Dali, Sunod Kanako
Maminaw Ba Kamo?
Ang paggiya sa propeta mopanalipod, mopanalangin, ug motabang kanato—kon kita motugot niini.
Paghulagway pinaagi ni Alyssa Talent
“Ang kalaglagan nagsingabot!”
Makaguol kana nga mensahe nga dawaton. Apan hunahunaa isip ang tawo nga mao ang mohatag niini!
Si Samuel nga Lamanita mao ang gitawag sa Ginoo sa pagpasidaan sa mga Nephita sa ilang pagkadaotan. Nagbarog ibabaw sa usa ka paril, si Samuel namahayag nga usa ka adlaw “hingpit nga kalaglagan … moabot gayod gawas kon kamo maghinulsol” (Helaman 13:10).
Si Samuel nanagna usab nga sa ika-lima nga tuig adunay usa ka gabii nga walay kangitngit ug usa ka bag-ong bitoon sa langit mopakita og timaan nga matawo ang Manluluwas (tan-awa sa Helaman 14:2–5).
Giunsa man pagtubag sa mga Nephita ngadto sa mensahe ni Samuel?
Sila nagdumili sa pagpaminaw. Sila “mibato kang [Samuel] … ug … nagpana kaniya samtang nagbarog siya diha sa paril” (Helaman 16:2). Salamat na lang nga, ang mga tawo dili na mobato o motira og mga pana sa mga propeta karon, apan daghan gihapon ang mosalikway sa iyang mga pulong kon siya magtudlo sa mahangtoron nga mga kamatuoran sa ebanghelyo sa Manluluwas.
Kon ang propeta mamulong, sa unsang paagi kamo motubag? Maminaw Ba kamo?
Ania ang tulo ka pahinumdom sa mga panalangin nga moabot gikan sa pagka-adunay usa ka propeta sa yuta ug sa pagpaminaw ngadto kaniya.
Ang Propeta Nahigugma Kanato ug Nag-ampo alang Kanato
Sa daghang pakigpulong sa kinatibuk-ang komperensiya, si Presidente Russell M. Nelson nagsulti kanato:
Gimahal ko kamo.” “Kamo kanunayng ania sa akong hunahuna ug sa akong mga pag-ampo.”
Pagkanindot niini nga panalangin nga masayod nga ang propeta nahigugma kanato ug nag-ampo alang kanato!
Dul-an sa lima katuig human sa mga panagna ni Samuel nga Lamanita, ang pipila sa mga Nephita miingon nga ang panahon milabay na nga matuman ang iyang mga gipamulong. Sila mibiay biay niadtong kinsa mituo ug gani mitakda og usa ka adlaw sa pagpatay sa mga tumutuo kon ang mga timailhan sa pagkatawo sa Manluluwas dili moabot (tan-awa sa 3 Nephi 1:6–9). Atol niining makahahadlok nga panahon, ang propeta nga si Nephi nag-ampo sa tibuok adlaw “alang sa iyang mga katawhan … nga hapit na malaglag tungod sa ilang hugot nga pagtuo” (3 Nephi 1:11).
Karon, ang mga pag-ampo sa propeta motabang kanato sa daghang paagi kay sa atong mahunahunaan. Ang espirituhanong giya nga iyang madawat pinaagi sa pag-ampo mopanalangin sa tibuok kalibotan.
Ang mga Propeta Mogiya Kanato ngadto sa Manluluwas
“Ihangad ang imong ulo ug pagmaya,” ang Ginoo misulti ni Nephi. “Ang panahon duol na, ug niini nga gabii ang timailhan ihatag, ug pagkaugma moabot Ako diha sa kalibotan” (3 Nephi 1:13).
Sa pagsalop sa adlaw, wala kadto mingitngit. Ang timaan miabot! (Tan-awa sa 3 Nephi 1:15.) Sa pagkasunod buntag, ang tanan nasayod nga mao na kadto ang adlaw nga ang Manluluwas matawo, ug usa ka bag-ong bitoon ang mipakita (tan-awa sa 3 Nephi 1:19, 21). Ang tanang butang nga gipanagna sa Ginoo pinaagi ni Samuel mahitungod sa pagkatawo sa Manluluwas natuman sumala sa gisulti nga kini mahitabo.
Ang pag-abot sa Manluluwas dinhi sa kalibotan dihadiha dayon miluwas sa mga tumutuo gikan sa kamatayon. Apan dili lang sila ang giluwas. Si Jesukristo mianhi aron sa pagluwas kanatong tanan gikan sa sala ug kamatayon, naghatag kanato og kusog sa mga panahon sa panginahanglan, ug nagdala kanato og paglaom ug hingpit nga kalipya pinaagi sa Iyang Pag-ula. Kini ang nahimong nag-unang mensahe sa matag propeta “ kinsa [naka] panagna sukad ang kalibotan nagsugod” (Mosiah 13:33). Ang mga propeta mogiya kanato ngadto sa Manluluwas, kinsa mao “ang dalan, ang kamatuoran, ug ang kinabuhi” (Juan 14:6).
Ang Propeta Mamahayag sa Kamatuoran
Sa unang higayon nga akong gibasa ang Basahon ni Mormon niadtong highschool, usa ka pagtulun-an gikan ni Samuel nga Lamanita ang nagustohan nako. Siya misulti sa mga Nephita nga kon sila magpadayon sa paglangay sa ilang paghinulsol moabot ang panahon nga “hangtod nga sa kataposan ulahi na gayod ang tanan.” Siya miingon, “Kamo nagtinguha sa tanan nga adlaw sa inyong kinabuhi alang niana nga dili ninyo maangkon; … gipangita ninyo ang kalipay sa pagbuhat sa kadaotan,” nga sukwahi sa kinaiyahan sa atong Langitnong Amahan (Helaman 13:38).
Sa atong panahon, si Presidente Nelson adunay susama nga hunahuna:
“Samtang ang kalibotan moinsister nga ang gahom, kabtangan, kainila, ug kagana sa unod makahatag og kalipay, kini dili makahatag og kalipay! Kini dili makahatag og kalipay! …
“Ang kamatuoran mao nga mas labaw nga makakapoy ang pagpangita og kalipay diin kamo dili gayod makakita niini! … Si Jesukristo … , ug Siya lamang, ang [adunay] gahom sa pagtabang ninyo sa pagbuntog sa mga tintasyon niini nga kalibotan.”
Ang pipila sa mga Nephita mipili sa pagpaminaw ug pagtuo sa mga pulong ni Samuel; daghan ang wala (tan-awa sa Helaman 16:1–8). Sa daghang paagi, karon dili kaayo lahi.
Unsa ang inyong pilion? Maminaw ba kamo ngadto sa propeta?
Si Presidente Nelson mitudlo:
“[Mga propeta, mga manalagna, ug mga tigpadayag] mahimong dili mosulti kanunay sa mga tawo kon unsay ilang gusto nga paminawon. Ang mga propeta panagsa ra nga ilado. Apan kami kanunay magtudlo sa kamatuoran!”
Kon kamo maminaw ngadto sa propeta ug mobuhat sa iyang mga pulong, inyong makaplagan nga ang iyang propetikanhong paggiya mopanalipod, mopanalangin, ug motabang kaninyo sa tibuok ninyong kinabuhi.