Kede Obang a Keltarreng E Nguu a Klisichel a Dios
Sel dosiik er a kltalreng, e ked emo otengelii a klisichel a Dios el remuul a blakereng er kid el mo tang.
A delal a Gordon a dilu er ngii el kmo bol merek el meruul a urerel ra blai, eng mo rulii a kelel pie. Sel kot el soal. Ng kmal di kelel. A Gordon a mlo meruul a urerel er a blai, ea delal a mlo meruul er tial pie. A klou el ochedal er a Kelly a mlei er a blai lobengkel a sechelil. Ng milsa tial pie e uleker el uase ng sebchel ngii ma sechelil el menga er ngii.
“Diak,” ng dilu Gordon, “tia kelek el pie. A mami a rirelii el kelek, e mle kirek loureor el kirel.”
A Kathy a ileklii a ochedal. Ng meral di omdasu er ngii e diak el soal merous. Ng mekera longa er tiang el di ngii el tang?
A bol uriul er a le bo er a mlai a Kathy el mo meradel er a sechelil, e ngar tial kingall a teblo el napkin el kmal ungil telatam, teblo el taod el ngar bebul, me a teblol pie el ngara blatong. A Kathy uluuchais er tial cheldecheduch er a kemeldilel a Gordon el lolechotel el kmo ng mle soal mengodch er ngii e olecholt er a blekokeuii el mor tirkel blechoel diak
Sera 1842, ea re Santo mle meringel loureor lomkedechor er a Nauvoo Temple. Uriul er a teketekel a Relief Society er a March, e a Profet Joseph a mle blechoel mei er a miting er tir el mengedmokl er tir el kirel a chedaol el ruoll, el bochu loruul er a chelsel a templo.
Sera June 9, ea Profet “a dilul kmo ng molisechakl el kirel a chubechub[.] Omko Jesus Kristo me a [ re] anghel a dmu er kid a meringel el tekoi, eked elocha mekerang? Ng kiired el mo chubechub e obes a mekekerei el tekoi.” A President Smith a millemolem, “Ng mekngit a renguk el kmo ng diak a ungil klausechelei—le alsekum a chimong a ngara ringel eng tir rokui a melchesuar—le ngultuil er a kltalreng e kid a nguu a klisiich lobengkel a Dios.” 1
Tial kedeb el tekoi a kmal silbechii er a ngak el uaia desiu. Sel dodak a rengud ede mobang a klisichel a Dios. Tial beluulechad a diak el uai ngii er a ngara mong. Ng betok el tekoi el soak el mo meruul mo ungil. E dirrek el mal betok a klengit el kirel aikel kuureng, ea le bebil eng mo mechitechut a renguk. Ak blechoel, mo metik er ngak loker: Ak mekerang e mo ungil omtab er a rechad er bita er ngak? Ak mekerang eh mo toketekii a “kltalreng” sel sekum a rokui el chad a di kakerous? Ngera el klisichel a Dios a mo sebechek el nguu alsekum ak telkib el mo kaukledem ngak ma rebebil er a rechad? A kusiik er a chelsel a renguk, e ngarngii a kldei el kumdasou. Aika locha dirrek el sebchel ngosukau.
Bom Chubechub
Jacob 2:17 a kmo, “Momdasu er a [rodam me a rodos] er kau el uaia omomdasou el kirem, e bo modengelterir rokui, e morous el mor tir me bo lungil beserir el uai kau.” Msall e dengedechii a tekoi el klalou loba chubechub—bo mimokl loba chubechub me bo lungil beserir el uai kau.
Kede blechoel lomdasou a klalou el rua kall a lechub a udoud, eng di sel desal lousbech er ngii er a ikel odngeled a chubechub.
A merreder ngak er a Relief Society dilul kmo: “A tekoi el … kyaksok … er kau el kirel a mo mesebechakl er a ngklem. … Ak mesekau er sel kau a ngii me sel klungiolem. … Ng diak bok delii a ngii de el ngerang lekor kau el mekngit, el diak bol sebecheklau. A kulengit me moruul er a osisiu el mei er ngak le ak, meral, medakt, el tomelii a rengum.”
