Unsaon sa Paghimo sa Komperensiya nga Mas Makahuloganon Kaninyo
Sulayi kining tulo ka ideya alang sa usa ka mas mahinungdanon nga kasinatian sa komperensiya.
Mga paghulagway pinaagi ni Jarom Vogel
Umaabot na ang kinatibuk-ang komperensiya, ug kini gituyo nga adunay epekto nga molungtad lapas sa tapos sa semana sa komperensiya! Kining tulo ka sugyot makahimo sa komperensiya nga mas makahuloganon alang kaninyo.
1. Andama ang Inyong Kaugalingon sa Espirituhanong Paagi
Sa dili pa ang kinatibuk-ang komperensiya, mahimong andamon ninyo ang inyong espiritu pinaagi sa yano nga mga butang sama sa pagtuon sa kasulatan ug sinsero nga pag-ampo. Makahimo gani kamo og usa ka pagpuasa sa social media o makahimo og espesyal nga pagbiyahe ngadto sa templo. Ang pagpangandam sa espirituhanong paagi motabang kaninyo nga mobati sa makagiya nga impluwensiya sa Espiritu Santo.
2. Pagbaton og Pangutana sa Hunahuna
Unsay inyong gihunahuna bag-ohay lang? Tingali kamo adunay importante nga desisyon nga pagahimoon, usa ka problema sa pamilya, o pangutana sa ebanghelyo. Pag-ampo ngadto sa Langitnong Amahan mahitungod niini, ug paminaw alang sa giya atol sa kinatibuk-ang komperensiya.
Susiha ang kasinatian ni James sa miaging tuig!
Sa dihang miabot ang komperensiya, gusto kong masayod kon unsaon nga mas maayong magamit ang gahom sa Pag-ula ni Kristo sa akong kinabuhi. Mainampoon akong nag-ampo nga nangayo sa Langitnong Amahan sa pagtabang kanako sa pagpaminaw sa Espiritu, masayod kon unsaon sa paghimo og mas maayo nga mga pagpili, ug mapasaylo sa akong sayop nga mga pagpili.
Samtang namulong si Elder Dieter F. Uchtdorf, kini nakapadani kanako:
“Sa higayon nga kamo modesisyon nga mobalik ug maglakaw diha sa pamaagi sa atong Manluluwas ug Manunubos, ang Iyang gahom mosulod sa inyong kinabuhi ug mousab niini.
Nasayod ako nga kini ang unsay gusto sa Ginoo nga akong madunggan, ug nabati nako ang Espiritu nga nagpamatuod kanako sa katinuod niini. Pinaagi sa pag-andam og usa ka pangutana sa hunahuna, nakadawat ko og personal nga tubag sa akong mga pag-ampo.
James M., 16, North Dakota, USA
3. Gamita ang usa ka Baroganan o Imbitasyon
Paminaw alang sa usa ka pagtulun-an o baroganan nga nakapadani kaninyo. Dayon paghimo og usa ka tumong sa paggamit niini sa inyong kinabuhi. Mahimo usab kamong maminaw og maayo alang sa direkta nga mga imbitasyon gikan sa mga propeta ug apostoles. Isulat ug paningkamoti ang labing menos usa niadto nga mga imbitasyon. Ang paglihok inubanan sa hugot nga pagtuo motabang kaninyo nga mobati sa kamatuoran ug gahom sa propetikanhon nga mga pagtulun-an.