![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fa2%2Faf%2Fa2afe263ef41f7ef6d1f119b1e1851865e644fc1%2Fa2afe263ef41f7ef6d1f119b1e1851865e644fc1.jpeg/full/!250,/0/default)
Mo Chemau a Ngarmedal Taem loba Klaumerang
A ngar medad el taem a mo klebokel el mo er tirkel keldmokl e melemolem el keldmokl el donguu er a chimal a Rubak.
Tia kmal meringel er kid lobes er ngii el kesus. Rodos er ngak, Ng dmeu a renguk el mo obengkemiu. Kom blechoel ngara uldesuek er a ikal mla momerek el sesei el buil. Kemiu a kuk mesisiich er a eiai el million el rechad. Ng diak el dil ngarngii a ulecherangel ng dirrek el ngarngii er kemiu achedaol klisiich el mo omekngodech er a beluulechad. Ak mla mesekemiu el meruul a ikal er tial temel tial bekuiuiuul el serch.
Bebil er kemiu a osiik a klekedall e mle meringel a skel malechub eng beches el ureor. Betok a ulsisechakl er a rengalek e oldingel er a re tonari. A rebebil a mle mengemedaol er a remisionari el mle mereched el mo merek a temel a mision er tir e a rebebil a rirelii a blirir el mo sel missionary training center. Ko mla ousbech a technology el omes er a telungalek ma resechelei, e olngeseu er tirkel di tir el tang, e mesuub er selMei, Moltirakl er Ngaklobengterir a rebebil. Ko mla metik er a teletael el rulii a Chedaol Sils meng ungil. E mla remuul a betok el masku—el remillion el masku!
Lobang a klechubechub me a beltik el reng, ea renguk a mo er tirkel betok el redil meliuekl er a beluulechad el betik er a rengrir a mla mo smerch. Aki lemangel el obengkemiu. Aki meluluuch el kiriu. Aki chemat e meluluuch el mo er tirkel rokui el blak a rengrir loureor el mengeluolu er a rebebil el kirel a omengedmeklel a bedengir.
Kemiu el ngeasek el redil me kom dirrek el dechemat er kemiu. Me sel social media a mui er a klaucherarou, eng di betok er kemiu a mla metik a teletael el mo omekduch a rengrir a rebebil e olecholt er a llemesel a Osobel.
Rodos, kemiu a meral ungil chad! Ak chemat er a klisichiu me a klaumerang er kemiu. Ko mla ochotii el kmo chelsel a meringel el taem, e kemiu a melemolem el bekeu a rengmiu. Ng betik a renguk er kemiu, e kmal ungil dmung er kemiu el kmo a Rubak a betik a rengul er kemiu e mes a ikel ungil lureor el omoruul. Ko mesulang! Lmuut el melekoi, kemiu a mla ochetemiu el kmo kemiu a urungulel a Israel!
Kemiu a olechotel a urungulel el President Gordon B. Hinckley a ulmedasu el kiriu se er a lochotii sel “Telungalek: Klumech el mo er a Beluulechad,” ra mla mo merek el 25 rak er a Ongetiu el Buil er a 1995 general Relief Society miting. 1 Ng klou a ultutelel sel ngii a ngililtii el mo ouchais er tial klou a ultutelel el klumech el mo er a rodos er a Ikelesia. Se el loruul er tiang, e a President Hinckley a mlo ungil lochotii a belkrir a redil er a chelsel a moktek er a Rubak.
Chelcha, eng soak el mo medengei a ikel omsiluub er a chelechal rak. Ke mla mukeroul el mo kmeed er a Rubak, a lechub e komelchesuar mla morcheroid er Ngii? E a ikel mla duubech er a chelecha ngera mla rulii a uldesuem el kirel a ngarmedal taem?
