Reng Luldak el ngara Llemalt me a Kltalreng
Tiaikid el erul dart el rak el reksi er a Ikelesia er kid, e deluut el mo smisichii a blakereng er kid el chedal a Ikelesia er a Rubak el mo kiei er a llemalt e bo desal mo tang.
A llemalt me a keltalreng a kmal meklou a ultutelel. 1 Sel sekum a rechad oubeltikereng er a Dios loba rengrir rokir e melasm el mo uai Ngii, eng kesai a uldikel me a ultok er a beluu. Ngarngii a klou el keltalreng. Ng kmal soak a meral cheldecheduch lokesiul tiang.
A ngeasek el chad el diak el chedal a klechelid er kid, el General Thomas L. Kane a ulengeseu e milsebechakl er a Resanto er a beluu er sera bol kirir el tuobed er a Nauvoo. Ng kmal ulengeseu er a Ikelesia el betok el rak. 2
Sera 1872, e a General Kane, me a meduch el bechil, er a Elizabeth Wood Kane, me a reteru el ngelekir el sechal a tilobed er a blirir er a Pennsylvania el mo er a Salt Lake City. Te ulebengkel a Brigham Young me a rechedal el merael bedul a diluches el mo er a St. George, Utah. A Elizabeth a mle oumededenger er a remechas er a Utah. Ng kmal mlo mechas a rengul er a bebil er a tekoi lesiluub. Okesiul tiang, ng mlo medengei el kmo ngii di lureor el sebechel a redil meruul a mla er ngii er a Utah. 3 Ng miltik er a rechedal a Ikelesia el mle bekokeuii e ungil a rengrir loba omengull el kirir a re Native Americans. 4
Tial omerollir e te kiliei er a Fillmore er a blil Thomas R. me a Matilda Robison King. 5
A Elizabeth a milluches el kmo a Matilda er a miruul er a belsoil el kirel a President Young me a rechedal, el teim el American Indians a mle soiseb er a delmerab. Ng dimlak ongit el mo er tir, ng di mle bleketakl el uase te me teloi er tir. A Sister King a milngedecheduch er tir “lousbech a tekingir.” Te mlo dengchokl lolab a berrir e kmal ko er a ungil a rengrir. A Elizabeth a uleker er a tara tirkal ngelekel a King, “Ngera ng dilu delemiu er tirkel chad…?”
A ngelekel a Matilda ulenger el kmo “Ng dilu, Tirka el ngodech el chad a mle kot el mei, e ak mla remuul a di klebech el kall el kirir; eng di a kelem a ngara ngau er chelechang, e a kmo oleker kau sel bol merek.”
A Elizabeth a uleker, “Ng meral mo meruul tiang, a lechub eng di mesterir a der er a uum?” 6
A ngelekel a Matilda ulenger, “A delak a mo remuul a kelir el di uaia loruul a kelem e te mo omengur er a uum.”
E mlo uaisei, el tir a “mle ungil beserir e omesoil.” A Elizabeth a millekoi el kmo a omerellel a mle dart el basent er a uldesuel. 7 A keltalreng a medechel sel sekum kede ochotii er a rechad omengull me a odanges luldimukl a le ngodech a blekerdelir el chad.
Kemam loungerachel, a diak ki mdu el kmo a ngarmong ea rokui el deleuill a di mle ungil, me a rokui lomeruul meng di mle uaia Kristo, a lechub a rokui luldasou a mle melemalt. Eng di, a klechelid er kid olisechakl el kmo kid el rokui a ngelekel a Chedam er a Babeluades, e kid a mengull er Ngii me a Ngelekel, el Jesus Kristo, el ngii Osobeled. Sel urunguled a kmo a rengud me a uldesued bol tang el ngara llemalt me a kltalreng, e kid a mo tang Lobengterir. 8
A llemalta dmolech el dodengelii el tekoi eng di kmal uldimukl er a otirekled er a llechul a Dios. 9 Ng rullid el mo meruul a chedaol ruoll el ngii a rolel a telbiil e omekngeltengat er kid el mo oba Chedaol Reng el mengetiakik a klengar kid. 10
A llemalt a diak el belkul a kmo kede ultuil er a ta me a tang el kirel a klengeltengat er a klengar kid er chelechal taem. Ng locha diak bo debechiil a lechub e bo doungalek a lechub e dengai aikel klengeltengat el soad. Ng di Rubak a mla yaksok el kmo tirkel melemalt el blak a rengrir “a mo kiei lobengkel a Dios er a diak a ulebengelel deureng.” 11
A kltalrenga dirrek el dmolech el tekoi, eng di ngolchotel sel kot me a ongeru el ngarbab el llach el mo oubeltikereng er a Dios me a rebebil er a rechad. 12 Ngolchotir a rechad er a Zion el rengrir me a uldesuir “a oba keltalreng.” 13
A belkul a klemechek a suobel el mengai er a chelsel a chedaol llechukl.
