Kmal Chetengakl er a Rubak
A taem er a ongarm me a moalech el reng a diak el ngedechii osengel a Rubak el Ngii a kmal omes er kid, e omekngeltengat er kid.
A tara klebesei er a ngaramong, ak mle ngeasek el missionari el mesiou er a kekerel ikelesia er a kekerel beluul er a Amami Oshima, er a Siabal, kldemek me ngak a meral mlo ungil a rengmam er a ki bo modengei el kmo a President Spencer W. Kimball a mei ra Asia me a rokui el chedal a ikelesia me a re misionari el ngara Siabal a mlor tir a tekoi el mora Tokyo el mo orrenges er a profet er a ongibel er a beluu. A rechedal a ikelesia, me a kldemek me a ngak a mocha merech er kemam el kirel tial ongdibel, el ngii a mle teruich me a eru el sikang el kim ngara bilas er a East China Sea el mo er a Siabal, me a dirrek el teruich me a eim el sikang el kim ngara kzia el mo er a Tokyo. Ng klengitelreng, el uaisei, e ng dimlak el sebechel. Aki ngilai a tekoi el mla er a merredel er a mission el kmo ng cherroid e kosekodel a time me a uchul, e ngak me a kldemek a mo diak el sebecham el mo er tial ongdibel er a Tokyo.
El bebil er a rechedal a ikelesia er tia el kekerei el branch er kemam a milrael el mo er a Tokyo, e kemam a di kiliei. Aikel klebesei ruriul a uaia blel kellechakl e diak a ngerang. Aki rirelii a sakrament er tial kekerei el ikelesia el di mle kemam, e a re Uriul-klebesei el Santo me a remisionari el ngara Siabal a mlar tia el klou el ongdibel.
Ng mirrael el mo imis el moalech a renguk er a luut er tirkal chedal a ikelesia ruriul er tia el ongdibel e kurrenges er tir el ngara deureng e louchais a tekingel a President Kimball el kirel okedecherul a templo er a Tokyo. Te meral mla er a deureng el melekoi el kirel tial urungulir el toutang. Te milsaod el kmo, sera rengesii a chisel okedecherul a templo, e a rechedal a ikelesia me a remisionari a mlo diak loreked a deureng er tir e di mle keberuul lomrotech a chimorir.
Ng mla mo rak me a rak, e ng di ak mal dirk medengelii sel moalech el reng el ngak a milchesuar el dimlak el sebechek el mo er tia el ngara reksi el miting.
Aika el mereko el buil e ak mla melbedebek er tial teletael sel kumes e kumtab er a dmolech el moalech el reng me a klengitelreng—e lemuut el ngarbab er sel dilubech el mei er ngak er a kngeasek el misionari—el tial secher el COVID-19 a uchul.
Sera uchelel chelechal rak, er a di lomerk tial rakt, e a First Presidency ultebedii a tekoi el kmo a “Ikelesia me a rechedal a blak a rengrir lochotii a ungil klechad me a ungil lomeruul el mo er a retonari”1 e kmal “mo ungil kerekikl.”2 A leuaisei, e kede mla torrob aikel kldibel er a rechedal a Ikelesia er a beluulechad el meliuekl, e olluut er a kmeed el tedobech er a remisionari er a Ikelesia le muut el mo remei, e chosimer a rokui el templo er a Ikelesia el rokir. Betok er kemiu a milngedmokl el mosoiseb er a templo el kirel chedaol ruoll—luldimukl omak a deleuill er a chelsel a templo. A rebebil er kemiu a mlo telkib el mereched el momerek a temiu el misionari a lechub e kom kuk mla mo mesiou er a tara basio.
Chelsel tiaikid el taem, e a roungerachel er a kabelment me a tekoi er a omesuub a chilsimer a skuul—el ngilodech a teletelel omelilt me a dirrek el mlorimel el torob a tekoi er a klekool, ongdibel, tekoi er a siukang, me a bebil er a tekoi me a omeruul er a skuul. Betok er kemiu a mlengedmokl el kirel a klaiungader el dimlak leborngii, me a dimlak el morenges, me a tekoi er a klekool el dimlak bo mousekool.
