Rianna n Otan te Tia Kamaiu
Ngkana ko kaniiko nakon Iesu Kristo ao n raira nanom, Mwaakana ni kamaiu ma n kakorakora e na kairiko n kaotinakoko man te rotongitong.
N teuana kibau ae anaanau ngke I kaaben n te wanikiba, I kikiba nako Tiaman n te aoa 11 n te ingabong ao n roko i California n te aoa 1 n te bwakantaai n te bong naba anne. Kabootauan te tai n mwananga ao n roko, e kona n taraaki bwa te kiba riaon te Atlantic Ocean ao aban North America e ti anaa uoua te aoa.
E butimwaaka te Boeing 747, ma e aki roko raoi ni birina are taneiai ia! Ni koauana, e nakon 11 te aoa tain te kiba, ngkana e raoi te ang, ni mwananga 5,600 te maire (9,000 km).
Bukina bwa ti buti n rimaeao, e aki bubung taai inanon kibara. Ti buti rinanon te oota man Tiaman nako California. Te oki nako Tiaman, ngkane, bon te karaki ae manga kaokoro. Ngke tia manga buti rimainuku, e waekoa n bung taai nakon are bon tataneiai iai, ao n tai ae tiaki kaantaningaia, e a taoniira naba te bong.
E ngae ngke ti kiba n te bong, ribuakon te rootongitong, I ataia ma te koaua bwa taai e teimatoa, matoa, ao n tuai n toki korakorana. I ataia bwa inanon taina ao ena manga waerake taai, ao te oota ae takiakia ena uota te abuee ma te maiu nakon te bong ae boou imwain tokin kawaira.
Tabetai bwaai ake irarikira a kona n taraa n bibitaki, aki kantaningaaki, ao n rotongitong. I kakaitau ibukin Iesu Kristo. Bon Ngaia ootan ao maiun te aonaaba. Mairouna, ti karekea te kaantaninga ni boong aika imwaira, karekean Otana ae mai ieta, ao te berita ni karekean te tokanikai iaon te bure ao te mate.
Ana Tangira ao Mwaakan Te Tia Kamaiu
Man ana tangira ibukira, Iesu Kristo e anga Maiuna ibukiia natin te Atua ni kabane ao ni kauka mataroan te maiu ae aki mamate ao te maiu ae akea tokina.
N aki tabe ma bwaai ake e tangiria Tatan bwa kona kakoauai, ko aki kona n raroanako ma konabwain te Tia Kamaiu ni kamaiuko. Ko aki kona n raroanako bwa ko “katobibiaki n bain ana tangira n aki toki” (2 Nibwaai 1:15).
Aio bon te kabanea n korakora ibuakon bwaintangira ake a roko man kakamwakurin ao mwaakan ana kamaiu ao ana Mwakuri ni Kamaiu Iesu Kristo. Bukina bwa te Tia Kamaiu e korakai i Keketemwane ao Korokota, E ataia bwa e na kanga ni buokiko inanon am tai n aitara ma kaangaanga (taraa Aramwa 7:11-12).
E taku Beretitenti Russell M. Nelson: “Ngke e [mate te Tia Kamaiu] ibukin buren te aonaaba, E kauka te kawai nakoia taan Iriiria bwa a na karekea Ana kamaiu, korakorana, ao mwaakana ni kabooira.”
Te mwaaka anne, kanga ai aron taai, n tauraoi n taainako ikekei. E aki kona ni bibitaki. Touan mwanekan te Tia Kamaiu kanga ai aron kitanan te rotongitong ao n roko iaan ootan taai, ike koa kona iai n karekea ana kakabwaia te Atua aika te oota, te aabue, ao te tangira.
Te Moan Waaki ae Otanako
Ana Boki Moomon e karakina aroia Nibwaite ngke a kabanea teniua te bong ribuakon te rotongitong ae korakora imwiin taurakin te Tia Kamaiu n te Kaibangaki. Te rotongitong are e katobibiia e katea bannan te rotongitong n tamnei are ti rinanona ngkana ti karaoa te bure. Ngkane a ongo bwanaan Kristo are e kaoia bwa ana otinako man te roo nakon te Otana:
“Kam aki okirai ngkai, ma n rairinanomi man ami bure, ma n rairaki, bwa I aonga ni kamarurung ngkami?” (3 Nibwaai 9:13).
