Pa nos Desaroyo Spiritual i Enseñansa
E misterionan di Dios ta wòrdu desplegá na nos solamente sigun Su boluntat i por medio di e poder di e Spiritu Santu.
Ora ku mi tabata mucha, mi mayornan a risibí un regalo ku a bira hopi fasinante pa mi ruman hòmber chikitu David i ami. E regalo tabata un modelo na miniatura di e planchinan di oro ku e profeta José Smith a risibí for di e angel Moroni. Manera mi ta kòrda, e miniatura (planchanan) tabatin manera un 10 página di metal ku palabranan skibi riba nan. Pero tòg, e páginanan ei no tabata loke a kaptura nos atenshon.
Nos a wòrdu kriá skuchando e storianan di e Restourashon. Nos tabata sa di, i a kanta den Primaria over di planchanan di oro skondí den profundidat di un inklinashon di seru i entregá dor di e angel Moroni na José Smith. Miéntras ku e kuriosidat di nos mente yòn a wòrdu konmoví, tabatin un kos ku realmente nos ker a Wak: kiko tabatin skibí riba e sekshon chikitu di e planchanan miniatura ku tabata safe seya ku 2 enlasenan di metal chikitu?
E planchanan tabata poné riba un mesa chikitu un par di dia promé ku nos kuriosidat a bira muchu grandi. Anke nos tabata komprondé masha bon mes ku esnan aki no tabata echt e planchanan ku Moroni a distribuí, nos ker a Wak e parti seyá. Asina ta, ku na diferente okashon, mi ruman i ami a purba di usa kuchúnan, kucharanan bieu i kiko ku ta otro ku nos por a pensa riba dje pa lanta e parti seyá di e planchanan djis bastante for di otro pa por a Wak kiko nan tabata kontené --- pero no asina tantu ku e enlasenan chikitu lo kibra. Por lo ménos nos tabata sufisientemente sabí di no a laga indikashon di nos kuriosidat di mala mucha. Na nos desapunto i frustrashon, e intentonan aki pa “lur den e planchanan” tabata semper un frakaso.
Te ainda mi no sa kiko ---si algu mes--- tabata skondí bou di e parti seyá. Pero e parti mas bergonsoso di nos historia ta ku, te ku awe mi no tin un idea kiko tabata skibí riba e parti di e páginanan di metal ku sí tabata intenshoná pa wòrdu lesá. Mi por solamente imaginá ku e páginanan aki tabata kontené relatonan di e Restourashon i testimonionan di José Smith i e Tres i Ocho Testigunan, ku a Wak e planchanan aktual ku Moroni a entregá.
For di e kreashon di e mundu aki, nos amoroso Tata na Shelu a proveé direkshon, guia i instrukshon pa Su yunan por medio di profetanan. Su palabranan a wòrdu pasa dor di e profetanan aki i ta wòrdu wardá komo skrituranan pa nos desaroyo i siñansa. Nefi a deskribié na e manera aki:
“Paso mi alma ta deleitá den e skrituranan, i mi kurason ta konsiderá nan, i ta skibi nan pa e siñansa i e ganashi di mi yunan.
“Wak, mi alma ta deleitá den e kosnan di Señor; i mi kurason ta pensa kontinuamente riba e kosnan ku mi a Wak i tende.”
Ademas, durante di dispensashonnan pasado i den e lastu dispensashon di e Plenitut di Tempu, miembronan digno di Señor su Iglesia a wòrdu bendishoná ku e kompaño konstante di e Spiritu Santu, ku ta yuda den nos desaroyo spiritual i siñansa.
Sabiendo di e karakter diligente di mi ruman hòmber chikí, mi ta imaginá ku ta hopi posibel ku e la lesa tur e palabranan skibi riba e planchanan miniatura den mi mayornan su hogar. Ami, sinembargo, a ignorá e bèrdatnan kla i presioso ei i na lugá a eforsá mi enfoke buskando e kosnan ku no tabata intenshoná pa wòrdu revelá.
