![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F12%2Fe0%2F12e06076432429d84861c13390953fc8abda57ad%2F12e06076432429d84861c13390953fc8abda57ad.jpeg/full/!250,/0/default)
Rokui el Beluu, Keblii, me a Omelekoi
Ng sebeched el mo, ng okiu a teleteled, e mo tebechedel a okedmeklel a ulaoch me a yaksok er a Rubak—el tebedechel a ebangkelio el omekngeltengat er a beluulechad.
Rodam me a rodos, ak dirk ulemak er a chebechiil er a templo, olitrakl aikel beldeklel a teletelel a COVID-19. Ngika el redil me a sechal mocha bechiil, el di diul mla misionari, a di diul mle rechad er a blirir e odam e odos er tir. Ng dimlak el beot. Ngika el redil a ongetiu er a reteruich el ngalek. Tirka el tetiu el bebil er ngii a mle dengchokl el blechocheb, el ngara kot el klou el mo er a kot el kekerei, el chacheroid a delongelir.
Tial telungalek a mla melasm el mo ungil tonari er sel lekiliei er ngii Eng di, a tal chedal a telungalek a dimlak el sal mededaes a rengul—leng kmo, a delal a redil a chedal a Ikelesia er a Jesus Kristo er a Uriul-klebesei el Santo.
Tial telungalek a milasm el mo ungil sechelei er a skuul, el ngara ngii a lodersii, me a rechad lekengei er tir, a lechub eng diak. Te miluluuch e meluluuch me bol medemdemk a rengrir a rechad.
A tal kesus, e tial telungalek a ulemdasou el kmo a nglunguchir a mla monger, er a kmal ngodech el teletael. A blirir a milseseb el di mle riou er a chutem. E dirrek el ngar ngii a ngodech el dilubech. Tial seseb a dilemdemk a rengrir a retonari er tir.
A retonari me a skuul a chiludel a bail, oeacher, me a meklou a belkul klekedall el kirel tial telungalek, el tir a mlo diak a ngerang er tir. A blekokeuii a mok a ungil klemedengei. Ng dimlak el ngii a rael el tial telungalek a ulelsingch er ngii el nger er a nglunguchir. Eng di, te mirreng a saul er a ikel blal suub lokiu a ringel me a ngodech el nger er a meral ngara rengrir el nglunguchir.
Ng klemerang, el tirkel loba blakereng me a mad lomes, e a chubechub er a Rubak a mocholt er a taem er a ongarm er a klengar. A dotekangel ongarm me a ringel e ked emerald ngmai a klengeltengat er a babeluades. Chelsel tial kelngar er a chutem, e kede locha tuom a lechub e kede mengiil er a kmo ngerang el telkib el taem, eng di uriul e kede meral mo mes a meklou a ultutelel. 1 Tiaikid a yaksok er Ngii. 2
Sel chisel erul dart el rak omuchel lobengkel a smiich el yaksok el kmo a “Dios a betika rengul er a rengelekel el ngara beluulechad el rokir.” 3 A dersta er kid el ngara bek el beluu, kebliil, omelekoi, me a rechad, 4 a Dios a yaksok, e tibir, e siotai er kid el mei ngu a klou el deureng me a klungiaol er Ngii.
A beltikereng er a Dios el kirir a rokui el chad a bleketakl er a chelsel chedaol llechukl. 5 Sei el beltikereng iliuekl er a chedaol telbilel a Abraham, el mengudel er a reberriid el Rengelekel, 6 me a Uldesuel el kirel a deureng er klanger kid.
A blai el blil a klaumerang eng diak a rengodech el chad, a lechub el chad er a ngodech el beluu, 7 diak a meteet me a diak a chebuul, 8 e diak a oleko te ngodech el “chad.” Me kid el “teloi er a resanto,” 9 e kid a mla mongit el mo ngodechii a beluulechad el mo ungil, er a chelsel mo er a iikrel, dersta el chad, tal telungalek, me a chimol basio er a tal taem.
Tia duubech sel doltirakl e domerk er a ebangkelio. Sera uchelel chelechal taem, e a Profet Joseph a ngiluu a meang lulaoch el kmo a Chedam er a Babeluades a mengerchir er a rokui el chad er a ngii di el ker el mo metik er a beltikereng er a Dios e mo medengelii sel Klisichel mukeroul e mengodech.
