Kam Folem Mi
?Bae Yu Lisin?
Toktok blong olgeta profet i save givim proteksen, blesem, mo helpem yumi—sapos yumi akseptem olgeta.
Pikja droing i kam long Alyssa Talent
“Fasin blong Prapa Spolem Nogud Samting i stap Kam!”
Hemia i wan mesej blong fraet we oli kasem. Be pikjarem long maen se yu ia nao man we oli jusum yu blong givimaot mesej ia!
Samuel we i Man blong Leman, Lod i bin singaotem hem blong givim woning long Ol Man blong Nifae from fasin nogud blong olgeta. Samuel i stanap long wol blong bigtaon ia mo bin talemaot se wan dei “fasin blong prapa spolem gud yufala … i mas kam blong hapen sapos yufala i no sakem sin” (Hileman 13:10).
Samuel i bin profesae tu i talem se faef yia moa we naet bae i no kam dak mo wan niu sta bae i girap we i wan saen se Sevya Hem i bon (luk long Hileman 14:2–5).
?Olsem wanem nao Ol Man blong Nifae oli ansa bak long mesej blong Samuel?
Olgeta oli no wantem lisin. Olgeta oli “sakem ston long hem [Samuel] … mo … oli sutum ol aro long hem long taem we hem i stap stanap long wol” (Hileman 16:2). Tangkyu, we pipol oli no sakem ston o sutum ol aro long profet blong tedei, be plante oli sakemaot mo jikim ol toktok blong hem taem hem i tijim ol tabu trutok blong gospel blong Sevya.
Taem profet i toktok, ?olsem wanem nao bae yu yu ansa? ?Bae yu lisin?
Hemia tri rimaenda blong ol blesing we oli kam taem yumi gat wan profet long wol mo stap lisin long hem.
Profet i Lavem Yumi mo Prea from Yumi
Long plante jeneral konfrens toktok, Presiden Russell M. Nelson i bin talem long yumi se:
“Mi lavem yufala.” “Yufala i stap oltaem long maen blong mi mo long ol prea blong mi.”
!I wan naesfala blesing blong save se profet i lavem yumi mo prea from yumi!
Kolosap faef yia afta long ol profesi blong Samuel Man blong Leman, sam Man blong Nifae oli talem se taem i bin pas finis mo ol toktok blong hem bae oli no hapen. Olgeta oli jikim olgeta we oli biliv mo iven jusum wan dei blong oli kilim ded olgeta we oli biliv sapos saen blong taem ia we Sevya bae i bon i no kam (luk long 3 Nifae 1:6–9). Long taem blong bigfala fraet ia, profet Nifae i bin prea ful dei long God “from ol pipol blong hem … olgeta we kolosap bae oli ded from fet blong olgeta long kastom blong ol papa blong olgeta” (3 Nifae 1:11).
Tedei, ol prea blong profet oli helpem yumi long plante wei bitim we yumi save luksave. Gaed long saed blong spirit we hem i kasem tru long prea i bin blesem evriwan long wol.
Profet i Lidim Yumi blong Go long Sevya
“Leftemap hed blong yu mo stap glad” Lod i bin talem long Nifae. “Taem i kam kolosap mo naet bae i saen i kamaot, mo long tumoro mi kam long wol” (3 Nifae 1:13).
Long taem we san i go daon i no gat tudak. !Saen blong taem ia i bin kam! (Luk long 3 Nifae 1:15.) Long nekis moning, evriwan oli save se hem i dei we Lod bae i bon i kam long wol, mo wan niu sta i kamaot . (luk long 3 Nifae 1:19, 21). Evri samting we Lod i bin profesae tru long Samuel abaot dei we Lod bae i bon i bin kamtru olsem we Lod i bin talem se bae i olsem.
Stret taem ia we Sevya i kam long wol, Hem i bin sevem olgeta ia we oli biliv long Hem aot long ded. Be i no sevem olgeta ia nomo. Jisas Kraes i bin kam blong sevem yumi evriwan long sin mo ded, Hem i givim yumi paoa long ol taem blong nid, mo i givim hop long yumi mo glad tru long Atonmen blong Hem. Hemia i impoten mesej blong evri profet “we oli [bin] talemaot ol profesi stat long taem we wol i bin stat” (Mosaea 13:33). Ol profet oli lidim yumi i go long Sevya, we hem i “rod ya mo stamba blong trutok, mo stamba blong laef” (Jon 14:6).
Profet i Talemaot Trutok
Fastaem we mi bin ridim Buk blong Momon long sekendri skul, wan tijing blong Samuel Man blong Leman i stap long tingting blong mi. Hem i bin talem long ol Man blong Nifae se sapos oli stap pusumbak dei blong fasin blong sakem sin blong olgeta, taem bae kam we bae i “let tumas we i no gat en.” Hem i se, “Yufala i bin lukaot long evri dei blong laef blong yufala, long samting ia we yu no save kasem; … mo yufala i bin lukaotem blong stap hapi long taem we yufala i mekem ol nogud fasin,” we i agensem fasin blong Papa long Heven (Hileman 13:38).
Semmak long dei blong yumi, Presiden Nelson i tijim:
“Taem wol i fos blong gat paoa, gat ol samting, blong stap popula, mo ol harem gud blong bodi oli givim hapines, !ol samting ia oli no givim hapines! Oli no save givim hapines! …
“Trutok hem i we bae yu kam moa taet blong lukaotem hapines long ples we bae yu neva save faenem long hem! … Jisas Kraes … , mo Hem nomo i, [gat] paoa blong leftemap yu aot long pul blong wol ia.”
Sam Man blong Nifae oli jusum blong lisin mo bilivim ol toktok blong Samuel; be plante narafala oli no lisin (luk long Hileman 16:1–8). Long plante wei, yumi tedei i no defren long olgeta.
?Wanem nao bae yu jusum? ?Bae yu lisin long profet?
Presiden Nelson i bin tijim:
“[Ol profet, sia, mo reveleta] bae i no oltaem talemaot long ol pipol wanem oli wantem harem. Ol profet oli no popula. Be bae yumi oltaem tijim trutok!”
Taem yu lisin long profet mo mekem wanem hem i talem, bae yu faenem se toktok blong hem bae i protektem yu, i blesem yu, mo helpem yu truaot long laef blong yu.