Sel Meral Ngklel a Ikelesia

Mla er a President Russell M. Nelson

A Jesus Kristo a omeklemalt er kid el mo omekedong er a Ikelesia el ngii a Ngklel e le tiang a Ikelesia er Ngii, el mui er a klisichel.

Betik er a renguk el rodam me a rodos er ngak, chelechal klebokel el Chedaol sils e ke de ngara deureng el rokui er a betok el klengeltengat er a Rubak. Aki meral mereng a suliu er a klaumera er kemiu er a mla moluut el ebangkelio er a Jesus Kristo, me a blakereng er kemiu el melemolem malechub e kom luueta el mei er a Rolel, me a dirrek el blakereng er kemiu el mesiou e ra Ikelesia er Ngii.

Chelechal sils a kumelchesiu el kirek el mengedecheduch er kemiu el kirel a klou a belkul tekoi. Sesei el sandei er a memong, e a kultebedii a babier el mesaod el kirel a meral ngklel a Ikelesia. Ak miruul er tiang le Rubak a ulechotii er a uldesuek a klou el ultutelel a ngakl el Ngii a mla chotii el kirel a Ikelesia er Ngii, el ngii a Ikelesia er a Jesus Kristo er a Uriul-klebesei el Santo.

Me komo mes, le a nger el kirel tial el tekoi el tilobed me sel mla mukbeches lomesodel a mlar ngii a sorir me a chetirir. Betok el chedal a Ikelesia di mle mereched el sumecheklii a ngklel a Ikelesia er a blogs me a social media er tir. A rebebil a mlo melchedech el kmo e ngerang, aikal ngeldechel a beluulechad e ngera me kede melodech er a tekoi el ngii a kora uaia “lak el klou a belkul tekoi.” E a rebebil a kuk uase ng diak el sebechel mekedmokl, me ngera me kede meruul er ngii? Msall e ksodii el kmo ngera uchul me a ki kmal simbai el kirel tial tekoi. Eng di msall e kot el smodii sel diak: luldimukl er tial ngeldechel a ngklel a Ikelesia:

• Ng diak dolodech er a ngklel.

• E diak domekbeches er ngii.

• E diak domesiich er ngii.

• E diak di kibilkerokl el meruul er ngii.

• E diak lak el klou a ultutelel tekoi.

Tia bai, di sumecheklii. Tiang a tekingel a Rubak. A Joseph Smith a dimlak lomngakl er a mloluut el Ikelesia lokiu ngii; me a Mormon meng dimlak. Ng Osobel a Ngii a dilu el kmo, “Tiakid a mo ngklel a ikelesia er ngak er a uriul klebesei el ngii a, Ikelesia er a Jesus Kristo er a Uriul-klebesei el Santo.”

Osisiu el teletael er a uchelel, er sera AD 34, e a mla mekiis er a kodall el Rubak a ulechotii osisiu el tekoi le mo er a rechedal a Ikelesia er Ngii er a bo loldingel er a rechad el mlara Beluu er a Merikel. Tiaikid el taem e Ngii a dilu el kmo:

“Ko mo omekedong er a ikelesia er a ngklek. …

“Alsekum eng ikelesia er ngak e ngera meng diak lokedongall er a ngklek? Le alsekum eng ikelesia er a Moses’ eng mo Moses a ngklel ngii el ikelesia; a lechub a likelesia er a chad e komolker ngii er a ngklel a chad; eng di alsekum e komolker er ngii er a ngklek eng ikelesia er ngak.”

A leuaisei, e a ngklel a Ikelesia a diak dolodech er ngii. A Osobel er a lebeketeklii a mo ngklel a Ikelesia er Ngii, e ng dirrek lulemuchel el kmo, “Tiaikid a mo ngklel a ikelesia er ngak,” Ng klou el tekoi ra rengul. Me alsekum e kede ousbech a delbochel ngakl malechub e kede kongei a kedeb el ngkel, e Ngii a metirm a rengul.

Me ngera ngara ngakl, a lechub a, delbochel el ngakl? Sel dousbech er a delbochel el ngklel a Ikelesia, el uaia “LDS Church,” me a “Mormon Church,” malechub a “Ikelesia er a Ruriul-klebesei el Santo,” e sel kmal klou a ultutelel el ngii a diak er a chelsel aikal ngakl a a ngklel a Osobel. A dotebedii a ngklel a Rubak er a Ikelesia er a Rubak a kot el klou el teng ra Diablong. Sel lak dousbech er a ngklel Osobel, e kid a mekekokid el dikea domekerreu aikel rokui el Jesus Kristo a mla remuul kired—luldimukl er a Tngakireng er Ngii.