Tial ulaoch a mlengai, er a mle kerrekar el blirir a re Smith er a Palmyra, New York. 10
Ng mlomerek er sera 1998, e tial blirir a re Smith a liluut el mokedechor sel meral dodai er ngii. Sel ongeru el delmerab er bab a osisu a klungel el 18- by 30- by 10-foot (5.5 by 9 by 3m) el basio el ngii a Moroni,a kmal klebokel el loderuchela mla er a Dios, a dilum er a ngeasek el Joseph er sel kesus er a September 21, 1823. 11 }
Kom dobedebek a tekingel a Profet Joseph:
“A [Moroni] a dilu el kmo … a Dios a ngar ngii a ureor el bol beskak; e a ngklek a mo medung lungil e mekngit er a chelsir a rokui el beluu, kebliil, me a omelekoi. …
“[Moroni] a dilu el kmo ngar ngii a hong el delakl, … el mui er a cherrengelel a diak a ulebengelel Ebangkelio er a chelsel.” 12
Ka momtab. Kede mengull er a Dios el Diak a Ulebengelel Chedam me a Ngelekel, el Jesus Kristo, ng diak el Profet Joseph a lechub el ngii di el sechal a lechub eng redil.
Eng di ka momtab aikel ulaoch el Dios a mesterir a remesiungel el di mla tmaut. 13 A bebil a dilubech ruchei el taem, e a bebil a mlo uriul, eng di rokui el di mla tmaut. 14 Sel dorrenges a ulochel a Rubak, e kid a sebeched, er a teleteled, el dirrek el mo otutel aikel ulochel me a yaksok er Ngii—el ngii a telengtengil ebangkelio er a beluulechad.
Sera 1823, Joseph a dimlak a remedengelii el teruich me a euid a rekil buik el kiei er a basio er a beches lileakl el beluu. A lak el klemerang, eng mekera e omdasou el melekoi el kmo ngii a mo dongu er a urerel a Dios e oleiuiid lokiu a sengk me a klisiich er a Dios a chedaol llechukl el beluulechad a di mo medengelii?
Eng di, ngii el klemerang a uchul, e kau me a ngak a sebeched el sioning el kmo tial ulaoch a mla tmaut e kid a uldimukl lolngeseu el kirel otutel.
Rodam me a rodos, beluulechad el meliuekl, a dersta er kid a teloi er tial October 2020 el klou longdibel e teloi a ikel beluu, kebliil, me a omelekoi er sel ulaoch.
Chelechal sils, e a rechedal a Ikelesia er a Jesus Kristo er a Uriul-klebesei el Santo a kiei er a dart me a oketiu me a kllolem el beluu me a basio, lobengkel a edei el telael me a okeua el dart me a okeua me a kllolem el stake er a Ikelesia er a chelsel a kltiu er a ikal beluu. 15 Kede olchotel a kakerous el basio e dirrek luchul a klisiich.
Sera 1823, eng techa ulemdasou el kmo a 2020 eng morngii a keldei el meklou el beluu lobdois a rechedal a Ikelesia er ngii—Beluu er a Merikel, Mexico, me a Brazil?
A lechub eng lluich me a kldei el beluu lobdois er a dart el telael a rechedal a Ikelesia—a keldei a North America, e a tacher me a kleuang a Central me a South America, chimong a Europe, kleuang a Asia, e a chimong a Africa? 16
A President Russell M. Nelsona melekoi el kirel a Babier er a Mormon el kmo “ngmengasireng longasireng.” 17 A resioning er ngii ouchais el kmo, “Bo lodengei a beluulechad el rokir, kebliil, me a omelekoi, me a rechad.” 18 Chelechal sils, e a klou longdibel a ngar ngii er a dart el kakerous lomelekoi. A President Nelson a mla sioning er a Jesus Kristo me a mla moluut el ebangkelio er Ngii e ra chelsel a dart me a okedei el beluu e dirk melemolem.
Ngulemuchel el di mle eim el telael er sera 1830 aikel kot el Babier er a Mormon, e a dart me a oketiu me a erung el million lecheklel rokir a lechub a bebil er ngii el Babier er a Mormon a mla melcuhes er a dart me a tacher me a teblong lomelekoi. A uiedel a Babier er a Mormon a dirrekl el mo ngar ngii el digitally. A oidel a Babier er a Mormon er chelechal taem a uldimukl e rngii a lluich me akldei lomelekoi lokeim el chad a melekoi er ngii, el ngii a kmal tekingir a rekmeed el 4.1 billion el chad. 19
Ngokiu a mekekerei e beot el tekoi—el dersta er kid a mla mongit el mo meruul—e a meklou el tekoi a mekedmokl.