Ng mla mo erul dart el rak er a Chedam me a Ngalek er a lekot el me duum e luchelii a urerel Oluut er a ebangkelio er a Jesus Kristo er sera 1820. A cheldecheduch el ngara Ongeua el 4 Nephi er a chelsle a Babier er a Mormon a uldimukl e rngii a erul dart el rak el Osobel a mlo duum e tilketekii a Ikelesia er Ngii er a chuodel el Merikel.
Tial reksi el donguiu er ngii er a 4 Nephia mesaod er a rechad el dimlak a klachechei, mekngit, nglemuu, blulak, omekeuad, a lechub el ngii di el mekngit. Ng llemalt a uchul, e tial rekord a uasei, “eng meral dimlak a rengara deureng el chad el mo uai tir er a chelsir a rokui el chad el mla obeob er a chimal a Dios.” 14
Tiaikid el keltalreng, ea 4 Nephi e kede menguiu, “Ng dimlak a ultok er a beluu, leng beltikereng er a Dios el mlara rengrir a rechad a uchul.” 15
Eng di ng chelebuul, 4 Nephiel bocha losaod er a klou lomelodech lulemuchel er sera “erul dart me a kot el rak,” 16 el mekngit me a klekakeakl a tilmelii a llemalt me a kltalreng. A delchel a mekngit el dilubech a kmal mlo iimis el mekngit el mlo uchul er a ngarbab el profet el Mormon a lilangel el mo er a ngelekel er a Moroni:
“E a rungalek, te mekera tirkal chad, e semeriar er a mekngit lomeruul—
“Kede mekera e uase a Dios a di chelellakl el diak bo loukerkeriil er tir?” 17
Chelechal taem, el dekiei er a tokubets el taem, eng di a beluulechad a diak el sal ngeltengat er a llemalt me a keltalreng el kleuadel er a chelsel a 4 Nephi A mera er ngii, kede kiei er a taem el klou a klekakeakl. Eng di, a remilion el mla kongei er a ebangkelio er a Jesus Kristo a mla tibir el mo osiik er a llemalt me a keltalreng. Kede rokui el medengei el uase ng sebeched el mo ungil, e tiaikid a chelbengeled er chelechal sils. Ng sebeched el mo klisiich el mesebechakl e omekngeltengat er a beluu el rokir. Tiaikid el erul dart el rak el reksi er a Ikelesia er kid, e deluut el mo smisichii a blakereng er kid el chedal a Ikelesia er a Rubak el mo kiei er a llemalt e bo desal mo tang. A President Russell M. Nelson a mla olengit er kid “el mo chotii a ungil klechad er a beluu, e bo doba keltalreng me a omengull lobengterir a rengodech el chad.” 18 Tia belkul a kmo ked emo oubeltikereng e ra ta me a tang me a Dios e kongei er a rebek el chad el rodam me a rodos e meral lochotii el kmo kede chedal a Zion.
Ngokiu a rokui el osischekled, eng sebeched el mo olchotel a keltalreng e oldeu er a rekakerous el chad. A keltalreng me a rekakerous el chad a diak el kautok. Ng sebeched el mo oba keltalreng sel doldak er a rebek el chad e doba omengull er a rekakerous el chad. Chelsel aikel teruich me a eim el rak el kusiou er a San Francisco Stake Presidency, e te mlarngii a rechad er a Sebangiol, Tonga, Samoa, Tagalog, me a remelekoi a tekoi er a Manderin el chad. Tirkel melekoi a tekoi er a Ngebard el mlara ward er kemam a rechad er a kakerous el beluu. E mlarngii a beltikereng, llemalt, me a keltalreng.