E sel kmal meringel a uldasou el kirir a tengulalek el mla mo dibus a rebetik er a rengrir er tial taem; el betok a diak el sebechir el mengemeldiil a lechub e kuk di el ko er a kldibel el ngii a mle sorir el meruul.
A dongedeb er ngii, eng betok, el betok er kemiu a mla mo mekurt e moalech a rengmiu, e ngara klengitelreng, me a ngasechereng. Me ng mekera a domekungil, e doutekangel, e omakes el bedul uchei sel sekum e kede omelechesiu el mla metemall a tekoi?
A profet el Nephi a ulemuchel el lomotk aike el mekekerei el zintsiu se er a le bla bo el klou el chad. Sera lomes er a klengar ngii me a urerel, eng mlo mtebengar el kmo ngii a uchul sel klou a belkul el llechukl er sel kot el bades er a Babier er a Mormon. Tia el bades a ochotii sel kmal klou a belkul el osisechakl el me er kid el mo melebedebek el kirel er chelecha el taem. A dodengei el tekingel a kmo, “Ngak, el Nephi, el mlukeroul er a rungil loungalek … ,”ngii a meluches, “e mla mes a betok longarm er a klengar ngak, eng di, a kmal mla mukngeltengat er a Rubak er a klengar ngak”3
Kid el mesuub er a Babier er a Mormon, a di medengei a betok longarm el Nephi a mesaod. Eng di uriul er a louchais ongarm er a klengar ngii, e a Nephi a meskid osengel er a ebangkelio el chetengakl er a Rubak er a chelsel a rokui el sils er ngii. A taem er a ongarm me a klengitelreng a diak el ngedechii osengel a Rubak el Ngii a kmal omes er kid, e omekngeltengat er kid.
Lesa me ngak a dirk mlo kebetech lokiu a melidiul lobengterir a bekord el elolem el dart el misionari er a Australia, el betok er tir a mla mechesimer me a lechub e te diak el sebechir el mekerang er tia el COVID-19, el betok a uluureor er aike el ble el kiei er ngii. Kede dmak el rokui e omasech er tirke el chad el ngara Beches el Renged, Babier er a Mormon, me a Doctrine and Covenants el tir a Dios a ulumekngeltengat er tir el mo kudmokl a meklou el tekoi er a chelsel a ongarm. Tir rokui a mlucholt el okiu aikel tekoi el sebechir el remuul el ngii a lmuut el betok lokiu a ngesou er a Rubak er a ikel kuk bai mlodiak el sebchir remuul er a taem lengara bul e lak el sebechir el mekerang.
Aki milnguiu el kirel a Paulus me a Silas, er a le ngara kelebus, e loluluuch, longitakl, lolisechakl, e le sioning—e dirrek el milsa techolb a chad ra kelebus.4
E lmuut me a Paulus, er a lengara Rom, el mle kelebus el di ngara blai el diak el bol tobed leru el rak, el tiaikid el taem eng millemolem “lolisechakl e sioning er a rengedel a Dios,”5 “lolsisechakl aikel tekoi el kirel a Rubak el Jesus Kristo.”6
A Nephi me a Lehi, el ngelekel a Helaman, ruriul er a mekngit lomeruul me a kellebus el mlo er tir e a ngau a mlo iliuekl er tir el mesebechakl er tir e a Rubak “lokiu a chelellakl e medemedemek el ngor … a silbechii [a rulemdechem er tir] er sel kmal chelsel a rengrir.”7
A Alma me a Amulek er a lengara Ammonihah, el miltik el kmo te betok a ulumerang … e ulemuchel louchel a rengrir, e milsuub chedaol llechukl,”8 ruriul er a lemotuub e kireos er tir a kall, me a ralm, me a bail, e melechet e siseb er a kelebus.9
E a ulebongel a Joseph Smith, el mlara ringel er a Liberty Jail, el, ulmelchesiu el cheloit e obesong, e bai mocha rongesii a tekingel a Rubak el melekoi: “Aikal rokui … a mo uchul a klungiolem”10e a “Dios a mo obengkem el mo er a ulebongel.”11
A derta er tirkang a mle ungil medengei a lodengei a Nephi: el tir a mla mes a betok el ringel er a chelsel a klengar er tir, e ng di te kmal chetengakl er a Rubak.
