Señor JesuCristu ta Siña Nos Hasi pa Orashon
Ora boso ta hasi orashon, boso ta hasi orashon ku intenshon berdadero òf boso ta hasi orashon djis pa hasi?
Den 1977, mi tabata sirbí komo un misionero di tempu kompleto den Cusco, Perú. Mi kompañero i ami a risibí un aprobashon pa bai ku tur e misioneronan den e zona di Cusco na e ruinanan magnífiko Machu Picchu.
Serka di fin di nos bishita na e ruinanan, un par di e misioneronan kier a bai na e Brùg di Inka, parti di un kaminda den seru. Inmediatamente, mi a sinti den mi kurason e Spiritu tabata limitá mi pa no bai e nan. E kaminda tabata pasa kantu di un seru ku tin un kaida di 600 meter. Na vários parti e kaminda tabata solamente sufisiente hanchu di moda ku ta un persona so por a pasa kada biaha. Mi kompañero ami a bisa nan ku nos lo no bai na na e Brùg di Inka.
Sinembargo, e misioneronan a keda insistí pa nos bai. I e petishonnan a bira mas intenso,i apesar di lokual e Spiritu a indiká na mi, mi a sukumbí na e preshon di e grupo i a bisa nan ku nos lo bai bishita e brùg solamente si nos lo ta hopi kuidadoso.
Nos a subi e kaminda ku ta hiba na e Brùg di Inka ku ami na fin di e grupo, i na kuminsamentu nos tur tabata kana trankil, manera a palabrá. Despues e misioneronan a kuminsá kana masha lihé i hasta a kore. Nan a ignorá mi petishon pa bai poko poko. Mi a sinti mi obligá pa yega serka nan, i a bisa nan ku nos tin ku bira bek. Mi tabata leu patras di nan, mi mester a kore duru pa por a alkansá nan.
Yegando na un birada, den un pasashi muchu smal pa dos hende por pasa pareu, mi a haña un misionero pará ketu ku su lomba pega na e baranka. Mi a puntr’é di kon e tabata pará einan. E la bisa mi ku e la haña un impreshon pa keda para na e lugá ei pa un ratu i ku ami tin ku sigui bai.
Mi a sinti e urgensia pa alkansá esnan nos dilanti, asina ku el a yuda mi pa mi por a pas’é, i mi ta por a sigui pa dilanti riba e kaminda, mi ripara ku e ku e tera tabata yen di mata bèrdè. Mi a pone mi pia drechi riba tera, realisando,segun mi ta kayendo, ku no tabatin tera bou di e matanan bèrdè. Desesperá mi a gara algun taki ku tabata bou di e kaminda. Pa un momentu mi por a wak abou, algun 600 meter bou di mi, e Riu Urubamba ku ta krusa e Vaye Sagrado di e Inkanan. Mi a sinti manera ku mi forsa a kaba laga mi, i tabata solamente un kuestion di tempu ku lo mi no por a tene mas. Na e momentu ei, mi a hasi orashon intensivamente. E orashon tabata masha kòrtiku. Mi a habri mi boka i a bisa. “Tata, yuda mi!”
E takinan no tabata sufisientemente fuerte pa por a soportá e peso di mi kurpa. Mi tabata sa ku e fin tabata serka. I den e mes un momentu ku mi tabata bai kai, mi a sinti un man firme tene mi na mi brasa i a hala mi ariba. Ku e ayudo ei, mi por a sigui lucha pa mi por a subi riba e kaminda bek. Ta e misionero ku a keda patras ta esun ku a salba mi.
Pero en realidat ta nos Tata na Shelu a salba mi. El a skucha mi bos. Mi a skucha e bos di e Spiritu tres biaha kaba, bisando mi pa no bai na e Brùg di Inka, pero mi no obedesé e bos. Mi tabata den shòk, mi tabata pàlido, i mi no tabata sa kiko mi tin ku bisa. Despues mi a kòrda ku e otro misioneronan tabata mas dilanti nos, i pues nos a bai buska nan te ora ku nos a haña nan i konta nan loke a pasa ku mi.
Nos a regresá bek na Machu Picchu, masha kuidadosamente, i den silensio. Na e regreso di e biahe mi a keda ketu, i a bini e idea na mi mente ku El a pone atenshon na mi bos pero ku ami no a pone atenshon na Su bos. Tabatin un doló inmenso den mi kurason pa a desobedesé Su bos i na mes momentu un sentimentu profundo di gradesimentu pa Su miserikòrdia. E no a ehersé Su huisio riba mi, pero den Su gran miserikòrdia, El a salba mi bida (wak Alma 26:20).