A ward me a branch er a Ikelesia er a Jesus Kristo er a Uriul-klebesei el Santo a mekedmokl loltirakl a basio a lechub eng tekoi, 19 ng diak loltirakl er a kmo te chad er ker. A olchotel a beluad a chad a diak llechukl er a record er a rechad er a ikelesia.
Uchelel a Babier er a Mormon, el kmeed el eim el dart me a okeim el rak ruchei er a lemechell a Kristo, e kid a mosisechakl bleketakl el llach el kirel a deleuill er a rengelekel a Chedam er a Babeluades. A rokui el chad a kirir loltirakl a llechul a Rubak, e tir el rokui a mokedong el mo ngmai a klungiaol er a Rubak; “e ngii a diak el kotouar er a ngii di el chad el mei er ngii, a rmechedelekelk me a becheleleu, a rekelebus me a remimokl, sechal me a redil; e ngii a medengelterir tirkel diak a klechelid er tir; e tir el rokui a diosisiu er a Dios, a re Jew me a re Gentile.” 20
A urerel Osobel me a klemechel a mla subedid el kmo a rokui el chad a di ngelekel a Dios. Kid el rokui el do odam e odos. Chelsel osisechakl e kid oumerang el kmo tial beluu el ngii a mle uchul Oluut, el Beluu er a Merikel, me a Uchetemel a Llach er ngii 21 me a bebil er a osisiu el tekoi, 22 lulluches a rediak el cherrungel el chad a mlukrael er a Dios el mo omekngeltengat er a rokui el chad. El uaia ikel donguiu er a Doctrine and Covenants, el kmo aikang a mlekedmokl e kirel omecheliu a llemeltir a rokui el chad,loltirakl a melemalt e chedaol olisechakl. 23 A erung er a ikal osisechakl a sel mimokl el melilt me a ngerachel er a kngtil a chad. A Rubak a millekoi el kmo:
A leuaisei, eng diak el melemalt el tara chad a mengerusii er a chimong.
E tiaikid a uchul ak mla kudmkelii a Uchetemel a llach er tial beluu, lokiu a remellomes el chad el tir a mla moterekokl el kirel tial moktek, e osebelii a chutem el kirel a kodellir a rechad. 24
Tai el ocholt a mlo er a ngii er a 1833 sel blel kemanget el ngara ringel a resanto er a Missouri. Sel uchelel a Doctrine and Covenants section 101 eng kmo: A remekngit el chad a mla odikelterir er a rekeblirir er a Jackson County. … A ulektakt er a kodall el mo er a [rechedal] a Ikelesia a mle betok. 25
Tia mle taem er a uldikel er a bebil er a basio. Betok el chad er a Missouri a ulemes er tirkal Native American el uaia lechereuir e mle sorir loldik er tir er a beluu. Osisiu, betok er tirkel uchelir a rechad er a Missouri a ulsibai er a rechad e ulmelchesiu el bekikl er tirkel kuk ulemtok er a klsibai.
E kid, a kuk osischekled a mle mengull er a re Native American e mle soad lolisechakl er tir a ebangkelio er a Jesus Kristo. Sel dosaod er a klsibai, e a chedaol llechukl er kid a meketeklii el uase ng diak a chad lousibai er a tara chad. 26
Ng di uriul, a Resanto a mlodik el tuobed er a Missouri 27 e mlorimel el melukl el mo er a Ngebard. 28 A Resanto mlo ungil beserir e miltik er a budech lobengkel a llemalt, keltalreng, e kiei el ngara ebangkelio er a Jesus Kristo.
