E Santa sena Por yuda Nos pa Bira Santu

Pa Elder Peter F. Meurs

Di e Setenta

Konsiderá sinku manera pa oumentá e impakto i poder di nos partisipashon na e ordenansa sagrado di santa sena.

Un di mi promé rekuerdonan ta di reunionnan sakramental hasí na nos kas na Warrnambool, Australia. Entre 10 òf 15 hende a partisipá den nos rama, i mi tata, un di e tres poseedor nan di saserdosio, regularmente tabatin e oportunidat pa bendishoná e santa sena. Mi ta kòrda e sintimentunan ku mi tabatin ora e ku humildemente i kuidadosamente e tabata lesa e palabranan di e orashon di santa sena. Hopi biaha su bos tabata tembla ora ku e tabata sinti e Spiritu. Tin biaha e mester a stòp pa e por a kontrolá su emoshonnan promé ku e por kaba e orashon.

Ku sinku aña di edat, mi no tabata por komprondé e nifikashon kompletu di lokual tabata wòrdu bisá òf hasí; sinembargo, mi tabata sa ku algu importante tabata sosedé. Mi por a sinti e influensia kalmu i trankilisante di e Spiritu Santu ora mi tata tabata kontemplá e Salbador su amor pa nos.

E Salbador a siña: “Esaki boso mester hasi semper na esnan ku arepentí i a boutisá den mi nòmber; i boso ta hasié den memoria di mi sanger, ku mi a drama pa boso, pa boso testifiká na e Tata ku boso semper ta kòrda mi. I si boso kòrda mi semper boso lo tin mi Spiritu huntu ku boso” (3 Nefi 18: 11).

Mi ta invitá nos tur pa konsiderá sinku manera pa oumentá e impakto i poder di nos partisipashon regular na e ordenansa sagrado di e santa sena, un ordenansa ku por yuda nos bira santu.

1. Prepará Adelantá

Nos por kuminsá nos preparashon pa e santa sena hopi promé ku e reunion di sakramental kuminsá. Djasabra lo ta un bon momentu pa kontemplá nos progreso spiritual i preparashon.

Mortalidat ta un regalo esensial den nos biahe pa bira manera nos Tata Selestial. Pa nesesidat, ta inkluí pruebanan i difikultatnan ku ta duna nos oportunidat pa por kambia i krese. Rei Benjamin a siña “ku e hòmber natural ta enemigu di Dios, … i lo keda, pa semper i semper, a ménos ku e someté na e persuashon di e Spiritu Santu, i despohá di e hòmber natural i bira un santu pa medio di e Ekspiashon di Cristu e Señor” (Mosia 3:19). Partisipashon na e ordenansa di santa sena ta duna nos e oportunidat pa nos entregá nos kurason i alma ku mas frekuensia na ku Dios.

Den nos preparashon, nos kurason ta bira kibrá ora nos ta ekspresá gratitut pa Cristu su Ekspiashon, arepentí di nos faltanan i debilidatnan, i pidi e Tata pa e por yuda nos den siguimentu di nos biahe pa bira manera Dje. Nos por mira pa dilanti pa e oportunidat ku e santa sena ta duna pa kòrda e Su sakrifisio i renobá nos kompromiso na tur e kombenionan ku nos a hasi.

2. Yega Tempran

Nos eksperensia sakramental por mehorá ora nos yega muchu mas promé ku e reunion i meditá ora e músika di preludio ta wòrdu toká.

Presidente Boyd K. Packer a siña: “Preludio di músika, toká ku reverensia, ta alimento pa e spiritu. E ta invitá inspirashon.” “Esaki no ta momentu,” Presidente Russell M. Nelson a spliká, “pa kombersashon òf transmití mensahe, pero un periodo di meditashon ku spiritu di orashon, miéntras ku e lidernan i miembronan ta prepará spiritualmente pa e santa sena.”

3. Kanta i Siña di e Palabranan di e Himno Sakramental

E himno sakramental ta un parti espesialmente importante pa nos eksperensia sakramental. Músika ta elevá nos pensamentunan i sintimentunan. E himno sakramental ta mas poderoso ainda ora nos enfoká riba e palabranan i e doktrina poderoso ku ta wòrdu siñá. Nos ta siña mas for di e palabranan manera “Gòlpiá, kibrá, di sker pa nos”“laga nos rekordá i ta sigur ku nos kurason i mannan ta limpi i puru,”i “kaminda hustisia, amor, i miserikòrdia ta topa den harmonia dibino!”

Ora nos ta kanta un himno den preparashon pa partisipá di e emblemanan, e palabranan por bira parti di nos kompromiso bou di kombenionan. Konsiderá, por ehèmpel, “Nos ta stima bo, Señor; nos kurason ta yen. Nos ta kana e kaminda ku bo a skohé.”

4. Partisipá Spiritualmente den e Orashonnan Sakramental (Wak Moroni 4–5)

Enbes di tende sin skucha e palabranan familiar di e orashonnan sakramental, nos por siña i sinti mas ainda si nos partisipá spiritualmente konsiderando e kompromisonan asosiá na e bendishonnan inkluí den e orashonnan sagrado aki.

