Ser Ambisioso pa Kristu
Nos ta ambisioso pa Cristu ora nos ta sirbi fielmente, aseptá humildemente, perseverá noblemente, resa fervientemente, i partisipá dignamente.
Mi kerido rumannan, awe mi ke papia ku e hóbennan di Iglesia inkluyendo nos misioneronan maravioso. Klaro, e rumannan ku ta yòn na kurason tambe ta invitá kalurosamente pa skucha.
Ougùstùs pasá , Presidente Russel M. Nelson a dediká e bunita Tèmpel di Sapporo - e di tres na Hapon. E Tèmpel Sapporo ta traha na parti nòrt di Hapon na un lugá ku yama Hokkaido. Manera Utah, Hokkaido a wòrdu establesé pa pioneronan industrioso i trahadó.
Na 1876, e edukadó renombrá ku yama Dr. William Clark a wòrdu invitá pa bin Hokkaido pa duna lès. E la biba na Hapon pa solamente ocho luna, pero su espíritu Kristian a laga un impreshon profundo riba su studiantenan no Kristian. Promé ku e bai, e la duna su studiantenan un mensahe di despedida ku a wòrdu inmortalisá den un estatua di bròns. E la bisa, “Muchanan, ser ambisioso!” – “Ser ambisioso pa Kristu.” Su mandato pa “Ser ambisioso pa Kristu” por yuda dirigí e desishonnan diario pa e Santunan di Último dia awendia.
Kiko ta nifiká “ser ambisioso pa Kristu”? Ser ambisioso pa Kristu ta nifiká ta motivá, enfoká, i dediká na Su obra. Ser ambisioso pa Kristu poko bia por nifiká ku nos ta haña onornan públiko. Ser ambisioso pa Kristu ta nifiká ku nos lo sirbi fielmente i diligentemente den nos barionan i nos ramanan sin keha i ku un kurason kontentu.
Nos misioneronan ku ta sirbi den hinter mundu ta ehèmpelnan bunita di esnan ku berdaderamente ta ambisioso pa Kristu. Algun aña pasa, Hermana Yamashita i ami a sirbi den e Mishon Japan Nagoya. Nos misioneronan tabata ambisioso pa Kristu. Un di nos misioneronan tabata e hóben yama Elder Cowan.
Elder Cowan no tabatin su pia drechi pa motibu di un aksidente komo mucha. Algun siman despues ku e la drenta su mishon, mi a risibí un yamada di su kompañero. Elder Cowan su pia prostetiko a kibra miéntras e tabata kore baiskel. Nos a hib’e na un lugá pa drech’e, i einan den un kamber priva, mi a mira su pia pa promé bia. Mi a realisá kuantu doló e tabata sufri. Su pia prostetiko a wòrdu drecha, i e la regresá su área.
Sin embargo, miéntras e simannan ta pasa, e pia prostetiko a kontinuá ta kibra kada bia. E konsehero médiko di área a rekomendá pa Elder Cowan bai kas pa un posibel re asignashon di mishon. Mi a risistí e konseho aki pasobra Elder Cowan tabata un bon misionero, i e tabatin un deseo grandi di keda na Hapon. Gruadalmente, Elder Cowan a kuminsá yega su límite físiko. Maske esaki, e no a murmurá ni keha.
Atrobe, mi a wòrdu konsehá pa permití Elder Cowan sirbi na un lugá ku no ta rekerí pa e kore baiskel. Mi a meditá riba e situashon. Mi a pensa riba Elder Cowan i su futuro, i mi a hasi orashon tokante e asuntu. Mi a sinti impreshoná pa, si, Elder Cowan mester bai kas i warda re asignashon. Mi a yam’e i ekspresá mi amor i preokupashon i bis’e mi desishon. E no a bisa nada komo kontesta. Solamente mi por skuch’e ta yora na e otro banda di e telefòn. Mi a bisa, “Elder Cowan, bo no mester kontestá mi aworakí. Lo mi yama bo mañan. Por fabor konsiderá mi rekomendashon ku orashon sinsero.
Ora ma yam’e siguiente dia, e la bisa ku humildemente e lo sigui mi konseho.
Durante mi último entrevista ku ne, mi a hasi e pregunta aki: “Elder Cowan, bo a pidi riba bo formulario mishonal pa nan manda na un mishon kaminda bo no mester kore baiskel?”
E la bisa mi, “Si, Presidente, mi a hasi esei.”
Mi a rospondé, “Elder Cowan, bo a wòrdu yama na e Mishon Japon Nagoya kaminda bo tin ku kore baiskel. Bo a bisa bo presidente di estaka?