A Joseph Smith a dilung er a rodos er sel sils er a June 1842:
“A chad sel lochotii a kmal kekerei el blekokeuii el mei er ngak, Eng meral mo dmeu a rengul a uldesuek. …
“…Sel dolkeed el mo er a Demad er a Babeluades, e kede memgal mo oba chubechub el mora rengar ringel—[el kid omelchesiu el soad] el mo chellungel, e lemechoit a kngterir rulled. [A cheldechedechak a] mo e ra rokui el Beluu—el kmo omko Dios a mo chubechub el kiriru, e bom chubechub el mo er a ta me a tang.” 2
Tia mle omellach el melutk el mo er a Relief Society. Lak dorritel er a ta me a tang a lechub el tobed a mekngit er a ngered. Domecheliu er a ngklel a ta me a tang e dochotii a sengk er a chubechub. 3
A Bilsengiu Bo Ta Bedesil
Sera 1936, e a time r a omeius er a University er a Washington a mlo er a Dois el mo er a Olympic Games. Tia sel taem er a Klou el Chelebuul. Tirka tirkel diak lungil beserir el buik el ureir er a omengiis el kolt me a omelechelcholch el kerrekar e t emla kudmokl a sesei ludoud el sebechir el mo er a Berlin. A bek el telengtengil a klaiuengader a ko er a di mesisiich er tir, eng di ngarngii a dilubech er tial klaiuengades. A tekoi er a omesius, a lomekedong er ngii el “swing.” Mrengesii tial omesodel el ngara buk el Rebuik el ngara Bilas:
Ngarngii a tekoi el duubech a lebebil er a taem el meringel a doruul e meringel a dosaod er ngii. Ng okedongall el “swing.” Ng duubech sel sekum a rokui el chad a tal meius el diak a ngera loruul er ngii.
A rechad el meius a kirir el kmal blak a rengrir e a osisiu el taem e a derts el chad a kirel meruul er sel ngerchelel. A klaiuengader a diak bol kats er ngii a rumtechei. A rungil dmak a el chad a ta teletelir—el ngarngii oungerachel, e ngarngii ngike loserechii a rengul, e ngarngii ngike el mo omtok, e ngarngii ngike el meruul a budech. Ng diak a chad el kuk ngarbab er a tang, tir el rokui el meklou a belkrir, eng di alsekum e te dmak el meius, eng kirir lultuiul er a ta me a tang—el ngkel kuk mesisiich el meius a merengul, e ngike el kuk mechitechut a mekekokil.
A klekakarous a sebechel mo klungiaol ng diak bol kngtil. Seikid e kid a melchesuar a bils el di ngii el merael. Seikid e a ringel a mekekokil el merael mo diak. A ungil “ta bedesid” a uaia poem. 4
Meng dimlak el iior er a betok lolibesongel, e tial tim a mle dmak loureor e mlo kats. A nguked lengiluu er tial Olympic a mle deuil a rengrir, eng di sel kltalreng lesilubii tirka el chad er a omeius er se sils a mle klou a ultutelel e di mle mereko medechel er a rengir.
Morchedau el Choroid a Mekngit me Ledubech a Ungil
Sel olachitngeer el ngara Jacob 5, e a Rubak er a sers a dillemii a ungil kerrekar er a ungil chutem, eng di ng mlo mechut e mlo mekngit lourodech. A Rubak er a sers a eai el taem lolekoi el kmo: Ng mekngit a renguk [el] lemad tial kerrekar.
A remesiou a melekoi er a Rubak er a sers: Ka becherei [tial kerrekar] el telkib el taem. A Rubak a dilu el kmo: Choi, ak mecherei el telkib. 5
E sola mei aikel tekoi el sebechel tekoi el mo er kid el rokui el melasm losiik er a ungil rodech er a klengar kid: Kom chemoit aikel rokui el mekngit mel sebechel a ungil duubech. 6
A kltalreng a diak di lekiul duubech; kede oureor el kirel. Ng chetituokel, e a bebil er a taem eng diak lungil er kid, eng di ng mekekokil duubech sel rochedid el choroid a mekngit me a ungil sebechel duubech.
