![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F8e%2F76%2F8e760510de50c09b426a628466b5efb7bff47612%2F8e760510de50c09b426a628466b5efb7bff47612.jpeg/full/!250,/0/default)
A Dios a Mo Rullii a Kmo Ngerang el Mengasireng
A Dios a mla kudmekelterir a Rengelekel me a Ikelesia er Ngii el kirel tiaikid el taem.
Dimlak el meketeket er a lekerd er a Salt Lake Valley, ea Ruriul-klebesei el Santo a mlo omuchel lomekedechor er a chedaol templo. Te mle omdasou el mla metik er a basio el sebechir el mengull er a Dios el ngar budech e diak odechelakl.
Eng di, uchei er a bol merek a urerel a dodai er a templo, e a resoldau er a Merikel e mlei el dolemii a beches el kabenor.
A remengeteklel a Ikelesia dimlak lodengelii a teletelir tirkal soldau, me a Brigham Young a dilu er a Resanto me te tuobed e doklii a dodai er a templo.
Ak medengei el uase a rebebil er a rechedal a Ikelesia a mle mechas a rengrir el uase te blak a rengrir el meleketek er a rengedel a Dios e chelechang metemall.
Uriul, eng mlodiak odechelakl, e tial dodai er a temlpo a liluut el mekiis a urerel. Seikid e tirkal uchelel a ikelesia a mlo metik el uase betok er a ikel bad e lmla riou a mle blached, el dimlak lungil dodai er a templo.
El uchul, me a Brigham a dilu er tir mete oureor tial dodai meng mo sebechel ungil olngeseu aikal bad el kbekbel tial klebokel Salt Lake Temple. Uriul, e a Resanto a mlengitakl er a “How Firm a Foundation”3e medengei el uase tial chedaol templo er tir a mlokedechor er a mesisiich el dodai el medechel el telal telcheroll.
Tial cheldecheduch osischeklid el uase ng mekera Dios a lousbech er a cherarou el kudmeklii a moktek er Ngii.
Omekodall el Rakt er a Beluulechad
Ng sebeched el mtebengar osisiu el teletael el mei er kid er chelechal sils, leng uaisei.
A kumdasou eng diak a chad el rongesak a lechub eng menguiu aikal tekingek el dirkak lolchesuar a telmellel tial omekodall el rakt.
A ngara klengitelreng le chedal a telungalek a lechub a resechelir a mla mad, aki ngara klengitelreng lobengkemiu. Nglungucham me a Chedam er a Babeluades bo longelaod e losumech a rengmiu.
A klemanget er a telmellel tial rakt a chengelakl er a di klechad er a chad. Betok el telungalek a dikea ududir e chelbangel a klengerenger, rrau a rengrir, e bekikl. Kede chemat a meringel lurerir a rebetok el chad el melasm el merrob er tial rakt. E mereng a saul er tirkel meringel loureor el mla odars a klengar tir lolngeseu, e omekungil, e melisiich er a rechad el tir a ngara chelebuul. A rengmam a mui er a omereng el saul er a ungil omerelliu me a chubechub el mobang.
Aki mesisiich el meluluuch me a Dios bo lebok a mado er a babeluades e lokeek a klengar kemiu er a klengeltengat er a Dios.
Kid A Tane
Ng dirk betok a diak dodengei el kirel tial rakt. Eng di chimol tekoi el kungil medengelii a kmo, tial rakt a dimlak lak lodengelii a Chedam er a Babeluades. Ngii a dimlak el bolosiik er a lmuut el cheldebechel er a reanghel, a lechub el lomekedong a bkaischemrungel el miting, a lechub e lorech a ngesou el ngarngii el kirel tial bkaischemrungel el teletael.
A klemechek er chelechal sils a kmo ng uaisei el tial rakt a diak el ngii a soad, eng di a Dios a mla kudmekelterir a Rengelekel me a Ikelesia er Ngii el kirel tiaikid el taem.
Kid a otekengelii tiang, choi. Eng di kired el muut el mo meringel loureor, e outekangel, e mengiil lemuut el mo uaia uchelel. Kede melemolem lomakes el bedul uchei, e mo ungil ruriul.
Kid a uaia, tane. Me sel mo uchul e a klaumerang er kid a mo mesisiich, eng kirel medalm e mukeroul. Ng sioning er ngak el kmo ng uaisei el bebil er a taem e kede omelchesiu el mla medakl er a ongarm er a klengar a lechub e kede seluk er a iilkolk, eng di a beltikereng er a Dios me a klengeltengat er a mle moluut el ebangkelio er a Jesus Kristo a mo meskid a mengasireng el sobecheklid.
A Klengeltengat a mei ruriul er a Ongarm
A bek el temel a beluulechad a di ngarngii a ringel me a ongarm el bla el siseb er ngii.
