5 Wei blong Gat Gudfala Helt long saed blong Filing
Yumi stanap strong tugeta.
Hasban blong mi Scott, mo mi i bin givim seves olsem ol misin lida long Ostrelia Sidni Misin long 2018 kasem 2021. Taem wan niu misinari rekod i soem se oli stap fesem hadtaem wetem helt long saed blong filing, mi letem olgeta oli save stret long taem ia se mi bin go tru long taem blong bigfala wari truaot long laef blong mi olsem wan bigman. Mi bin wantem olgeta blong andastanem se mifala i stap long semmak tim blong mekem se oli no fesem hemia olgetawan.
!Mi laekem blong serem semmak mesej wetem yu! Plante pipol oli go tru long jalenj blong helt long saed blong filing be yumi save helpem wanwan long yumi. Blong mekem i klia: Mi mi no wan profesonol blong helt long saed blong filing. Be mi laekem blong serem sam wei long saed blong bodi mo long saed blong spirit blong gat wan gudfala helt long saed blong filing, we i bin helpem mi mo olgeta we mi save mo lavem.
Kraes i mekem gel blong Jaeras i girap bakegen long ded, i kam long Greg K. Olsen
Wei Namba Wan Letem Yumi Kipim Kraes i Stap long Medel
Mi bin bigwan kolosap long San Francisco, California, USA, mo mi tingbaot wan naes pak kolosap long solwota we i gat plante defren kaen pleplei! Hem i gat wan bigfala raon wud we i flat, we yu save sidaon long hem mo traem blong hang strong taem bigfala raon wud ia i spin i go raon hariap. Olgeta we oli sidaon long en, oli stap foldaon i go aot faswan. Olgeta we oli save gud paoa we i stap long medel blong wud ia, oli sidaon kolosap long medel.
Mi ting se hemia i wan gudfala samting blong yusum blong tij blong kipim Kraes long medel taem yumi stap go tru long sam long ol had taem—nomata hem i fasin blong wari, OCD, o wan samting we i semmak. Yumi nidim Kraes long medel blong laef blong yumi.
Long taem we yumi fesem hadtaem long helt long saed blong tingting, yumi maet stop blong toktok i go long heven, o yumi gat hadtaem blong gat filing we i kolosap long Sevya. Hemia i no minim se oli panisim yumi o se yumi no klin inaf from lav blong God. Long mi, blong trastem se Hem i stap taem yumi stap wet blong koneksen ia i kambak bakegen hem i gat praes. Gohed blong prea, kipim ol toktok blong Sevya, trastem ol promesem blong Hem, tekpat long sakramen, mo mekem evri samting blong kipim yu long medel wetem Hem.
Nambatu Wei: Letem Yumi Dipen long Lod Evri dei
Ol pikinini blong Isrel long waelples oli mas dipen long Lod from Mana evri dei. Samtaem taem yumi stap wok wetem ol situesen we oli bigwan blong wok wetem olsem wan bigfala atak blong fraet o soa long saed blong filing, yumi wantem blong oli gowe mo nomo kambak bakegen. Mo ating bae oli hapen—be bae i no long wei o taem we yumi wantem. Hemia i no minim se hop i lus. Yumi nidim blong dipen long God evri dei taem yumi wok mo lukluk fored from ol gud taem we oli stap kam.
Wan wei i blong lukaotem help blong Papa long Heven mo traem ol defren wei blong faenemaot wanem nao i wok blong yu. Afta Hem i save helpem yu tingbaot, long ol taem we yu no filim gud o wan bigfala fraet, olsem wanem miusik i save help long semmak situesen olsem o olsem wanem blong stap konek wetem wan we yu trastem i mekem se yu filim sef. Hemia i mekem yu save kolektem wan grup blong ol tul blong oli pruvum se i wok mo blong traem nekis taem, taem yu fesem hadtaem. Ol wanem yu mekem, lukaotem help blong Lod evri dei.
Yumi save talemaot bigwan: “Taem mi dipen long Lod evri dei, bae mi girap mo faenem paoa we mi no bin save se mi gat!”
