Olsem wanem blong Mekem Konfrens i Gat Moa Mining long Yu
Traem ol trifala tingting ia blong wan moa impoten konfrens eksperiens.
Ol pikja droing oli kam long Jarom Vogel
Jeneral konfrens i stap kam kolosap, mo i kam blong mekem jenis we bae stap oltaem bitim konfrens wiken! Trifala wei ia i save mekem konfrens i gat moa mining long yu.
1. Rere long Yuwan long Saed blong Spirit
Bifo jeneral konfrens, yu save rere long spirit blong yu tru long ol simpol samting olsem skripja stadi mo prea wetem wan tru hat. Yu save mekem tu wan sosol media fast o mekem wan spesel trip i go long tempol. Rere long saed blong spirit bae i helpem yu blong filim gaed ia we i paoa blong Tabu Spirit.
2. Gat wan Kwestin long Tingting
?Wanem nao i bin stap long tingting blong yu long ol taem we i jes pas? Maet yu gat wan impoten desisen blong mekem, wan wari blong famli, o wan kwestin long gospel. Prea long Papa long Heven from hemia, mo lisin long gaed long taem blong jeneral konfrens.
!Jekem eksperiens blong Jemes we hem i bin gat las yia!
Taem konfrens i bin kam, mi wantem blong save olsem wanem mi save mekem gud yus long paoa blong Atonmen blong Kraes long laef blong mi. Mi prea blong askem Papa long Heven blong helpem mi blong lisin long Spirit, blong save olsem wanem blong mekem ol gudfala joes, mo blong Hem i fogivim mi long ol rong joes blong mi.
Taem Elda Dieter F. Uchtdorf i bin toktok, i bin tajem mi:
“Taem we yu jusum blong kambak mo wokbaot long wei blong Sevya mo Ridima blong yumi, paoa blong Hem bae i kam long laef blong yu mo jenisim yu.”
Mi save se hemia hem i wanem we Lod i bin wantem mi blong harem, mo mi save filim Spirit i testifae long mi long hamas trutok ia hem i tru. Taem mi rere wetem wan kwestin long tingting, mi bin save risivim wan ansa blong miwan long ol prea blong mi.
James M., 16, North Dakota, YSA
3. Laef Folem wan Prinsipol o Invitesen
Lisin long wan tijing o prinsipol we i kamaot klia long yu. Afta mekem wan gol blong laef folem long laef blong yu. Yu save lisin gud tu long daerek invitesen we i kam long ol profet mo ol aposol. Raetem daon mo wok long wan nomo long olgeta invitesen ia Blong wok wetem fet bae i helpem yu blong filim trutok mo paoa blong ol tijing blong profet.