A Enoch me a rechedal a kiliei er a taem er a klengit, mekemad, me a kodall. “Eng di Rubak a mlei e kiliei lobengterir a rechedal.” Ng mlarngii a mengasireng el tekoi er a uldesuel kirir. Ngulngeseu el toketekii a Zion—el rechad el ta rengrir me a uldesuir” e “kiei el ngara llemalt.”4
A ngeasek el Joseph, el ngelekel a Jacob, a ulebidokl er a kliokl, e mloterau, e mlodik, e mlechoit.5 A Joseph a locha mlo omdasou el uase a Dios a mla obes er ngii. A Dios a mlarngii a mengasireng el tekoi er a uldesuel kirel a Joesp. Ngii a ulusbech er tiaikid el taem er a ongarm el melisiich er a Joseph el mlo uchul eng mlo mesebechakl er a telungalek er ngii.6
Momtab er a Joseph Smith el Profet er a lengara kelebus er a Liberty Jail, eng lilangel lolengit a ngesou el kirir a Resanto el mlara ringel. Ng locha mle melchedech el uase ng mekerang a Zion e mo mechederoder er a chelsel a uai tial teletael. Eng di Rubak a milsang a budech, me a klebokel chedaol ocholt luleak uriul a milsterir a budech a Resanto—e melemolem el meskau me a ngak a budech.7
Ng tela el taem er a uchelel a Ikelesia er a Jesus Kristo er a Uriul-klebesei el Santo el Resanto a mlora klengitelreng e milchedech el uase a Dios ng locha mla obes er tir? Ngdi ngokiu odechelakl, ongarm, me a oberaod el ulektakt, e a Rubak el Dios a mlarngii a ngodech el tekoi el mlara uldesuel kirir a Rengelekel. Kmo ngerang el diak a mtebengar.
Ngera kede subii er a ikal okesiu—me a lmuut el betok el ngara chedaol llechukl?
A kot, a remelemalt a diak el mochib er a ringel me a ongarm er a klengar. Ng kired el rokui el mo obangel ongarm, le ikaikid el taem er a ringel e kede suub osisechakl el smisichid e rullid el mo kmeed er a Dios.
Ongerung, a Demad er a Babeluades a medengei el uase kede ngara ringel, eng di kid el Ngelekel a uchul, e Ngii a diak el chitid.8
Momdasou er ngike el chimong el chubechub, el Osobel, el chiloit a temel er a klengar Ngii lomekungil er a rsmecher, resabisi, me a roumededenger me a rengara ringel.9 Omomdasou e Ngii ng diak lolbedebek er kid er chelechal sils?
Kemiu el sechelik, el betik er a renguk el rodam me a rodos, a Dios a mo omes e mengkar kemiu er a chelsel aikal taem er a rraureng me a dakt. Ngii a medengelkemiu. Ngii a remenges ongtmiu. Ngii a blak a rengul e sebeched lultuil er ngii. Ngii a mo kudmokl a telbilel.
A Dios a ngarngii a kmo ngerang el mengasireng er a uldesuel kiriru me a Ikelesia el rokir—el mengasireng lureor.
We Thank Thee, O God, for a Prophet
Aikel kot lungil sils a ngarmedad, ng diak el ngarulled. Tiaikid a uchul e a Dios a meskid chedaol ocholt er chelechal taem! A lak, e kid a di mesebesek, el mengiil el mo meiusech mel sebeched el mo chelellakl A moktek er a Rubak el kired a lmuut el ngarbab er tiang. Le tiang a Ikelesia er a ngar el Kristo, e Ngii a omekrael er a reprofet er Ngii, a uchul e kid omakes el bedul uchei e bedul bab, el mo er sel basio el dirkak a tal de bor ngii, el ngarbab el diak el sebeched el mtebengar!
Chelechang, e tiang a diak el belkul a kmo ng diak bo desiseb er a ringel el daod er tial kelngar er a chutem. Ng diak el belkul a kmo ng diak el borngii a bkaischemrungel el duubech, me a tellemall, me a ses el eolt. A mera er ngii, ng sebechel kmal merael mo mekngit ruchei er a bolungil.
Ngak lulmekall a skoki, ak silubii el uase ng uaisei el diak el sebechek el melilt a olibesongel el bok chelbangel sel kumekall, eng di ng sebechek el kudmeklak el kirel me a ikel bo kuruul sel dubech A usbechall er a taem er a ringel a chelelakl el reng me a bleketakl luldasou.
Kede mekerang e meruul tiang?
Kede mo chemau ngii e lmuut lomes aikel meklou a ultutelel, meklou a ultutelel osisechakl er a ebangkelio, el kmo ngera ikel meklou a belkul. Ke smsisiich a blekerdelem er a klechelid er kau—el uaia nglunguuch me a omesubel chedaol llechukl me a oltirakl a llechul a Dios. Ke melilt omoruul tekoi lultuil er a bedochel lomeruul.
Momes aikel sebechem el remuul ng diak likel tekoi el diak el sebechem el remuul.
Ke smisichii a klaumerang er kau. E orrenges omekrael tekingel a Rubak me a profet er Ngii el mo omekrael er kau.
