Wokbaot long Laet blong Sevya
Taem yu kam long Jisas Kraes mo sakem sin, paoa blong Hem blong hilim mo mekem yu strong bae i lidim yu aot long tudak.
Long wan longfala flaet, we mi bin kapten blong plen, mi bin tekof long Germany long 11:00 long moning mo kasem Kalifonia long 1:00 long aftenun long sem dei. Komperem taem we plen i aot mo taem we i kasem, bae yumi luk se wan flaet blong krosem Atlantik Si mo ful graon blong Not Amerika i tekem tu aoa nomo.
Boeing 747 ia i bin spid, be i no spid tumas. Tru samting we i stap se, flaet ia i bin tekem11 aoa, we i stap dipen long win, blong travel 5,600 mael (9,000 kilo mita).
From we mifala i stap flae long wes, san i neva go daon long taem blong flaet blong mifala. Mifala harem gud long bigfala dei laet stat long Germany kasem Kalifonia. Blong kambak long Germany, i wan defren stori olgeta. Taem mifala i flae long is, san i go daon moa kwik bitim ol nomol taem, mo bifo mifala i luksave, naet i kavremap mifala.
Iven taem mifala i stap flae long naet, long bigfala tudak, mi bin save wetem ful hat blong mi se san i no jenis, i stap long semmak ples mo mifala i save dipen long hem. Mi bin save se i no longtaem san bae i girap, mo bigfala laet bae i kambak we i tekem wom mo laef long wan niufala dei bifo flaet blong mifala i finis.
Samtaem ol samting raon long yumi oli no stap semmak, yumi no save wanem bae hapen mo i tudak. Mi talem tangkyu from Jisas Kraes. Hem i laet mo laef blong wol ia Tru long Hem, yumi gat hop long fiuja, akses long tabu laet blong Hem, mo promes ia blong las win ova long sin mo ded.
Lav mo Paoa blong Sevya
From lav blong Hem long yumi, Jisas Kraes i bin givim laef blong Hem from evri pikinini blong God mo openem doa blong fasin blong nomo save ded mo laef we i no save finis.
Nomata wanem Setan bae wantem yu blong bilivim, yu yu no go longwe long paoa blong Sevya blong sevem yu. Yu yu neva go longwe from “ol han blong lav blong hem oli raonem yu blong taem we i no save finis.” (2 Nifae1:15).
Hemia hem i nambawan presen long evri presen we i kam tru long paoa we i mekem i posibol, mo i save sevem man long sin, we i paoa blong Atonmen blong Jisas Kraes. Tru long safaring blong Sevya long Getsemane mo Golgota, Hem i save olsem wanem blong helpem yu blong go tru long eni samting mo evri jalenj we yu fesem (luk long Alma 7:11–12).
Jisas Kraes Hem i paoa blong yu!
Presiden Russell M. Nelson i bin talem se, “Taem we Sevya [i bin givim sakrifaes ia blong pem praes] blong evri kaen man, Hem i bin openem wan rod blong olgeta we oli folem Hem blong save kasem hiling, paoa blong Hem mo paoa we i blong pemaot man.”
Paoa ia, i olsem san, i stap oltaem. Hem i neva muvmuv. Folem rod blong Sevya hem i olsem se yu stap wokbaot i kamaot long ol sado mo kam insaed long laet blong san, ples we yu save kasem ol blesing blong laet, wom mo lav blong God.
Wan Niufala Stat We i Saen
Buk blong Momon i tokbaot olsem wanem Ol Man blong Nifae ol spendem tri dei long ples we i tudak afta we oli hangem Sevya long kros. Tudak blong graon ia we i raonem olgeta i ripresentem tudak long saed blong spirit we yumi eksperiensem from sin. Afta, oli harem voes blong Kraes we i stap invaetem olgeta blong aot long tudak mo blong go insaed long laet blong Hem:
?“Bae yufala i no kambak naoia long mi, mo sakem ol sin blong yufala, mo jenisim laef blong yufala blong mekem se mi save mekem yufala i kam oraet?” (3 Nifae 9:13).
