Nakomai, Iriirai
Kabonganai Raoi Bongin Maium
Ko tangiria ni maiu n boong ake a bwakanako? Ngaia, bon tai.
Kamataata n te tamnei iroun Alyssa Petersen
Ko a tia n iaiangoia ae e bebete riki ke n nakoraoi riki maium ngke arona bwa ko bungiiaki n te tai teuana imwaain ae bon am tai? E mwaiti aika a tia n namakina te aekaki aio—te burabeti naba, n te tai teuana.
Te burabeti Nibwaai (n ana boki Ereman) e nora buakakaia ana aomata ao e tang n takarua: “O, tera ngke I kona n karekei boong aika aekan boong ngke e moan roko tamau are Nibwaai man te aba are Ierutarem… — … ao ngkanne e na bon kimwareirei tamneiu” (Ereman 7:7–8).
E rinanon te rawawata n ana bong. N tokin te tai, eang, e a butimwaea maiuna: “Ma … bon aikai au bong” (Ereman 7:9).
Am Bong
Aikai bon am bong. Ana kaoti man uotii kataakim, ma ana anganiko naba tibwangam. N katootona teuana, inanon am bong, ko kona:
-
Ikoikoita Iteraera n iteran te rabuna ni kauoua. Aio “bon te kabanea n kakawaki n bwai ae waakinaki iaon te aonaaba n boong aikai.” E mwaiti am anga n tibwauaa te euangkerio ao ni kaoia aomata bwa ana kaniiaki nakon Iesu Kristo ao Ana Ekaretia. Ko kona n ibuobuoki n kakaeaia ami bakatibu n anga aika kamiimi ao n buokiia ake a tia n motirawa ni karekei otenati n te tembora.
-
Kabonganai bwaai n rabakau aika boou aikai n aanga aika raoiroi. E onoti rabakaum n kaotia nakon te aonaaba n aron kabonganaan rabakau n taai aikai n aanga aika raoiroi.
-
Totokoa te kairiribai, te aki karinerine, ao te kakaokoroaki. Ngkai a waaki n karawawata ara aonaaba bwaai aika buakaka aikai, ko kona n kaota te kawai ae tamaroa riki—ana kawai te Tia Kamaiu n akoi, nanoanga, n rau, ao n tangira.
-
Teimatoa n te aonaaba ae bibitaki. Ngkai ngkoe te tia kakaonimaki nakon Iesu Kristo, Ana euangkerio, ao Ana Ekaretia, e na kakabwaiako te uea, ao ana katotoonga bannam aomata ngkana a rinanon angibuakan te maiu.
Am Kakai
E bebete n taainako uotan Nibwaai, ma e mena ikekei (ao n te tai) are e kainnanoia te Uea bwa e na mena iai. E kakaonimaki. Ao man anne, e noori kakai ao bwaai aika kamiimi n bongin maiuna ao e kateimatoaki iroun te Uea. (Taraa Ereman 7-16.)
Ko kona n noori am kakai ma kamimi ngkana ko kakaonimaki inanon am bong ni maiu.