Kid a diak dil kid el tang er a blakereng er kid lomekdubech er a kltalreng. A Jacob 5 a melemolem, A remesiou a mlong me te oureor el blak a rengir, me a Rubak er a sers me ngulureor lobengterir. 7
Kid el rokui el mo soiseb er a meringel el tekoi, el tekoi locha dimlak el kirel duubech. Kid el rokui a dirrek, el bebil er a taem, e kede mecherei a kldidai el reng me a mekngit el reng meng tomelii a rodech el dobang. Engdi Jesus Kristo Osebeled er a rokui el tekoi. A klisichel a mo rutechii sel kmal cheslel a rengud e medechel el mo er sel bo domekedong er Ngii. Kid el rokui el di mo olengit a chubechub el kirel a kngtid me a chelitechetud. E Ngii a meskid el di tada. E Ngii olengit er kid el nguu osisiu el chubechub el mo er a tara chad.
A Jesus a milketeklii: “Bom tang; le lak bom tang eng diak mchedak.” 8 Eng di alsekum kede tang—omkom kede odekdak aikel dodengei me a duch er kid mel sebechel a bilas el tabedesil—e seikid e kid a Chedal. E Ngii a mo ngosukid el dmedaes aikel mekngit me a ungil a sebechel mukeroul.
Ulaoch er a Yaksok
Kid a dirkak de bo er sel ngii a soad el morngii, e kid a dirkak de bo er sel ngii a kired el morngii. A kuumerang aikel soad el melodech er a klengar kid me a rebebil a mei lokiu sel doureor e dolasm er a bek el sils el mo ungil medengelii a ta me a tang. E le ngerang? Le kid a melasm el meleketek er a Zion—el tir a rechad “loba tal reng me a tal uldasou.” 9
Kid el redil er a telbiil, a klou a derellii. Tiaikid el teletael a sebeched el meruul er a bek el sils sel dosuub lobengkel a sechelid, omechiuaiu er a rengalek, a dongedecheduch er a chad el dedak el dengchokl er a chelsel a bas, e dongedmokl er a kmo ngera kid me a chad el dedak loureor. Ngarngii a klisiched el choroid a mekngit luldasou e toketekii a kltalreng.
A Relief Society me a Young Women a diak dil class. Aika dirrek el diak dobes lomeruul el kakerous el redil a ngmasech er a osisiu el bilas e meius el tabedesil. A kdulii tiakid el ongit: bom teloi er a rebetok el tir a sebechir el ngodechii a beluulechad. A telbiil el ngercheled a mo mesiou, me mesebechakl er a remechitechetong, e mo chellungel er a rengara ringel e oltour er tir ra uleked. Ng diak el meringel bododengei a kired el meruul, e ng di ngblechoel lomtok er sel soad meng kired el melasm. A remechas er tial Ikelesia a diak a telkelel a techellir el mo ngodechii a beluu. Ak mui el medengei el kmo, sel dosiik er a kltalreng, e ked emo otengelii a klisichel a Dios el remuul a blakereng er kid el mo tang.
A Ikelesia er a loudkeu er sel chedaol ocholt er a 1978 el kirel a priesthood, e a President Russell M. Nelson a ultebedii a mesisiich lulaoch el klengeltengat: “Nglungchek e klengeltengat el kbesterir tirkel rokui lorrenges me bo decheroid a ngii di el mekngit luldasou e dorael melemalt lobengkel a Dios—me a ta me a tang—el ngara budech me a kltalreng.” 10
Me bo denguu tial klengeltengat er a profet e dolasem lousbech er ngii me a rebek el chad el mo mengisois er a kltalreng er a beluulechad. Ak meskemiu a sioning er ngak er a tekingel a Rubak el Jesus Kristo, e rtiakid el nglunguuch: “Me tir bol tang; el uai kau, e Chedam, el ngara ngak, me a ngak a ngara kau, me tir bol tang lobengked.” 11 El ngara a ngklel a Jesus Kristo, amen