Momtab er tiang lokiu a Osengel kirel: Sera uchelel e Ngii a mle Jehovah, el Dios er a Chuodel Renged. Ngokiu a derdelel a Demal, e Ngii a Ulemeob er tial beluulechad me a bebil er a beluu. Ngii a millilt el mo otireklii a soal a Chedam e ngarngii a relii el mora rokui el ngelekel a Dios el diak a di chimol chad el sebechel remuul! Meng mle metengel el mei er a beluulechad el Di Chimong el Ngelekel a Chedam er a tech, e Ngii a lulketui er ngii, mlotuub, miltub, e mlora ringel. Me ngara Sers er a Gethsemane, e a Osobeled a ngilai a bek el ringel, bek el klengit, me arokui el mekngit me a rokui el ongarm el mla morngii lokiu kau me a ngak me a rokui el chad el tir a mla kiei ma dirk mo kiei. Tiaikid el ringel er a berraod, e Ngii a mlo mengerngars a rsechel.Aikal rokui el ringel a liluut el mechisois er a bol mekerus er a Kolkata.

Ngokiu aikal ringel—sel chimol Tngakireng er Ngii ma Okiis ra kodall—e Ngii a ulsebelid ra diak el luut el kodall el mora rokui, e osebelid a dersta me a dersta er kid er a klengit, alsekum e kede ouchel a rengud.

Uriul er a Okiis er a kodall er a Osobel me a kodellir a Reapostol er Ngii, e a beluulechad a siliseb er a ilkolk. E sera 1820, e a Dios el Chedam me a Ngelekel Sechal, er a Jesus Kristo, a dilum el mo er a Profet Joseph Smith el muchelii Olutel a Ikelesia er a Rubak.

Aikel rokui el ringel el Ngii a lutekangel—me a aikel rokui el Ngii a riruul el mora rokui el chad— e ak mocha mtebengar el kmo kid a mla omekedong er a ngklel a mla moluut el Ikelesia er a Rubak, er a ngakl el choridii a chedaol ngklel a Jesus Kristo!

Bek el Sandei el dolai er a sacrament, e kede omekbeches a chedaol telbiil el mora Demad er a Babeluades el kmo kede tibir el mo nguu a ngklel a Ngelekel, el Jesus Kristo. Kede tibir el mo oltirakl er Ngii, ouchel a rengud, e oltirakl a Llechul, e blechoel melbedebek er Ngii.

Sel dechitii a Ngklel er a Ikelesia er Ngii, e kede locha mengeroid er Ngii er a klengar kid.

A mo nguu a ngklel Osobel a uldimukl er ngii a sioning el mo ra rebebil—lokiu omerelled me a tekinged—el kmo a Jesus a Kristo. Kede locha medakt el tomellii a rengul a chad loleker kid el “Mormons” meng diak desebecheklii a Osobel, e dengesuir luldimukl ra ngklel a Ikelesia er Ngii?

Alsekum e kid el rokui me a dersta el chad a mo ngmai a klisichel a Tngakireng er a Jesus Kristo—el mo omekungil er kid, e melisiich er kid, e osebelid—ruriul eng kired el kongei el kmo Ngii a uchul tial klisiich. Ng sebeched lomuchel el mo omekedong er a Ikelesia er Ngii er sel ngakl el Ngii a dilii.

Sel domes ra betok el beluu er a beluulechad, e a Ikelesia er a Rubak a blart el “Ikelesia er a Mormon.” Eng di kid a rechad er a Ikelesia er a Rubak a medengei el kmo ng techa bdelul: ng Jesus Kristo. Mekngit el dolekoi, le te betok el chad el rongesii a tekoi el Mormon omdasou el kmo kede mengull er a Mormon. Ng diak el uaisei! Kede chemat er a smiich el profet er a recheuodel er a Beluu er a Merikel. Eng di kid adiak doltirakl er a Mormon. Kid a oltirakl er a Rubak.

Sera uchelel a mla moluut el Ikelesia, e a tekoi el Ikelesia er a Mormon me a Remormons a mle blechoel usbechall el uaia le mekngit a belkul— ng mekgit el tekoi— mekngit el ngakl el uaia longeroid er a Dios er tial mla moluut el Ikelesia er a Jesus Kristo er a uriul klebesei.

