E Le Tuua Lava Na o i Tatou
Saunia e Peresitene Thomas S. Monson
O le a i ai se aso tou te mafaufau ai i o outou olaga ma toe tepa i o outou taimi faigata, ma o le a outou iloa ai na i ai lava o Ia iina e le aunoa i ou autafa.
Ou tuafafine pele, o le agaga ua tatou lagonaina i lenei afiafi o se faailoga lea o lo outou malosiaga, lo outou tuuto ma lo outou lelei. E sii mai le fetalaiga a le Matai: “O outou o le masima o le lalolagi. … O outou o le malamalama o le lalolagi.”1
A o ou mafaufau loloto i lou avanoa e lauga atu ai ia te outou, sa faamanatu mai ia te au le alofa o lou toalua pele, o Frances sa i ai mo le Aualofa. I lona olaga sa ia auauna atu ai i le tele o tofiga i le Aualofa. A o tau fai 31 uma o ma tausaga, na valaauina au e avea ma peresitene o le Misiona a Kanata. I le taimi o le tolu tausaga o lena tofiga, na pulefaamalumalu ai Frances i Aualofa uma i lena eria atoa, lea sa aofia ai itumalo o Ontario ma Quebec. O nisi o ana faigauo mafana na tupu mai ona o se taunuuga o lena tofiga, faapea ai foi ma le tele o valaauga na mulimuli ane ia faatumuina i le Aualofa a le matou lava uarota. Sa avea o ia ma se afafine faamaoni o lo tatou Tama Faalelagi, o la’u soa faapelepele, ma o la’u uo mamae lava. Ua ou misia lava o ia e sili atu i lo upu e mafai ona faamatalaina.
Ou te alofa foi i le Aualofa. Ou te molimau atu ia te outou sa faatulagaina e ala i musumusuga ma o se vaega taua o le Ekalesia a le Alii iinei i le lalolagi. O le a le faigofie ona fuatiaina mea lelei uma ia e sau mai lenei faalapotopotoga atoa ai ma olaga uma ua faamanuiaina ona o le Aualofa.
Ua aofia i le Aualofa ia tamaitai eseese. O loo i ai nisi o outou o e nofofua—masalo o loo aooga, masalo o loo faigaluega—o loo atiaeina se olaga lelei ma faamalieina. O nisi o outou o ni tina pisi tele i le faafaileleina o fanau. Ma isi o outou ua le o toe i ai ni tane ona ua tatala faaipoipoga pe ua maliliu foi ma o loo tauivi e tausi a outou fanau e aunoa ma se fesoasoani a se tane ma se tamā. O nisi o outou ua tausiaina a outou fanau ae ua iloaina o le manaoga mo la outou fesoasoani e faaauau pea. E toatele outou o loo i ai ni matua matutua o loo manaomiaina le tausiga agaalofa lea e na o outou e mafai ona tuuina atu.
Po o fea lava o tatou i ai i le olaga, e i ai taimi e tofu ai i tatou uma ma ni luitau ma ni faigata. E ui e eseese mo tagata taitoatasi, ae e tupu i tagata uma.
O le tele o luitau o loo tatou fetaiai e mafua ona o loo tatou ola i lenei lalolagi faaletino, ua faatumulia i le tele o ituaiga eseese o tagata. E i ai taimi tatou te tuufesili ai ona o le atuatuvale, “E mafai faapefea ona faatumau lo’u taulai atu ma le mausali i se lalolagi selesitila a o o’u nofo ai i lenei lalolagi telesitila?”
O le a i ai taimi o le a e uia ai ala tiga o tofotofoga ma faigata. Atonu o le a i ai taimi o le a e lagonaina ai lou le pipii atu—pe ua mamao ese—mai Lē Foai mai ia meaalofa lelei uma. E te popole e faapea ua tuua na o oe. Ua suitulaga ai e le fefe le faatuatua.
A e iloaina ua e oo i ia tulaga, ou te aioi atu ia te oe ia e manatua e tatalo. Ou te fiafia i upu a Peresitene Ezra Taft Benson e faatatau i le tatalo. Na ia saunoa:
“I lo’u olaga atoa lava ua avea ai le fautuaga ia faalagolago i le tatalo ua faasilisili lea i lo isi fautuaga uma lava ua ou … mauaina. Ua avea ma se vaega taua mo au—o se taula, o se punavai ola e le aunoa o le malosi, ma le faavae o lo’u malamalama i mea paia. …
“… E ui lava e oo mai ni mea faafeagai, ae e mafai ona tatou maua i le tatalo le faamautinoaga, aua o le a fetalai mai e le Atua le filemu i le loto. O lena filemu, o le agaga o le toafimalie, o le faamanuiaga aupito sili lea o le olaga.”2
Sa apoapoai mai le Aposetolo o Paulo:
“Ia faailoa atu o outou manao i mea uma lava i le Atua.
