Olengit, Osiik, e Melengod
Sel klou a ultutelel el tebedechel a moktek er a Chedam er a Babeluades a sel techall el mo mengedecheduch er Ngii er a ngidil taem el ngii a soad.
Eua el buil er a mla memong, er a kusuub er a chedaol llechukl, e ak milenguiu el kirel sel urerel a Alma a le ngara Ammonihah e ak milsang tial uldasu er a chelsel sel Mei, Moltirakl er Ngak: “Me sel monguiu el kirel a meklou klengeltengat el Dios a milsterir tirkel rechad er a Nephi (mesa Alma 9:19–23), e momdasu a ikel meklou el klengeltengat el Ngii a mla meskau.”1 Ak tilbir el mo lmusech aikel klengeltengat el Dios a mla meskak e mle rekord el lotuu er sel digital version er tial babier. Ng di mle chelsel a sesei el bung, e ak ml a lmusech a tacher me a kllolem el klengeltengat.
Sel mle uldimukl er a ikang sel klou el klengeltengat er a klechubechub er a Osobel me a melngakireng el omelenget el kirek. Ak dirrek el liluches a klengeltengat el ngak a mle omtechei er a Osobel se er ak ngeasek el misionari er a Portugal ea, uriul, lobengkel a betik er a renguk el diak a ulebengelel el kldemek, er a Patricia, er a Brazil Porto Alegre South Mission, e ki mle mesiou el obengterir a eim el dart me a lluich me a terung el mesisiich lungil remisionari. Mak melekoi el kirel a Patricia, eng betok er a ikal klengeltengat el ngak a lilusech er sel sils a klengeltengat el kemam a mle dmak el oldeu er a chelsel a ikal okeuang el rak el ki mbechiil—uldimukl sera ki merenged er a São Paulo Brazil Templo, retedei el ungil rengelekam, rebecherir, me a teruich me a tedei el rengelekir a rengelekam.
A uldesuek a dirrek el ulebult el mo er a ungil delak me a demak, el ulmekeroul er ngak el olab a osisicheklel a ebangkelio. Ak miltebengar a ta el taem se er a delak a ultibaruach el obengkek el mo meluluuch el ngara bita er ngak sera le teruich a rekik. Ng locha ulmelchesiu el kmo a lsekum a nglunguchek a mo er a Chedam er a Babeluades, eng kirel el mo lmuut el mo mesmechokl el mo ungil. Ngii a dilung, “Ak mo kot el mo meluluuch, ea uriul er a nglunguchek, e kau a mo meluluuch.” Ngii a millemolem er tial teletael el mo betok el klebesei, el merekmo ngii a mesemechokl er a rengul el kmo ngak a mla smuub e meruul a osisechakl el kmo ngmekerang a kungedecheduch el mo er a Chedam er a Babeluades. Ak meral mereng a sulel el ulsisechakl er ngak el meluluuch, e le ngak a silubii el kmo a Demak er a Babeluades a rremenges a nglunguchek e onger el kirel.
Ng klemerang, tiang a tara ikel klengeltengat el klilechesii er sel list er ngak—sel sengk el orrenges e subii sel moktek er a Rubak. Sel klou a ultutelel el tebedechel a moktek er a Chedam er a Babeluades a sel techall el mo mengedecheduch er Ngii er a ngidil taem el ngii a soad.
Ongit el mla er a Rubak
Sera Osobel a ble loldingel er a beluu er a Merikel er a uriul er a Llemekiis er a Kodall, e ngii a ulmelekl er a ongit el Ngii a milsterir el mo tirkel Mesiungel el ngara Galilee. Ng millekoi:
“Molengit, me lekong; mosiik, me bo betik; molengod, me lobkais leko er kau.
“Le ngikei el mo olengit a mongmai; me ngikei el mosiik a mometik; me ngikei el mo melngod a bolobkais” (3 Nephi 14:7–8; dirrek el mesa Mateus 7:7–8).