E pan i e awa ta bendishoná i santifiká pa nos alma. Nan ta kòrda nos riba e sakrifisio di e Salbador i ku E por yuda nos bira santu.

E orashonnan ta splika ku nos ta partisipá di e pan den memoria di e kurpa di e Yu, kual El a duna komo un reskate pa kualifiká tur pa e resurekshon, i nos ta bebe e awa den memoria di sanger di e Yu, kual El a drama libremente pa asina nos por wòrdu redimí ku kondishon ku nos lo arepentí.

E orashonnan ta introdusí e kombenio ku e frase “ku nan ta dispuesto” (Moroni 4:3) E frase aki tin asina tantu poder potensial pa nos. Nos ta dispuesto pa sirbi i partisipá? Nos ta dispuesto pa kambia? Nos ta dispuesto pa atendé nos debilidatnan? Nos ta dispuesto pa alkansá otronan i bendishoná nan. Nos ta dispuesto di konfia e Salbador?

Manera e promesa ta establesé i nos ta partisipá, nos ta konfirmá den nos kurason ku nos ta dispuesto pa:

Tuma riba nos mes e nòmber di JesuCristu.
Hasi esfuerso pa mantené tur Su mandamentunan.
Rekord’é semper.

E orashon ta konkluí ku un invitashon sublime i un promesa: “Pa nan por tin su Spiritu semper huntu ku nan” (Moroni 4:3).

Pablo a skirbi, “E fruta di e Spiritu ta amor, goso, pas, pasenshi, amabilidat, bondat,fieldat, humildat, [i] dominio propio” (Galatanan 5:22–23). Bendishonnan i donnan bunita ta disponibel pa nos si nos warda nos kombenionan.

5. Reflekshoná i Rekord’é ora e Emblemanan di Santa Sena Ta Pasando.

E na momentunan reverente ora ku poseedornan di saserdosio ta pasa e santa sena por bira sagrado pa nos.

Ora e pan ta pasando, nos por reflekshoná ku den e último akto di amor pa nos, e Salbador a tuma “morto riba dje, pa e por los e ”lasonan di morto ku ta mara su pueblo” (Alma 7:12).

Nos por rekordá e bendishon glorioso di e resurekshon aki ku ” lo bini na tur, … tantu katibu komo liber, tantu hòmber komo muher, tantu malbado komo hustu; asta ku ni un kabei di nan kabes lo wòrdu pèrdí; pero tur kos lo wòrdu restourá na nan forma perfekto. (Alma 11:44).

Ora e awa ta pasando, nos por rekordá e petishon di e Salbador:

Mira aki, Ami, Dios, a sufri e kos nan aki pa tur, pa nan no tin nodi sufri ku nan arepentí; …

“Di kua e sufrimentu a kousa mi mes, ku ta Dios, e mas grandi di tur, tembla pa kousa di doló, i drama sanger di tur porio, i sufri tantu den kurpa komo spiritu--- i tabata ke pa mi no mester a bebe for di e kopa margá ei, i desmayá” (D&C 19:16,18).

Nos ta rekordá ku El a tuma “ riba dje [nos] enfermedatnan, pa su entraña yena ku miserikòrdia, di akuerdo ku e karni, pa e por kòrda konforme e karni pa e por yuda su pueblo di akuerdo ku[nos] enfermedatnan” (Alma 7:12).

Ora nos ta konsiderá e eksperensia durante santa sena, nos por puntra nos mes:

Kiko lo mi hasi e siman aki pa ta mihó prepará pa e santa sena?
Mi por kontribuí mas na e reverensia i revaluashon ku ta kompañá e kuminsamentu di e reunion sakramental?
Kua doktrina a wòrdu siñá den e himno sakramental?
Kiko mi a tende i sinti ora mi a skucha e orashon sakramental?
Kiko mi tabata pensa ora e santa sena tabata pasa ?

Elder David A. Bednar a siña: “E ordenansa di e santa sena ta un ripitishon i invitashon sagrado pa arepentí i sinseramente pa wòrdu renobá e spiritualmente. E akto di partisipá na e santa sena, riba su mes, no ta redimí piká. Pero ora nos prepará konsientemente i partisipá den e ordenansa sagrado aki ku un kurason kibrá i un spiritu kontrito, e ora ei e promesa ta ku nos lo tin e spiritu di Señor semper ku nos. I pa medio di e poder sagrado di Spiritu Santu komo nos kompañero konstante, nos por tin semper un remishon di nos pikánan.”

Mi ta testifiká di un multitut di bendishon disponibel na nos si nos oumentá nos preparashon i partisipashon spiritual den e ordenansa di e santa sena. Mi ta sigui testifiká ku e bendishonnan aki ta na nos alkanse pa medio di e amor di nos Tata na Shelu i e pa e sakrifisio ekspiatorio infinito di Su Yu stimá, JesuCristu. Den Su nòmber sagrado, hasta JesuCristu, amèn.