Ng merang, a Rubak a mla mengedecheduch el kirel a ikal sils er kid. Ng milellach el kmo a ikel sils er kid “a rechad mo [ diak lodenge] rengrir” 2 e longeuid er a re ngellitel el chedal a Dios. 3 Ng dilu er a Profet Joseph Smith el kmo a “budech a mo dibus er a beluulechad” 4 e a kerior a mo er a rokui el chad. 5
Eng di a Rubak a mla ochotii a ues el kmo tia el uriul el klebesei a kmal mo ungil. Ng dilu er a Profet Joseph Smith el kmo a “ureor … er a ikal uriul klebesei, a kot el mo klou. … A klebkellel a diak a smodii, me a klungel a diak a mtebengar.” 6
Chelecha, klungela locha diak el sel tekoi el kau a ngiltii el mo smodii a ikal mla mo merek el buil! Ke demekerang e mo meruul a ikal ocholt me a ikal klebokel el klumech el kirel a ikal sils er kid? A Rubak a silbedid er tial beot, engdi kot el ungil, el menglou a reng: “Alsekum e ke keldmokl eng diak kom medakt.” 7
Ng klebokel el yaksok! Ng di chimong el kmal meral sebechel ngodechii a osenged el kirel a ngarmedad el taem. Ak dirk rirengesii a klaumerang er a redil el ouchais el kmo tia el bekuiuiuul serch, uldimukl er a desiu el mla er a Salt Lake Valley, a ngilsukii el mo medengei el kmo ngii a diak el keldmokl el uai sel ngii a ulmedasu el uai ngii. Se er a kuker er ngii a lsekum eng mesaod er a oleketmekimel er a kall a lechub eng klaumerang er ngii, eng mle klikmechur e kmul uase, “Choi!”
Alsekum a omengedmokl a ngii sel uchul e kede chemau tial uriul klebesei me a ngarmedad el taem loba klaumerng, e kede mekerang e mo ungil keldmokl?
Mla mo meketekt el taem, e a re profet er a Rubak a olengit er kid el mo mengudel e kudmokl a kall, ralm, me a udoud el kirel sel taem er a usbechall. Tia el bekuiuiuul serch el ngarngii chelechal taem a lmuut el smisichii sel llemesel sel omellach. A kulengit me momuchel el mo keldmokl er a klechad. Engdi ngak a bai bekikl el kirel a omengedmeklel a chedaol me a tekoi er a reng.
Ngar tial omelekoi, eng sebeched el smuub a betok el mlara Captain Moroni. Se ra le merredel er tirkel soldau ra re Nephite, ng mlo chemau a ultok el mle mesisiich, e betok, e mekngit a teletelir. Ma leuaise, a Moroni a milngedmokl er a rechedal el ousbech a chedei el teletael.
Kot, e ngilsuterir el remuul a basio el diak el mekesakl a le ngarngii, el basio er a selbechakl . 8 Ongerung, ng milngedmokl a uldesuir a rechad el mo mui a klaumerang er tir el mo er a Rubak. 9 E a ongedei, ng dimlak el stob el mengedmokl er a rechedal er a tekoi er a tech malechub eng chedaol. 10 Bo do medasu a ikang el chedei el olisechakl.
Kot el Olisechakl: Remuul a Basio er a Selbechakl
A Moroni a milisiich a ikel chelsel a belurir a re Nephit el ngarngii a cheoatel, ilbolb, me a cheldukl. 11 Se ra lemei a re Lamanites el me otmok er tir, eng mlo “mechas a rengrir er a llemesir, a re Nephites el kirel a kedmeklir el kirel a basio er tir er a selbechakl.” 12
Osisiu, sel rau el reng a le ngarngii meliuekl er kid, eng kired el mo remuul a basio el kid a diak de mekesakl, el kirel a tekoi er a tech me a chedaol. Se el blimiu bo el omrotel er a klaumerang—me a Chedaol Reng bo le kiei er ngii—e a blimiu a mo sel kot el basio el kirel a selbechakl.
Ng osisiu, a re stake er a Zion a omrotel er a “sesel iolt” 13 ele ng mukrael lokiu tirkel olab a kiis er a priesthood e ousbech a klisichel a deruchelel a priesthood. Me sel molemolem loltirakl a llach el mla er tirkei el Rubak a mla mesterir a klisichir el mo omekrael er kau, e ke mo melchesuar er a klou el selbechakl.