Nambatri Wei: Yu Save Lukaotem Gud Bodi blong Yu
Bren hem i pat blong bodi blong mit mo bun mo from hemia i mekem se hem i isi blong foldaon long plante defren samting mo ol fasin nogud blong laef long wol ia. Be gud nius hem i: i gat ol step we oli pruvum, we yumi save tekem blong mekem bren blong yumi i kam moa strong mo we i save mekem helt long saed blong filing blong yumi i kam moa gud. Hemia hem i sam long olgeta step ia:
-
Eksperiensem laet blong san o bigfala laet long moning.
-
Go aot long bus, stap konek wetem laef blong bus.
-
Eksasaes evri dei
-
Kakae ol helti kakae
-
Drink plante wota
-
Gat inaf taem blong slip evri naet
Ol teknik blong pulum win oli gat strong paoa tu. Traem blong pulum gud bigfala win tru long nus blong yu i go insaed, mo afta narawan. Holem taet win blong wan seken, mo, afta fosem aot evri win blong yu i kamaot tru long maot blong yu.
Mi mekem hemia blong samtaem, taem mi wekap, long ol taem we mi gat ol strong filing (olsem bifo taem blong givim wan toktok long jeneral konfrens!), mo bifo taem blong go long bed.
Nambafo Wei: Yumi Save Askem Help
Sapos yu lus taem yu stap go wokbaot long bus mo kam fas long wan gaed, ?bae yu yu sem blong askem daereksen blong sefti? Mi no ting. Askem help i no wan saen blong wiknes. Plante taem yumi mekem hemia long ol narafala eria long laef blong yumi.
Help blong brekem nogud kastom blong man we oli no stap askem help long saed blong ol jalenj blong filing.
Weta yu nidim help blong God, ol fren, famli, o ol medikol profesonol, yu yu no wan man we i wik blong lukaotem moa help we yu nidim. !Trutok i we, yu stap soem strong tingting blong yu!
Nambafaef Wei: Letem Yumi Stap Konek
Konek wetem Papa blong yu long Heven evri tru long prea hem i impoten.
Mi filim tu se hem i impoten tumas blong stap konek wetem ol pipol we yumi filim se i sef mo yumi trastem olgeta. !Ringim mama blong yu! Toktok wetem wan fren fes tu fes. Toktok wetem wan brata o sista. Yumi strong taem yumi helpem wanwan long yumi. Paoa ia i wok long tugeta wei. Evriwan i nidim wan man. Fasin blong stap yuwan mo fasin blong wari bigwan plante taem tufala i folfolem tufala nomo. Konektem yu wetem olgeta we yumi lavem, mo laef wetem, mo save luk, mo givim wan hag, hem i wan bigfala ansa blong plante harem nogud we yumi stap eksperiensem.
!Yumi Save Winim Faea wetem Hem!
Samtaem yumi nidim blong rimaenem yumi bakegen se God i stap wetem yumi.
Long OlTesteman, King Nebukanesa i sakem Sedrak, Mesak mo Abednego i go long wan faea we i hot tumas we ol gad oli no save go kolosap from hot blong hem.
?Be, olsem wanem nao olgeta tri ia oli laef?
Ol skripja oli tijim se nambafo man oli save luk hem long faea wetem olgeta we hem i “olsem wan God nomo” (Daniel 3:25).
Mi biliv se hemia i minim se Kraes i stap wetem yumi tru long ol hot blong ol hadtaem blong yumi, speseli taem yumi stap stap strong long olgeta. Hadtaem blong helt long saed blong tingting i save olsem wan hot faea. Kraes Hem i Emanuel we i minim se “God i stap wetem yumi.”
No fogetem, Jisas Kraes hem i paoa blong yumi, i no long en blong rod nomo, taem yumi fri blong eksperiensem ol filing we yumi no askem. Hem i stap wetem yumi long ol wokabaot blong yumi. Hem i paoa mo help blong yumi naoia.
!Letem yumi stanap strong tugeta!