Okesiul tiang, sera temel a stake conference er a Monroe, Utah, el ngar ngii a kmeed el erul telael me a erul dart el chad, e a kuleker el kmo te tela mla ngara mission. Ng kmeed el rokui el chim el di mlodars. Aika el mereko el tela el rak, e tiaikid el chimo el stake, e a eim el dart me a okolem me a teuang a mla ngara mission er a beluu er a Merikel me a okeim me a kldei el beluu er a bek el meklou el beluu—el diak luldimukl er a Antarctica.
A Antarctica, er sel beluu er a Ushuaia, el kmal bebul a Argentina, e ak milsa ulaoch el toutang le remisionari a mla omerk er a mlamoluut el ebangkelio er a Jesus Kristo er a basio el okedongall el kmo “ngulebengelel a beluulechad.” 20
A siasing el ngara iikrel aika el eua el volumes el kmo Santo 21 a olchotel a rdechel ebangkelio er a roumerang el Santo er a beluulechad el rokir. A reksi er a Ikelesia er kid a delalm er a klaumerang er a roltirakl er a ebangkelio el chedal a ikelesia, luldimukl er a Mary Whitmer, el mesisiich a klaumera er ngii lodos el Moroni a ulecholt er ngii aikel sintsyu el Babier er a Mormon. 22
Tial merael mei el Kot el buil 2021, e a kldei el magazine er a Ikelesia—el Friend, Kire a Klisischir a Rengeasek,me a Liahonaa siotai er a rokui el mei e mkauchais a klaumera er kemiu el teloi er a recheldebechel er a roumerang. 23
Rodam me a rodos, sel doleketek er a klaumera er kid er a Chedam er a Babeluades me a Jesus Kristo, e dengai a klengeltengat sel doltirakl a klemerang er a ebangkelio me a chedaol ruoll, e dosuub, e dolbedebek, e domerk er a melemolem Loluut, e kid a oltaut er sel ulaoch.
Kede melodech er kid me a beluulechad loltirakl er a teletelel ebangkelio el ngii omekngeltengat a klengar er a ngii di el ker.
A tal odos el ngara Africa a kmo, “A uomesiungel a bechik lokiu a priesthood a rulii el kmal mo klou a rengul e bekokeuii. E ngak a merael mo ungil buch e chedil.”
A tal mla mo oureor er a siobai el chad el ngara Central America a kmo uchei er a lebetik er a mla moluut el ebangkelio er a Dios, e ngiii a dikiliei er a rael. Chelecha ngii me a telungalek er ngii a mla metik er a meral, moktek, me a omelisiich.
A ngeasek el buik er a South America a omekeroul a malk e olterau a ngisel lolngeseu lomechar a mado er a blai el rechad er a blil omekedechor ngii. A kot eng locha tengetengel. Ng meral mo mes a mado er a babeluades lobok.
A kuk ikel Eua el Saus, er a dimesngebard er a Beluu er a Merikel, a telungalek er a Native American a oumekeroul a klebokel el bara el mo omung er a desert, lolchotel a klaumerang er a ebangkelio me a siungel a klechad er tir.
A silobel er a meringel mekemad, a odam el ngara Southeast Asia lulemdasou el kmo a klengar a mle diak a belkul. Ng mlo sebechakl lokiu a berrusel er a chad ledilak er a skuul loba tray er a sacrament e ouchais el kirel a chedaol ruoll me a Tngakireng er a Jesus Kristo.
A Chedam er a Babeluades a siotai er kid er a ngii di el ker el mo melchesuar a beltikereng er Ngii, e mesuub e mukeroul lokiu omesuub, mo meduch loureor, siungel a klechad, me a teletael er a klungiaol me a deureng el debetik er ngii er a mla moluut el Ikelesia er Ngii.
Me sel dorael el mo oumera er a Dios, e a bebil er a taem e a ongtid er a ikel ringel, klsabisi, me a diak dodengei el taem, e kede mo medengei el kmo Ngii a kmal medengelkid e lmuut el betik a rengul er kid.
Tiaikid a uchul e kid ousbech a ngesou er a Dios el mo mekdubech a llemalt, tabesul, melemalt, me a budech er a rekeblid me a buai. Sel meral, dmolech, e bleketakl el cheldecheduch, basio, a mei sel bo dolchesuar a beltikereng er a Dios, e dosiik er a chubechub me a ongasireng lokiu a Tngakireng er a Ngelekel Sechal, e de bekdebechii a diak a ulebengelel deleuill lokiu chedaol ruoll.