“O le manuia foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.”3
O se folafolaga mamalu lena! O le filemu lena lea tatou te sailia, lea e matuai o tatou manaomia lava.
E lei tuu maia i tatou i lenei lalolagi ia savavali na o i tatou. O se puna ofoofogia o le mana, o le malosi, ma le mafanafana o loo avanoa mo i tatou taitoatasi. O Ia o le ua sili atu lona silafiaina o i tatou nai lo i tatou lava, o Ia o le ua silasila i se ata tele atu, ma o le ua silafiaina le taunuuga mai le amataga ua faamautinoa mai ia i tatou o le a i ai pea o ia iina mo i tatou e tuuina mai le fesoasoani pe afai tatou te ole atu. Ua tatou maua le folafolaga: “Tatalo e le aunoa, ma ia talitonu, ma o le a galulue faatasi mea uma mo lo outou lelei.”4
A o tuuina atu a tatou tatalo i le lagi, ia aua nei galo ia i tatou ia upu na aoao mai e le Faaola ia i tatou. Ina ua Ia fetaiai ma tiga matuitui o Ketesemane ma le satauro, sa Ia tatalo atu i Lona Tama, “A e aua nei faia lo’u loto a o lou finagalo.”5 Atonu e i ai taimi e faigata ai, ae o lo tatou tiute foi le faatuatuaina o lo tatou Tama Faalelagi ua Ia silafia le auala sili ma le taimi faapea ai ma le ituaiga o fesoasoani e tuu mai lea tatou te sailia.
Ou te faamemelo i upu a se fatusolo:
Ou te le iloa po o a ni auala,
Ae ou te iloa e tali mai le Atua i talosaga.
Ou te iloa ua Ia tautino mai,
Ua ou iloa ai o taimi uma e faafofoga mai,
Ma o le a tali mai, vave pe tuai.
O lea ou te tatalo ma faatalitali filemu ai.
Ou te leiloa i le faamanuiaga ou te saili i ai
Pe oo mai i auala tonu ou te mafaufau ai;
Ae tuu atu a’u tatalo ia te Ia lava,
O Lona finagalo e poto atu i lo o’u ala,
E mautinoa lava o le a Ia tali mai i au talosaga,
Pe tali mai i nisi auala sili atu o faamanuiaga.6
Ioe, o le tatalo e le mo na o taimi o faafitauli. Ua tau soo mai ia i tatou i tusitusiga paia ia “tatalo e le aunoa”7 ma ia tatalo pea i o tatou loto.8 O upu o se viiga masani ou te fiafia i ai o loo tuu mai ai se fesili lea e sili ona tatou fesiligia ai i tatou lava i aso uma: “Pe na faia sau tatalo?”9
E faaopoopo atu i le tatalo e fesoasoani ai ia i tatou i le taulimaina o lo tatou lalolagi ua faigata i le tele o taimi, o le suesueina lea o tusitusiga paia. O upumoni ma musumusuga o loo maua i a tatou tusi faavae e fa o ni meatotino taugata ia ia te au. Ou te le fiu e faitau i ai. E siitia au faaleagaga i soo se taimi lava ou te sailiili ai i tusitusiga paia. O nei upumoni paia ma le alofa e tuu mai ai le taitaiga i lou olaga ma faasino ai le ala e tau atu i le atoatoa e faavavau.
A o tatou faitau ma mafaufau loloto i tusitusiga paia, o le a tatou lagonaina ia musumusuga mālū o le Agaga i o tatou agaga. E mafai ona tatou maua ai ni tali i a tatou fesili. Tatou te iloa ai faamanuiaga e oo mai e ala i le tausiaina o poloaiga a le Atua. Tatou te maua ai se molimau maumaututu e uiga i lo tatou Tama Faalelagi ma lo tatou Faaola, o Iesu Keriso, faapea ai ma lo La alolofa mo i tatou. Pe a tuufaatasia ia suesuega i tusitusiga paia ma a tatou tatalo, o le a mafai ai ona tatou iloa ma le mautinoa e moni le talalelei a Iesu Keriso.
