Rodos er a Zion
Kemiu a klisichiu a klou a ulsbechellel er a omengedibel er a Israel me a okdebechel a rechad er a Zion.
Betik ra renguk el rodos er ngak, ak ngeltengat el mo mengedecheduch er chelechal kmal ungil taem er a reksi er a beluulechad. Bek el sils, e kid a dimerael mo kmeed er sel klebokel el taem el Osobel el Jesus Kristo a lmuut el mei er a beluulechad. Kede medenge bebil er a ktekudel el tekoi el morngii ruchei er a lemei, eng di a rengud a belkuuk er a deureng e ansing e dirrek el medengelii sel klebokel el telbiil el ngii a mo mutaut ruchei er a lemei.
Kid el betik ra rengul ngelekel redil a Chedam er a Babeluades, e ngelekel a Rubak el Jesus Kristo er a Rengedel, 1 kau a ngarngii a klou a belkul el urerem er a ikal merael mei el mekklou a ultutelel klebesei. Kid a medengei el kmo a Osobel a mei el mora rechad el tir a cheldull el keldmokl el kmo kiei el di uai tirkel chad el ngara belual a Enoch. A rechad el mla er sei a mle ta klaumera er tir er a Jesus Kristo e mirrael el meral mlo klikiid me te milengai el mora babeluades.
Tiakid a mesaod er a lulechotii a Rubak el dilubech el mora rechedal a Enoch e mo dubech er tial ulebongel el renged er a cherrungel taem.
A Rubak a dilu el kmo a sils a mei el beluulechad a mo olengull, engdi uchei er sel sils ea eanged a mo milkolk, me a ilkokl a mo dokedekii a beluulechad; me a eanged a mo melmesim, dirrek a beluulechad; me a meklou el kerior a mo ra delongelir a rengelekir a rechad, engdi a rechedak a bo ku ngeluolou er tir;
“Me a llemalt a kudurokl el meriou el mlara babeluades; e a klemerang a bo kutobed el mlara beluulechad, el mo sioning er a Dita el Ngelekek; a okisel er a kodall; oi, me a okiserir a rokui el chad; me a llemalt me a klemerang a kngai el mo merk er a beluulechad el di uai a ieleb, el mo mengedibel er a rengellitel er ngak el ngara ikal eual saus er a belulechad, el mora basio el bo kedmeklii, el Chedaol Mats, me a rechedak bol lokes a usekerir, e bo lomes el kirel sel el ngak a mei; e leng seikid a mo blik, el ngii a mo okedongall el Zion, el Beches el Jerusalem.
“Me a Rubak a dilu er a Enoch: Misei e kau me a rokir el buluam a mo kebetech risei, me kede ngoititerir el merkid, me te mesekid e kede mo kaiuechull, e mo ketungel el mad;
“E seikid a bo kiei er ngii, e ngii a mo Zion, el ngii a metuobed er ngii a ikel rokui el blebelek el blak ruul; me a chelsel a tal telael el rak ea beluulechad a mo cholengull.” 2
Kemiu e rodos, me a rengelekiu el redil, me a rengelekir el redil, me a remeklou el redil el mo mulmekerreu er tir a mo ngar sel chaidirengul a omeob er tial chelechad er a rechad el tir a mo teloi er sel klebokel el deleuill lobengkel a Osobel. Kemiu a klisichiu a klou a ulsbechellel er a omengedibel er a Israel me a okdebechel a rechad er a Zion el tir a mo kiei el ngara budech er sel Beches el Jerusalem.
A Rubak a mla, okiu a re profet er Ngii, e rulii a telbiil lobengkemiu. Sera uchelel a Relief Society, ea Profet Joseph Smith a millekoi el mora rodos el kmo: Alsekum kom kiei lokiu a mla metutk el kiriu, ea re anghel a dikeal sebechir el moreked el diak lobengkem.” 3
Tial klebokel techall a ngar kau, me kau a longedmokl er kau el kirel tiaikid.
A President Gordon B. Hinckley dilu el kmo:
“Kemiu e rodos … a diak moba ongeru el basio er a uldesuel a Chedam er tial diak a ulebengelel deureng me a klungiolir a Rengelekel. Kemiu a kot el klou a ultuteliu el tebedechel tial uldasu.