Kid el rokui meng sebeched lomekesui er kid me a dirrek el lomekesiu el cherrengelel a ikelesia er a teletael el kid a chetengakl er a medal a Rubak er a ikel taem er a ringel el kid a mla obangel er a ikal mereko el buil. Aika lokesiu el kumasech, bol lolisiich a klaumera er kemiu el kirel a deruchellel a ngar el profet er kid, el ngii omekrael er kid ruchei er a bododengelii tial rakt, el rullid el mo sebeched lotekangel ongarm el merael mei.
A kot, e deluut el mo melisiich er a osisechakl er a blai lobengkel a ngesou er a Ikelesia.
Erul rak ra mla memong, e a President Russell M. Nelson a millekoi: “Kede mla mo omdasou er a ‘ikelesia’ el kmo ng basio el dengara miting er ngii, e a blai a olngeseu er ngii. Kede ousbech el mo ngodechii tial teletael. … A blai-el chemau a Ikelesia, a nguu a ngeseu er aikel mekedmokl er a chelsel a … ikelesia er kid.”12 Ng meral ulaoch el tekoi! A omesubel ebangkelio er a blai a mla mutaut lokiu a chesmerel aika el blil ongdibel er kid. Luldimukl a lluut a beluulechad er a smechel me deluut el mo er a ikelesia, eng di kid a melemolem er a omesubel ebangkelio er a blai el di uaia chelechal taem lengarngii tial rakt.
A ongeru lokesiu el kot el de chetengakl er a Rubak se el ocholt el kirel a odingel el ngii a ngarbab e chedaol teletael.
Sera 2018, e a President Nelson a ulechotii odingel el uaia lengeldechel a “teletael sel domekerreu er a ta me a tang.”13 Tial rakt a mla ocholt a betok el techall el dolisiich a duch er kid loldingel. A rodam me a rodos el loldingel, me a rengeasek el redil me a sechal, me a lmuut el bebil a mla mesiou lokiu a omengedecheduch, okedmeklel a mekesekesel a blai, kall, klumech lokiu a technology, me a chedaol ruoll er a sakrament el mo er tirkel ngesool. A Ikelesia a dirrek el mla olngeseu er a rebebil er tial rakt lokiu a kmal betok el ngesou er a kall, basio er a rediak a delengcheklir, me a basio el mo er a rechad er a ngodech el beluu me a dirrek el ngesou el mo er a ikel beluu el ngara ringel er a klengerenger. A rodos er a Relief Society me a telungalek er tir a mla meringel loureor el meruul a million el dekedekel a mad el kirir a rechad er a ukeruul.
Sel mong meng ulebongel el okesiu er a mukngeltengat er a chelsel aika el taem er a chongarm a osiik a ngarbab el deureng er a olutel a chedaol ruoll er a templo.
Tia kmal ungil kleuadel er a cheldecheduch. A Sister Kaitlyn Palmer er a lenguu okedong el mo er a mission er tial mlo merek el Ongeua el Buil, eng kmal mle iimis lungil a rengul el mo misionari eng di ngmlo melchesuar a klou el ultutelel a le bo er a templo e lengai a klengeltengat el ngai chedaol ruoll. Uriul er a lemekedmokl a temel mo melai a kelngeltengat, e a tekoi a mlei el kmo a rokui el templo a mo mechesimer el tial omekodall el rakt a uchul. Uriul er a tial el mengam a reng el tekoi, eng mlo medengei el kmo ng di mo ngara blil e ngara (MTC) lokiu a melidiul. Meng diak el iior er tial kelngitelreng, le Kaitlyn a millasm el di ungil a rengul.
Aikel buil ruriul, e a Sister Palmer a dimlak el bolak sel urungulel el mo e ra templo. A telungalek er ngii a ulsengerenger e ngara nglunguuch el kmo a templo bo lemengai a chesmerel ruchei er a lorael. Bek el tutau el sel lomuchel a Kaitlyn el ngara blil e lengara MTC eng melekoi el kmo, “Chelechal sils eng locha sils el bol dubech a mengasisreng me a templo lmuut el mengai a chesmerel?”