Sa saunoa mai Peresitene Gordon B. Hinckley, “Tau ina ia faamanuiaina i tatou taitoatasi e le Alii ia taumamafa i ana [afioga] paia ma ia utuvai mai ai [i na afioga] lena malosi, lena filemu, [ma] lena malamalama lea ‘o loo silisili lava i mea uma e manatu i ai’ (Filipi. 4:7).”10
A tatou manatuaina le tatalo ma faaalu se taimi e faitau ai tusitusiga paia, o le a matua faamanuiaina atili o tatou olaga ma o le a faamāmāina a tatou avega.
E mafai ona ou faasoa atu ia te outou se tala i le auala na tali atu ai lo tatou Tama Faalelagi i tatalo ma aioiga a se tasi o tamaitai, ma tuu atu ia te ia le filemu ma le faamautinoaga sa ia matua saili malosi i ai?
Sa amata ona oo faigata ia Tiffany i le tausaga ua tea a o ia talimalo i lona fale mo le Aso Faafetai ma le Kerisimasi. Sa a’oga lona toalua i le a’oga faafomai ma ua i ai nei i le lua tausaga o lana a’oga faafomai. Ona e manaomia ona faigaluega o ia mo le tele o itula, o lea sa le mafai ai ona ia fesoasoani i lona toalua i le tele e mafai ai i tulaga uma la te tau fai fiafia ai, ma o lea la, o le tele o mea sa manaomia ona faataunuuina i lea vaitau o aso fiafia, e faaopoopo i ai ma le tausiga o le la fanau laiti e toafa, sa palasi uma ia Tiffany. Sa faasolo ina lofituina o ia, ona oo lea ina ia iloaina o se tasi sa matua pele ia te ia ua aafia i le kanesa. O le atuatuvale ma le popole sa amata ona avea ma avega mamafatu ia te ia, ma ia oo atu ai i se vaitau o le lotovaivai ma le faanoanoa. Sa ia saili atu i se fesoasoani faafomai, ae sa leai se suiga. Sa mou atu foi lona fia tausami, ma sa amata ai ona pa’e’e, lea sa le lelei mo lona tino itiiti. Sa ia sailia le filemu i tusitusiga paia ma tatalo mo se laveaiga mai le faanoanoa ua lofituina ai o ia. Ina ua foliga mai ua leai se filemu po o se fesoasoani e oo atu, sa amata loa ona ia lagonaina le tuulafoaiina e le Atua. Sa tatalo lona aiga ma uo mo ia ma taumafai malosi e fesoasoani i ai. Sa latou auina atu ana meaai sa fiafia i ai i se taumafaiga ia faatumauina lona soifua maloloina faaletino, ae sa na o sina tofo lava i ai ma lē mafai ai ona taumafa uma.
I se tasi aso sa patino le faigata, sa le faamanuiaina le taumafai a se uo e faatosina o ia i meaai sa masani ona fiafia i ai. Ina ua leai ma se mea e aoga, sa fai atu lea uo, “Masalo e i ai lava se mea e logo lelei ia te oe.”
Sa mafaufau Tiffany mo sina taimi ona fai mai lea, “E na o le pau le mea ou te mafaufau i ai e logo lelei o se falaoa e tao i le fale.”
Ae sa leai se falaoa na maua i lena taimi.
O le aoauli na sosoo ai sa tatagi ai le logo o le faitotoa a Tiffany. Sa i ai lona toalua i le fale ma sa ia alu atu i le faitotoa. Ina ua ia foi ane, sa ia tauaaoina se papa falaoa na tao i le fale. Sa faateia Tiffany ina ua ia ta’u atu i ai sa aumai i se tamaitai e igoa ia Sherrie lea la te tau le iloaina. O ia o le uo a Nicole, le uso o Tiffany, e nofo o ia i Denver, Colorado. Sa faailoa puupuu atu Sherrie ia Tiffany ma lona toalua i ni nai masina na muamua atu ao nonofo ai Nicole ma lona aiga faatasi ma Tiffany i le Aso Faafetai. O Sherrie, sa nofo i Omaha, sa sau i le fale o Tiffany e asiasi mai ia Nicole.
A o lea la i ni masina mulimuli ane, faatasi ai ma le sasala o le manogi o le falaoa ua ia uuina, sa valaau atu ai Tiffany i lona uso o Nicole e faafetai i ai mo le auina atu o Sherrie i se feau o le alofa mutimutivale. Peitai, sa ia iloa ai e le i uunaia e Nicole lea asiasiga ma na te leiloaina foi.
