Paghunong sa Balik-balik nga Pagtan-aw og Pornograpiya
Mibati ko nga nag-inusara ug nahadlok. Apan ang akong bishop mipahinumdom kanako sa pipila ka importanteng mga butang sa pagkaplag og paglaom ug tabang.
Paghulagway pinaagi ni Sue Teodoro
Ako unang nabantang sa pornograpiya sa edad nga 13. Aksidente nakong nakit-an kini sa social media, wala makahibalo kon unsa kini ug wala makasabot niini. Ang akong wala gituyo nga pagkabantang ug pagkakuryoso nahimong tinuyo nga pagtinguha niini.
Niadtong higayona, ang mga mensahe sa akong mga lider mahitungod sa pornograpiya ingon og nagsulti nga kadto usa ka butang nga ang mga lalaki lamang ang nanglimbasog. Kini mipabati kanako og dako kaayong kaulaw. Nagtuo ko nga dili gayod ako makasulti ni bisan kinsa mahitungod sa akong panglimbasog. Nasayod ako mahitungod sa Pag-ula ni Jesukristo, apan tungod kay nagtuo ko nga ako lamang ang batang babaye nga anaa niini nga panglimbasog, gibati nako nga ingon og ang akong sitwasyon dili na matabangan sa Manluluwas. Gibati nako nga ingon og ang eksepsiyon.
Ang Opisina sa Bishop
Atol niadtong mga tuiga, sa mga dapit sama sa seminary o mga debosyonal—bisan asa nga anaa ang Espiritu—kasagaran nakong gibati nga giaghat sa pagpakigsabot og miting sa akong bishop. Sa dugay kaayong panahon, unsay nakapugong kanako sa pagbuhat niini mao ang ideya nga ako adunay dungog nga ipabilin isip usa ka maayo nga bata gikan sa usa ka aktibo nga pamilya. Nagtuo ko nga makita niya ako kon kinsa ako—ug wala ko nagtuo nga kana nga tawo angayan higugmaon. Nagtuo ko nga pagasilotan dayon ko.
Sa dihang sa kataposan akong gipahiluna kana nga miting, lahi kaayo ang nahitabo kaysa akong gidahom. Imbes nga mohatag og silot, ang akong bishop misulti kanako: “Ikaw usa gihapon ka anak nga babaye sa Dios. Ikaw sama lang nga gimahal gihapon, ug ikaw sama lang nga gihatagan og bili.”
Nakahinumdom ko nga mibati og maayo og gugma. Kadto mao ang unang higayon nga kusog kaayo nakong nabati ang gahom sa Pag-ula sa Manluluwas sa akong kinabuhi. Sa paghandom, nakasabot ko kon nganong kadto nga mga pulong nga gisulti sa akong bishop importante kaayo.
Anak nga Babaye sa Dios
Kon kamo nanglimbasog sa pornograpiya, kamo makasinati og pabalikbalik nga kaulaw. Alang kanako, mobati ko nga wala masayod sa akong kaugalingong pagkatawo ug dayon mogamit sa pornograpiya aron sa pagsagubang niadto nga negatibo nga mga emosyon. Dayon mobati ko og kaulaw ug mopalayo sa akong kaugalingon gikan sa uban, ug ang sikulo mobalik.
Sulod sa taas nga panahon, misulay ko nga mosalig sa akong kaugalingong gahom sa kabubut-on nga “mohunong lang.” Apan dili nako kini mabuhat nga ako ra. Ang akong bishop mitabang kanako sa paghinumdom sa akong pagkatawo—nga ako usa ka hinigugma nga anak nga babaye sa Dios. Samtang nakigkita ko kaniya ug nakahinumdom niana nga kamatuoran, misugod ko nga nakahimo og tinuoray nga pag-uswag.
Mga litrato sa maayong kabubut-on ni Madelyn ug sa iyang pamilya
Nasayod si Madelyn nga ang pornograpiya dili lamang ang iyang bukid nga sakaon. Uban sa tabang sa Manluluwas ug sa husto nga mga himan, padayon siyang nakakaplag sa kalig-on sa pagbuntog sa mga hagit sa kinabuhi. Kini nga litrato gikuha sa wala pa siya misaka sa usa ka glacier didto sa Alaska, USA!
Ang Kamatuoran mahitungod sa Dios ug sa Manluluwas
Sa sinugdanan, nahadlok ko nga mag-ampo. Nakita nako ang Langitnong Amahan isip usa ka Dios sa hustisya ug kasuko. Apan ang pagsinati sa proseso sa padayon nga paghinulsol nakatabang kanako nga makasabot sa kinaiya sa Langitnong Amahan ug ni Jesukristo. Ang pagkahibalo nga ang kausa nga paghinulsol dili mohimo kanako nga dili madutlan niini nga panglimbasog mitugot kanako nga magpadayon sa pagsalig sa Ilang balaanong tabang. Ang Langitnong Amahan nasayod na daan mahitungod ug nakasabot sa akong mga pagsulay; gikinahanglan lang nakong modangop ngadto Kaniya.
