Dali, Sunod Kanako
Pahimusli ang Inyong mga Adlaw
Nangandoy ba kamo nga kamo nabuhi sa nanglabay nga panahon? Nan, ayaw.
Paghulagway pinaagi ni Alyssa Petersen
Nakahunahuna ba kamo sukad sa inyong kinabuhi nga mas masayon o mas maayo pa kon natawo kamo sa mas naunang panahon? Ang uban mibati niining paagiha sa una—gani ang usa ka propeta, sa makausa mibati sa ingon.
Si propeta Nephi (sa basahon ni Helaman) nakakita sa kadaotan sa iyang katawhan og miingon: “O, nga ako unta nakaangkon sa akong mga adlaw diha sa mga adlaw nga ang akong amahan nga si Nephi sa sinugdanan mibiya gikan sa yuta sa Jerusalem … — … ang akong kalag unta nakaangkon og hingpit nga kalipay” (Helaman 7:7–8).
Naglisod siya sa pagpakabuhi sa iyang panahon. Sa kataposan, siyempre, siya kinahanglan nga moatubang sa reyalidad: “Apan … kini ang akong mga adlaw” (Helaman 7:9).
Inyong mga Adlaw
Mao kini ang inyong mga adlaw. Kini mahimong magpakita og mga hagit, apan kini usab nagtanyag og mga oportunidad. Sama pananglit, sa inyong mga adlaw, kamo:
-
Makapundok sa Israel sa duha ka habig sa tabil. Kini “mao ang labing importanting butang nga mahitabo sa yuta karon.” Kamo adunay daghang paagi sa pagpakigbahin sa ebanghelyo ug modapit sa uban nga mas mopaduol ngadto ni Jesukristo ug sa Iyang Simbahan. Makatabang kamo sa pagdiskobre sa mga katigulangan sa maanindot kaayo nga mga paagi ug motabang niadtong nangamatay na sa pagdawat og mga ordinansa diha sa templo.
-
Gamita ang teknolohiya sa kapositibo nga paagi. Kamo gisangkapan sa lahi nga paagi aron ipakita sa kalibotan kon sa unsang paagi ang modernong teknolohiya magamit alang sa maayo.
-
Pakigbatok sa kasilag, pagtamay, ug pagkabahin-bahin. Samtang kining mga daotan mokatap sa atong kalibotan, kamo makapakita og mas maayong paagi—ang mabination, maluluy-on, pakigdait sa kalinaw, ug mahigugmaong paagi sa Manluluwas.
-
Pagmakanunayon sa nag-usab-usab nga kalibotan. Kon kamo matinud-anon ngadto ni Jesukristo, sa Iyang ebanghelyo, ug sa Iyang Simbahan, ang Ginoo mopanalangin kaninyo, ug ang uban motan-aw sa inyong ehemplo diha sa mga unos sa kinabuhi.
Ang Inyong mga Milagro
Dili kadto kanunayng sayon lang kang Nephi, apan anaa siya kon asa (ug kanus-a) gikinahanglan siya sa Ginoo. Siya nagmatinud-anon. Isip resulta, nakakita siyag mga milagro ug mga katingalahan sa iyang mga adlaw ug gisuportahan sa Ginoo. (Tan-awa sa Helaman 7–16.)
Kamo makakita sa inyong kaugalingong mga milagro ug mga katingalahan kon kamo magmatinud-anon sa inyong mga adlaw.