Mi tabata sorprendí pa su kontesta. E la bisa, “No, mi no a hasié. Mi a determiná ku si ta einan Señor a yama mi, lo mi bai gym i trein mi kurpa pa mi por kore e baiskel.”
Na konklushon di nos entrevista, e la hasi mi e pregunta aki ku awa na su wowonan, “Presidente Yamashita, dikon mi a bin Hapon? Dikon mi ta akinan?”
Mi a kontestá sin duda, “Elder Cowan, mi sa di un rason pakiko bo ta akinan. Bo a bini pa mi benefisio. Mi a bin komprondé ku mi a sirbi ku un gran hóben. Mi ta bendishoná di ta konosé bo.”
Mi ta kontentu di bisa ku Elder Cowan a regresá su hogar i a wòrdu re asigná pa sirbi den un mishon kaminda e por usa un outo pa su biahenan. Mi ta hopi orguyoso di no solamente Elder Cowan pero di tur misionero rònt mundu ku ta sirbi ku hopi deseo sin murmurá òf keha. Danki, elder i hermananan, pa bo fe, bo enfoke, i bo ambishon fuerte pa Kristu.
E buki di Mormon ta kontené vários historia di esnan ku tabata ambisioso pa Kristu. Alma Yu komo un hóben a persiguí e Iglesia i su miembronan. Despues e la pasa dor di un kambio di kurason dramátiko i a sirbi komo un misionero poderoso. E la buska e guia di Señor, i e la bendishoná su kompañeronan miéntras e tabata sirbi ku nan. Señor a fortales’é, i e la surpasá e tribulashonnan ku e tabata enkontra.
E Alma aki a duna su yu Helaman e siguiente konseho:
“Ken ku pone su konfiansa den Dios lo wòrdu apoyá den su tribulashonnan, i den su difikultatnan, i den su aflikshonnan. …
“… Warda e mandamentunan di Dios. …
“Buska konseho serka Señor den tur bo echonan, i e lo dirigí bo pa bon.”
Nos di dos yu a biba mayor parti di su hubentut pafó di Iglesia. Ora e la hasi 20, e tabatin un eksperensia ku a lag’e tin gana di kambia su bida. Ku amor, orashon, i ayuda di su famia i miembronan di Iglesia, i finalmente e kompashon i grasia di Señor, e la regresá Iglesia.
Despues, e la wòrdu yama pa sirbi den e Mishon Washington Seattle. Inisialmente e a sufri deskurashamentu grandi. Tur anochi den e promé tres lunanan, e tabata bai den baño i yora. Meskos ku Elder Cowan, e la buska pa komprondé, “Dikon mi ta akinan?”
Despues di a sirbi pa un aña, nos a risibí un e-mail ku tabata un kontesta na nos orashonnan. E la skibi: “Aworakí mi por sinti berdaderamente e amor di Dios i di Jesucristo. Lo mi traha duru pa bira manera e profetanan di ántes. Ounke mi ta eksperensiando algun difikultat, mi ta berdaderamente felis. Sirbiendo Hesus, ta e mihó kos ku tin. No tin nada mas maravioso ku esaki. Mi ta hopi felis.”
E la sinti manera Alma; “I oh, ki felisidat, i ki lus maravioso mi a mira; si, mi alma tabata yena ku alegria, mas tantu ku loke mi doló tabata!”
Den nos bidanan nos ta eksperensia tribulashon, pero si nos ta ambisioso pa Kristu, nos por enfoká riba Dje i sinti su felisidat hasta mei mei di nan. Nos Redentor ta e ehèmpel mas grandi. E la komprondé su mishon santu i tabata obediente na e boluntat di Dios e Tata. Ki bendishon spesial ta pa trese Su ehèmpel maravioso na nos memoria kada siman ora nos ta partisipá di e sakramento.
Mi rumannan, nos ta ambisioso pa Kristu ora nos sirbi fielmente, akseptá humildemente, soportá noblemente, hasi orashon fervientemente, i partisipá dignamente.
Ku nos por ta ambisioso pa Kristu ora nos akseptá nos difikultatnan i tribulashon ku pasenshi i fe i haña felisidat den nos kaminda di konvenio.
Mi ta testifiká ku Señor konosé bo. E konosé bo desafionan i preokupashonnan. E konosé bo deseo di sirbi E ku deboshon i, si, hasta ambishon. Ku e por guia bo i bendishoná bo miéntras bo hasi esaki. Den nòmber di Jesucristo, amèn.