Ejerovia Jehova rehe, ha ani ejeko
Ikatu ñacentra ñande rekove pe Salvador-re jaikuaávo Chupe, ha Ha’e odirihita ñande rapekuéra.
Aviaja aja Asia-re, peteĩ hermana ahayhuetéva oñemboja cherendápe, che’añua ha oporandu chéve: “¿Añetehápe reguerovia ko evangelio ha’e añeteguaha?”. Che hermana ahayhuetéva, aikuaa añeteguaha. Ajerovia Ñandejárare.
Proverbios 3:5–6-pe, ñamoñe’ẽ ko ñemoñe’ẽ:
“Ejerovia Jehová rehe opa ne korasõ reheve, ha ani ejeko ne arandúre.
“Ehechakuaa chupe opa nde rapekuérape, ha ha’e omoĩporãta nde vereda-kuéra”.
Ko escritura ou peteĩ ñemoñe’ẽ, peteĩ advertencia ha peteĩ promesa gloriosa reheve.Pe ñemoñe’ẽ: “Ejerovia Jehová rehe opa ne korasõ reheve”, ha “Ehechakuaa chupe opa nde rapekuérape”. Pe advertencia: “…ani ejeko ne arandúre”.Ha pe promesa gloriosa: “…ha’e omoĩporãta nde vereda-kuéra”.
Ñañe’ẽ raẽ pe advertencia rehe.Pe ta’anga ojehecháva ome’ẽ ñandéve heta ñapensa haĝua. Pe advertencia ou umi ñe’ẽme “ani ejeko” – “ani ejeko ne arandúre”. Pe ñe’ẽ ejeko he’ise eñemovã físicamente térã emỹi peteĩ lado gotyo. Ñañemovãrõ físicamente peteĩ tenda térã ambue gotyo, ñañemomombyry pe mbytetégui, japerde equilibrio ha javava. Jajekórõ espiritualmente ñane arandúre, ñañemovã, ñañemomombyrývo ñande Salvador-gui.Ñañemovãrõ, nañaiméi centradas; ndajaguerekói equilibrio; nañaiméi centrada Cristo-pe.
Che hermanakuéra, penemandu’áke, ñande vida premortal-pe, ñaimékuri pe Salvador ndive; Jajerovia Hese.Jahechauka ñande apoyo, kyre’ỹ ha vy’a pe plan de felicidad ñande Ru Yvagagua omoĩva’ekue rehe. Nañañemovãikuri; Ñañorairõ ñande testimonio reheve ha “jajoaju Tupã mbarete rehe, ha upe mbarete osẽ triunfante”. Upe ñorairõ iporãva ivaíva ndive ova ko yvýpe. Peteĩ jave jey jaguereko pe responsabibidad sagrada ñapu’ã haĝua testigo ramo ha ñamoĩ ñande jerovia Ñandejára rehe.
Opavave ñañeporanduva’erã: ¿Mba’éichapa apyta centrada ha ndajekóiche arandúre?¿Mba’éichapa ikatu ahechakuaa ha asegui pe Salvador ñe’ẽ ko mundo ñe’ẽ imbaretetereírõ? ¿Mba’éichapa ikatu ambokakuaa jerovia pe Salvador rehe?
Pehejami tasugeri peẽme mbohapy laja ikatuha rupi ñambotuichave ñande kuaapy ha jerovia ñande Salvador rehe. Pehechakuaáta umi principio ndaipyahuiha, ha katu ifundamental. Ojepurahéi opa Primaria-pe, oñehendu umi Mujeres Jovenes lección-kuérape, ha ha’e ñembohovái heta Sociedad de Socorro porandúpe ĝuarã. Ha’e principio-kuéra oikóva ñanecentra haĝua, ha ndaha’éi ñanemovã haĝua.
Peteĩha, ikatu jaikuaa Ñandejárape ha jajerovia Hese “[ñanderoryrõ] Cristo ñe’ẽme; ha péina ápe, Cristo ñe’ẽ he’íta peẽme opa mba’e pejapova’erã.”
Ojapo heta mesekuéra, rojapo hína pe estudio familiar de las escrituras. Che nieto oguerekóva mokõi año oguapy hína cherapypa’ũme romoñe’ẽ aja. Che avy’a hína Kuri jarýicha, cherorývo che membykaria’y familia visita reheve.
