Direkta sa Punto

Ang Simbahan ba nagpakabana mahitungod sa politika ug sa gobyerno?

Ang politika ug gobyerno makaapekto sa atong mga kinabuhi, lakip sa atong abilidad sa pagsimba, ug Ang Simbahan ni Jesukristo sa mga Santos sa Ulahing mga Adlaw nag-awhag sa mga miyembro niini sa pag-apil niini. Pinaagi sa Iyang mga propeta, ang Ginoo mihatag kanato og tinuod nga mga baroganan, ug depende ra sa matag usa kanato sa paggamit niadto nga mga baroganan sa lainlain nga mga aspeto sa atong kinabuhi, lakip sa atong pag-apil sa politika ug sa gobiyerno. Lainlain nga mga dapit adunay lainlain nga mga balaod, ug ang Simbahan nag-awhag kanato sa pag-apil sa bisan unsa nga paagi nga atong mahimo.

Ang Simbahan mismo dili moendorso og bisan unsa nga partido sa politika, mga plataporma, o mga kandidato. Wala kini gidapigan sa politika. Ug ang Simbahan dili magsulti kanato unsaon sa pagboto. Kini yanong magpahinumdom kanato nga ang Ginoo nagsulti kanato sa pagtinguha ug pagsuporta sa mga lider nga matinuoron, maayo, ug maalamon (tan-awa sa Doktrina ug mga Pakigsaad 98:10). Ug kini usahay mohimo og opisyal nga publiko nga mga pamahayag bahin sa politikanhon nga mga butang nga may kalabotan sa moral nga mga isyu o sa mga pamaagi sa Simbahan.

Ang Simbahan nag-awhag usab sa mga miyembro sa pagtabang sa paghimo sa ilang mga komunidad nga maayo nga mga dapit nga mapuy-an ug magpadako og mga pamilya. Adunay daghang maayo nga mga kawsa nga kita makaapil aron sa pagtabang sa pagpalambo sa mga butang bisan asa man kita.

Tan-awa sa Kinatibuk-ang Tamdanan nga Basahon, 38.8.30, Librarya sa Ebanghelyo; Mga Artikulo sa Hugot nga Pagtuo 1:11–12.