Mira na e Buki, Mira na Señor
Bo por wak e Buki di Mormon komo bo klave, bo sentro spiritual di forsa?
Mary Elizabeth Rollins
Den mi mente, mi ta imaginá boso di e generashon ku ta lanta mirando òf skuchando na e seshon di konferensia aki un kaminda òf otro den e mundu. Lo mi tin gana kompartí un storia berdadero ku boso, un storia kua por ta tur dos un ehèmpel i un lès. E por mustrá boso kon pa yega mas serka di Señor i alkansá poder mas grandi pa resistí tentashon.
Esaki ta un storia di un mucha muhé yòn, bibando na New York, kende a promé ku el a hasi tres aña a pèrdè di tata ora su boto a hundi riba un lago grandi. E, su mama, ruman hòmber mayor, i ruman muhé menor a muda na un stat nobo den un otro estato pa biba ku su tanta i omo. Algun tempu despues ku e famia yega, misioneronan i miembronan di un religion nobo organisá a bini na nan stat ku notisia glorioso di e Restorashon di e evangelio. Nan a konta un storia remarkabel di un angel ken a entregá un registro ansiano na un hòmber yòn yamá Joseph Smith, un registro ku el a tradusí pa e poder di Dios. Dos di e bishitantenan, Oliverio Cowdery i John Whitmer, a aktualmente wak e páginanan di metal grabá di e registro ansiano ku nan wowonan, i Whitmer a testifiká ku el a wanta e plachinan di oro den su mannan. E registro a wòrdu publiká resientemente, i Hermano Whitmer a trese un buki ku ne. E nòmber di e buki, por supuesto, tabata e Buki di Mormon.
Ora Mary di 12 aña a skucha e misioneronan papia tokante e buki, e tabatin un sentimentu speshal den su kurason. Aunke e Buki di Mormon tabata diki ku hopi páginanan, Mary a anhelá pa les’é. Ora Hermano Whitmer a sali, el a duna un kopia presioso di e buki na Hermano Isaac Morley, kende tabata un amigu di Mary su omo i un lider lokal den e iglesia nobo.
Mary a skirbi mas lat: “Mi a bai [Hermano Morley su] kas … i a puntra pa wak e Buki; [e] a pon’é den mi man, [i] miéntras mi tabata mirando e, mi a sinti asina un deseo pa les’é, ku mi no por a keda sin puntr’é pa laga mi hib’é kas i les’é. … El a bisa … e mes ni tabatin tempu pa lesa ni un kapitulá den dje ainda, i ainda asta tiki di e hermanonan a wak e, pero mi a pidié asina seriamente p’é, ku finalmente el a bisa, ‘yu, si bo lo trese e buki aki bèk promé ku desayuno mayan mainta, bo mag di bai ku ne.”
Mary a kore bai kas i tabata asina kapturá pa e buki ku el a keda lanta kasi henter anochi lesando e. E siguiente mainta ora el a bolbe e buki, Hermano Morley a bisa, “Mi ta suponé ku bo no a lesa hopi den dje” i “mi no ta kere ku bo por bisa mi ni un palabra di dje.” Mary a para stret i a ripití for di memoria e promé versíkulo di e Buki di Mormon. El a sigui kont’é e storia di e profeta Nefi. Mary despues a skirbi, “El a mira mi di sorpresa, i a bisa, ‘yu, tuma e buki aki kas i kaba ku ne, mi por warda.’”
Tiki tempu despues, Mary a kaba lesa e buki i tabata e promé persona den su stat pa lesa henter e buki. E tabata sa ku e tabata berdadero i a bini for di Tata Selestial. Ora e tabata mira na e buki, e tabata mira na Señor.
Un luna despues, un bishitante speshal a bini nan su kas. Aki ta loke Mary a skirbi tokante su enkuentro memorabel e dia ei: “Ora [Joseph Smith] a wak mi el a mira mi asina seriamente. … Despues di un momento òf dos el … a duna mi un gran bendishon … i a duna mi un regalo di e buki, i a bisa e lo duna Hermano Morley un otro [kopia]. … Nos tur a sinti ku e tabata un hòmber di Dios, pasobra el a papia ku poder, i manera unu ku tin outoridat.”
E mucha muhé aki, Mary Elizabeth Rollins, a wak otro milagernan den su bida i semper a mantené su testimonio di e Buki di Mormon. E storia aki tin nifikashon speshal pa mi pasobra e ta mi tanta grandi di sinku generashon pasa. Dor di Mary su ehèmpel, huntu ku otro eksperensianan den mi bida, mi a siñá ku unu nunka ta demasiado yòn pa buska i risibí un testimonio personal di e Buki di Mormon.