Rodam me a rodos, ng betok a ultok er a beluuelchad el kirel a ollutel a meral ngklel a Ikelesia. Ng tial beluulechad el dekiei er ngii a uchul, me a ungil klekedall el ngosukid el metik aikel dousbech el tekoi—luldimukl a tekoi el kirel a Ikelesia er a Rubak e a rechad a kmo tial ngeldechel a ngklel a ikelesia a diak lungil. A rebebil a kmo kid el sal medengelkid a rechad el kmo kede “Mormons” malechub eng “Ikelesia er a Mormons,” eng kired el di mo mechei.

Omko tiang a mesaod el kirel a chelechad el kildmeklii a chad, e a ikal ultok a locha di ungil besul. Eng di tial okedeldaol tekoi, e kid a omes er Ngii el Ikelesia er ngii e kmo a teletelel a Rubak a diak, el sebechel el mo teletelel a chad. Omko ng mo meklou a rengud e meruul a ngercheled, e a Rubak a mo omekrael er kid er tial klou a belkul ngerachel. E kid el rokui, a di medengei el kmo a Rubak a mo olgneseu er tirkel meruul a Soal, el di uai Ngii el ngilseuir a Nephi el mlo sebechel toketekii a bilas el mlo olideiull er a daob.

Ng kired el mo kerekikl e klou a rengud sel dolasm el mesmechokl er tial cheleuid. A bekongerachel er a tekingel a media a sebechir el mo kongei er a ongtid.

Tial mlo merek el klou el ongdibel, e a Elder Benjamin De Hoyos a milngedecheduch el kirel a tal tekoi. Ng dilu el kmo:

“Sesei el rak ra memong er a kureor er a obis buai er a Ikelesia el ngara Mexico, [ea kldemek me ngak a mlongit] el mo mengedecheduch er a rasio. … [A tara oungerachel ra prokuram] a uleker [kemam], ‘Ngera meng kmal kemanget a ngklel tial Ikelesia? …’

“A kldemek me ngak a mlo klikmechur er tial meang el ker e mocha mesaod el kirel a ngklel a Ikelesia a dimlak el mengilt er a chad. Ng milskid Osobel. …Ngika loungerachel er a prokuram a di mle mereched longer, ‘Aki mo oleker ngii el uaisei.’”

Tial report ochotii a teletael. Cherrengel a taem, e a blakereng er a dersta er kid a mo usbechall el sumechokl a cheleuid er a ikal mereko el rak. A beluuelchad a locha oltirakl malechub eng diak er tial meral ngklel a ikelesia. Eng ngelmuut el diak lungil alsekum e kid a mo teloi er a beluuelchad e oleker ra ngklel a Ikelsia er sel diak el meral ngklel.

Sel mla mukbeches lomesodel a ungil. Ng dmu el kmo: “Sel kot el uchelel, e a mui el ngklel a Ikelesia a kmo: ‘Ikelesia er a Jesus Kristo er a Uriul-klebesei el Santo.’ Sel dousbech er a kedeb [ongerung], el tekoi ‘el Ikelesia’ malechub a ‘Ikelesia er a Jesus Kristo’ a dirrek el ungil. Ng dirrek el sebeched lousbech er a ‘mla moluut el Ikelesia er a Jesus Kristo.”

Omko ngarngii a chad loker, “Kau ke Mormon?” eng sebechem longer el kmo, “Alsekum e koker el kmo ngak ak chedal a Ikelesia er a Jesus Kristo er a Uriul-klebesei el Santo, eng oi, ng uaisei!”

A le ngarngii a chad loker, “Kau ke Uriul-klebesei el Santo?” eng sebechem longer, “Oi, ng uaisei. A kuumera er a Jesus Kristo e chedal a mla moluut el Ikelesia er Ngii.”

Rodam me a rodos er ngak, ak yaksok er kemiu el kmo alsekum e kid a mo blak a rengud lousbech er a meral ngklel a Ikelesia er a Rubak, e Ngii louklaou er tial Ikelesia a mo otengel a Klisichel me a klengeltengat el mora Ruriul-klebesei el Santo, el ngii a dirkak a tal deues. Kede mo olab a llomes me a klisichel a Dios el mo ngosukid el ngmai a klengeltengat er a mla moluut el ebangkelio er a Jesus Kristo el mora bek el beluu, kebliil, omelekoi, me a rechad e kudmeklii a beluulechad el kirel Ongeru Lemei a Rubak.

A leuasiei, e ngera ngara ngakl? Sel dosaod er a ngklel a Ikelesia er a Rubak, e a nger a “Ngii el rokui!” A Jesus Kristo a millekoi er kid el mo oleker er a Ikelsia er Ngii el ngara Ngklel le tiang a Ikelsia er Ngii, el olab a Klisichel.

