Pagpangayo—ug Paghatag—og Tabang bahin sa Kahimsog sa Pangisip
Kon mahitungod sa kahimsog sa pangisip, kamo makapangayo og tabang ug makatanyag niini ngadto sa uban usab.
Paghulagway pinaagi ni Simona Love
Unsay kinahanglan ninyong buhaton kon gibati ninyo nga naguol, nawad-an og kadasig, nabalaka, nahingawa, o nagmasulub-on?
Mahimong nagdahom kamo nga ang tubag usa ka butang sama sa: Mosunod sa ebanghelyo. Mag-ampo. Magbasa sa mga kasulatan. Moambit sa sakramento. Ug ang pagpadayon sa pagbuhat niadto nga mga butang maayo ug gikinahanglan ug maksulbad gayod (ug makalikay) sa daghan kaayong mga problema. Apan ang pipila ka problema nagkinahanglan og dugang nga mga paningkamot.
Siyempre, ang tanan mobati nga nabalaka o naguol usahay. Kabahin kana sa kinabuhi. Adunay daghang maayo nga mga paagi sa pagsagubang niadto nga mga butang. Apan kon ang kabalaka o ang depresyon grabe kaayo o dugay na kaayo nga kini mobalda na sa inyong kinabuhi ug mopugong kaninyo sa pagbati sa Espiritu, nan kamo mahimong anaa sa ang-ang diin dili na tinuod sa reyalidad nga magdahom nga mahimong mas mamaayo kini nga walay dugang nga tabang.
Ang kahimsog sa pangisip kay pisikal nga kahimsog (tan-awa sa Alang sa Kalig-on sa mga Kabatan-onan: Usa ka Giya sa Paghimo og mga Pagpili [2022], 29). Ang mga kemikal sa atong utok motabang sa pagdumala sa atong mga emosyon, ug ang utok kabahin sa lawas. Si bisan kinsa nga mosulti nga ang depresyon o kabalaka “sa hunahuna ra na” husto lamang sa literal nga pagsabot: ang inyong ulo, sa pagkatinuod, mao ang dapit diin makit-an ang inyong utok. Apan ang mga problema dili imahinasyon kondili mga tinuod nga sakit sama sa nabali nga bitiis o appendicitis.
Pangayo og Tabang
Ang Basahon ni Mormon nagsulti nga ang mga Nephita napanalanginan tungod sa “pagkamaayo sa mga matang sa daghan nga mga tanom ug mga gamot diin ang Dios miandam aron pagkuha sa hinungdan sa mga sakit” (Alma 46:40). Karon, mahimong tawagon nato kini nga mga butang nga medisina.
Karon, ang Dios miandam og gani mas daghang paagi sa pagtambal sa sakit ug pagkaangol, lakip sa pangisip ug emosyonal nga mga kasakit. Kita adunay mga panambal karon nga ang mga Nephita—ug ang atong mga apohan, alang niana nga butang—nangandoy lang. Kita nagpuyo sa usa ka panahon sa mga milagro! Ug gusto sa Langitnong Amahan nga gamiton nato kini.
Wala kana magpasabot nga ang tanan kinsa nanglimbasog sa depresyon o kabalaka nagkinahanglan og tambal o therapy. Ang matag usa lahi. Apan dili igsapayan sa inyong sitwasyon, usa ka butang ang segurado: Walay rason nga mag-antos nga mag-inusara. Ang inyong Langitnong Amahan mahinamon nga motabang.
Ang inyong Langitnong Amahan nasayod kon unsay makatabang kaninyo. Kon ang inyong mga panglimbasog masulbad man pinaagi sa pag-ampo ug hugot nga pagtuo, o kon kamo magkinahanglan man usab sa pagtinguha sa Iyang mga panalangin pinaagi sa pipila ka kombinasyon sa tambal, mga therapist, mga ginikanan, mga higala, mga bishop, mga lider sa kabatan-onan, mga magtutudlo, presko nga hangin, ug ehersisyo aron makaluhatay kamo latas sa lisod nga mga panahon, pangayo sa Iyang tabang. Ayaw kaayo og kabalaka mahitungod kon giunsa sa uban nga adunay susama nga mga problema sa pagsulbad niini. Ang Langitnong Amahan motabang kaninyo sa pagpangita og mga solusyon nga mobagay sa inyong kahimtang.
Pagmatinabangon
Ang tumong sa ebanghelyo mao ang pagtabang sa uban, nagsunod sa paagi nga ang Manluluwas mitabang kanila pinaagi sa Iyang Pag-ula. Kinahanglan kanunay kamong maningkamot nga “[tabangan] kadtong mibati nga nag-inusara, nahilayo, o walay mahimo. Tabangi sila nga mobati sa gugma sa Langitnong Amahan pinaagi kaninyo” (Alang sa Kalig-on sa mga Kabatan-onan: Usa ka Giya sa Paghimo og mga Pagpili, 12). Tingali kamo dili usa ka doktor o usa ka therapist, apan kamo usa ka disipulo ni Jesukristo, ug ang mga disipulo ni Jesukristo “[m]agbangotan uban niadto nga nagbangotan; oo, ug [m]aghupay niadto nga nagkinahanglan sa kahupayan” (Mosiah 18:9).
Usa sa labing importante nga mga butang nga inyong mahimo kon ang usa ka tawo nga inyong gimahal nanglimbasog sa depresyon, kabalaka, o ubang mga problema sa kahimsog sa pangisip mao ang pagpaminaw.
Kasagaran, tanan nga gusto sa usa ka tawo nga nanglimbasog sa emosyonal nga kahimsog mao nga kamo mosabot ug mopakigbahin sa inyong gugma. Wala sila nagdahom nga kamo aduna sa tanang tubag nga mosulbad sa tanan. Mahimong nagkinahanglan lang sila nga magpahungaw. Gusto sila og usa ka tawo nga ikauban nila, maminaw kanila, ug mopakita og pagsabot—mosulti, “Bitaw, murag lisod gayod kaayo ang unsay imong giagian. Pasayloa ko. Unta masulbad nako kini. Palihog pahibaloa ko kon unsaon nako pagtabang.”
Ug Hinumdomi …
Kon kamo man ang tawo nga naghatag og tabang o ang tawo nga nagkinahanglan og tabang, hinumdomi nga adunay pipila ka butang nga ang Dios lang ang makahimo. Tugoti Siya nga mohimo niini. Sa pagkakaron, himoa ang unsay inyong mahimo sa pag-atiman sa inyong kaugalingon ug sa mga tawo sa palibot ninyo.