Ol Voes blong Ol Yut
Fasin blong Mi blong Yusum Kakae blong Kontrolem Tingting fesem. Tru Aedentiti blong Mi
Blong wan longfala taem mi bin fesem hadtaem wetem wan fasin blong yusum kakae blong kontrolem tingting we oli singaotem anoreksia nevosa, hem i sik we yu kakae smol mo moa smol mo wari abaot blong kam fatfat. Hem i afektem yu long saed blong tingting—yu stat blong filim se i rong taem yu stap kakae, mo yu no andastanem ol nid blong bodi blong yu. Hem i no help taem mi gohed blong luk ol standet we oli no tru onlaen o long skul, mo mi komperem miwan wetem famli blong mi mo ol narafala man raon long mi.
Fasin blong yusum kakae blong kontrolem tingting blong mi i wan samting we mi bin haedem. Be mama blong mi i luksave ol jenis long fasin blong kakae blong mi. Hem i bin sidaon wetem mi mo givim mi taem olsem we mi nidim blong talemaot long hem wanem i bin stap hapen. Plante wota blong ae i bin ron, be mi ting se Spirit i bin help blong lidim hem blong save se mi nidim help. Tugeta, mitufala i mekem wan plan mo statem sloslo blong wok folem.
Long taem ia, mi jusum tu blong kasem petriakel blesing blong mi. Mi bin wantem save se laef blong mi bae i olsem wanem aotsaed long tudak ia we mi bin stap eksperiensem. Mi bin kam blong askem God, “?Huia mi?,” “?Yu yu lavem mi?,” mo “?From wanem mi stap long ples ia?” Fas samting we petriak i talem i bin wan ansa long olgeta kwestin ia. Blesing blong mi i helpem mi blong laenem abaot tru aedentiti blong mi mo wanem nao God i bin gat i stap blong mi. Evri taem mi ridim, mi filim lav blong Sevya blong mi mo tingbaot wanem mi save mekem wetem Hem.
Iven wetem sapot blong petriakel blesing blong mi, famli blong mi, Papa long Heven, mo Sevya blong mi, i bin tekem mi plante taem blong lego ol filing we mi bin gat abaot bodi blong mi. Hem i had yet samtaem blong akseptem miwan abaot huia mo wei we mi luk. Be from ol hadtaem taem blong mi, mi stat blong akseptem mo glad long gro mo laet we i kam taem mi luksave aedentiti blong mi.e Mi mi wan pikinini gel blong Papa long Heven. Mi mi wan disaepol blong Jisas Kraes. Tufala i luk long mi wetem lav mo leftemap tingting blong mi, mo hem i moa impoten bitim tingting blong eni narafala man.
Annalise B., ej 17, Georgia, USA
Hem i laekem tumas blong wok long hospital blong hem olsem wan studen nes mo i stap krietem art mo miusik blong onarem God mo ol kriesen blong Hem.