Sera August 10, e a First Presidency a ultebedii a tekoi el kmo a templo el ngara basio er a Kaitlyn a mo mengai a chesmerel el kirel chedaol ruoll er sel sils el ngii a kirel lomkokl er a tutau el merael el mo e ra mission. Ng mo diak el sebechel el mo er a templo e mechir a temel omerollel er a osisiu el taem. Meng uldesuir el kmo ng locha mo diak a taem, e a telungalek er ngii a ulemekedong er a merredel er a templo el Michael Vellinga el kmo ng locha ngarngii a rolel e a nglunguchir a sebechel morenges. A klengerengerir me a nglunguchir a mlonger.
Erul klok er a mochu tutau, el di tela el sikang ruchei er a lorael a skoki, e a Sister Palmer me a telungalek er ngii, a kaidelengelangel, e dechor remedal a templo er bita er a di klikmechur el merredel er a templo e melekoi el kmo, “Ungil tutau, e telungalek er a Palmer. Ak siokai er kemiu el mera templo!” A bocha lemerek er a omelai el klengeltengat er a templo, e te dilu er tir me lorreched el merael, le tara telungalek a ngara rikl el mengiil er a temir. Te ulemekall el melemalt el mora skozio el kmal di mlo mechir a temel merael el mo er a mission.
A chedaol ruoll er a templo el dikea dengai el mla mo tela el buil a kora kmal er aikel dulumdasu el templo er chelechang er a beluulechad lokokil el lmuut el mengai a chesmerel.
Chelechal bocha kungesimer, e a kulengit me mrenges a mesisiich, omekduch a reng, e mesebechakl el tekingel a Profet Joseph Smith. Ng ua lak dodengei el kmo ngii a liluches a ikang er a taem er a ringel e di mle ngiltang, kelebus e chelsimer lileak el ngar a blil er a Nauvoo, e omart er ngii er tirkel lulsiik lomdechem er ngii el diak loltirakl a llach.
“Chelecha, e ngera kede remenges er a ebangkelio el bla denguu? Ngerel a deureng! Ngor er a chubechub el mlara babeluades; me a ngerel a klemerang el tuobed er a beluulechad; ungil klumech el mora re mla mad; ungil klumech el mora re dingar me a re mla mad. …
“… Ng diak bai dolemolem loba klou el moktek? Morael bedul uchei e lak moubeteteluut. Bo mesisiich, … e molmeolem, melemolem el mo kats! A rengmiu bol ngara deureng, e msal mo mui er a deuil a reng. A beluulechad bo longitakl.”14
Rodam me a rodos, a kuumerang el kmo a tara klebesei, e a dersta er kemiu a mo melatk aikel mlo meterob el tekoi, aikel klengitelreng, moalech el reng, me a klsabisi er a ikal kmal meringel el team el kid a ngara chelsel el mo mesang el kmo ng mle uchul a kelngeltengat er a chachisois el klaumerang me a olechotel a klaumerang. Ak medengei el kmo tial kelngar, me sel klengar el merael mei, e a ongarm el omngarngii, el uaia re mlara Ammonihah, me a Liberty Jail, a mo obult el mo klungioliu.15 Ak meluluuch, el obengkel a Nephi, me bol sebeched el medengei aika el ringel er a ika el sils er kid e osisiu el taem bo de betebengar el kmo kid a kmal chetengakl er a Rubak.
Ak mo mengesimer el oba olechotel a klaumerang er ngak er a Jesus Kristo, el Ngii a dimlak lak lodengei a ringel el tebechedel a diak a ulebengelel el Tngakireng er Ngii eng mlo er cheungel a rokui el tekoi.16 Ngii a ungil medengei a kngtil a rengud, ringeled, me aikel ngara rengud. Ngii a Osobeled, e urunguled, ongeloded, e Sebechekled. A ikang a kuuchais el ngara Chedaol el Ngklel, a Jesus Kristo, bol uaisei.