Nakat-onan nako nga ang Langitnong Amahan ug si Jesukristo maluluy-on ug masinabtanon. Kon kamo modangop ngadto Kanila, Sila molakaw tupad kaninyo ug mogunit sa inyong kamot sa matag lakang sa agianan.
Pakigbatok sa mga Taktika ni Satanas
Ang pagsabot sa kinaiya sa Dios nakatabang usab kanako nga makasabot ni Satanas ug sa iyang mga himan ug sa unsang paagi kini molihok sa direkta nga pagsupak sa Dios. Usa sa labing gamhanan nga mga himan ni Satanas mao ang kaulaw, nga lahi gikan sa pagbati nga sad-an o “diosnong kasubo” (2 Mga Taga-Corinto 7:10). Kon kamo mobati nga sad-an, makaamgo kamo nga nakahimo kamo og sayop. Apan ang kaulaw mokonektar sa negatibo nga mga pagbati nga kamo aduna mahitungod sa inyong kaugalingon kon kamo makasala ngadto sa inyong pagkatawo, sama nga kamo mao kadto nga mga pagbati.
Gusto si Satanas nga ako motuo nga ako makabuntog niini nga hagit nga ako ra. Kini nga bakak usa ka butang nga mipugong kanako sa pagpakig-istorya sa akong bishop mahitungod sa akong panglimbasog sa pornograpiya. Gibati nako nga ingon og dili ko mahimong makigkita kaniya hangtod nga ako makasulti nga kadto usa ka butang nga akong gipanglimbasogan kaniadto. Si Satanas mogamit sa inyong indibidwal nga mga kahuyang aron himoon kamong mobati nga dili takos sa pagtinguha sa makaayo nga gahom sa Manluluwas.
Nakat-onan nako nga si Satanas motintal kanato kon kita nag-inusara, mao nga ang atong labing maayo nga panalipod mao ang koneksiyon. Usahay ingon lang kini ka yano sama sa pagtabang sa uban ug sa paggahin og makahuloganon nga panahon uban sa maayo nga mga higala. Ang pakigkonektar sa Langitnong Amahan, sa inyong kaugalingon, ug sa uban (ilabi na niadtong nakakita kaninyo sa paagi nga ang Langitnong Amahan nakakita kaninyo) mao ang labing maayo nga paagi sa paghinumdom sa inyong tinuod nga pagkatawo: usa ka bililhon nga anak sa Dios.
Usa ka Mas Taas nga Katuyoan
Sa kataposan misugod ko nga makakuha og mga pag-aghat sa pagtabang sa ubang batan-ong mga babaye nga nanglimbasog sa pornograpiya. Gibati nako ang usa ka mas taas nga katuyoan. Midesisyon ko nga mas magpakabana sa unsay gihunahuna sa Langitnong Amahan kaysa unsay mahimong gihunahuna sa uban sa akong palibot, mao nga nagsugod ko nga mas bukas nga namulong mahitungod sa akong mga kasinatian.
Sa dihang mabati ninyo ang dili ikalimod nga kalipay sa padayon nga paghinulsol, gusto ninyo kining ipakigbahin ngadto sa uban! Karon ako nagpadayon sa pagpakigbahin niini nga kalipay samtang nagserbisyo ako isip usa ka full-time nga misyonaryo.
Si Madi gitudlo nga moalagad isip usa ka full-time nga misyonaryo didto sa Singapore Mission, nga namulong og Malay.
Akong Mensahe
Kamo wala gayod nag-inusara, ug adunay paglaom.
Kini nga panglimbasog usa ka butang nga inyong mabuntog uban sa tabang sa Manluluwas, gisaligan nga mga minahal ug mga lider, ug sa husto nga mga himan. Ipalingkawas ang inyong kaugalingon sa pag-inusara ug pakigkonektar ngadto sa usa ka tawo nga nakakita kaninyo sa samang paagi nga ang Dios nakakita kaninyo. Pangutan-a sila kon unsay ilang nakita diha kaninyo!
Dili igsapayan kon unsa ang inyong hagit, kamo dili gayod lapas sa tabang sa Manluluwas ug sa Iyang Pag-ula. Ang Langitnong Amahan hingpit nga nahigugma kaninyo, ug kini bililhon gayod aron magpadayon sa paghinulsol.