A profet er kid, el President Russell M. Nelson, a mla odersii a osisiu el ongit el mei er a chelechal taem. Ng dilung: “Moluluuch el obang a ngklel a Jesus Kristo el kirel a omsimbai, sebekreng, chelitechetum—ochoi, a ikel soal a rengum. E bo, morrenges! Mluches a ikel uldasu el mei er a uldesuem. Mluches a ikel momelchesiu e mruul sel molchesuar a odubech el kirel. Sel momelekl er tial omeruul r a bek el sils, el mo melai a buil, e mo melai a rak, e kau a mo ‘mukeroul er a osisecheklel a ocholt.’”2
A President Russel M. Nelson a dochelir el kmo, “Aikal sils el merael mei, eng diak el sebeched el mo selbechakl er a chedaol tekoi a lak a ulekrael, ngesou, ongelaod, me a odbechel chedaol reng.”3
Ngera uchul ma ocholt a klou a ultutelel er kid er a sebecheklel a chedaol tekoi? E le beluulechad a sebechel el mengiseksikt e secherodech, e mui er a blulak me a olibesongel. Omengedecheduch lobengkel a Demad er a Babeluades a rulid el mo medengelii el kmo ngerang a klemerang e ngerang a blulak, e ngerang a ungil el kirel a moktek er a Rubak el kired e ngerang a diak el ungil. A beluulechad a dirrek el sebechel el kmal mo mekngit e mengam a reng. Engdi sel debekengii a rengud lobang a nglunguuch, e kid a mo omelchesuar a ongelaod el mla er a Demad er a Babeluades me a kllou el reng el kmo Ngii a betik a rengul er kid e kid a klou a ultuteled.
Olengit
A Rubak a dilung el kmo “le ngikei el mo olengit a mongmai.” A olengit a kora beot, engdi bai mesisiich eleng ochotii a soal a rengud me a klaumerang er kid. Engdi, ng melai a taem me a kllouelreng el mo mesuub el mo medengelii a oto er a ngerel a Rubak. Kid a mo ungil omtab a uldasu ma ikel domelchesiu el mei er a uldesued me a rengud, e mo lmuches, e le profet er kid a mla melekoi er kid el mo meruul. Meluches a ikel mellomes el uldesued a klou a ultutelel el telengtengil a omelai. Ngii a ngosukid el mo omtab, lmuut el mesuub, e lmuut el mo omelchesuar a ikel ngii a Rubak a olsisechakl er kid.
A tara betik er a renguk a kmal dirk milekoi er ngak el kmo, “Ngak a oumerang el kmo a ocholt el mei er a chad a klemerang. Ak oumerang er a Chedaol Reng el mo ocholt er ngak aikel rokui el tekoi el ngak a kirek el mo meruul.4 Ng beot er ngak a mo oumerang sel renguk a mo mekeald el obang a mesisiich el klaumerang.5 Engdi ak mekerang eng sebechel a Chedaol Reng el di blechoel mengedecheduch el merngak er tial el telekael?”
Mo er ngikal betik er a renguk e mo er kemiu rokui, ng soak el dmung el kmo ngak a dirrek el soak el mo blechoel el omelchesiu a ikel mesisiich el mellomes el uldasu er a Chedaol Reng e mo blechoel mesang a bleketakl el rael el mo oltirakl er ngii. Eng di diak el sebechek. Ma le uaisei, ea ikel kid a locha blechoel el mo omelchesiu a sel chelelakl, e kekerei el ngor er a Rubak el mengululau el mera uldesued me a rengud el kmo: “Ngak a ngar tiang. Ng betik a renguk er kemiu. Bong; e bo er sel bkul rebab el sebechemiu. Ak mo olngeseu er kemiu.” Kid a diak de blechoel kired el mo medengei a rokui malechub e deues a rokui el tekoi.
Sel chelelakl, e kekerei el ngor a lmuut el melisiich a klemerang, omekduch a reng, e mengelaod a reng—el chelsel a betok el taem el ngii a kmal dousbech er ngii er sel sils. A Chedaol Reng a merang, ea mellomes el Uldesuel a merang—a le meklou me a le mekekerei.
Osiik
A Rubak a mle yaksok, “ngikei el mosiik a mometik.” Sel mosiik a olechotel a urerel a uldasu me a chedaol tekoi—omdasu, skeng, omelasm, me a omesuub. Kede osiik eleng kede oumerang er a yaksok er a Rubak. “E le ngii di le chad el mor a Dios a kirel el oumerang el kmo ng ngar ngii a Dios, e ngii a omesterir a omeksulir tirkel osiik er ngii” (Hebru 11:6). Sel dosiik, e ngolechotel a ngariou el reng el kmo kid a kmal dirk de betok a kired el mesuub, ea Rubak a mo menglou a klemedengei er kid, e mengedmokl er kid el mo ngmai a lmuut el betok. E le Rubak el Dios a dilung el kmo: Ak mesterir a rengelekir a rechad me el mekekokterir el meruul a tekoi eng ngikel mo orrenges er Ngak a bok besang a betok (2 Nephi 28:30).