“A lak kemiu e tial uldasu a diak loureor. A lak kemiu e tial prokuram a diak el bol tekoi. …
“Derta er kemiu a ngelekel a Dios el redil, loba klebkellel el chedaol cheroll.” 4
A profet er kid, el President Russell M. Nelson, a mla smodii sel ngerchelem el mo mengedmokl er ngii el kirel a lemei a Osobel.
“Ng meringel er kid el melebodeb er a klisichir a … redil, el diak el dil chelsel a telungalek ng dirrek el Ikelesia er a Rubak, el ngarngii a bechiil el redil, chedil, me a dirrek chedei; rodos me a re anti; sensei me a dirrek el roungerachel; e a tokuni te ungil okesiul a blak el reng el mesebechakl er a klaumerang.”
“Tiang a mle klemerang er a bek el renged er a ebangkelio sera lomuchel er a Adam me a Eva. Uaisei, engdi tirka el redil er chelechal taem a ngodech er a ngii di el redil el mla ngarngii e le chelechal taem a ngodech er a ikel mla ngarngii. Tial ngedechel a mei loba techall me a ngerachel.” 5
Chelechal taem a ngodech e le a Rubak a mo omekrael er kid el mo kldmokl el mo uaia Belual a Enoch. Ng mla smodii el mora re apostol me a re profet er Ngii el kmo tia lomerael el mo chad er a Zion ng mo ua ngerang.
Elder Bruce R. McConkie a ulsisechaklt:
“A temel a [Enoch] a mle taem er a delngerenger me a mekngit lomeruul, sils er a ilkolk me a klautok, sils er a mekemad me a uldikel, sils el mle uldelid el morsel omekbeches er a beluulechad loba ralm.
“Engdi a Enoch, a mle kedung. Ng ‘milsang a Rubak,’ e milngedecheduch er ngii el ‘chachebangel a mederir’ el di uaia chad a longedecheduch er a tara chad. (Moses 7:4.) A Rubak a uldureklii el mo ouchais ra ouchelreng el mora beluulechad, e ulderchii el mo ‘melecholb loba ngklel a Chedam me a Ngalek, el ngii a mui er a krasia me a klemerang, me a Chedaol Reng, el ngii a sioning er a Chedam me a Ngalek.’ (Moses 7:11.) A Enoch a siliseb er a telbill e milngedibel er a rechad el tir a mera loumerang, tir el rokui a mlo meral mlo kedung me a ‘Rubak a mlei e kiei lobengterir a rechedal, me te kilieie el ngara llemalt,’ e mlukngeltengat er a babeluades. ‘Ea Rubak a ulemekedong er a rechedal el kmo Zion, le tir el mle ta rengrir e ta uldesuir, e kiliei el ngara llemalt; e dimlak a chebuul er a delongelir.’ (Moses 7:18.) …
“A uriul er a Rubak lomekedong er a rechedal Zion, ea chedaol llechukl a melekoi el kmo a Enoch ‘a milkedecherur a mats el lomekedong er ngii el Beluu er a Chedaol, el ngii a Zion;’ seikid el Zion ‘el mlengai el mora babeluades’ seikid ea ‘Dios a ngiluu el mo er ngii;” meng mla er “seikid ea chais a tilobed el kmo, a Zion a mla merael.’ (Moses 7:19, 21, 69.) …
“Tiaikid losisiu el Zion el mlengai el mora babeluades a lmuut el mei … sel luut a Rubak el nguu a Zion el mei, me a rekiei er a chelsel a mo teloi er a beches el Jerusalem, el ngii a mo meteketek.” 6
Alsekum me a irechar a uchelel, e sel taem el lemei a Osobel, ea rengalek el redil el tir a mesiiich loltirakl a telbilir lobengkel a Dios a mo klou er a tedobech er tirkei el tir a kldmokl el mo omukai er Ngii sel lemei. Ngiidi el ochur, a ngerchelem lomekdubech er a kltalreng er a delongelir a rechad el kldmokl el mortiaikid el Zion a lmuut el klou er a tedobech.
