Mga Tingog sa Kabatan-onan
Ang Akong Problema sa Kaon batok Sa Akong Tinuod nga Pagkatawo
Sulod sa dugay nga panahon ako nanglimbasog sa problema sa kaon nga gitawag og anorexia nervosa, diin nagkagamay ang imong kaon ug mabalaka kabahin sa pagsaka sa timbang. Kini nakaapekto sa imong panghunahuna—magsugod ka sa pagbati nga sad-an tungod sa kaon ug dili makasabot sa gikinahanglan sa imong lawas. Wala makatabang nga kanunay nakong makita ang dili tinuod nga sumbanan diha sa online o sa eskwelahan, ug akong gitandi ang akong kaugalingon ngadto sa akong pamilya ug sa uban sa akong palibot.
Ang akong problema sa kaon akoa gyod nga gitago. Apan ang akong mama nakamatngon og kausaban sa akong mga nabatasan sa kinan-an. Milingkod siya tupad nako ug mihatag kanako og dakong panahon kutob sa akong gikinahanglan aron sultihan siya unsa ang problema. Adunay daghang mga luha miagas, apan sa akong hunahuna ang Espiritu mitabang og giya kaniya nga masayod nga ako nagkinahanglan og tabang. Nagdungan sa paghimo og plano, ug hinay-hinayng gisugdan kini sa pagtrabaho.
Atol nianang panahona, mihukom usab ko sa pagkuha sa akong patriyarkal nga panalangin. Gusto ko nga masayod kon unsa kaha ang akong kinabuhi gawas sa kangitngit nga akong gisinati. Akong gipangutana ang Dios, “Kinsa ako?,” “Gimahal ba Ko nimo?,” ug “Nganong ania ko dinhi?” Ang unang butang nga gisulti sa patriyarka mao ang tubag niadtong mga pangutana. Ang akong panalangin nakatabang kanako nga makakat-on kabahin sa akong tinuod nga pagkatawo ug kon unsa ang gitagana sa Dios alang kanako. Sa higayon nga ako mobasa niini, akong mabati ang gugma sa Manluluwas alang kanako ug mahinumdom kon unsa ako mamahimo uban Kaniya.
Bisan kon uban sa suporta sa akong patriyarkal nga panalangin, sa akong pamilya, sa akong Langitnong Amahan, ug sa akong Manluluwas, mikabat og taas nga panahon ang pagproseso sa mga pagbati nga akong gihambin kabahin sa akong lawas. Lisod gihapon usahay dawaton ang akong kaugalingon kon si kinsa ko ug sa akong hitsura. Apan tungod sa akong malisod nga mga panahon, nagsugod ko sa pagpasalamat sa kalamboan ug sa kahayag nga naabot gumikan sa pag-ila sa akong tinuod nga pagkatawo. Ako usa ka anak nga babaye sa Langitnong Amahan. Ako usa ka disipulo ni Jesukristo. Sila mitan-aw kanako inubanan sa gugma ug pag-awhag, ug kana labaw pa ka importante kay sa opinyon ni bisan kinsa.
Annalise B., edad 17, Georgia, USA
Nalingaw sa pagtrabaho atol sa iyang internship sa ospital ug sa paghimo og art ug musika sa pagpasidungog sa Dios ug sa Iyang mga nilalang.