Karekean—ao te Anga—Ibuobuoki iaon Marurungin te Iango
Ngkana ti iangoa marurungin te iango, e mwaiti aanga aika ti kona n bubuti buokara iai ao n anga te ibuobuoki nakoia tabeman.
Kamataata n te tamnei iroun Simona Love
Tera ae kona karaoia ngkana ko namakina te nanokaawaki, bwarannano, te maaku, te raraoma, ke te rawawata n am iango?
Ko kona ni kaantaningai kaeka n ai aron aio: Maiuakina te euangkerio. Tataro. Wareki booki aika tabu. Anaa te toa. Ao reitinako karaoi bwaai aikai a raraoi ao n riai ao a bon katokii (totokoi) kangaanga aika bati. Ma tabeua kangaanga a kainnanoa te mwakuri ae raka.
Aomata ni kabane a namakina te maaku ma te nanokaawaki n tabetai, ao e bon koaua anne. Anne bon mwakoron te maiu aio. A mwaiti kawai aika raraoi aika kona n buokiko ma bwaai aikanne. Ma ngkanne te maaku ao te rawawata n te iango ea nang korakora ke n maan ao e a rootaki maium ao n tuukiko man namakinan te Tamnei, ngkana koa roko n te mwaneka are e aki kona n reke te marurung n akean riki te ibuobuoki.
Marurungin te iango bon marurungin te rabwata (taraa Ibukin Kakorakoraia Kairake: Te Kairi ibukin Karaoan Rinerine. [2022], 29). Kemikoro ake ni kaburorora a ibuobuoki n kabaerantii ara namakin, ao te kaburoro bon mwakoron te rabwata. Aomata ake a taku bwa namakinan te rawawata n te iango ma te maaku bon ti “kanoan am iango” a bon ti eti ni kaineti ma te kantaninga anne: atuum bon, ni koauana, nnen kaburorom. Ma kangaanga bon tiaki ti bwaai aika kakatamneiaki ma ai aron te ranga ae mwaoto ke ana kangaanga te abentekiti .
Karekea te Ibuobuoki
Ana Boki Moomon e taekinna bwa Nibwaite a kakabwaiaaki ma “rokoraoin aroka ma wakaa ake e a tia te Atua ni katauraoi ibukin katokan te aoraki” (Aramwa 46:40). Ni boong aikai, ti aranii bwa bwainaoraki.
Ni boong aikai, te Atua e a tia ni katauraoi kawai ni kaitarai aoraki ao ikoaki, n ikotaki ma te maraki n te iango ao te namakin. Iai iroura ngkai bwainaoraki ake Nibwaite—ao tibura, n te itera aei—a ti kona n mwiiakini. Ti maeka n te tai ae mwaiti kakai iai! Ao Tamara are i Karawa e tangiriira bwa tina kabonganai.
Ma tiaki nanona bwa ni kabane ake a rootaki n te rawawata n te iango ke te maaku a kainanoa te bwainaoraki ke te kamarurung ae kairaki iroun te tia rabakau. A kakaokoro aomata ni kabane. Ma engae ngkana tera nako ae ko mena inanona, teuana te bwai ae koaua: Akea riaina bwa kona rawawata n ti ngkoe. Tamam are i Karawa e ingainga ni kan buokiko.
Tamam are i Karawa e ataia bwa tera kona n buokiko. Tao ngkana e kona n katokaki rawawatam rinanon te tataro ma te onimaki, ke tao kona kainanoia n ukorii Ana kakabwaia rinanon te bwainaoraki, taan rabakau, am karo, raoraom, bitiobi, taan kairiiri irouia kairake, taan reirei, te ang ae boou, ao te kamarurung are ena buokiko inanon am tai n rawawata, bubutia Ana ibuobuoki. Tai raraomaakinii aroia tabeman n kaitarai aia kangaanga aika titeboo ma ngkoe. Tamam are i Karawa e na buokiko n karekei katokan am kangaanga ae kaineti raoi ma are ko rinanona.
Tauraoi n Ibuobuoki
Te euangkerio e boboto iaon buokaia aomata, ae katamneia raoi te anga are e buokiira iai te Tia Kamaiu rinanon Ana Mwakuri ni Kamaiu. Ko riai n kataia n taainako n “anga baim nakoia ake a maroaa, n tionako, ke n bwarannano. Buokiia n namakina ana tangira Tamaia are i Karawa rinanom” (Ibukin Kakorakoraia Kairake: Te Kairi ibukin Karaoan Rinerine, 12). Tao tiaki ngkoe te taokita ke te tia rabakau, ma ngkoe ana reirei Kristo ao ana reirei Kristo a “tang ma ake a tang; eng, ao ni karau nanoia ake a kainnanoa karauan nanoia” (Motiaea 18:9).
Teuana mai ibuakon bwaai aika kakaawaki ae ti kona ni karaoia ngkana iai temanna ae ti tangiria ae e taonaki n te rarawata n te iango, te maaku, ke aorakin nako te iango bon te kakauongo.
N angiin te tai, n bwai ae kainanoia are e rootaki marurungin ana namakin bon te aomata ae ena kaota te nanoanga ao te tangira. Aki tangira te reke ae kamiimi are ena kanakoraoi bwaai ni kabane. A tangira n ti katiinakoi bwaai ake irouia. A tangira temanna ae e na raoniia, ni kakauongo nakoia, ni kaota te nanoanga—ni kangai, “I kakoauaa bwa, te bwai ae ko rinanona e rangi n rawawata. Kabwara au bure. I tangiria n kan kanakoraoia. Taiaoka tuangai bwa tera te anga ae nna kona ni buokiko iai.”
Ao Uringnga …
Ngkana tao ngkoe ae ko anga te ibuobuoki ke ngkoe ae ko kainnanoa te ibuobuoki, uringnga bwa iai bwaai ae bon ti te Atua ae kona ni karaoi. Kariaia bwa E na karaoi. Ma inanon te tai aei, karaoa are ko ko kona ni karaoia n tararua maurim raoi ao aomata ake irarikim.