Katokan te Waaki n Tamnei n tamnein te tangako
I namakina te maroa ao te bwarannano. Ma e kauringai au bitiobi tabeua aanga ni karekean te kaantaninga ao te ibuobuoki.
Kamataata n te tamnei iroun Sue Teodoro
I moan norii tamnei aika tangako ngke 13 au ririki. I norii n au tai ni mamataku n te aonrain, n aki ataia bwa tera raoi ao n aki oota raoi iai. E bitaki aron noorakina are e bure au tai iai nakon kan ataakina raoi ao n ukoukoria.
N te tai anne, aia marooro au taan kairiiri iaon taekan tamnei aika tangako e taekinna bwa te bwai ae ti rootaki iai ataeinimwane. Aio are e a kaonai ma namakinan te maama. N au iango ao I bon aki kona n tuanga temanna taekan te bwai ae I rinanona. I ataa taekan ana Mwakuri ni Kamaiu Iesu Kristo, ma bukina bwa n au iango ao ti ngai te aine ae rootaki iai, I namakinna bwa au kangaanga ea riaon ana konabwai te Tia Kamaiu. I namakinna ae I okoro.
Ana Aobiti te Bitiobi
Inanon ririki aikane, taabo n ai aron te tieminari ke bootaki n taromauri—taabo are e mena iai te Tamnei—I aki toki n namakina kairakiu bwa nna kawara au bitiobi. Inanon te tai ae rangi n maan, te bwai ae tuukai man karaoan aei bon te iango are iai kinaakiu ae nna kateimartoa bwa te ataei ngai ae tamaroa man te utu ae kakaonimaki. Ngai irou e na noorai bwa antai raoi ngai—ao I aki kakoauaa bwa ngai te aomata ae kona n tangiraki. N au iango ao Nna aitara ma te katuuaeaki n te tai ae waekoa.
N tokina ngke ti nang kaitiboo, e a bon kaokoro ma are I kaantaningaia. N akean te tuaa ae I anganaki, e tuangai au bitiobi: “Bon ngkoe naba natin te Atua te aine. Ko bon tangiraki naba, ao ko bon manena naba irouna.”
I uringa namakinan te tangira ae takaburinako. Bon te moan tai are I a namakina iai mwaakan ana Mwakuri ni Kamaiu te Tia Kamaiu ae korakora inanon maiu. Ngkana I tanrikaaki, I oota bwa eaera kai a rangi ni kakawaki ana taeka au bitiobi akekei.
Natin te Atua Aine
Ngkana ko korakai ma te tatamnei n tamnein te tangako, ko rinanon namakinan te maama. Ngai irou, I aki booraoi ma kinaakiu i bon irou ao ngaia are I manga tamnei riki n te tangako bwa kaitaraan namakin aika aki raraoi aikai. Ngkanne I a manga namakina te maama ao I a kaokoroai ma te koraki, ao e a okioki naba arou anne.
N te tai ae maan, I kataia n bon onimakina oin korakorau ni “katokia.” Ma I aki kona ni karaoia n ti ngai. E buokai au bitiobi n kauringai bwa antai ngai— ae Ngai bon natin te Atua te aine ae tangiraki. Ngke I kaitiboo ma ngaia ao n uringa te koaua anne, I a moana naba te bitaki ni koaua.
Kariaia n te rawe tamnei mairoun Madelyn ao ana utu
Madelyn e ataia bwa tamnein te tangako bon tiaki ti te maunga are e na tamwakia. Man ana ibuobuoki te Tia Kamaiu ao bwaai n ibuobuoki, e kona n karekea te korakora n tokanikai iaon kangaangan te maiu aio. Te tamnei aio e raweaki imwain raoi ae tamwarakea te aitiburaoki i Alaska, USA!
Te Koaua ibukin te Atua ao te Tia Kamaiu
N te moan, I rangi ni maaku n tataro. I taraa Tamau are i Karawa bwa te Atua ae motiraoi ao n unuun. Ma ngke I a rinanon te waaki n rairannano ae reitinako ao ea buokai n kaotaai n anuan Tamau are i Karawa ao Iesu Kristo. Ataakin ae te rairannano n te tai teuana e aki kamanoai man te kangaanga aio ma e buokai n teimatoa n onimakina Aia ibuobuoki ae roko mai ieta. Tamau are i Karawa e a kaman ataia man oota ni kataakiu; I ti kainnanoia bwa nna reitaki Nakoina.
