Mngiltau er Chelecha el Sils
A klungel a diak a ulebengelel deureng er kid a ultuil er sel dolilt ra ngar el Dios e obengkel el okiu a Urerel.
A delibech el chad el mengai ra cheldecheduch el ngklel a Mary Poppins a di uaia roumesingd el chad ra ngebard el tir a omes ra rengalek—el ngii a mekera el kmal mengasireng. Ng melokou er cheltel ngebard el ngii a olengeseu ra ngara ringel el telungalek ra Banks el cherrengelir a teruich ma reteuid, el ngara Cherry Tree Lane, ra Edwardian London. A Jane me a Michael a mlo ngerchelel. Ng omuchel el lolsisechakl er tir loba melareng.
Jane ma Michael a kudmokl a bekerredechel el omeruul, e ng di a Mary a ulemechesiu el kmo ng mecha temel el melukl. Ngara blekeklel, e a sechelil a Mary el ngii a oungerachel ra olisall el ngklel a Bert, a mocha melasem el orrimel er ngii meng diak lorael. Ng oumondai el kmo, “E ng di te ungil ngalek, e Mary.”
Mary ulenger, “Eng di ngak ak mo mengesang er tir alsekum e te dimlak? Eng di ngdiak el sebechek el ngosuterir alsekum eng diak el sorir, e uaisei el diak a ngodech el chad el meringel a dolisechakl er ngii el di uaia ngalek el medengei a rokoi el tekoi.”
Bert a ulker, “Meng?”
Mary a ulnger, “Meng uaisei el kirir el di tir el meruul a rokui el telkib el taem.”
Rodam ma rodos, uaia Jane ma Michael Banks, kid a “rungil el ngalek” el ngar ngii a uchul a ongesang el kired. A Demad er Babeluades a soal olengeseu e omekngeltengat er kid, e ng di kid a blechoel el diak de besa techall. Bebil ra taem, e kede dirrek el meruul er kid el leko de mla mo medengei a rokui el tekoi. E kid a dirrek el kired el meruul a rokui el di kid “el telkib el taem”. Sei a uchul e kede mlei ra beluulechad el mlara klengar ruchei ra beluulechad, blid ra babeluades. Merkid a “telkib” a uldimukl a omelilt a tekoi el doruul.
A moktek ra Demad er a Babeluades ra tekoi ra klechedam ma chedil a diak el rulterir a Rengelekel el mo meruul a ngera ngii a llemalt; ng bai ngii a rulterir a Rengelekel el mo melilt el meruul a ngii a llemalt e uaisei el di mo uai Ngii. Alsekum eng mle beot el soal kid el mo bekongesenges, e Ngii a mo ousbech a mereched el sengk ma blals el mo ultiul ra blekerdeled.
Eng di a Dios a diak a klemeriar el reng er Ngii el kirel a Rengelekel el di mo uaia mesuub e olengesenges “el charm” el ngii a diak el ongutech a Orecherel er a chelsel a delmerab er a celestial. Ng diak, a Dios a soal a Rengelekel a bo lemukeroul loba chedaol teletael el bol dak Lobengkel el kirel a Urerel a telungalek.
A Dios a mla rullii a uldasu el ngii a mo sebeched el mo ngar ngii a dikesed ra Rengedel, el telbiil el rael el ngii a omekrael er kid el mo uai Ngii, mo oba sel el klengar el Ngii a obang, e mo kiei ra diak a ulebengelel klengar el telungalek er a rengedel. A omelilt ra tang a mle uaisei—e dirk—klou a belkul el me er tia el uldasu, el ngii a desilubii ra temel a uchei er tia el klengar. Kid a kilengei er tia el uldasu e millilt el me er a beluulechad.
Mekera a bo doltaut el kmo ke de meral mo oumerang e mesuub el ousbech ra mimokl er kid el melilt el ngara meral rolel, e a dekedekel a obesbesong a dilekedek a uldesued meng diak el sebeched el melebedebek el mo medengelii a uldasu ra Dios. Alsekum e ngdimlak sel dekedek, e a moktek ra Dios a diak el sebechel mo mekedmokl e leng diak el sebeched el melemolem e bo loumerang er kid el mo ngmai a dikesed el sel Ngii a soal merkid.
