Brekem Sekol blong Ponografi
Mi bin filim se mi stap mi wan mo no gat hop. Be bisop blong mi rimaenem mi long sam ki blong faenem hop mo help.
Pikja droing i kam long Sue Teodoro
Mi bin luk ponografi blong fastaem long ej blong 13. Mi bin faenem nomo olsem long sosol media, we mi no save se hem i wanem mo mi no bin andastanem. Mi bin luk fastaem we mi no bin jusum blong luk mo afta long taem ia, mi jusum blong lukaotem.
Long taem ia, mesej blong ol lida blong mi abaot ponografi hem i olsem se oli stap talem se, samting ia ol boe nomo oli stap fesem hadtaem wetem. Hemia i mekem mi filim se mi sem bigwan. Mi bin tingting se bae mi neva save talemaot long wan man abaot hadtaem blong mi. Mi bin save abaot Atonmen blong Jisas Kraes, be from mi bin ting se mi wan gel ia nomo we mi stap go tru long hadtaem ia, mi bin filim se situesen blong mi i longwe long help blong Sevya. Mi filim se mi no pat.
Ofis blong Bisop
Long ol yia ia, long ol ples olsem seminari o ol devosen—eni taem we spirit i stap—mi filim se spirit i talem long mi blong putum wan taem blong mit wetem bisop blong mi. Blong longtaem, samting we i bin kipim mi blong no mekem hemia hem i bin tingting ia se ol pipol oli luk mi olsem wan gudfala pikinini from mi kamaot long wan aktiv famli. Mi bin ting se Hem i luk mi from huia mi—mo mi no bin bilivim se man ia i gat lav. Mi bin ting se bae mi kasem panismen long taem ia.
Long en, taem mi putum taem blong miting ia, i bin go defren long wei we mi bin tingting long hem. Hem i no bin givim panismen, bisop blong mi i bin talem long mi: “Yu yu wan pikinini gel blong God yet. I gat man i lavem yu yet, mo yu yu gat valiu yet.”
Mi tingbaot we mi bin fulap wetem filing blong lav. Hemia i fastaem we mi bin filim paoa blong Atonmen blong Sevya i strong long laef blong mi. Taem mi lukluk i go bak, mi andastanem from wanem ol toktok ia we bisop blong mi i bin talem oli bin impoten tumas.
Gel blong God
Taem yu stap fesem hadtaem wetem ponografi, yu go tru long wan sekol blong sem. Long mi, mi bin filim se aedentiti blong mi i stap longwe long mi, mo afta mi yusum ponografi blong handelem ol nogud filing ia. Afta, bae mi filim sem mo stap longwe long ol narafala man, mo sekol ia i gohed bakegen mo bakegen.
Blong longtaem, mi bin traem blong dipen long paoa blong mi wan “blong stopem.” Be mi no bin save mekem miwan. Bisop blong mi i bin helpem mi blong tingbaot aedentiti blong mi—se mi mi wan pikinini gel blong God we Hem i lavem tumas. Taem mi bin mit wetem hem mo tingbaot trutok ia, mi stat blong mekem wan tru progres.
Madelyn mo famli blong hem oli givim raet long ol pikja ia
Madelyn i save se ponografi i no wan hil ia nomo we hem bae i klaem long hem. Wetem help blong Sevya mo ol raet tul, hem i gohed blong faenem paoa blong winim ol jalenj blong laef. Foto ia oli tekem stret afta we hem i klaem long wan hil blong aes, hemia long Alaska, YSA.
Trutok abaot God mo Sevya.
Fastaem, mi bin fraet tumas blong prea. Mi bin luk Papa long Heven olsem wan God blong jastis mo kros. Be taem mi stap go tru long rod blong gohed blong sakem sin i bin helpem mi blong andastanem tru fasin blong Papa long Heven mo Jisas Kraes. Mi save se blong sakem sin wantaem, hem i no inaf blong mekem mi sef long hadtaem ia, be i mekem se mi gohed blong dipen long tabu help blong Tufala. Papa long Heven i save finis abaot mo andastanem ol hadtaem blong mi; mi nidim nomo blong go long Hem.
Mi lanem se Papa long Heven mo Jisas Kraes Tufala i gat lav mo sore, mo andastaning. Taem yu tanem yu i go long Tufala, bae Tufala i wokbaot long saed blong yu mo holem han blong yu long evri step long rod ia.
Faetem Ol Trik blong Setan
Andastanem fasin blong God i bin helpem mi blong andastanem Setan mo ol tul blong hem, mo olsem wanem olgeta oli wok agensem God. Wan long tul blong Setan we i gat bigfala paoa hem i sem, we hem i defren long rong o “harem nogud be i luk long God” (2 Korin 7:10). Taem yu filim se yu rong, yu luksave se yu bin mekem wan mistek. Be sem i konektem ol filing blong yu we i no stret abaot yuwan taem yu sin wetem aedentiti blong yu, olsem se yu yu ol filing ia.
Setan i bin wantem mi blong bilivim se mi save winim ol jalenj ia miwan nomo. Hemia i giaman samting we i bin kipim mi blong mi no toktok long bisop blong mi abaot hadtaem blong mi wetem ponografi. Mi filim olsem se mi no save mit wetem hem kasem taem we mi save talemaot se mi bin fesem had taem wetem long pas. Setan i yusum ol wiknes blong yuwan blong mekem yu filim se yu no klin inaf blong lukaotem hiling paoa blong Sevya.
Mi bin lanem se Setan i wok long yumi taem yumi stap yumiwan, mekem se bes proteksen blong yumi hem i blong konek. Samtaem i simpol nomo, olsem yu go luk wan narafala man mo spendem gud taem wetem ol gudfala fren. Blong konek wetem Papa long Heven, wetem yuwan, mo wetem ol narafala man (speseli wetem olgeta we oli luk yu olsem we Papa long Heven i luk yu) hem i bes wei blong tingbaot tru aedentiti blong yu: wan pikinini blong God wetem wan valiu.
Wan Stamba Tingting we i Hae Moa
Long en mi stat blong kasem ol toktok blong leftemap tingting blong helpem ol narafala yang woman we oli stap fesem hadtaem wetem ponografi. Mi filim wan stamba tingting we i hae moa. Mi disaed blong kea moa abaot wanem Papa long Heven i tingting long mi bitim wanem ol narawan raon long mi oli tingting long mi, mekem se mi stat blong serem ol eksperiens blong mi wetem ol man.
!Taem yu filim glad we yu no save stopem blong gohed blong sakem sin, yu wantem serem wetem ol narafala man! Naoia mi gohed blong serem glad ia taem mi stap givim seves olsem wan ful taem misinari.
Madi oli bin asaenem hem blong wok olsem wan ful taem misinari long Singapore Misin mo bae i toktok Malay lanwis.
Mesej blong Mi
Yu neva stap yu wan, mo i gat hop.
Had taem ia i samting we yu save winim wetem help blong Sevya, trastem olgeta we yu lavem mo trastem ol lida, mo ol raet tul. Yu kamaot long situesen ia blong stap yuwan mo go long wan man we i luk yu tru long ae blong God. !Askem olgeta wanem nao oli luk long yu!
Nomata wanem kaen faet yu gat, yu neva go ova long han blong Sevya mo Atonmen blong Hem. Papa long Heven i lavem yu fulwan, mo i impoten blong yu gohed blong stap sakem sin.