Sa malamalama le tala atoa ina ua valaau atu Nicole i lana uo o Sherrie e fia iloa po o le a se mea na uunaia o ia e auina atu lena papa falaoa. O le mea sa ia iloaina o se musumusuga lea ia te ia, ia Tiffany, ia Sherrie—ma o se musumusuga foi ia te au.
I lena taeao patino lea na auina atu ai le falaoa, sa uunaia ai Sherrie e fai ni papa falaoa se lua nai lo le tasi sa ia fuafua e fai. Fai mai a ia sa ia lagonaina se uunaiga e alu ma ave le falaoa lona lua i lana taavale i lena aso, e ui lava na te leiloa pe aisea. Ina ua maea se aiga o le aoauli i le fale o se uo, sa amata ona tagi lana tama teine e tasi le tausaga ma na manaomia ona ave i le fale e faamoe. Sa faatuai ia Sherrie ina ua oo atu le lagona le mafaaseseina e faapea e manaomia ona ia auina atu lena falaoa i le uso o Nicole, o Tiffany, lea e 30 minute le mamao i le isi itu o le taulaga ma o le na te tau le masani i ai. Sa ia taumafai ia le amanaiaina lea uunaiga, i le manao e ave lana pepe ua lelava i le fale ma e lagona foi le matamuli e ave se papa falaoa i tagata e le masani tele i ai. Peitai, sa malosi le uunaiga e alu i le fale o Tiffany, o lea sa ia usitai ai i le uunaiga.
Ina ua ia taunuu, sa tali mai e le toalua o Tiffany le faitotoa. Sa faamanatu atu i ai e Sherry ia te ia o ia o le uo a Nicole lea sa la feiloai i le Aso Faafetai, ma tuu atu ia te ia le papa falaoa, ma alu ese atu.
Ma o le mea lena sa tupu, na auina atu e le Alii se tagata e tau le masani ai mai le isi itu o le taulaga e auina atu e le gata o le papa falaoa na tao i le fale sa manaomia ae faapena foi se feau manino o le alofa ia Tiffany. O le mea sa tupu ia te ia e le mafai ona faamatalaina i se isi lava auala. Sa ia te ia se manaoga faanatinati ia lagonaina e le o tuua na o ia—o loo silafia e le Atua o ia ma e le o tuulafoaiina o ia. O lena falaoa—le mea tonu lea sa ia manao i ai—na auina atu ia te ia e se tasi na te tau leiloaina, o se tasi sa lei i ai ma sona iloa e uiga i lona manaoga, ae o se tasi na faalogo i le uunaiga a le Agaga ma mulimuli ai i lena uunaiga. Sa avea ma se faailoga manino ia Tiffany sa silafia ona manaoga e lona Tama Faalelagi ma lava Lona alofa ia te ia e auina atu ai le fesoasoani. Sa tali atu o Ia i ana tagi mo se toomaga.
Ou tuafafine pele, e alofa lo outou Tama Faalelagi ia te outou—outou taitoatasi. E le suia lava lena alofa. E le faatosinaina e ou foliga vaaia, o au meatotino, po o le tele o tupe o loo i ai i lau teugatupe i le faletupe. E le suia e au taleni ma tomai. Ua i ai lava iina. Ua i ai iina mo outou pe a outou faanoanoa pe fiafia, lotovaivai po o le tumu i le faamoemoe. Ua i ai le alofa o le Atua iina mo outou e tusa lava pe ua outou lagona lo outou manaomia pe leai foi se alofa. O loo i ai lava iina i taimi uma.
A tatou saili atu i lo tatou Tama Faalelagi e ala i tatalo faatauanau ma le faamaoni, ma le suesueina o tusitusiga paia ma le naunautai ma le tuuto sili, o le a malolosi ma mauaa loloto a tatou molimau. O le a tatou iloaina le alofa o le Atua mo i tatou. O le a tatou malamalama e le tuua lava na o i tatou. Ou te folafola atu ia te outou o le a i ai se aso tou te mafaufau ai i o outou olaga ma toe tepa i o outou taimi faigata, ma o le a outou iloa ai na i ai lava o Ia iina e le aunoa i ou autafa. Ou te iloa le moni o lenei mea i le maliu ai o la’u soa e faavavau—o Frances Berverly Johnson Monson.
Ou te tuuina atu ia te outou au faamanuiaga. Ou te tuuina atu ia te outou lou lotofaafetai mo mea lelei uma ua outou faia ma mo olaga o outou ola ai. Ou te tatalo ia faamanuiaina outou i meaalofa lelei uma i le suafa o lo tatou Faaola ma le Togiola, le Alii o Iesu Keriso, amene.