Lástimamente, nos desaroyo i siñansa por, tin biaha wòrdu atrasá òf asta pará dor di un deseo mal- konsiderá pa “lur den e planchanan.” E akshonnan aki por hasi ku nos ta buska pa kosnan ku no ta nesesariamente intenshoná pa wòrdu komprondé na e momentu aki, simultaniamente ta ignorá e bèrdatnan presioso ku sí ta intenshoná pa nos i nos sirkunstanshanan---e bèrdatnan ku Nefi a deskribí manera skibí pa nos siñansa i ganashi.
Nefi su ruman hòmber Jakob a siña, “Wak, grandi i maravilloso ta e obranan di Señor. Kon inkomprendibel ta e fondonan di e misterionan di Dje; i ta imposibel ku hendenan lo haña sa tur Su kamindanan. .”
Jakob su palabranan ta siña nos ku nos no por “lur den e planchanan” ku éksito òf fòrsa e misterionan di Dios pa wòrdu revelá na nos. Na lugá, e misterionan di Dios ta wòrdu revelá na nos solamente sigun Su boluntat I dor di e poder di e Spiritu Santu.
Jakob ta kontinuá:
“I niun hende sa di Su maneranan sino ku e ta wòrdu revelá na dje; “p’esei, rumannan, no menospresiá e revelashonnan di Dios.
“Paso Wak, dor di e poder di Su palabra hende a bini riba e superfisie di mundu. … E ora ei, dikon no ta posibel pa komandá e tera, òf e kreashon di Su man riba (mundu) su superfisie, sigun Su boluntat i plaser?
“Pa esei rumannan, no buska pa konsehá Señor, pero pa tuma konseho for di Su man.”
Pa ta posibel pa komprondé e misterionan di Dios, òf e kosnan ei ku por wòrdu komprondé solamente dor di revelashon, nos mester sigui e ehèmpel di Nefi, ku a bisa, “Siendo ekstremamente yòn, no opstante siendo largu na estatura, i tambe teniendo un gran deseo di sa di e misterionan di Dios, pa e motibu ei, mi a sklama na Señor; i Wak E la bishita mi, anto Ela suavisá mi kurason ku mi a kere tur e palabranan ku a wòrdu papiá dor di mi tata.” Señor su mes a splika mas aleu ku Nefi a ehersé fe, a buska ku ferbor ku humildat di kurason, i a tene Su mandamentunan.
E ehèmpel di Nefi pa buska konosementu a inkluí (1) un deseo sinsero, (2) humildat, (3) orashon, (4) konfiansa den e profeta, i un ehérsito di (5) nb} fe, (6) ferbor, i (7) Obedensia. E método di buska aki ta un gran kontraste ku mi “lur den en planchanan” òf purba di fòrsa e komprenshon di kosnan intenshoná pa wòrdu revelá sigun e tempu (reha) di Señor i dor di e poder di e Spiritu Santu.
Den e tempu moderno aki, nos a bin ekspektá ku konosementu por, i lo mester wòrdu optené inmediatamente; ora ku informashon no ta fásilmente hañá òf aksesibel, e ta wòrdu hopi biaha pone na banda òf deskonfiá. Dor di e abundansha di informashon, algun inkonsientemente, ta duna mas kredibilidat na fuentenan aksesibel ku un orígen deskonosí mas ku konfia Señora su patronchi establesé pa risibí revelashon personal. Jakob por tabata deskribiendo nos temporada ora ku e la bisa: “Pero Wak, [nan] tabata hendenan terko; i nan a menospresiá e palabranan ku tabata simpel, …. i a buska kosnan ku nan no por a komprondé. Pa esei, dor di nan sieguedat, kual seguedat a bini dor di pèrdè bista di e punto, nan mester tin ku kai; paso Dios a kita su simplesa for di nan, i a duna nan hopi kos ku nan no por komprondé, paso nan tabata deseá esaki. ”
En kontraste tin Presidente Dieter F. Uchtdorf su konseho. E la papia di misioneronan, pero su palabranan ta mesun aplikabel pa tur buskadó di bèrdat spiritual. “Ora … misioneronan tin fe den JesuCristu,” e la bisa, “nan lo konfia Señor sufisientemente pa sigui Su mandamentunan---- asta ora ku nan no ta komprondé kompletamente e rason pa nan. Nan fe lo wòrdu manifestá dor di diligensia i dor di traha duru.”
