Ak Oumerang er a Reanghel
A Rubak a medengei a ringel el om chelbangel. Ngii a medengelkau; Ngii a betik a rengul er kau, e Ngii a mo oldurokl er a re anghel el mo olengeseu er kau.
Rodam me a rodos, Ak oumerang er a reanghel, e soak el ouchais er kemiu er tekoi el dilubech el me er ngak el obengterir. El uaisei, ak oureng e meluluuch me bode omtab a ultutelir a reanghel er a chelsel a klengar er kid.
Kaikid a tekingel a Elder Jeffrey R. Holland el mla er aikal mla momerek el klou el ongdibel: “Sel dosoud er tirkel tir a donguu el ngara chimal Dios, e ke de lotkii el kmo ng diak el rokui el anghel a ngara sel bitang er a veil. Bebil er tir a dorael el obengterir e mengedecheduch er tir—er tiang, er chelechal taem, me a bek el sils. Bebil er tir a kiei er a tonari er kid. … Uaisei a babeluades a diak el ualsal kmal kmeed sel sekum e kede mesa beltik a rengul a Dios el mocholt el okiu a klechubechub me a blakerreng er a rechad el tir a kmal ungil a blekerdelir el kmal klikiid el di ta el anghel a tekoi el sebeched el medesuii” (“The Ministry of Angels,” Liahona, Nov. 2008, 30).
Ng kirir a reanghel er tia el bitang el ngak a soak el mengedecheduch el kirir. A reanghel el tir a merael er a delongeled er a bek el sils er a chelsel a klengar er kid a mesisiich el omeklatk el kirel a beltkil a rengul a Dios el me er kid.
Tirke el kot el reanghel el ngak a mo omasech er tir a reteru el rodos el misionari el tir a ulsisechakl er ngak el kirel a ebangkelio er a dirk ngeasek el sechal: Sister Vilma Molina me a Sister Ivonete Rivitti. Ngak me a kekerei el ochedak a ble el ongemedaol er kemam el mo er a ta er a omeruul er a Ikelesia el kemam a mlo medengelterir tirka el teru el odos. Ng diak el sebechek el metebengar el kmo sel kekerei el omeruul a mo ngodechii a klengar er ngak.
A rechad er a blik me a rebebil er ngak a dimlak el sal sorir el mesuub el kirel a Ikelesia er sel taem. Te dirrek el dimlak el sorir a remisionari a lebe loldingel er a blimam, me ak millai a omesuub er a chelsel a Ikelesia. Se el kekerei el delmerab er a ikelesia a mlo “chedaol chereomel” er ngak.
A uriul er a ta el buil el lolsisechakl er ngak a re missionaris, e ak miltecholb. Ak mle teruich me a elollem a rekik. Ng metarchebesul, el diak a siasing el kubang er tia el kmal chedaol el taem, e ng di ngar er ngii a siasing er ngak me a ochedak el kubang el mle ngar er sel omeruul er a ikelesia. Ak kirek el mo meketeklii el kmo ng techang a techang el ngar tial siasing. Ngak ngike el metongakl el ngara mo bedul a katur.
El sebechem el omes er ngii, melemolem el ngara Ikelesia a mle meringel er a ngeasek el ngii a dirk mle mengodech a klechad er ngii me a telungalek er ngii a dimlak el ngara osisiu el rael.
Me tia er a kulasem el melodech er a klechad er ngak, mo er a beches el siukang, me a beches el sechelei, ak mlo melechesuar el diak a kultab er ngii. Ak ulemelechesiu el di mle sabisii e mechitechut a renguk. Ak mle medengei el kmu Ikelesia a mle klemerang, e ng di mle telkib el meringel er ngak a melechesuar. El metarchebesuk e ouralmesils a renguk el kulasem el mo ungil chedal a beches el klechelid er ngak, e ak miltik er a blakelrengel el mo teloi er a edei el klebesei el ongdibel er a rengeasek, el ngii a kulemdasu e ng mo ngosukak el remuul a beches el klsechelei el obengterir a rebebil. Tiang e ngak a mlo medengelii a ta er a olsobel el anghel, el ngklel a Mônica Brandão.
Ng mle beches el kiei er tia el basio, el millukl el mei el mla er a ta el tebechedel a Brazil. Ng di mle merreched el nguu a osengek e, mlo ungil er ngak, ng di mle ungil besul er a rengul el mo sechelik. A kumdasu e ng ulemes er a chelsel a renguk ng diak el tia el ikrek.