“Ao kam na anganai bwa ami karea te nano ae uruaki ao te tamnei ae raraoma” (3 Nibwaai 9:20).
“Rairinanomi man okirai ma nanomi ni koaua” (3 Nibwaai 10:6).
Te Tia Kamaiu e anga naba te kakao aio nakoim ngkoe are ko a bua ribuakon te rotongitong. N ai aron nako waeraken taai are e mwakena moan waakin te bong ae boou, ni katoa tai are ko raira nanom iai, ko karekea te nano ae boou ngkana ko waakina aei, bon te bong ae raka ao man raneanea otana iroum.
Man am rairannano ni koaua, Iesu Kristo “e na onea mwiin nanobuakam ma te rau ao te kimwareirei. E na aki manga uring am bure. Inanon Korakorana, nanom ni kukurei ni kawakin Ana tua e na karakaaki.”
Ao n te tai are ko toua te moan mwaneka n te rairannano, te Tia Kamaiu e na moana “bitakin nanom ao maium. Teutana imwin teutana, ko na rikirake ao n riki n ai Arona” ao E na “uota nakoim te konabwai ae korakora ni karekea Mwaakana.”
Ukora te Kamaiuaki ae Aki Totoki
Te Tia Kamaiu bon te Mwatita n te Kamarurung. Teuana mai ibuakon rongorongon Mwakana ni kamaiu ae rangi n tamaroa e kuneaki n Ana mwakuri i aon te aba n Ana Boki Moomon:
“Iai i buakomi ae aoraki?” E titiraki. “Iai ibuakomi aika … rotaki n anga nako? Kairiaa mai ao N na katoka aorakiia, bwa iai au nanoanga nakoimi. …
“Ao e korobukina bwa ngke e a tia n taetae, a bane aomata ake a uanao n teuana te tai, ni mwananga …; ao e boni katoka aorakiia ni kabane ngke a uotaki nakoina” (3 Nibwaai 17:7, 9).
Ni katoa tai are e kamarurung temanna te Tia Kamaiu, imwain ao imwiin Mangautina, E kakoauaa Mwaakana ni kona ni kamaiuii tamneira. Ni kabane kakai n kamaiu a kotea Ana berita are te kamaiuaki ae e aki totoki ibukin te maiu n rabwata ao ara namakin are ena reke iroura man te Mangauti.
N taai tabetai, am tataro ibukin te kamaiuaki aki kaekaaki n te anga are ko kantaningaia, ma a bon aki kakatinanikuaki. Te tai ni kamarurungaki e na bon roko ni kaineti ma oin ana kawai ao ana tai Tamara are i Karawa, kanga n ai aron roon te tairiki are e angaanga te kawai nakon otan taai ae mimitong.
Raou aika kam tangiraki, I kakoaua bwa Iesu Kristo bon te Tia Kamarurung n te maiu aio ao te maiu are akea tokina. Ana nanoanga e tau ibukin kamarurungara ma ikoakira, katiakara man ara bure, kakorakoraakira n kataakira, ao kakabwaiakira ma te kaantaninga, te wanawana, ao te rau. E tauraoi n taainako mwaakana—teimatoa man kakaonimaki—engae ngkana ko, n taai tabetai, namakinna bwa koa raroa man Ana tangira, ootana, ao abueena.
E bia aki bubua namakinan te miimi ma te karabwarabwa ae bwanin ibukin bwaai ni kabane are e a tia ni karaoia te Tia Kamaiu ibukim. Taiaoka n ururinga ae ko tangiraki ni koaua. Ururinga am Berita ake a akea tokiia. Ao ngkanne “ke e anganingkami te Atua kabebetean uotami, rinanon ana kimwareirei Natina” Iesu Kristo (Aramwa 33:23).