A templo—el blil a Rubak—a basio er a selbechakl el diak a mo uai ngii. Ngarsei, e kemiu el rodos a mo ngmai a klisichel a priesthood lokiu a chedaol yaksok er a priesthood el bo moruul. 14 Ngarsei, e a retelungalek er kemiu a merenged el mo cherechar. Osisiu el ngartial rak, ea mo er a templo a kmal ulis el telekael a usbechellel, a endowment er kemiu a mla meskemiu a techeliu el mo ngmai a klisichel a Dios sel monguul a telbiliu el Obengkel.
Ng beot el omelekoi, a basio er a selbechakl a ngidil basio el sebechemiu lomelchesuar er a Chedaol Reng e mo mukrael er Ngii. 15 A Chedaol Reng sel lobengkemiu, eng sebechiu el lolsisechakl a klemerang, alsekum eng ngarngii a omtok a uldasu. E kemiu a sebechemiu el omdasu a nger el kirel a ebangkelio er sel chelsel a basio er a ocholt.
Ak siotai er kemiu, e rodos er ngak, el mo remuul a blimiu el basio er a selbechakl. E ngak a mo omekbeches er a siotai er ngak el mo er kemiu me bo menglou a klemedengei er a klisichel a priesthood me a telbiil me a klengeltengat er a templo. A le ngarngii a basio er a selbechakl el ngii a sebechemiu el mo er ngii a ngosukemiu el mo chemau a ngarmedal taem el obang a klaumerang.
Ongerung el Olisechakl: Mongedmokl a Uldesuiu el mo Mui a Klaumreang el mo er a Dios.
Kid a mla nguu a klou el ureor el mo komengetii a usbechellel a Salt Lake Templo.
A rebebil a ulker el kmo tiang kmal kirel el ousbech er tial teletael. Ma leuaisei, se er a Salt Lake Valley a bla er ngii sel 5.7 magnitude el desiu er a uchelel tial rak, e tial templo a kmal mlo meringel el melmesim me sel trombetang el ngarsel bleob el chaus er a anghel Moroni a rirebt! 16
Ngdi uai sel dodai er a Salt Lake Templo a kirel mo mesisiich meng diak el mekesakl a le ngarngii a telemall, ea chedaol dodai er kid a kirel mo mesisiich. Me sel, domekesiu er ngii el desiu el mo melmesim a klengar er kid, eng sebeched el dechor el “mesisiich e diak komesim” eleng uchul a klaumerang er kid. 17
A Rubak a mla osisecheklid el mekerang a domdois er a klaumerang er kid sel dosiik a “suobel,el okiu a omesuub ma dirrek el klaumerang.” 18 Kede melisiich a klaumerang er kid er a Jesus Kristo sel dolasm el mo oltirakl a Llechul e mo “blechoel melatk er ngii.” 19 Lmuut el bebil, a klaumerang er kid a mo klou er a bek el taem sel dousbech a klaumerang er kid el mo er Ngii. Tiakid sel belkul a omesuub lokiu a klaumerang.
Uai tia el okesiu, bek el taem el ngarngii a klaumerang er kid el mo oltirakl a llelchul a Dios—sel sekum ngarngii a uldasu el omtok er kid—malechub e sel bek el taem el doltngakl a omilil malechub eng uldasu el ngii a melemall a chedaol telbiil, e kede ousbech a klaumerang er kid, meng uchul eng mo klou a klaumerang er kid.
Osisiu, ngarngii a bebil er a teletael el meleketekt a klaumerang el uai a blakereng er a omsubel a Babier er a Mormon. Ng diak a ngodech el hong el ouchais el kirel a Jesus Kristo el obang a klisiich e bleketakl. A reprofet er ngii, el mlo mekllomes er a Rubak, a milesang a ikal sils er kid e mililt a olisechakl me a klemerang el mo olngeseu er kid. A Babier er a Mormona sel uriul-klebesei el omekrollel a selbechakl.