A profet Lehi a millekoi: “Mesa ia uchul a Rubak el Dios a milcherei chad meng di ngii el melilt a loruul. Me a chad a diak el sebechel el melilt alsekum eng diak a ngara bitang el mengesuseu er ngii.” Ngara telengtengil a dauch, a tara rael a lomtechei er ngii a Jesus Kristo, el ngii a Kot el ngelekel a Chedam. Sel tara rael a lomtechei er ngii a Diabelong, Lucifer, el ngii a soal el melemall ra mimokl el melilt e ngii a ngmai a rokui el klisiich.
Okiu a Jesus Kristo, “e ng ngar er ngii a oltechid el mengeluch el obengkel a Demad.” Uriul ra lemerekui er a tngakireng er Ngii, a Jesus a “ngilasech el mo er babeluades … el mo ngmai ra Chedam a klisichel ra klechubechub el obang el mo er a rengelekel a chad.” Dirrek, el obang a klisiich ra klechubechub, “ngii a mengeluch el kirir a rengelekel a chad.”
A chelechur a Kristo el obengkel a Chedam el okiu kid a diak a cherreuel. Jesus Kristo, el ngii a kilengei ma sel soal a mo mengai er se el ngii a soal a Chedam, el ngii a diak el bo el kot er a ngidi el ngerang ra bai se el di mla ngii a soal a Chedam. A Demad er Babeluades a diak loumededenger e bai kmal oieng e omrotech el kirel a klungioled.
A chelechur a Kristo, a ngar ngii a moktek er ngii, el omeklatk er kid el kmo Ngii a mla kokad a kengtid e diak a chad el diak el ngara chelsel a klechubechub ra Dios. Tirke el tir a oumerang ra Jesus Kristo, e ouchel a rengrir ra kengterir, nguu a techolbechelid, e outekangel el mora ulebongel— telengtengil a rael el mora klangunguuch— a Osobel a ousubes, omekungil, e mengeluch. Ngii a olengeseu er kid, mengelaod a rengud, e dirrek el omtechei er kid—sioning e mengesebechakl el kirel a klangunguuch er kid el obengkel a Dios.
Okiu a kmal bleketakl el omengodech, Lucifer a ngii a oltelechakl e oltutakl. John el Chad ra Ocholt a silodii sel kmal klou el klisichel: “E ak rirengesii a kmal klou el ngor er a babeluades el melekoi, Chelechang e ng mei a mo suobel, klisiich, ma Renged ra Dios er kid, ma klisichel a Kristo er Ngii.” E ngerang? Le uchul “ngike el oltelechakl er a rodam er kid a mla mei er eou, el ngii a oltelechakl er tir ra medal a Dios er kid ra tutau ma le kebesengei. E ngdi te mlo mesisiich er ngii el okiu a rsechel a Sib, ma dirrek el tekoi el okiu klaumerang er tir.”
Lucifer a ngike el oltelechakl. Ngii a milngedecheduch el omtok er kid er a klengar ruchei ra beluulechad, e ngii a melemolem el omtok er kid er tia el klengar. Ng osiik el oltuub er kid. Ng soal kid a bo dongarm ra diak a ulebengelel el ongarm. Ngii a melekoi er kid el kmo kede diak a ultuteled, ngike el melekoi er kid el kmo kede ngesonges, e dirrek el ngii a melekoi el kmo ng diak a rolel a ngebetel a telitur er kid. Ngii a kot el mesisiich el omecheracheb, ngike el ngii a mesebek er kid se el el bla derebet.
Alsekum e a Lucifer a ulsisechakl er a ngalek el mo merael e a ngalek a milsibas, ngii a oldiu er a ngalek, e kolebsengii, e melekoi er ngii meng merekong el diak lolasem. A rolel a Lucifer a uaisei e olekiik a moalech el reng ma sebekreng—el di blechoel. Ngika el demal a blulak a ngii a kot el ngarbab el olechelech a diak el klemerang e meduch el mengesuseu a urerel el mo mengeuid e mengesang er kid, “e le ngii a osiik a rolel ma rokui el chad a mo ngara klengitelreng el di uai ngii.”