E Klave di Bo Testimonio
Tin un lès personal pa boso den Mary su storia. Kada un di boso hòmbernan hóben, muhénan hóben, i muchanan por tin e mesun sentimentu ku e tabata tin. Ora boso ta lesa e Buki di Mormon i resa ku un deseo pa sa si e ta berdadero, bo tambe por risibí e mesun impreshon den bo kurason ku Mary a risibí. Bo tambe por haña ku ora bo ta para i duna testimonio di e Buki di Mormon, bo lo sinti e mesun spiritu di konfirmashon. E Spiritu Santu lo papia na bo kurason. Bo tambe por sinti e mesun spiritu di konfirmashon aki ora bo ta tende otronan kompartí nan testimonionan di e Buki di Mormon. Kada un di e testigunan spiritual aki por resultá na e Buki di Mormon birando e klave di bo testimonio.
Laga mi splika. E Profeta Joseph Smith, kende a tradusí e Buki di Mormon “dor di e don i poder di Dios,” a deskribí e Buki di Mormon komo “e mas korekto di kualke buki riba mundu, i e klave di nos religion.”
Desde e Buki di Mormon su promé ku e a wòrdu imprimí na 1830, mas ku 174 mion kopianan a wòrdu publiká na 110 diferente idioma, mustrando ku e Buki di Mormon ta ainda e klave di nos religion. Pero kiko esei ta nifiká pa kada un di boso?
Den términonan di arkitektura e klave ta e elemento prinsipal den un entrada ku bog. E ta e piedra formá manera un wei den e sentro i na e punto di mas haltu di un bog. E ta esun mas importante di e piedranan pasobra e ta mantené e bandanan di e bog den lugá, preveniendo ku e ta kai aden. I e ta e elemento struktural ku ta sigurá ku e porta, òf e apertura abou, ta pasabel.
Den términonan di evangelio e ta un don i bendishon for di Señor ku e klave di nos religion ta algu asina supstansial ku e Buki di Mormon i ku bo por want’é i les’é. Bo por wak e Buki di Mormon komo bo klave, bo sentro spiritual di forsa?
Presidente Ezra Taft Benson a ekspandé riba e siñansanan ei di Joseph Smith. El a bisa: “Tin tres manera den kua e Buki di Mormon ta e klave di nos religion. E ta e klave den nos testigu di Cristo. E ta e klave di nos doktrina. E ta e klave di testimonio.”
Presidente Benson ta sigui siñá: “E Buki di Mormon ta siñá nos bèrdat [i] ta karga testimonio di Cristo. … Pero tin algu mas. Tin un poder den e buki kua lo kuminsá kore den bo bida e momentu bo ta kuminsá un estudio serio di e buki. Bo lo haña poder mas grandi pa resistí tentashon. … Bo lo haña e poder pa keda riba e kaminda stret i smal.”
Mi Testigu Personal
Den mi kaso e Buki di Mormon a bira e klave di mi testimonio durante un período di añanan i durante un number di eksperensianan. Un eksperensia poderoso den e formashon di mi testimonio a pasa ora mi tabata un misionero yòn sirbiendo den mi promé área: Kumamoto, Hapon. Mi kompañero i ami tabata buska hende pa kombertí bayendo kas pa kas. Mi a konose un abuela kende a invitá nos kariñosamente pa drenta su kas, kua ta wòrdu yamá un genkan na hapones. El a ofrese nos un bebida friu riba un dia kalor. Mi no tabata na Hapon hopi largu ainda, i mi a resientemente kumpli lesa e Buki di Mormon i tabata resando pa sa ku sertesa ku e tabata berdadero.
Pasobra mi tabata asina nobo na Hapon, mi no tabata papia hapones hopi bon. Defakto, mi no ta kere ku e señora aki a komprendé hopi di loke mi tabata bisando. Mi a kuminsá siñ’é tokante e Buki di Mormon, deskribiendo kon Joseph Smith a risibí for di un angel un registro ansiano grabá riba plachinan i kon el a tradusí nan pa e poder di Dios.
Miéntras mi tabata dunando mi testimonio ku e Buki di Mormon ta e palabra di Dios i un otro testimonio di JesuCristo, mi a risibí e impreshon mas fuerte, kompañá pa un sentimentu kaloroso di konsuelo i serenidat paden di mi pechu, kua e skrituranan ta deskribí komo “bo pechu [kimando] paden di bo.” E sentimentu aki a reafirmá na mi den un manera poderoso ku e Buki di Mormon berdaderamente ta e palabra di Dios. Na e tempu ei, mi sentimentu tabata asina fuerte ku lágrimanan a bini na mi wowonan ora mi tabata papiando ku e abuela hapones aki.
