Kasem—mo Givim—Help wetem Sik long Saed blong Tingting
Taem i kam long saed blong sik long saed blong tingting, yu save askem help mo mo givim help tu long ol narafala man.
Pikja i kam long Simona Love
?Wanem nao yu sapos blong mekem taem yu no glad, tingting blong yu i foldaon, filing blong fraet, wari, o filing blong no harem gud i kam?
Maet yu wantem wan ansa blong i olsem hem ia : Laef folem gospel. Prea. Ridim ol skripja. Tekem sakramen. Mo gohed blong mekem olgeta samting ia we i gud mo i impoten mo mekem ol bigfala problem oli kam stret(mo stopem). Be sam problem oli nidim sam moa efot.
Evriwan oli filim wari o no glad samtaem, yes hemia i tru. Hem i pat blong laef. I gat plante helti wei we yu save mekem semmak wetem ol samting ia. Be sapos filing ia blong fraet o no harem gud tumas i stap longtaem tumas we i mekem se i stap afektem laef blong yu mo blokem yu blong no filim Spirit, yu maet stap long wan stej we i nomo ril blong akseptem se bae yu winim nomo olsem we i no gat moa help.
Helt long saed blong tingting hem i helt long saed blong bodi (luk long Blong Ol Yut Oli Kam Strong: Wan Gaed Buk blong Stap Mekem Ol Joes [2022], 29). Ol kemikol long bren blong yumi oli help blong kontrolem ol filing blong yumi, mo bren i pat blong bodi. Eniwan we i talem se filing blong harem nogud o filing blong fraet “ i stap evriwan long hed blong yu” hem i stret nomo blong talem olsem: be long hed blong yu, i tri se i ples we bren blong yu i stap. Be ol problem oli no stap long bren nomo be oli ril olsem we yu brekem wan lek o wan soa apendiks.
Kasem Help
Buk blong Momon i talem se Ol Man blong Nifae oli gat blesing “from we oli gat plante lif mo rus we God i bin mekem rere blong tekemaot ol sik” (Alma 46:40). Tedei, yumi save singaotem ol samting ia meresin.
Tedei, God i bin rere long plante moa wei blong faetem ol sik mo soa, we i tekem tu sik long saed blong tingting mo harem nogud long saed blong filing. Yumi gat ol tritmen naoia we Ol Man blong Nifae—mo ol bubu long yumi, wetem hemia—oli bin drim long hem. !Yumi laef long wan taem blong ol merikel! Mo Papa long Heven i wantem yumi blong yusum olgeta.
Hemia i no minim se evriwan we i fesem hadtaem wetem filing blong harem nogud o filing blong fraet oli nidim meresin o tritmen long saed blong tingting. Evriwan i defren. Be nomata wanem situesen blong yu, wan samting we hem i tru:I no gat risen blong safa yuwan. Papa long Heven i wantem tumas blong help.
Papa long Heven i save wanem bae i helpem yu. Sapos hadtaem blong yu i save kam gud tru long prea mo fet, o weta yu tu yu nidim blong lukaotem ol blesing blong Hem tru long sam meresin, man blong givim spesel tritmen blong problem blong hat, ol papa mo mama, ol fren, ol bisop, ol yut lida, ol tija, fres win, mo eksasaes blong tekem yu tru long ol had taem, askem help blong Hem. No wari tumas abaot olsem wanem ol narafala man wetem ol semmak problem oli stretem olgeta. Papa long heven bae i helpem yu blong faenem ol ansa we bae i stret long situesen blong yu.
Givim Help
Gospel ia i abaot fasin blong helpem ol narafala man, we i soem wei we Sevya i bin helpem yumi tru long Atonmen blong Hem. Yu sud oltaem traem blong “go aot mo go lukluk olgeta we oli filim se oli stap olgetawan, oli sore, o oli no gat help. Helpem olgeta oli filim lav blong Papa long Heven tru long yu” (Blong Ol Yut Oli Kam Strong: Wan Gaed Buk blong Stap Mekem Ol Joes, 12). Maet yu no wan dokta o wan man blong givim spesel tritmen blong hat problem, be yu yu wan disaepol blong Kraes, mo ol disaepol blong Kraes oli “krae sore wetem olgeta we oli krae sore, yes, mo leftemap tingting blong olgeta we oli nidim fasin blong leftemap tingting” (Mosaea18:9).
Wan long ol impoten samting we yu save mekem taem wan man we yu lavem i stap traehad wetem filing blong no harem gud, filing blong fraet, o ol narafala helt problem long saed blong tingting oli nidim blong man i lisin.
Plante taem man we i stap fesem hadtaem wetem helt blong hem long saed blong filing i wantem blong yu yu sore mo serem lav blong yu long hem. Oli no nidim yu blong gat wan majik ansa we bae i stretem evri samting. Oli nidim nomo blong talemaot hat blong olgeta. Oli nidim wan man we bae i stap wetem olgeta, lisin long olgeta, mo soem sore long olgeta—blong talem se, “Mi agri, wanem we yu stap go tru long hem mi harem se i no gud tumas. Mi sore. Mi wantem tumas se mi save fiksim. Plis letem mi save olsem wanem mi save help.”
Mo Tingbaot …
Taem yu stap givim help o yu nao yu stap kasem help, tingbaot se i gat samsamting we God nomo i save mekem. Letem Hem i mekem olgeta. Long taem ia, mekem wanem we yu save mekem blong kea long yuwan mo pipol raon long yu.