5 ka Sugyot alang sa Mas Maayong Emosyonal nga Kahimsog

Ni Tamara W. Runia

Unang Magtatambag sa Kinatibuk-ang Kapangulohan sa Young Women

Kita mas lig-on kon magtinabangay.

mga kamot nga naggunit og dalag nga bola nga adunay smiley niini

Ang akong bana, si Scott, ug ako miserbisyo isip mga lider sa misyon didto sa Australia Sydney Mission gikan 2018 hangtod 2021. Kon ang mga rekord sa usa ka bag-o nga misyonaryo mipakita nga nanglimbasog sila sa ilang emosyonal nga kahimsog, pahibaloon dayon nako sila nga nakasinati ko og depresyon sa tibuok nakong hamtong nga kinabuhi. Gusto ko nga makasabot sila nga magtinabangay kami aron sila dili kinahanglang moatubang niini nga sila ra.

Gusto kong mopakigbahin sa sama nga mensahe diha kaninyo! Daghan kaayong mga tawo ang nagsagubang og mga hagit sa emosyonal nga kahimsog, apan kitang tanan makatabang sa usag usa. Aron maklaro: Dili ko usa ka propesyonal sa emosyonal nga kahimsog. Apan ganahan kong mopakigbahin og pipila ka praktikal ug espirituwal nga mga sugyot alang sa mas maayong emosyonal nga kahimsog nga nakatabang kanako, ingon man niadtong akong nahibaloan ug gimahal.

Si Kristo nga Mibuhi sa Anak nga Babaye ni Jairo

Sugyot 1: Ipabilin Nato si Kristo nga anaa sa Sentro

Nagdako ko duol sa San Francisco, California, USA, ug nakahinumdom nga ganahan kaayo sa usa ka sakayan sa peryahan nga duol sa baybayon! Kini naglangkob og usa ka dako nga kahoy nga plaka nga inyong lingkoran ug paningkamotan nga mokupot og maayo samtang magkakusog ang tuyok sa plaka. Kadtong kinsa milingkod duol sa kilid kasagaran maoy unang malabay. Kadtong kinsa nakasabot sa centrifugal nga pwersa, hinuon, milingkod duol sa sentro.

Nagtuo ko nga kana usa ka nindot nga analohiya alang sa pagpabilin ni Kristo sa sentro samtang nakasinati kita og pipila niining malisod nga mga sitwasyon—bisan kon kini man ang kabalaka, depresyon, OCD, o susamang butang. Gikinahanglan nato si Kristo sa sentro sa atong mga kinabuhi.

Sa mga panahon sa mga panglimbasog sa kahimsog sa utok, tingali kita adunay namenosan nga koneksiyon ngadto sa langit o nagkalisod nga mobati nga duol ngadto sa Manluluwas. Wala kini magpasabot nga kita gisilotan o nga kita dili takos sa gugma sa Dios. Alang kanako, ang pagsalig nga Siya anaa diha samtang magpaabot nga mapahiuli ang koneksiyon bililhon kaayo! Padayon sa pag-ampo, mahala ang mga pulong sa Manluluwas, salig sa Iyang mga saad, ambit sa sakramento, ug buhata ang tanan nga mopabilin kaninyo nga nakasentro Kaniya.

Sugyot 2: Saligan Nato ang Ginoo Matag Adlaw

Ang mga anak sa Israel didto sa kamingawan gikinahanglang mosalig sa Ginoo alang sa mana sa matag adlaw gayod. Usahay kon kita makasinati og mga butang nga ingon ka grabe sama sa mga panic attack o ubang emosyonal nga mga kasakit, gusto nato nga kini permanenteng mawala. Ug tingali kini mawala—apan dili sa paagi o sa panahon nga atong gusto. Kana wala magpasabot nga ang paglaom nawala na. Gikinahanglan natong mosalig sa Dios matag adlaw samtang maningkamot kita ug magpaabot sa mas maayo nga mga panahon sa umaabot.

Usa ka pamaagi mao ang pagtinguha sa tabang sa Langitnong Amahan ug mosulay og lainlaing mga estratehiya aron makaplagan kon unsay labing maayo alang kanimo. Dayon Siya makatabang kanimo nga makahinumdom, atol sa emosyonal nga malisod nga mga higayon o sa usa ka panic attack, kon sa unsang paagi ang makapahupay nga musika ingon og nakatabang sa usa ka susama nga sitwasyon o kon sa unsang paagi ang pakigkonektar ngadto sa usa ka tawo nga imong gisaligan mipabati kanimo nga luwas kaniadto. Kini motugot kaninyo sa pagkolekta og usa ka hugpong sa nasulayan nga epektibo nga mga himan nga sulayan sa sunod higayon nga kamo manglimbasog. Bisan unsa ang inyong buhaton, tinguhaa ang tabang sa Ginoo adlaw-adlaw.

Kita makasulti gani og kusog: “Kon ako mosalig sa Ginoo kada adlaw, ako mobangon ug mangita sa kusog nga wala nako mahibaloi nga ako aduna!”