Na final di e dia, ora tabata momentu pa mi hasi mi orashon personal, mi a hasi orashon ku mi kurason na e “Tata di miserikòrdia, i e Dios di tur konsolashon” (2 Korintionan 1:3). Mi a hasi orashon”ku un kurason sinsero, ku intenshon berdadero, teniendo fe den Cristu” (Moroni 10:4).
Mainta trempan di e mesun dia ei, mi a hasi orashon ku mi lepnan, i ora mi tabata serka di pèrdè mi bida, mi a hasi orashon for di mi kurason na Dje. Na e momentu ei mi a meditá riba mi bida. Mi a haña ku na hopi okashon, nos Tata na Shelu tabata hopi miserikòrdioso ku mi. El a siña mi hopi lèsnan e dia ei na Machu Picchu i naCusco, Perú. Un di e lèsnan di mas importante tabata ku semper, semper lo mi mester hasi orashon “ku un kurason sinsero, ku intenshon berdadero, [ehersiendo] fe den Cristu.”
Na un okashon nos Señor JesuCristu “tabata hasi orashon na sierto lugá,” i “ora ku el a kaba, un di su disipelnan a puntr’e, Señor, siña nos hasi orashon” (Lukas 11:1). E ora ei el a siña su disípulonan ta kon ta hasi orashon. I awe E ta siña boso i ami pa hasi orashon ora nos ta mir’e den nos mente hasiendo orashon den Getsémani bisando, “No opstante no mi boluntat, sino di bo, lo wòrdu hasi” (Lukas 22:24). Ora boso ta hasi orashon, realmente di bèrdat boso ke pa, “no mi boluntat, pero di bo, sea hasí”?
Pablo ta deskribí kon Jesus a hasi orashon “durante su bida na mundu,” espesialmente den Getsémani: “Ora e la ofresé orashonnan i súplikanan bou di gritu i yoramentu na e ku tabata kapas pa salb’é for di morto, el a wòrdu skucha pasobra el a someté su mes na Dios” (Hebreonan 5:7). Ora boso ta hasi orashon, boso ta hasi orashon ku intenshon berdadero òf boso ta hasi orashon djis pa hasi? Boso ta superfisial den boso orashonnan?
Jesus a hasi orashon intensivamente i papia ku Su Tata,”I a sosodé, ku Jesus tambe a batisá, i orando, e shelu a habri” (Lukas 3:21). Ora boso ta hasi orashon, boso ta sinti manera ku shelu ta habrí? Kuantu tempu pasá bo a sinti e komunikashon ei ku shelu?
Jesus a prepará su mes pa tuma desishonnan importante hasiendo orashonnan na Su Tata.
“El a bai den seru pa hasi orashon, i a siguí henter anochi den orashon ku Dios.
“I ora a bira di dia, el a yama su disipelnan serka dje: i for di nan e la skohe diesdos” (Lukas 6:12–13).
Boso ta prepará boso mes pa tuma desishonnan importante dor di hasi orashon na boso Tata Selestial? Boso ta prepará boso mes pa un momentu di orashon?
Ora Jesus a bini na e kontinente Amerikano, E la siña e hendenan pa hasi orashon. ”I Jesus a bisa nan: sigui hasi orashon; sinembargo nan no a stòp di hasi orashon” (3 Nefi 91:26).
Jesus ta invitá nos pa hasi “orashon semper” (Doktrina i Kombenio 10:5). Jesus sa ku nos Tata Selestial ta skucha i duna lokual ta mihó pa nos. Dikon tin biaha nos no ke risibí? Dikon?
Na mes momentu ku nos bisa, “Tata na Shelu,” E ta skucha nos orashonnan i ta sensitivo na nos i nos nesesidatnan. I asina Su wowonan i Su oreanan awor ta konektá ku boso. E ta lesa nos mente, i E ta sinti nos kurason. Boso no por skonde nada p’E. Awor, e kos maravioso ta ku E ta wak boso ku wowonan di amor i miserikòrdia---amor i miserikòrdia ku nos no por wòrdu komprondé kompletamente. Pero amor i miserikòrdia ta huntu Kuné asina ku n’e, na mes momentu ku boso bisa, “Tata na Shelu.”
Pues un momentu pa hasi orashon ta un momentu masha, masha sagrado. E no ta un persona ku ta bisa, “No, Mi no ke skucha bo aworakí, pasombra bota bini serka mi solamente ora ku bo tin problema.” Hende so ta hasi esei. E no ta un ku ta bisa, “O, bo no por imaginá bo kon okupá mi ta awor aki.” Hende so ta bisa esei.
Ku nos tur por hasi orashon manera Jesus a siña nos hasi orashon ta mi speransa i orashon den nòmber di Señor JesuCristu, amèn.