A klungiolel a klechlid me a llomes a usbechall er a chelechal chetituokel, klou a nglemuu, me a mekngit el beluulechad. Me kede mekerang e lmuut el mekbeches, omekrael, e mengeluolou er a rechad? 24
A omellemel a kerrekar er a Haiti a ta er a ikel betok lokesiu er a rechad el mo dmak e meruul a ungil lomeruul. A beluu, luldimukl er a 1,800 el chedal a Ikelesia, lulngeseu smiik a kerrekar, a mlo kldibel e melalm a kmeed el 25,000 el kerrekar. 25 Tiak kederir a chereomel a mla medalm er ngii a obdois er a 121,000 el kerrekar. E omdasou a mo melalm a lmuut el kmeed el telael kerrekar.
Tial uldekial a ureor a uchul a chucheb, mengeluolou er a chutem, e melenget a ieleb. Ng klebekelel a beluu, e omudech er a rechad, e uchul omengang, e melisiich er a rechad. Omko koker er a rechad er a Haiti el kmo ng techa mo meridm a rdechel aika el kerrekar, e te kmo, “Ngii di el chad el songerenger.”
Bebil er a okai el basent er a rechad er a beluulechad a chedal a klechelid. 26 A klechelid er a beluu a keldmokl lolngeseu sel dubech a bkaischemrungel el tekoi, luldimukl a ngesou er a kall, basio er a rechad, omesuub, omenguiu, me a osisechakl er a skel a ureor. Beluulechad el rokir, e a rechedal a ikelesia, resechelei, me a Ikelesia olngeseu a beluu er tirkel diak a delengcheklir el mesterir a ralm, klekedall er a omengikiid, ngesou el mo er a resechudel, klekedellel a mad—el mo er a chimol chad, chimol basio, me a chimol kerrekar. 27 Ngii di el ker, e kede melasm el mo ungil chedam me a chedil e ungil chad er a beluu, lolngeseu a basio dekiei er ngii me a beluu, luldimukl er a Latter-day Saint Charities. 28
A Dios a meskid a sengk er a mimokl melilt—me a ngercheled er a ikel dolilt el tekoi. Ng melekoi a Rubak, “Ngak, el Rubak el Dios, a mla meksau a iilmokl, a leuaisei [e ke] mimokl el melilt.” 29 Sera louchais er a “ngbetir a rekelebus,” 30 e a Rubak a mle yaksok er a Tngakireng er Ngii me a rolel ebangkelio a sebechel kodekedii a rengedel a tech me a reng. 31 Chubechub, tial iilmokl el mesebechakl er kid a dirrek el mo er tirkel mla mo iikrii tial klengar.
Sesei el rak er a mla memong, a prist er a Central America a uluuchais er ngak el kmo ng milsuub el kirel a “techolbechelid el mo er a remla mad el chad” er a Uriul klebesei el Santo. “Ng ko er a melemalt,” ng millekoi ngika el prist, “el Dios a mesterir a rokui el chad a techall el nguu a techolbechelid, el diak el iior er a kmo te kiliei er ker, diak el uldimukl er a remekekerei el ngalek, el tir a ‘ngar el okiu a Kristo.’ 32 A Apostol Paulus,” ng millekoi ngika el prist, “a melekoi el kirir a re mla mad el mengiil er a techolbechelid me a okiis er a kodall.” 33 A chedaol ruoll er a templo a yaksok a bek el beluu, kebliil, me a omelekoi “melemolem el rengodel er a kodall, beluu er a ngau, a lechub a debull.” 34
Sel dosiik er a Dios, e a bebil er a taem e ngodech el nger er a nglunguched a ngoikid, el mo er a selbechakl, el oridii a iilkolk er a rengud, e mekrolid el mo metik er a chedaol selbechakl me ked emo ngmai a klungiaol er a telbilel me a beltikereng er Ngii.
A meklou el tekoi a blechoel lomuchel el mekekerei, eng di ongasireng er a Dios a mocholt er a bek el sils. Kede meral mereng a saul el kirel a ngarbab el sengk er a Chedaol Reng, Tngakireng er a Jesus Kristo, me a mla mocholt el osisechakl, chedaol ruoll, me a telbiil el debetik er a mla moluut el Ikelesia er Ngii, okodongall el ngara Ngklel.
Mei e de ngara deureng e dekengei er a ongtil a Dios el mo ngmai e kudmeklii a yaksok er Ngii me a mla mulaoch el klengeltengat er a bek el beluu, kebliil, me a omelekoi, a nglunguchek, el ngara chedaol ngklel a Jesus Kristo, amen.