Durante di e lastu konferensha general di April, Elder Dallin H. Oaks a splika: “ Iglesia ta hasi gran esfuerso pa ta transparente ku e argifnan ku nos tin, pero despues di tur kos ku nos por publiká, nos miembronan tin biaha ta keda atras ku preguntanan básiko ku no por wòrdu resolvé dor di estudio. …. Tin kos ku solamente por wòrdu siñá dor di fe. ”
Profetanan ansiano a instruí e mesun prinsipio aki, demostrando ku dor di tempu karakter humano no a kambia i ku Señor su patronchi pa siña ta di tur tempu. Konsiderá e proverbio di Tèstamènt Bieu aki: “ Konfia den Señor ku henter bo kurason; i no len riba bo mes su komprenshon.”
Isaías a splika, papiando pa Señor, “Mes haltu ku shelu ta pasa tera, mes leu mi manera di hasi ta for di esun di boso i mi pensamentunan ta pasa boso pensamentunan. ”
Nefi a añadí un otro testimonio ora ku e la proklamá, “O Señor, mi a konfia den bo, i lo mi konfia den bo pa semper.”
Fe i konfiansa den Señor ta rekirí pa nos rekonosé ku Su sabiduria ta superior ku esun di nos. Tambe nos mester rekonosé, ku Su plan ta proveé e potensial di mas grandi pa desaroyo spiritual i enseñansa.
Nunka no a wòrdu ferwagt di nos “pa tin un sabiduria perfekto di kosnan” durante di e eksistensha mortal aki. Na lugá, ta wòrdu ferwagt di nos pa “spera pa kosnan ku no ta wòrdu mirá, ku ta bèrdat. ”
Asta ku e gran fe di Nefi, e la rekonosé su komprondementu limitá ora ku e la respondé na e angel ku a puntr’é, “Bo sa kiko ta e kondesedensia di Dios?” Nefi a respondé, “Mi sa ku E stima Su yunan; no opstante, mi no sa e nifikashon di tur kos. ”
Di manera similar, Alma a ekspresá na su yu Helaman, “Aworakí e misterionan aki ainda no a wòrdu revelá kompletamente na mi; p’esei lo mi wanta. ”
Mi ta ekspresá mi testimonio ku nos Tata na Shelu stima Su yunan, i ya manera Nefi i Alma, mi no sa e signifikashon di tur kos. Ni mi no tin nodi di sa tur kos; mi tambelo wanta i warda ku pasenshi riba Señor, sabiendo ku “Mi tin tur kos komo testimonio ku e kosnan aki ta bèrdat; i boso tambe tin tur kosnan komo testimonio pa bosnan ku nan ta bèrdat. …
“ … E skrituranan ta poné dilanti di boso, si, i tur kos ta mustra ku tin un Dios; si, asta e tera, i tur kos ku ta riba e superfisie di dje, si, i su moveshon, si, i tambe tur e planetanan ku ta move den nan forma regular ta testifiká ku tin un Kreador Supremo. ”
Sigun nos ta rekonosé ku nos ta kreashon di un Tata na Shelu sabio i dediká, “ E ora ei”, dikon nos no ta lag’é guia nos desaroyo spiritual i enseñansa “sigun Su boluntat i plaser” na lugá di esun di nos?
E ta bibu. JesuCristu ta Su Yu Unigenito i e Redentor di humanidat. Dor di Christu su Ekspiashon Infinito, E tin e sabiduria i perspektiva pa guia nos den e delaster dianan aki. José Smith ta Su profeta, eskohé pa restourá Su reino riba tera den su plenitut. Thomas S. Monson ta Su profeta bibiente i bosero awendia. Di esaki mi ta duna mi testimonio sinsero den e nòmber di JesuCristu, amèn.