Nakomai, Iriirai
Ko na Kakauongo?
Ana kairiiri te burabeti e kona ni kamanoira, kakabwaiaira, ao n buokiira—ngkana ti butimwaai.
Kamataata n te tamnei iroun Alyssa Talent
“E a roko te kamaunaaki!”
Anne te rongorongo ae kananokaawaki karekeana. Ma iangoia ngke ngkoe are ko weteaki bwa ko na anga te rongorongo!
Tamuera te Reimwanaite e weteaki iroun te Uea bwa ena kauringiia Nibwaite taekan buakakaia. E tei iaon te oo, Tamuera e taekinna bwa te bong teuana “korakoran te urubwai … ao e na bon riki aio ngkana kam aki rairinanomi” (Ereman 13;10).
E taetae n burabetiia Tamuera bwa inanon nimaua te ririki ao e na iai te tairiki ae e na akea te rootongitong iai ao e na kaoti te itoi ae boou i karawa n mwakena bungiiakin te Tia Kamaiu (taraa Ereman 14:2–5).
A kanga Nibwaite n kaeka ana rongorongo Tamuera?
A rawa n ongo. A “karebanaa [Tamuera] n taian atibu … ao … katebea ni kanoan aia kai ni katebe ngke e tei iaon te oo” (Ereman 16:2). Ti kakaitau, bwa aomata aikoa karekare n taian atiibu ke n katebeia te burabeti n taai aikai, ma e mwaiti aika aki butimwaiia ao n kanaenaei ana taeka ngke e reiakinii koaua aika akea tokiia n ana euangkerio te Tia Kamaiu.
Ngkana e taetae te burabeti, ko na kanga n kaeka? Ko na kakauongo?
Aikai teniua kauring iaon kakabwaia ake a kona n reke man karekean te burabeti iaon te aba ao te kakauongo nakoina.
Te Burabeti e Tangiriira ao E Tatataro Ibukira
N taian rongorongo aika mwaiti n taian maungatabu ni kabuta, Beretienti Russell M. Nelson e tia n tuangiira:
“I tangiriki ngkami.” “Kam teimatoa n memena n au iango ao n au tataro n taainako.”
Bon te kakabwaia ataakin ae te burabeti e tangiriira ao e tatataro ibukira!
E kaania nimaua te ririki imwiin ana taetae ni burabeti Tamuera te Reimwanaite, tabeman Nibwaite a taku bwa ea bunginako te tai are ena koro iai nanon ana taeka. A bwainingareia ake a kakoauaa ao n rinea te bong ae ana tiringiia iai taan kakoaua ngkana aki kaoti kanikinaean bungiiakin te Tia Kamaiu (taraa 3 Nibwaai 1:6-9). Inanon te tai ae kakamaaku aio, te burabeti ae Nibwaai e bong ana bong n tataro “ibukiia ana botanaomata … ake iaon kawaia n tiringaki ibukin aia onimaki” (3 Nibwaai 1: 11).
N boong aikai, ana tataro te burabeti e buokiira n aanga aika baiti aika tiaki atai. Te kairi mai karawa are e karekea rinanon te tataro e kakabwaia te aonaaba.
Te Burabeti e Kairiira Nakon te Tia Kamaiu
”Tabekarake atuum ao kukurei,” te Uea e tuanga Nibwaai. E a kan roko te tai, ao n te tairiki aei ao kam na anganaki te kanikina, ao n teingabong ao N na kaoti nakon te aonaba” (3 Nibwaai 1:13).
Ngke e bung taai, e aki roo. E a roko te kanikina! (Taraa 3 Nibwaai 1:15.) Te ingabong are imwiina, ataia aomata bwa ai te bong are ea bungiiaki iai te Tia Kamaiu, ao e kaoti te itoi ae boou (taraa 3 Nibwaai 1:19, 21). Bwaai ni kabane are e taetae ni burabetiia te uea rinanon Tamuera ibukin bungiiakin te Tia Kamaiu a koro bukiia n aron are e taekinna te Uea bwa ana koro.
Rokon te Tia Kamaiu n te aonaaba e waekoa ni kamaiuiia ake a kakoauaa man te mate. Ma e aki ti kamaiuiia. Iesu Kristo e roko bwa e na kamaiura ni kabane man te bure ao te mate, n anganiira te korakora inanon ara tai ni kainnano, ao n uota te kantaninga ma te kimwareirei rinanon Ana Mwakuri ni Kamaiu. Aio bon oin raoi te rongorongo mairouia burabeti ni kabane “ake a [tia] taetae ni burabeti man moan rikin te aonaaba” (Motiaea 13:33). Burabeti a kairiira nako te Tia Kamaiu, are ngaia “te kawai, te koaua, ao te maiu” (Ioane 14:6).
Te Burabeti e Taetaekina te Koaua
Te moan tai are I wareka Ana Boki Moomon ngke I kauarinan, iai ana reirei Tamuera te Reimwanaite ae teke nanou iai. E tuangiia Nibwaite bwa ngkana a teimatoa n taotaona aia tai n rairannano e na roko te tai are e nang “rianako oi mwiina.” E taku, “Bwa kam kabanei bongin maiumii n ukoukora te bwai ae e aki kona n reke iroumi; … ao kam ukoukora te kukurei ma ni karaoan te bure,” are bon te bwai ae kaitara aron te raoiroi are e mena iroun Tamara are i Karawa (Ereman 13:38).
Inanon ara bong aikai, Beretitenti Nelson e reiakiniira aekan naba anne:
“Ngkai te aonaaba e kairooro bwa te mwaaka, te bwaibwai, kinaakira, ma kakukurein te rabwata anganiira te kukurei, ma a bon aki! A aki kona! …
Te koaua bwa e rangi kakua riki bon ukoran te kukurei n taabo ake aki kona ni kuneaki iai! … Iesu Kristo … , ao bon ti Ngaia, [iai] mwaakana n tabekiko rake iaon ana katitiki te aonaaba.”
Tabeman Nibwaite a rineia bwa ana kakauongo ao n kakoauai ana taeka Tamuera, e mwaiti ake aki (taraa Ereman 16:1–8). N aanga aika mwaiti, ao bon akea te kaokoro naba ma boong aikai.
Tera ae kona rineia? Kona kakauongo nakon te burabeti?
E reirei Beretitenti Russell M. Nelson:
“[Burabeti, taan mamata, ao taan karekei kaotioti] a kona n aki tutuangiia aomata n taainako bwaai ake a kan ongo. Aki rangi n kinaaki burabeti. Ma ti kona n taainako n reiakina te koaua!”
Ngkana ko kakauongo nakon te burabeti ao n maiuakinii ana taeka, kona noria bwa ana kairiri n burabeti e na kamanoko, kakabwaiaiko, ao n buokiko inanon maium.