Ng dmeu a renguk el kirel a Nglunguchel Osobel llechukl er a Hong er a Johanes. A Osobel a milketeklii el kmo a Chedam a Uldureklii e Ngii, el Osobel, a mla rokir a ureor el Ngii a uldureklii el mo meruul er ngii. E dirrek el miluluuch el kirir tirkel mo oumerang er a Kristo: “Me bol tang; el uai kau, e Chedam, el de tang, kau me a ngak, me tir bo lobengked.” 29 A keltalreng a ngii a lululuuch el kirel a Kristo ruchei er a lemotelechakl e bol mekerus.
Sera kot el rak er a uchelel Oluut er a ebangkelio er a Jesus Kristo, llechukl er a section 38 er a Doctrine and Covenantse a Rubak a mengedecheduch el kire a mekemad me a mekngit el dilu el kmo, a kmal subedemiu el kmo, bom tang, le lak bom tang eng diak mchedak. 30
A siukang er a Ikelesia er kid a ebangkelio er a Jesus Kristo. A Babilengel a Apostol Paulus el mo er a rechad er a Roma klou a belkul. 31 A uchelel a Ikelesia er a Rom a mla er ngii a re Jew me a re Gentiles. Tirka el Jews a ulkiu a siukang er a tir e “mlo mimokl, e dilubech e blo betok e mesisiich.” 32
A re Gentiles el mlara Rom a ulab a siukang el klou er ngii a mlara Hellenistic, el Apostol Paulus a mle ungil medengelii leng mla ngara Athens me a Korinth.
Me a Paulus a ulechotii ebangkleio er a Jesus Kristo er a beot el rolel. Ng millekoi el kirel aikel teletael er a siukang er a Judaic me a Gentile 33 lulemtok er a meral ebangkelio er a Jesus Kristo. Ng dilu er a dersta er tir el mo mechei a siukang er tir me a ikel loumerang el ngii a diak loltirakl er a ebangkelio er a Jesus Kristo. A Paulus a millekoi er a re Jew me a re Gentiles el mo oltirakl a llach, e kaubeltikereng, e kmo a llemalt a mekrolid el mo suobel. 34
A siukang er a ebangkelio er a Jesus Kristo a diak el siukang er a Gentile a lechub el siukang er a Judaic. Ng diak el iior er a iiro er a chad a lechub a le kiei er ngii. Sel dengara deureng er a kakerous el chad, eng kired el mechei aikel siukang er kid lomtok er a ebangkelio er a Jesus Kristo. A rechedal a ikelesia me a rebeches el mei a blechoel chad er a kakerous el beluu me a kakerous el siukang. Alsekum e kid a mo oltirakl er a tekingel a President Nelson el mo mengidb er a berrid el Israel er a ikal erul beluu, e kid a mo metik el uase kede diak desal ngodech er tirkel Jews me a re Gentiles er a taem er a Paulus. Eng di ng sebeched el mo tang lokiu a beltiekreng me a klaumerang er kid er a Jesus Kristo. A Babilengel a Paulus el mo er a Roma meketeklii osisechakl el doltirakl a siukang me a osisechakl er a ebangkelio er a Jesus Kristo. Ng okesiu el mei er kid er chelechal sils. 35 A chedaol ruoll er a templo oldak er kid er a tokubets el teletael e rullid el mo tang el mo er a ulebongel.
Kede mengull er a ruchelel a ikelesia er a beluulechad el rokir el diak el belkul a kmo te mle cherrungel ng bai tir el lutekangel ongarm, e mlo chuarm, el melasm el mo uaia Kristo, e millasm el meleketek er a klaumerang e mo tang el ngara Osobel. A keltalreng er tir lobengkel Osobel a rirelterir el mo kaukledem. Tial osisechakl a klemrang el mo er kau me a ngak er chelechal sils.
A okedong el mo er a rechad er a Ieklesia er a Jesus Kristo er a Uriul-klebesei el Santo a mo melasm el mo chedal a Zion loba kltalreng me a tal uldasou e kiei el ngara llemalt. . 36
Nglunguchek me bo doruul a llemalt e doba kltalreng e bo demui el mesiou e dongull er a Osobel, el Jesus Kristo, el ngii ak sioning el kirel. El ngara a ngklel a Jesus Kristo, amen.