Bo Testigu Personal
Kada un di boso tambe por risibí un testigu personal di e buki aki! Bo ta realisá ku e Buki di Mormon a wòrdu skirbi pa bo—i pa bo dia? E buki aki ta un di e bendishonnan di biba den loke nos ta yama e dispensashon di e plenitut di tempunan. Aunke e Buki di Mormon a wòrdu skirbi pa outornan inspirá ansiano—hopi di nan tabata profetanan—nan i e hende di nan dia no tabatin e benefisio di poseé e buki kompletu. Bo awor tin fásilmente den bo alkanse e sagrado registro kua profetanan, saserdotenan, i reinan a apresiá, brasá, i preservá! Bo tin e benefisio di tin den bo man e buki di Mormon kompletu. Ku interes, un di e profetanan di e Buki di Mormon, Moroni, a wak nos dia—bo dia. El a asta wak abo, den vishon, hopi shen di aña pasá! Moroni a skirbi:
“Ata awor, Señor a mustra mi kosnan grandi i maravioso tokante … dia ku e kosnan aki,” papiando di e Buki di Mormon, “sali na kla entre boso.
“Ata’ki, mi ta papia ku boso komo si fuera ku boso tabata presente, pero tòg boso no ta. Pero wak, JesuCristo a mustra boso na ami, i mi konosé boso echonan.”
Pa yuda e Buki di Mormon bira e klave di bo testimonio, mi ta duna boso un reto. Mi a siñá resientemente ku hopi hendenan yòn ta gasta un averahe shete ora pa dia mirando na pantayanan di televishon, kòmpiuter, i selular. Ku esei den mente, bo lo konsiderá hasi un kambio chikitu? Lo bo remplasá diario algun di e tempu di pantaya ei—partikularmente esun devoto na media sosial, e internèt, hunga wega, òf televishon—ku e lesamentu di e Buki di Mormon? Si e estudionan mi ta usando ta korekto, bo por fásilmente haña tempu pa studia e Buki di Mormon kada dia asta si ta solamente pa 10 minüt. I bo por studia den un manera ku ta permití bo pa disfrut’é i komprend’é—òf riba bo dispositivo òf den forma di buki. Presidente Russell M. Nelson resientemente a koutela, “Nos nunka mester hasi lesa e Buki di Mormon parse manera un deber fastioso, meskos ku tuma un medisina ku smak malu mester wòrdu guli lihé i despues nos por haak e af ku finalidat.”
Pa algun di boso muchanan mas yòn, bo por lesa ku un mayor, abuelo, òf ser kerí. Si un kapítulo, versíkulo, òf porshon ta bira asina difísil pa deskurashá bo lesamentu, sigui na e siguiente i e siguiente. Mi ta visualisá bo siguiendo e ehèmpel di Mary. Mi ta visualisá bo ku goso haña tempu i un lugá ketu pa lesa e Buki di Mormon. Mi ta mira bo deskubriendo kontestanan, sintiendo guia, i ganando bo mesun testimonio di e Buki di Mormon i un testimonio di JesuCristo. Ora bo ta mira na e buki, bo ta mira na Señor.
Bo lo lesa e pasashinan di e buki presioso aki i enkontrá bo Salbador stimá, Señor JesuCristo, riba kasi kada página. E ta wòrdu kalkulá ku un forma di Su nòmber ta wòrdu usá un averahe di un biaha kada 1.7 versíkulonan. Asta Cristo Sumes a testifiká di su berasidat den e delaster dianan aki, deklarando, “Komo bo Señor i bo Dios ta biba e ta berdadero.”
Mi ta gradisí pa e invitashon i promesa ku Señor a duna dor di e profeta Moroni na kada un di boso—i na kada persona kende ta lesa e Buki di Mormon. Mi ta sera pa lesa e invitashon i promesa aki i ta pone mi testimonio aserka: “I ora boso risibí e kosnan aki [e Buki di Mormon], mi lo amonestá boso pa boso puntra Dios, e Tata Eterno, den e nòmber di [Jesu] Cristo, si e kosnan aki no ta bèrdat; i si boso pidi ku un kurason sinsero, ku berdadero intenshon, ku fe den Cristo, e lo manifestá e bèrdat di dje na boso, pa e poder di Spiritu Santu.”
Mi ta duna mi testimonio di e Restorashon di e evangelio den e delaster dianan aki i di e Buki di Mormon komo evidensia supstansial di e Restorashon ei. Meskos ku e palabranan di e buki aki a inspirá un mucha muhé di 12 aña pa brasa e Iglesia di Cristo restorá kasi dos siglo pasa, e bèrdatnan bo lo haña einan lo elevá i inspirá bo den un manera similar. Nan lo fortalesé bo fe, yená bo alma ku lus, i prepará bo pa e futuro ku apénas bo tin e abilidat pa komprendé.
Paden di e buki su páginanan, bo lo deskubrí e amor infinito i grasia inkomprensibel di Dios. Manera ku bo ta trata di sigui e siñansanan ku bo ta haña einan, bo goso lo ekspandé, bo komprendementu lo oumentá, i e kontestanan ku bo ta buska pa e hopi retonan mortalidat ta presentá lo wòrdu habrí na bo. Manera ku bo ta mira na e buki, bo ta mira na Señor. E Buki di Mormon ta e palabra revelá di Dios. Di esaki mi ta testifiká, ku henter mi kurason i alma, den e nòmber di JesuCristo, amèn.