Opakuévo ore estudio de las escrituras, amboty che kuatiañe’ẽ. Che nieto oikuaa pya’e oñenomava’erãha. Ohupi hesa rovy’asy ha he’i peteĩ añetegua ijapyra’ỹva: “Hetave escritura, Nana”.
Che membykaria’y, peteĩ túva gueno ha oñemova’ỹva chemomarandu: “Che sy, anike nembotavy; Noñenoseinteko”.
Ha katu che nieto ojeruréramo hetave Escritura, ¡romoñe’ẽve umi Escritura! Hetave Escritura ohesape ñane apytu’ũ, omongaru ñande Espiritu, ombohovái ñande porandukuéra, ombokakuaa ñande jerovia Ñandejárare, ha ñanepytyvõ ñacentra haĝua ñande rekove Hese.“…aipota penemandu’a pehesa’ỹijo hağua ko’ãva jesarekópe, peimeporã hağua.”
Mokõiha, ikatu jaikuaa Ñandejárape ha jajerovia Hese ñembo’e rupive. ¡Tuicha jehovasa ningo ikatuha ñañembo’e ñane Tupãme! “Pejerure Túvape opa pene korasõ mbarete reheve.”
Aguereko peteĩ mandu’a porã peteĩ ñembo’e añongatu porãvagui. Peteĩ che vacacion de verano-rã universidad-pe, ajagarra peteĩ ñemba’apo Texas-pe. Amboguata che coche tujami, ambohérava mborayhu reheve, Vern, cientos de kilómetros, Idaho guive Texas peve. Vern henyhẽ techo peve, ha che aimembaitékuri pe Aventura pyahurã.
Asẽnguévo, añañua che sy ahayhuetévape ha ha’e he’i chéve: “Ñañembo’emína reho mboyve”.
Roñesũ ha ha’e oñepyrũ oñembo’e;Ojerure’asy ñande Ru Yvagaguápe che ñeimeporãre; Oñembo’e che coche ndoguerekóiva aire acondicionado rehe, oikoporã haĝua; Ojerure angelkuéra toĩ chendive pe verano pukukue, haoñembo’e, oñembo’e ha oñembo’e
Pe py’aguapy ouva’ekue upe ñembo’e rupi ome’ẽ chéve py’aguasu ajerovia haĝua Ñandejárare ha ani ajeko che arandúre. Ñandejára odirigi che rape heta decisión-pe ajapova’ekue upe verano-pe.
Jajepokuaávo ñañemo’aĝuĩ ñande Ru Yvagaguáre ñembo’épe, jaikuaavéta pe Salvador-pe;Jajeroviáta Hése haÑande jaipotáva ojoguavéta Ha’e oipotávape. Ikatu jahupyty ñandéve ha ambuévape ĝuarã umi jehovasa ñande Ru Yvagagua ikere’ỹ ome’ẽ haĝua ñandéve jajerurérõ chupe jerovia reheve.
Mbohapyha, ikatu jaikuaáve Ñandejárape ha jajerovia Hese jaservívo ñande rapichakuérape. Akompartíta ko historia penendive Amy Wright permiso reheve, oikumbyva’ekue mba’épa he’íse servicio jepe peteĩ mba’asy ivaiete ha ñandejukakuaáva mbytépe. Amy ohai:
29 de Octubre de 2015 aikuaa aguerekoha cáncer,Pe ome’ẽva peteĩ tasa de supervivencia de 17 porciento-nte. Umi probabilidad naiporãiete. Aikuaa chera’arõha peteĩ ñorairõ che rekovére. Aĩkuri decidida amoĩvo opa ikatúva, ndaha’éi chejehe añónte ha katu avei che familiakuéra rehe.Diciembre-pe añepyrũ quimioterapia. Aikuaa heta umi efecto secundario ome’ẽva umi droga ojepurúva cáncer contra-pe, ha katu ndaikuaái ikatuha nderasy vaieterei ha reikove gueteri.
“Peteĩ jave, ha’e pe quimioterapia ha’eha peteĩ violación de los derechos humanos. Ha’e che ménape chekane’oitereiha. ¡Añeme’ẽma! Ndahamo’ãvéima hospital-pe.Iñarandúpe, che ména ahayhuetéva cherenduporã ha upéi he’i: Gueno, upéicharõ jatopava’erã mávapepa jaservíta”.
¿Mba’e? ¿Ndohechakuaái piko hembireko oguerekoha cáncer ha ndaikatuiha ogueropu’akave umi py’avai ha reterasy noñe’aguantáiva?