“Mo bae yufala i mekem olsem wan sakrifaes long mi, wan hat we i fulap wetem sore mo wan spirit we i wantem blong sakem sin” (3 Nifae 9:20).
“Yufala i sakem sin mo kambak long mi wetem ful stamba tingting blong hat” (3 Nifae 10:6).
Ol invitesen blong Sevya ia oli go tu long yu taem we yu faenem se yu lus long tudak. Semmak olsem ol taem we san i girap long stat blong wan niufala dei, evri taem yu sakem sin, yu kasem wan fres stat, wan niufala stat we i saen.
Tru long fasin blong sakem sin, Jisas Kraes “bae i putum bak pis mo glad blong tekem ples blong harem nogud blong yu. Bae Hem i nomo tingbaot ol sin blong yu. Long paoa blong Hem, tingting blong wantem tumas blong yu blong folem ol komanmen blong Hem bae i kam moa antap.”
Stret long taem we yu tekem fas step blong sakem sin, Sevya bae i stat blong “jenisim hat mo laef blong yu. Sloslo, bae yu gro mo kam moa olsem Hem ” mo Hem “bae i givim yu moa akses long paoa blong Hem.”
Faenem Hiling we i No Save Finis
Sevya i Masta Blong Hilim Evri Samting. Wan long ol naesfala wei blong soem hiling paoa blong hem, i stap long ministri blong Hem insaed blong Buk blong Momon :
“Yufala i gat eniwan we i sik long medel blong yufala?” Hem i askem. “Yufala i gat eniwan … we oli gat hadtaem long eni fasin? Karem olgeta oli kam long ples ia mo bae mi mekem olgeta i oraet, from mi mi gat sore long yufala. …
“Mo i bin hapen se taem we hem i toktok olsem ia nao, evri grup blong pipol ia, long semtaem, oli go fored … ; hem i bin mekem olgeta evriwan oli kam oraet taem we oli karem olgeta oli go fored long hem.” (3 Nifae 17:7, 9).
Evri taem taem Sevya i hilim eniwan, tugeta, bifo mo afta long Laef bakegen long ded blong Hem, Hem i testifae long faenol paoa blong Hem blong hilim ol sol blong yumi. Wanwan merikel blong hiling oli poen i go long promes blong Hem blong lasfala hiling blong Hem long saed blong bodi mo long saed blong spirit we bae i kam long yumi long Laef bakegen long Ded.
Samtaem, ol prea blong yu blong hiling bae i nogat ansa long wei we yu hop from, be Hem i neva ting nating long olgeta. Taem blong hiling bae i kam yet long wei mo taem blong Papa long Heven, semmak olsem we tudak blong naet we oltaem i givim wei long naesfala san blong girap.
Dia fren blong mi, mi testifae se Jisas Kraes hem i Man blong Hilim man long laef ia mo long laef we i no save finis. Bigfala sore blong Hem i inaf blong hilim ol soa long bodi blong yu, wasem klin sin blong yu, givim paoa long yu long hadtaem, mo blesem yu wetem hop, waes tingting, mo pis. Paoa blong Hem i stap oltaem—i neva jenis mo yu save dipen long hem—iven taem yu, long wan taem, yu filim se yu stap longwe long lav, laet mo kamfot blong Hem.
Bae yu neva lusum filing ia blong givim respek mo bigfala fasin blong talem tangkyu from evri samting we Jisas Kraes i bin mekem blong yu. Plis save se lav blong Hem long yu i stret gud evriwan. Tingbaot promes we Hem i bin givim long yu blong taem we i no save finis. Mo “letem God i mekem ol hevi samting blong yu oli nomo hevi, tru long glad blong Pikinini blong hem.,” Jisas Kraes (Alma 33:23).