Molatk el kmo, tiang a Ikelesia er a Jesus Kristo—Ngii oba ongengel.
Momdasou aike betok lungil tekoi el mla duubech er a ikal mereko el telael rak. A bebil er ngii a:
-
A sakrament a liluut el moterekokl el kot el klou a ultutelel lomengull er a Chedaol sils.
-
A Mei, Moltirakl er Ngak a mlekedmokl el kirel omesuub er a blai, lolngeseu er a Ikelesia el melisiich er a dersta el chad me a telungalek.
-
Kede milchelii a lmuut el ngarbab lmuut el chedaol teletelel odingel.
-
A usbechel a technology a omerk er a ebangkelio e meruul a urerel a Rubak a mla oberk er a Ikelesia el rokir.
Uldimukl er tial klou el ongdibel a locha diak el mekedmokl a lak a technology.
Rodam me a rodos, ngokiu a Kristo loba ongeu, eng diak di bo lungil besul a rokui el tekoi; ng dirrek el mo mengasireng.
A Ureor el Mengidb er a Israel a Melemolem
Sera uchelel e tial omekodall el rakt a rengud eng mo torbengii a urerel a Rubak. Okesiul tiang, a uldelid el teletael er a osischeklel ebangkelio a mlo diak el sebechel. Eng di, tial omekodall el rakt a mla ocholt a beches e lmuut el bedochel teletael er a osisechakl el mo er tirkel losiik. A ureor el mengidb er a Israel a merael mo obdois e mesisiich. Betok el betok el cheldecheduch a sioning er tiang.
A ungil sechelimam el kiei er a Norway a milluches el mer ngak ma Harriet louchais er a iildois er a techolbechelid. “Aikel basio el Ikelesia a kmal kekerei,” ngii a milluches, “e a rekesai a rulii a branch, e a branch a mekdebechii a ward!!”
Chelsel a beluu er a Lativa, e a redil el miltik er a Ikelesia lokiu a internet a kmal mlo ungil a rengul el mesuub el kirel ebangkelio er a Jesus Kristo meng kuk kmal mle mereched el mo er sel sils, e uchei er a bol merek a remisionari er a kot el osisechakl, e nguleker er a sils el bol metecholb.
Chelsel a Beluu er Ngebard er a Europe, e a tal redil ngiluu okedong er a remisionari a millekoi, “Rodos, ngera meng dimlak momekedong ruchei? Ng meketeketang el kungiil!”
Betok er a remisionari er kid a kmal mechesang er chelechang. Betok er tir olisechakl er a rebetok el chad er chelechang. Ng klou sel deleuill er a rechedal a ikelesia me a remisionari.
Sera uchei, e kid a locha kmal mlo mechesang er a dimla teletael me tial omekodall el secher a locha milok a medad. Kede locha dirk ulusbech a chelechol e a bad a mla morngii. Chelechang, e kid a mesuub lousbech a kakerous el klekedall, luldimukl a technology, el siotai er a rechad—loba ungil teletael me a omeruul—el mei e omes, mei e olngeseu, e mei e mkiei.
Urerel, Teletelel
Tiaikid a urerel a Rubak. Ngii a siotai er kid el mo osiik er a Teletelel e mo meruul er ngii, e locha ngodech er a ikel bla doruul.
Tia dilubech el mo er a Simon Peter me a rebebil er a rultirakl el tir a mlora chei er a Debel a Tiberias.
“Sel kesus eng dimlak a chelderir.
“Eng di bochal tutau … [ea], Jesus a dilchor er a kederang. …
“E dula er tir el kmo, Motengel a ukediu er a kuk]bitang er a bilas, eng morngii a cheldmiu.”
Me te ultengel a ukedir er a bitang er a bilas e “mlo diak el sebechir longasech er a iidisel a ngikel.”10
A Dios a mla chotii e melemolem lolecholt er a mesisiich el Chimal. Ng mereku sel sils e kid a mo chelellakl e melbedebek er chelechang e mo medengei el kmo aikal taem er a kerior, a Dios a ulngeseu er kid el mo metik er a ungil teletelel el—Teletelel—a okedecherul a Rengedel er a mesisiich el dodai.
Ak sioning el kmo tiang a urerel a Dios e Ngii a melemolem el meruul a betok el mengasireng el tekoi er a delongelir a Rengelekel, me a Rechedal. A Dios a klsool er kid er a chereuel a Chimal loba chubechub el chim.
A kuuchais el kmo a President Russell M. Nelson a profet er chelechal sils.
Me ngak el Apostol er a Rubak, ak siotai e omekngeltengat er kemiu el mo “ngara deureng e meruul aikel rokui el [ngerchelem]; e [bom] chelellakl, e modengei el kmo, ko mo mesa rengedel a Dios, me a chimal a mo mocholt.”11 E ngak a yaksok el kmo a Rubak a mo remuul a mengasireng el tekoi el mei lokiu aikel melemalt lureriu. El ngara a ngklel a Jesus Kristo, amen.