Melengod
E merekong ea Rubak a dilung, “Me ngikei el mo melngod, a bolobkais.” A omelengod a olechotel a klaumerang. Sel blak a rengud el oltirakl er Ngii, ea Rubak a mekengii a rael el ngaruchei er kid. Ngarngii a klebokel el chelitakl el olsisechakl er kid el kmo “bekiis e mrulii a betok el omeruul er a bai momerous er a klou [el] blid el ngarbab. Sel doruul a ungil a ungil teletael, el klou el deureng, el klengeltengat er a ngerachel me a beltik el reng.”6 A Elder Gerrit W. Gong er a Chelechad er a Teruich me a terung a dirk silodii el kmo a ocholt a blechoel el mei sel doruul a ungil. Ng dilung: “Sel dolasm el oldars a chim el olngeseu er tirkel meliuekl er kid, ea kumdasu a Rubak a meskid a lmuut el betok el Beltkil a Rengul el mo er tir me a kid el dirrek. A kumdasu e kid a rongesii a oto er a Ngerel- kede omelchesuar er Ngii lokiu a kakerous el teletael- sel doluluuch el mo olngeseu er tirkel meliuekl er kid e le tiang sel tara nglunguuch el Ngii a kmal soal el mo onger er ngii.”7
Okesiul a Alma
Tial beot el uldasu ngara chelsel sel Mei, Moltirakl er Ngak el omdasu el kirel a klengeltengat er ngak a milskak a ungil chedaol reng me a bebil er a chedaol uldasu. Me sera kulemolem el menguiu el kirel a Alma me a urerel a le ngara Ammonihah, e ak miltik el kmo a Alma a olechotel a ungil okesiu el kmo ngera belkul a olengit, osiik, e melengod. kede menguiu el kmo a Alam a ureor lobang a chedaol reng, e mle meringel el meluluuch el mo er a Dios, ma Rengul bo tirkal rechad. Tial nglunguuch, a le uaisei, a dimlak el monger el uai sel ngii a uluureng el kirel, me a Alma a mlodikel el mo tuobed er tial bouai. Meng oberaod a rengul er a klengit el reng, ea Alma mlo soal kotouar, ea anghel a dilung aikal tekoi: Klengeltengat el mo er kau e Alma, me mokisii a btelum e moldeu a rengum, eleng ngarngii a uchul meke oldeu er a rengum. A anghel a dilung er ngii meluut el mo er a Ammonihah el luut el melasm, me a Alma a di mle mereched el lmuut el merael mong.8
Ngerang kede subii er a Alma el kirel a olengit, osiik, me a melengod? Kede subii el kmo a nglunguuch a kirel ngarngii a chedaol ureor, e diak el di el blechoel el mo tmaut el di uaisei el soad el kirel. Me sel domelechsuar er kid el telirm a rengud malechub oberaod a rengud er a klengit el reng, ea Rubak a meskid a ongelaod me a klisiich el okiu a kakerous el rael. Ng locha diak el bo el onger a rokui el kerid malechub el sumechokl a rokui el mondelenged el di mereched; ng bai, Ngii a omekduch a rengud el melemolem el melasm. A lsekum me kede remuul a moktek er kid el uai a Moktek er Ngii, e Ngii a mo mekais a rael el kired, el di uai Ngii a riruul el mo er a Alma.
Ng klaumerang er ngak el kmo tia sel taem er a cherrungel el ebangkelio. Ng sebeched el oldeu a rengud er a klengeltengat er a Tngakireng er a Jesus Kristo er a chelsel a klengar er kid. A chedaol llechukl a beot a dolai el merkid. Kede mukrael lokiu a reprofet el olsisechakl er kid er a moktek er a Rubak el kirel a meringel el taem el kid a kiei er ngii. Uldimukl er tiang, ng sebeched el ngmai a ocholt el merkid ma Rubak a sebechel mengelaod e omekrael er kid. El uai a anghel el dilung er a Alma, ngarngii a “kmal ungil uchul e kede oldeu a rengud.” (Alma 8:15). El ngara a ngklel a Jesus Kristo, amen.