te fa’aro’ora’a i te Vārua Maita’i.