Ak medengei el kmo a Dios a ngar. A Jesus a ngii a Kristo. Ngii omekrael er a Ikelsia er Ngii er chelechal sils. Aika ak dung el ngara chedaol ngklel a Jesus Kristo, amen.

Uleklatk

1. “A Rubak a mla subedak ra klou el ultutelel a ngakl el Ngii a ml chotii el kirel a Ikelesia er Ngii, el ngii a Ikelesia er a Jesus Kristo er a Uriul-klebesei el Santo. Nganrgii a ureor el medechel er medad el mo oltiakl er a Soal. Aikal mereko el sandei, eng betook el mengeteklel a Ikelelsia a mla oureor el kirel tial tekoi. A lmuut el bebil ra omesodel tial klou a belkul tekoi a mo muchais ra ikal merael mei el buil” (Russell M. Nelson, in “The Name of the Church” [official statement, Aug. 16, 2018], mormonnewsroom.org).

2. Tirkel mla momerek el Merredel ra Ikelesia a mla melekoi ra osisiu el ongit. El uaia, President George Albert Smith el millekoi el kmo: “Lak motubii a Rubak e moleker tial kmo Ikelesia ra Mormon. Ngii a dimlak loleker ngii el Ikelesia ra Mormon” (er a Conference Report, Apr. 1948, 160).

3. Mesa “Style Guide—The Name of the Church,” mormonnewsroom.org.

4. Mesa Doctrine and Covenants 115:4.

5. 3 Nephi 27:7–8.

6. Mesa Moses 1:33.

7. Mesa Doctrine and Covenants 19:18.

8. Mesa Moroni 4:3; Doctrine and Covenants 20:37, 77.

9. A Mormon a ta er tirkel teua el betok a blel lluches er a Babier er a Mormon, tirkel bebil a Nephi, Jacob, me a Moroni. Tirkal rokui a sioning er a Rubak, el uaia mlukrael el ulleiuid, el Profet Joseph Smith.

10. Nguldimukl er a tekingel a Mormonites a bebil er a tekoi el dimlak el ungil a belkul (mesa History of the Church, 2:62–63, 126).

11. Bebil ra mekngit el ngakl a dirrek el ngara chelsel a Beches el Renged. Sera sils ra kerkeriil ra Apostol Paulus er medal a Felix, a Paulus a lulekoi er ngii el kmo “ng bdelul a chelechad ra Nazarenes” (Rellir 24:5).Tial tekoi el “Nazarenes,” a lullekoi a tara chad el kmo: “Tiang a ngakl el mora Rekristiano el uaia lotuub el mor tir. Tem le okedongall el uaisei le Jesus a mle chad ra Nazareth” (Albert Barnes, Notes, Explanatory and Practical, on the Acts of the Apostles [1937], 313).

    Osisiu, a tara chad a millekoi el kmo: “A Rubak a mle betook el motuub e okedongall el ‘The Nazarene’ (Matt. xxvi. 71), ma Jews a ulelker ra roltirakl er ngii el ‘Nazarenes.’ Ng diak el kengei el kmo te Kristiano, i.e. disciples of the Messiah” (The Pulpit Commentary: The Acts of the Apostles, ed. H. D. M. Spence and Joseph S. Exell [1884], 2:231).

    Osisiu el tekoi, e a Elder Neal A. Maxwell a millekoi: “Ngokiu a reksi er a chedaol llechukl, ekede mesang a rouketui er a reprofet el mengeroid er tir lomtelub er tir el uaia longeroid er tir. Oumesingd, el uaisei, e ng diak a orrenges er tir er a cheslel a reksi er a rebetok el chad. Ng dirrek, a Rekristianio ra uchelel a ‘mle okedongall el Nazarenes.’ (Rellir 24:5.)” (“Out of Obscurity,” Ensign, Nov. 1984, 10).

12. Mesa 1 Nephi 18:1–2.

13. Benjamín De Hoyos, “Called to Be Saints,” Liahona, May 2011, 106.

14. Ng diak el sebeched el mekerang ra ikel ngakl el rechad olker kid, eng di kid a sebeched lotekangel. Kede mekerang e a rebebil a mo mengull er a meral ngklel a Ikelesia alsekum e kid el chedal a diak doleker ngii ra meral ngklel?

15. “Style Guide—The Name of the Church,” mormonnewsroom.org.

16. A tekoi el santo a belchoel loulsbech er ngii er a Chedaol Biblia. A babilengel a Paulus el mora Efesus, a okesiul, eng mle ousbech ra tekoi el santo ra bek el bliongel. A santo a chad el oumerang ra Jesus Kristo e melasm el oltirakl er Ngii.

17. Mesa Doctrine and Covenants 121:33.