Choi nguaisei, el kot el ngarbab el selbechakl a mei sel do dersid el mo er a Chedam er a Babeluades me a Jesus Kristo! Klengar el diak a Dios a klengar el mui er a sebekreng. Klengar el obengkel a Dios a klengar el mui er a budech. Ng uaisei e le chedaol klengeltengat a mo er tirkel mui er a klaumerang. A ngeiul a ocholt a tara kot el ungil er a ikal klengeltengat.
A Rubak a mle yaksok el kmo alsekum e kede olengit, e kede mo ngmai a “mekdekudem el ocholt.” 20 Ak yaksok el kmo sel bo momdois a klisichiu el mo melai a ocholt, a Rubak a mo omekngeltengat er kemiu el obang a ulekrael el kirel a klengar er kemiu me a betok el sengk er a Chedaol Reng.
Ongedei el Olisechakl: Lak Kom Stob el Mengedmokl.
Me sel teletael a mlo ungil, a Captain Moroni a di millemolem el mengedmokl er a rechedal. Ng dimlak el stob. Ng dimlak bo lomedasu el kmo ngungiang a rokui.
A cherarou a diak el stob el melemall. Ma le uaisei, e kid adiak el kired el stob el mengedmokel! Sel de kmal mo ungil el sebeched el di kid—er a klechad, tekoi er a reng, me a chedaol—e sel dungil el keldmokel eng sebeched el mo tomer a ikel omerollel a Diablong.
Rodos, kemiu a kmal meduch el remuul a basio er a selbechakl el kiriu me a rebetik ra rengmiu. Lmuut el bebil, kemiu a ngarngii a chedaol klisichiu el ngosukemiu el mo meleketek a klaumerang er a rebebil el ngara ungil teletael. 21 E kemiu a diak kom stob. Kemiu a mla lmuut el ochotii er a chelechal rak.
Kulengit, me molemolem! Sel blakelreng er kemiu el mesebechakl a blimiu e dolmii a klaumerang er a chelsel a rengrir tirkel betik er a rengum a mo ngmai a nguked el mo er a telcheroll el merael mei.
Rodos, ng kmal ngarngii a betokel kid a mad el tmuil el kirel! A Rubak a ngilkemiu loia er tia er a chelechang eleng Ngii a medengei el kmo ngarngii a klisichiu el mo chodechulii ikal meringel el telengtengil a ikal uriul klebesei. Ngii a mle medengei el kmko kemiu a mo medengelii a klungel a Urerel e mo semeriar el mo olngeseu el mo rulii.
Ngak a diak kulekoi el kmo a ikal sils ngarmedad a mo beot, engdi ak yaksok er kemiu el kmo a ngarmedal taem a mo klebokel el mo er tirkel keldmokl e melemolem el keldmokl el donguu er a chimal a Rubak.
Rodos, lak di doutekangel el ngar tial ngarngii er a chelechal taem . Bo dechau a ngarmedal taem lobang a klaumerang! Temel a kerior a techall el kid a bai mo melisiich a chedaol tekoi. Ng taem el omerolled a sebechel kmal meral ngarngii a rellii er a bai ikel chelelakl el taem.
Ak yaksok el kmo sel deruul a basio er a selbechakl, e kudmokl a uldesued el mo mui a klaumerang el mo er a Dios, e diak de stob el mengedmokl, a Dios a mo omekngeltengat er kid. Ngii a mo “ngosukid; e, [mo] mengedecheduch a budech el merkid, e [mo] meskid a klou el klaumerang, e … mo rulid el kmo ng [sebeched] el mo ngarngii a urunguled er Ngii el mo ngosukid.” 22
Me sel bo mongedmokl el mo chemau a ngarmedal taem el obang a klaumerang, a ikal yaksok a mo er kemiu! A kuuchais, el obang a beltkil a renguk el mo erkemiu ma klaumerang er ngak elmo er kemiu, el obang a ngklel a Jesus Kristo, boluaisei.