Kam Folem Mi
Holemtaet Ol Dei blong Yu
?Yu yu gat filing ia blong wantem laef long taem bifo? I gud, yu no filim olsem.
Pikja droing i kam long Alyssa Petersen
?I gat wan taem long laef blong yu we yu bin gat tingting ia se laef blong yu bae i isi moa o gud moa sapos yu bin bon long taem bifo? Ol narafala man oli bin filim semmak olsem long taem bifo—iven wan profet, long wan taem.
Profet Nifae (long buk blong Hileman) i bin luk ol pipol blong hem we oli no wantem sakem ol fasin nogud blong olgeta mo hem i singaot: “O, mi wantem we sapos mi save gat ol dei blong mi long ol dei we papa blong mi Nifae i aot long graon blong Jerusalem, … — … ale bae sol blong mi bae i gat glad” (Hileman 7:7–8).
Hem i bin gat wan had taem blong stap laef long taem blong hem. Long en, yes, hem mas fesem ril samting we i stap: “Be … hemia taem blong mi” (Hileman 7:9).
Ol Dei blong Yu
Hemia i ol dei blong yu. Maet bae oli givim yu ol jalenj, be olgeta oli givim tu ol janis. Eksampol, long ol dei blong yu , yu save:
-
Karem i kam tugeta Isrel long tugeta saed blong vel. Hemia “hem i moa impoten samting ia nao we i stap tekem ples long wol tedei.” Yu gat plante wei we yu save serem gospel mo invaetem ol narafala man blong kam kolosap moa long Jisas Kraes mo Jos blong Hem. Yu save help blong faenem ol apu long ol gudgudfala wei, mo helpem olgeta we oli bin ded blong kasem ol odinens long tempol.
-
Yusum teknoloji long ol gudfala wei. Yu yu fulap wetem ol tul we yu save soem long wol olsem wanem teknoloji blong tedei i save yus long gudfala wei.
-
Stap longwe long fasin blong no laekem narafala man, raorao, mo fasin blong sepseperet. Taem ol bigbigfala trabol ia blong devel i fulumap wol, yu save soem wan moa gud wei—wei blong Sevya blong gat fasin blong stap kaen, fasin blong gat sore, stap mekem pis, mo lav.
-
Stanap Strong long wan wol we i stap muvmuv Taem yu yu fetful long Jisas Kraes, gospel blong Hem, mo Jos blong Hem, Lod bae i blesem yu, mo ol narafala man bae oli luk long eksampol blong yu long ol strong win blong laef.
Ol Merikel blong Yu
I no bin isi oltaem long Nifae, be hem i bin stap long wea ples (mo wetaem) Lod i nidim hem long long hem. Hem i bin fetful. From samting ia, hem i bin luk ol merikel mo ol sapraes samting long ol dei blong hem, mo Lod i bin protektem hem. (Luk long Hileman 7–16.)
Yu save luk ol merikel mo ol sapraes blong yuwan taem yu fetful long olgeta dei blong yu .