Alsekum e a Kristo a ulsisechakl ra ngalek el mo merael e a ngalek a milsibas, Ngii a mo ngosukii a ngalek el mo dechor e mengesuseu er ngii ra bek el blekeklel. Kristo a ngii a olengeseu e mengelaod a rengud. A rolel a meskid a deureng ma reng ra oureng—el uaisei e di blechoel.
A telbilel a Dios a uldimukl er ngii a omekrael er kid, el omekedong er ngii ra chedaol llechukl el kmo ng llechul a Dios. Aika el llechul a Dios a diak el besiich malechub el uldekial a delibech el llach el ngii a kuk di moktek er ngii a meruul er kid el mo bekongesenges. Ngii el rokui a ngar er ngii a rellii el kirel a omekdebechel a blekeradel el mo uaia Dios, el lemuut el mo dmak lobengkel a Demad er a Babeluades, e mo ngmai a diak a ulebengelel deurreng. A blekongesenges el mora Llechul a Dios a diak el muiko; ke de medengei el melilt ra Dios ma Rolel el mo remei. Tia el okesiu a osisiu el di uaia Adam ma Eve, el ngii a “Dios a milsterir a llach, el uriul ra louchais er tir el mo medengelii a uldasu ra mo suobel.” Uaisei el Dios a soal kid a bo dorael ra rael ra telbiil, Ngii a meskid a sel klaumerang er kid el melilt.
El uaisei, a Dios a soal, e melebedebek, e omekrael el kmo a bek el Rengelekel bo lolilt el kirel. Ngii a diak bo el lorrimel er kid. Ng okiu a sengk ra mimokl el melilt, e a Dios a mesterir a techall a Rengelekel el mo “melilt a loruul, e diak el omesterir a chelngelir.” A mimokl el melilt a ngosukid el melilt el mo merael ra rael, ma lechub e ng diak. Ng dirrek el rullid el kmo kede mengai, ma lechub e ng diak. Di uaia sel el diak durrimel el mo olngesenges, ng diak el sebeched el morrimel el diak bo dolengesenges. Diak a chad el sebechel, el diak loba se el kengei, el mo oridid er se el rael. (Chelechang, e lak a rrau el reng el kirir tirkel miltemall a techellir el melilt. Te diak el bla bo lecheroid er sel rael. Tir a victims. Te mo nguu a klaumodengei, beltik el reng, me a klechubechub er a Dios.)
Engdi sel demengai er sel rael, a Dios a mo mekngit a rengul e leng medengei, eng di ngara rokui el teletael, a mo uchul a mengkekerei a deureng e duebes a klengeltengat. Chelsel a chedaol llechukl, sel mengai ra rael a tara lomekedong er ngii el kmong klengit, e sel uchul a mengkekerei a deureng e melebes a klengetengat a domekedong er ngii el kmong blals. Okiu tia el omeruul, a Dios a diak el omals er kid; a blals a mekdubech el uchul aike el ngii a dolilt, diak el Ngii.
Se el bo dolechesuar el kmo kede mla reuebet er sel rael, ng sebeched el melemolem el diak de ngar ngii, malechub e ng uchul a Tngakireng ra Jesus Kristo, e ng sebeched el melilt el mo omult a blekekled e muut el mo ngar er ngii. Chelsel a chedaol llechukl, e a telengtengil a omelasem el mo mengodech e lemuut el mo merael er a rael a sel douchel a rengud ra kengtid. Sel diak douchel a rengud ra kengtid a belkul a kmo ke de melilt el melebes er kid ra omelai el klengeltengat el ngii a Dios a soal meskid. Alsekum kid a “diak ra rengud a mo ngara deureng el kirel aike el ngii a [bode] ngai”—sei a kmal di mo ior er kid, diak el Dios.