Sugyot 3: Kamo Makaatiman sa Inyong Lawas

Ang utok kabahin sa atong mortal nga lawas ug mao nga tandogonon sa daghang pagkadaiya ug mga pagkadili hingpit sa kinabuhi sa yuta. Apan maayong balita: adunay napamatud-an nga mga lakang nga atong mahimo aron sa pagpalig-on sa atong utok nga makapalambo usab sa atong emosyonal nga kahimsog. Ania ang pipila niana nga mga lakang:

Pagsinati sa kahayag sa adlaw o kasanag sa artipisyal nga kahayag sa buntag
Modangop ngadto sa kinaiyahan, pagbati og koneksiyon sa yuta
Pag-ehersisyo kanunay
Pagkaon og makapahimsog nga mga pagkaon
Pag-inom og daghang tubig
Pagkatulog og sakto matag gabii

Ang mga teknik sa pagginhawa mahimong gamhanan usab. Sulayi ang pagginhawa og lawom pinaagi sa inyong ilong, ug dayon laing lawom nga pagginhawa. Pugngi sulod sa pipila ka segundo, ug, sa kataposan, ipwersa og paggawas ang tanan sa inyong ginhawa sa inyong baba.

Gibuhat nako kini sa pipila ka higayon sa akong pagmata, atol sa mga higayon sa grabe nga mga pagbati (sama lang sa dili pa mohatag og pakigpulong sa kinatibuk-ang komperensiya!), ug sa dili pa matulog.

duha ka tawo nga mikab-ot ug naggunitay og mga kamot

Sugyot 4: Makapangayo Kita og Tabang

Kon kamo nasaag sa pag-hike ug nakasugat og usa ka giya, maulaw ba gayod kamo nga mangutana og mga direksiyon ngadto sa kahilwasan? Dili ko motuo nga dili nimo kini buhaton. Ang pagpangayo og tabang dili usa ka timaan sa kahuyang. Kasagaran natong gibuhat kini sa ubang mga aspeto sa atong kinabuhi.

Tabang sa paghunong sa negatibo nga panghunahuna batok sa pagpangayo og tabang bahin sa emosyonal nga mga hagit.

Kon kamo man nagkinahanglan og tabang gikan sa Dios, mga higala, pamilya, o medikal nga mga prospesyonal, kamo dili usa ka mas huyang nga tawo alang sa pagtinguha og dugang nga tabang nga inyong gikinahanglan. Sa pagkatinuod, nagpakita kamo og kaisog!

usa ka linya sa mga tawo nga nag-inagbayay

Sugyot 5: Magpabilin Kitang Konektado

Ang pakigkonekta sa inyong Langitnong Amahan pinaagi sa inadlaw nga pag-ampo importante kaayo.

Gibati usab nako kini nga mahinungdanon kaayo nga magpabiling konektado ngadto sa mga tawo nga mobati kita nga luwas nga ikauban ug kasaligan. Tawagi ang inyong mama! Pakig-istorya sa usa ka higala nga mag-inatubangay. Pakigsulti sa usa ka igsoon. Mas lig-on kita kon kita motabang sa usag usa. Kana nga kalig-on mopalig-on kaninyo ug sa inyong gitabangan. Ang tanang tawo nagkinahanglan og usa ka tawo. Ang pag-inusara ug depresyon kasagarang mopagrabe sa usag usa. Ang pakigkonektar ngadto niadtong atong gihigugma ug gikauban sa pagpuyo ug ikakita ug magakos usa ka nindot nga pangontra ngadto sa daghan kaayong kasakit nga atong masinati.

Kita Makasugakod sa Hudno uban Kaniya!

Usahay kinahanglan lang kitang mapahinumdoman nga ang Dios nag-uban kanato.

Sa Daang Tugon, si Hari Nabucodonosor milabay ni Sadrac, Mesac, ug Abed-nego ngadto sa init kaayo nga hudno nga bisan ang mga tigbantay sa gawas wala nakasugakod sa kainit.

Sa unsang paagi kining tulo nakasugakod?

Ang mga kasulatan nagtudlo nga usa ka ikaupat nga hulagway ang makita diha sa kalayo uban kanila kinsa “sama sa [Anak sa Dios]” (Daniel 3:25).

Nagtuo ko nga kini nagpasabot nga si Kristo nag-uban kanato latas sa atong kinalisoran nga mga pagsulay, ilabi na samtang kita naglahutay niini. Ug ang mga panglimbasog sa kahimsog sa utok mabati gayod nga sama sa usa ka nagdilaab nga hudno. Si Kristo mao si Immanuel, nga literal nga nagpasabot nga “Ang Dios ania uban kanato.”

Ayaw kalimti, si Jesukristo mao ang atong kalig-on, dili lang diha sa kataposan sa agianan, kon kita nakalingkawas na gikan sa kasinatian sa mga emosyon nga wala nato gipangayo. Siya sa pagkatinuod nag-uban kanato sa kinatibuk-an sa atong panaw. Siya ang atong kalig-on ug kahupayan karon mismo.

Magtinabangay kita og maayo!