A kmo ouchais er kau er a uchul e ak oumerang el uaisei. A Babier er a Mormon a meskid a cheldechederir a rechad er a Zion. Ko medengei er sera uriul er a le mosisechakl, nguu a beltikelreng, me a klengeltengat er a mla mokiis el Osobel e “ng mlo diak a klautok er tial beluu, e le beltkil a rengrir er a Dios el ngii a kiliei er a chelsel a rengrir a rechad.” 7
A kudengei lomeruul a mla osisecheklak el kmo a rengelekel a Chedam er a Babeluades el redila oba sengk el mengkekerei a klautok e olsingch a llemalt loba beltikelreng er tir er a Dios me tial beltkil a rengrir er a Dios a lokdebechii el mo er tirkel tir a lolegeseu er tir.
Ak milsang er ak ngeasek el kekerei el ikelesia er kemam a mle meruul er a misang er er a blimam. Dital obekuk me a ngak a ullab a Aaronic Priesthood, a demak a dimle imong el Melchizedek Priesthood. A president er a Relieaf Society er tial ikelesia a dirk ulebult ea bechil a dimlak el soal tial ngerchelel er a Ikelesia. A rechedal a ikelesia a betok el mle meklou el redil el dimlak a oba priesthood er a chelsel a blirir. Ak ulemes er a delak me a tirkal rodos el dimlak a tang me bolak el kaubeltikelreng, ketkakl, e kaukerreu. Ak medenge er chelechal kmo tiaikid a mle osengek er a Zion el bilskak.
A osisechakl el merngak er a ongetikaik er a redil a millemolem er a kekerei el Ikelesia er a Albuquerque, New Mexico. Ak kulemes er a bechil a branch president, me a district president, me a Relief Society president el rirutech a rengrir a rebek el beches el chad me a dirk mlo chedal a ikelesia. Sel Sandei er ak tobed er a Albuquerque, ruriul er a erul rak lomes a ongetikaik er a rodos risei, e a kot el stake a mlokdubech. Chelecha ea Rubak a mla loiang a templo risei.
Ak mle melukl el mora Boston, el mle mesiou el ngar a district presidendy el oungerachel er betok el mekekerel el ikelesia el ngara eru el beluu. Ng mla rengii a klautok el betok er a tang el kim kildmokl lokiu a klaubeltikelreng me a klausubes er a redil el tir a ulngeseu el domedemek a reng. Sel Sandei er ak tobed er a Boston, ea chedal a First Presidency milngederoder er a kot el stake er a chelsel a Massachusetts. Ngarngii a templo el ngar sei er chelechang. Ngii a mle ngai el mora omilil er a Ikelesia e a uriul eng mlokedong el mo mesio el stake president e kuk mo mission president, el lulngetikaik er ngii a blak a rengul loumerang el bechil.
Rodos, kemiu a ngiluu a klengeltengat el redil ngelekel a Dios el oba meringel chad el sengk. Kom ngiluu el mei er tial klengar a chedaol teletael el mo omekerreu er a rechad e menguoku er tir el morbab el bedul a beltikelreng me a klikiid el ngii a sebechel ngoititerir el mo dmak el kiei el ngara cheldebechel er a Zion. Tia diak el aksident el Relief Society, a kot el chelechad er a Ikelesia el ruul el mora rengelekel redil a Chedam er a Babeluades, el oba moktek er tir el “Dmolech el Beltikelreng a Diak el Ngemed.”
A Charity a bliochel el beltikelreng er a Jesus Kristo. Meng klaumera er kau er Ngii me a cherrungel e oureor el diak a ulebengelel Tngakireng er Ngii a mo osisebau, me tirkel kau a oubeltikel reng e mesiou er tir, er tial ngarbab el sengk el mo kiei er tial beluu el meketeketa er a domes er ngii el ngii a mle yaksok el Zion. Nga risei e komo odos er a Zion, e loubeltikelreng er kemiu a Rubak metirkel kau a ulmekngeltengat er tir.
Ak kuuchais el kmo kau a chad er a rengedel a Rubak el ngar tial beluulechad. Kom ngelekel redil a ungil Chedam er a Babeluades, el uldureklemiu el mera beluulechad lolab a kakerous el sengk el kemiu a tilbir el mo ousbech lomekngeltengat er a rebebil. Ak yaksok er kemiu el kmo a Rubak a mo omekrael er kemiu lurrekodel a chimomiu, lokiu a Chedaol Reng. Ngii a mo oak medemii sel molngeseu er Ngii el mengedmokl er a Rechedal el merael el mor sel Zion el blel yaksok er Ngii. Ak dirrek el olecholt er a klaumerang er ngak loba ngklel a Jesus Kristo, boluaisei.