Diak el belkul a keltektel el de diak de ngar sel rael ma lechub e ng sel klemengetel a cherroid er kid, sel taem el kid a tibir a rengud el mo mengodech, a Dios a mo ngosukid el lemuut el mei. Ngara osengel a Dios, lokiu a kmal meral ouchel a rengud ra kengtid e melasem el melemolm el oba klisiich ra Kristo, se sel deluut el mo ngara rael, eng di uai ma lak de tilobed er sel rael. A Osobel a mlo harau a kengtid e ngubetid er sel ngii a klou el mengkekerei a deureng ma klengeltengat el merkid. Tia a lomekedong er ngii ra chedaol llechukl el kmo ng klausubes. Uriul ra techolbechelid, rokui el rechad ra ikelesia a tmorech el mo cheroid er a rael—bebil er kid a dirrek el tuchelbakl. Uaisei, sel dolemolem el oumerang ra Jesus Kristo, ouchel a rengud ra kengtid, e melai a Ngesuil, e dirrek el mousubes, a diak el dil tang-el mekdubech el tekoi eng di ng telengtengil tia el rokir el klengar, el ngii a di melemolem e omelekl. Tia a rolel se el kid a “outekangel el mora ulebongel.”
Ng kired el melilt el kmo ng techa dosiou er ngii. Se el klungel a diak a ulebengelel el deureng er kid a ultuil ra melilt ra ngar el Dios e Obengkel ra Urerel. Mesel domakes el mo “meruul er se el telkib” el di kid, e kid a mesuub el oba sel sengk er kid ra mimokl el melilt el ngara meral teletelel. Ua ikel dilung a reteru el mle President el mlara Cherrengelel a Cheldebechel ra Rolngeseu el kmo, diak el kired el ua “tolechoi el ousbech a olaiu ma omesmechokl ra bek el taem.” Ng diak, a Dios a soal kid el mo ultebechel el meklou el chad e omtebechel er kid.
Se el dolilt el mo oltirakl ra uldesuel a Chedam el ngii a di ta el rael el bo el sebeched el mo nguu a Rengedel; ng dirrek el di sei a uchul e ng sebechel oumerang er kid el diak el bo el oker er kid el kmo ngera a omtok er sel ngii a Soal. Eng di ng kired el medengei el kmo “ng diak a chad el meringel a dolisechakl er ngii el ua ngalek el ngii a medengei a rokui el tekoi.” Meng kired el msa techall el bo dosuub er a rolel a Rubak el okiu a Rubak ma remesiou er Ngii. Ng sebeched el oumerang el kmo kid a mekreos el ngelekel a Chedaol Demad ra Babeluades e kid a klou a ultuteled el “kirel ongesang” e mo medengei el kmo “sel di lekid” a diak a belkul el kmo “ke de meral di kid el tang”.
Me sel ngkel Jacob el profet ra Babier er a Mormom a le dilung, ak melekoi lobengkel:
“Ma leuaisei, bol mechelaod a rengmiu, e bo modengei el kmo kau a mimokl el meruul a teletelem—el mo melilt er sel ngii a rael el mora diak a ulebengelel kodall ma lechub eng diak a ulebengelel klengar.
“Osisiu, betik ra renguk el rodam [ma rodos], bom kangunguuch el mo obengkel a soal a Dios, e diak el sel soal a diabelong … ; e bo modengei, el kmo a uriul er sel kangunguuch el obengkel a Dios, sei a di ta el siseball el mora klechubechub ra Dios meke mo suobel.”
Me bo, molilt el loumerang ra Kristo; molilt el ouchel a reng ra klengit; molilt el mo metecholb e mo nguu a Chedaol Reng; molilt el mo ngar ngii ra rengum el mengedmokl el kirel e mo klikiid el mo nguu a sakrament; molilt el mo meruul a telbiil ra chelsel a templo; molilt el mo mesiou ra ngar el Dios ma Rengelekel. A tekoi el dolilt a mo oterkeklel a kmo kid ke de kmal uangerang e mo uangerang a klechad er kid.
Ak mengesimer loba sel klengeltengat ra Jacob: “Uaisei, me Dios bo lokisau ra … diak a ulebengelel kodall el oba klisichel a tngakireng, me bo el sebechem el mo nguu se el diak a ulebengelel Rengedel a Dios.” El ngara ngklel a Jesus Kristo, Amen.