I reiakinna bwa Tamau are i Karawa ao Iesu Kristo a nanoanga ao a oota. Ngkana ko rairaki Nakoia, A na rianna irarikim ao n taua baim inanon kawaim.
Kaitaraan ana Mwakuri Tatan
Ootau n anuan te Atua e buokai naba n oota iroun Tatan ao ana bwai ni mwakuri ao aroia n mwakuri ni kaitaraa te Atua. Teuana mai ibuakon ana bwai n mwakuri Tatan ae korakora bon te maama, are e kaokoro ma te nanobuaka ke te rawawata are tangirai te Atua ibukin ara rairannano” (2 I-Korinto 7:10). Ngkana ko namakina te nanobuaka, koa ataia bwa koa tia ni kairua. Ma te maama e tomai namakin aika aki raraoi ake ko namakinii ibukim ngkana ko karaoa te bure n kaineti ma kinaakim, kanga ai ngkoe te namakin arei.
Tatan e tangirai bwa nna kakoaua bwa I kona n tokanikai iaon te kangaanga aio ibon irou. Te kewe aio bon te bwai are e tuukai man te marooro ma au bitiobi ibukin au kangaanga ma tamnei n tangako. I namakinna bwa I aki kona n kaitiboo ma ngaia ni karokoa te tai are I a kona n taekinna bwa te bwai ae I a tia n rinanona ngkoa. Tatan e kaboongana memeerem n karaoiko bwa kona namakinna bwa ko aki tau n ukera mwaakan te Tia Kamaiu ni kamaiuko.
I reiakinna bwa Tatan e mwakuri iaora bwa tina namakina te katinanikuaki, ngaia are kaitaraan anne ae te kabanea n tamaroa bon te reitaki ma aomata. Tabetai e rangi n bebete te reitaki nakoia aomata ao kabanea am tai ma raraom aika raraoi. Te reitaki ma Tamam are i Karawa, ma ae bon ngkoe, ao ma aomata (moarara riki ma ake a nooriko n te aro are e noriko iai Tamam are i Karawa) bon te kawai ae moan te tamaroa ibukin uringan kinakim ae koaua: natin te Atua ae kakawaki.
Te Aroaro ae Tamaroa Riki
Inanon taina ao I karekei wirikiriki bwa nna buokiia ataeinnaine tabeman ake a korakai n kaitaraa te tatamnei n tamnei aika tangako. I namakinna bwa e a reke arou ae tamaroa riki. I rineia bwa nna tabeakina riki are e iangoia Tamau are i Karawa nakon are aia iango kain rarikiu, ao I a moana au mamarooro ma te koraki iaon au taneiai.
N te tai are ko namakina te kimwareirei ni koaua man am rairannano ae e reitinako, ko na tangiria n tibwauaia ma aomata! Ngkai I reitinako n tibwauaa te kimwareirei aio ngkai I beku bwa te mitinare ae bwanin ana tai.
Madi e beku bwa te mitinare ae bwanin ana tai n te Singapore Mition, n te taetae n Malay.
Au Rongorongo
Ko aki titiku n ti ngkoe, iai te kaantaninga.
Te korakai aio bon te bwai ae ko kona n tokanikai iaona man ana ibuobuoki te Tia Kamaiu, aika tangiraki iroum ake ko onimakiniia ao taan kairiiri, ao bwaai n ibuobuoki. Kaotinakoko man te katinanikuaki ao reitaki nakoia ake a nooria rinanon matan te Atua. Titirakiniia bwa tera ae a noria iroum!
N aki tabe bwa tera am kangaanga, ko bon aki kona n bwakanako ma ana konabwai te Tia Kamaiu ao Ana Mwakuri ni Kamaiu. E rangi n tangiriko Tamam are i Karawa, ao e bon uaana kateimatoaan te rairannano.