Ko na Kanga ni Karika te Maungatabu bwa e na Manena Nakoim
Katai iango aika teniua aikai ibukin karekean te taneiai ae raka kakannatona.
Kamataata n te tamnei iroun Jarom Vogel
E kan manga roko naba te Maungatabu ni Kabuta, ao e riai n iai ana mwiina ae ena tiku nako imwiin te maungatabu! Reirei aika teniua aikai a kona n kananoa riki nanon te maungatabu ibukim.
1. Katauraoa Nanom n te Maiu n Tamnei
Imwain te maungatabu ni kabuta, ko kona n katauraoa tamneim rinanon bwaai aika bebete n aron te kamatebwai ni koroboki aika tabu ao te tataro ae mai nanom. Ko kona naba n karaoa te taubaang man bwaai n reitaki n te aonrain ke ni kawara te tembora. Te katauraoi n te maiu n tamnei e na buokiko n namakina ana kairiiri te Tamnei ae Raoiroi.
2. Roko ma te Titiraki n Am Iango
Tera ae Mena ngkai n Am Iango? E kona n ae ena iai te babaire ae kona karaoia ae kakawaki, tabeaiangaia am utu, ke am titiraki ibukin te euangkerio. Tataro nakon Tamam are i Karawa ibukina, ao kakauongo nakon te kairiiri n tain te maungatabu ni kabuta.
Noora ana taneiai James n te ririki ae nako!
Ngke e roko te maungatabu, I tangiria n kan ataia bwa nna kanga n kabonganaa raoi mwaakan ana Mwakuri ni Kamaiu Kristo inanon maiu. I tataromwaaka n bubutia Tamau are i Karawa bwa e na buokai n kakauongo nakon te Tamnei, n ataia bwa nna kanga n karaoi babaire aika tamaroa riki, ao ni kabwaraaki au bure n au rinerine ake a kairua.
Ngke e taetae Unimwaane Dieter F. Uchtdorf, e reke nanou n aio:
“Man te tai are ko kataua iai bwa kona karairaki n okira kawain ara Tia Kamaiu ao te Tia Kabooi Maiura, e na rin Mwaakana ni maeum ao ni bitia.”
I ataia bwa aio ae tangiria te Uea bwa N na ongo, ao I kona n namakinna bwa te Tamnei e kakoauaa koauana nakoiu. Man katauraoau ma te titiraki n au iango, I karekea te kaeka ae onoti nakon au tataro.
James M., 16, North Dakota, USA
3. Maiuakinan te Tua ke te Kakao
Kakauongo nakon te reirei ke te tua ae teke iai nanom. Ao ngkanne katea am kouru bwa kona maiuakinna inanon maium. Ko kona naba n kakauongo raoi nakon kakao aika roko mairouia burabeti ma abotoro. Korei ao mwakuri iaon tao teuana naba mai ibuakon kakao aikane. Te mwakuri inanon te onimaki e na kona n buokiko n namakina te koaua ao mwaakan taian taetae n burabeti.