Amy he’ive: “Umi síntoma ivaive mbeguekatu oĝuahẽmeve aguerekohápe peteĩ térã mokõi ára vaivai al mes, ikatuhápe aiko peteĩ yvypóra oikovévaicha. Umi árape ore familia otopa jepi ambuéicha oservi haĝua”
Peteĩ umi árape, Amy familia ome’ẽ“estuche de alivio de quimioterapia” ambue paciente-kuérape, oguerekóva mba’eombovy’a haĝua chupekuéra ha oipytyvõ haĝua ogueropu’akávo umi síntoma. Amy ikatu’ỹ jave oke, opensa mba’éichapa ombovy’áta ambue hapichakuérape; Heta laja tuicha mba’e, ha katu heta ha’ékuri nota térã mensaje de texto michĩ omokyre’ỹva ha ohechaukáva mborayhu. Umi pyharépe hasyetereívo chupe ha ndaikatúi oke, oñeno hi’ipad reheve ha oheka umiordenanza ojejapova’erã ijypykuéra omanomava’ekuére. Milagrosamente, ohasave chugui pe asykue, ha ikatu opersevera.
“Pe servicio, otestificka Amy, “osalva che rekove. Ipahápe atopa mbarete aha haĝua tenonde gotyyo pe vy’a ajuhuva’ekuépe añeha’ãvo ambovevýi umi che rapichakuéra oĩva che jerére jehasa’asy.Aha’arõ ore proyecto de servicio tuicha vy’a ha kyre’ỹ reheve. Ko ára peve, ha’e peteĩ mba’e iñextráñova. Oimeraẽ opensáne peteĩ opytava’ekue akãperõ, oĩva envenenada ha oñorairõva hína hekovére oĩtaha justifikada opensárõ upe momento-pe pe iñimportánteva ha’eha che. Upevére, apensarõ chejehe, che situación rehe, che jehasa’asy ha hasýva chéve, yvóra iñypytũ ha ivaieterei.Añecentrávo ambuévape, oĩ tesape, esperanza, mbarete, py’aguasu ha vy’a. Aikuaa upéva ikatuha Jesucristo expiación pu’aka ñandejoko, ñanemonguera ha ñande habilitáva rupive”.
Amy ojerovia Ñandejárare oikuaávo Chupe. Ojekórire jepe michĩmi iñarandúre, oiméne ombotoveva’erãmo’ã pe idea ome’ẽ haĝua servicio. Pe servicio oheja ipu’aka hasy ha ijehasa’asy rehe ha ovivi haĝua ko escritura: “Peime jave pende rapicha pytyvõme, peimehánte pende Tupã pytyvõme.”
Jesucristo ipu’aka ko mundore.Ha Ha’e rupive, Ijexpiación infinita rupive, opavave jaguereko mba’érepa jajerovia, jaikuaávo ipahápe opa mba’e oĩporãtaha.
Hermanakuéra, opavave ñande ikatu jajerovia Ñandejárare ha ani jajeko.Ikatu ñacentra ñande rekove pe Salvador-re jaikuaávo chupe, ha Ha’e odirigita ñande rapekuéra.
Ñaime ko yvýpe jahechauka haĝua upe jerovia Hese ohejava’ekue ñaime Jesucristo ndive he’íramoguare: “Péina ápe; chemondo chéve.”
Che hermanakuéra pohayhuetéva, Pte. Thomas S. Monson otestifika “umi jehovasa oñeprometéva ndojeipapakuaái. Jepe umi nube oñembyaty, jepe umi ama ou ñande ári, ñande evangelio kuaapy ha mborayhu jaguerekóva ñande Ru Yvagagua ha ñande Salvador rehe ñanemoangapyhýta ha ñanembopytasóta…jaguatávo kare’ỹme…Ndaiporimo’ãi mba’eve ko mundo-pe ikatútava ipu’aka ñanderehe.”
Amoĩve che testimonio ñande Profeta jahayhuetéva mba’éva ndive. Jajeroviáramo ñande Ru Yvagagua ha ñande Salvador Jesucristo rehe ha ndajajekóirõ ñane arandúre, Ha’ekuéra odirigíta ñande rapekuéra ha oipysóta iporiahuvereko jyva ñandéve ĝuarã. Jesucristo rérape. Amén.
Nota:1 de abril de 2017-pe, hermana Cordon ojerreleva Segunda Consejera ramo Presidencia General Primaria-guápe.