El uchul e ng mlo sechelik, ak mlo medengelteterir a resechelil, el tir a mlo sechelik e kemam a dilak el rokui el oldeu a rengmam er a klekool er a ikelesia el kemam a mle ulsiseb er ngii. Aika el klekool a kmal mle meklou a ultutelel el kirel tia el beches el klengar er ngak.
Tirka el ungil sechelei a kmal mle klou a lerellii, e ng di diak el mosisechakl el ebangkelio er a blik el obengkel a remengesuseu el telungalek er ngak a rirellii tia el beltek el mo chedal a ikelesia el kmal mo meriked. Aike el tekoi el kuruul el kirel a ebangkelio er a Ikelesia a mle klou a ultutelel el kirel tia el omekeroul el beltek. Uriul e a reteru el reanghel a mlodurokl er a Rubak el me olengeseu.
A ta er tir a mle Leda Vettori, el mle sensei er ngak er a seminary er a bek- el tutau. El okiu a kengei el beltkil a rengul me a ungil osisecheklel, ngii a milsak a “ungil tekingel a Dios” er a bek el sils (Moroni 6:4), el ngii a kmal mle usbechall er a sils er ngak. Tiang a ulngeseu er ngak el omekeroul a chedaol klisichel a renguk el melemolem.
A ta er a anghel el mlodurkl el me olengeseu er ngak a president er a Young Men, Marco Antônio Fusco. Ngii a dirrek el mle mokedong el mo kldemek er a odingel er a remeklou. El di mle kekerei a klaumedengei me a duch er ngak me a dirrek el ngodech el teletelek, ngii a milskak a ngerchelek el mo olisechakl er a ongdibel er a chelechad er a prist me a odingel. Ng mileskak a techall el mo meruul e mesuub el diak di kumes e kumtab er a ebangkelio. Ng uluumerang er ngak, el muut el engelakl er ngak el oumerang er ngak.
Ak mereng a sulir tirka el anghel, me a dirrek el betok el tir a blo kudengelterir er a ikel el taem el kmal mle meklou a ultutelel er a chelsel a di ulemuchel el klengar er ngak, ak ngilai a klisiich el melemolem el ngara rael er a telbiil e mlo nguu a sioning er a chedaol klemerang.
E uaisei, ngike el ngeasek el redil anghel, Mônica? Uriul er a ki bo merek el ngara mision, ngii a mlo bechik.
Ng diak kumdasu el kmo ng di mle ngii el mokdubech el ungil sechelei, ngerachel er a Ikelesia, me a mukeroul el okiu a ungil tekingel a Dios a mle tebechedel tia el teletael. A Merredel er a ikelesia el Gordon B. Hinckley a ulisechakl: “Ng diak el beot el tekoi el obult el mo teloi el chedal tia el Ikelesia. Ng belkul a kmo ke mo merrob a mechut el omeruul. Ng belkul a kmo ke mo oititerir a remechut el sechelim. Ng dirrek el locha belkul a kmo ke mo oleakl a bebil er a omoumerang el tekoi. Ng locha mo ousbech el molodech a bebil er a tekoi el moruul me a dirrek el ike el ngii a soal a rengum. Ng betok el teletael e ng belkul a sabisii me a dirrek el dakt el kirel a diak modengei el tekoi. Ng kirel ngar er ngii a ulkerreu el ukeroul me a omelisiich er a chelsel tia el kmal meringel el taem er a dirk ulebult el chad” (“There Must Be Messengers,” Ensign,Oct. 1987, 5).
A uriul e ng mildechel, “A dersta er tir ousbech a keldei el tekoi: sechelei, ngerachel, me a omelisiich ‘er a tekingel a Dios’” (“Converts and Young Men,” Ensign,May 1997, 47).
Ngera me a Kuuchais aika el tekoi el dilubech er ngak el obengkem?
A kot, e ng tekoi el mo er tirke el tir a mengarm a osisiu el teletael er chelecha el taem. Ke locha beches el dirk ulebult el mo chedal a ikelesia, me a lechub e ke liluut el mei er a Ikelesia ruriul er a obelm cheroid el telkib el taem, me a lechub e ng mo er a tang el ngii a meringel er ngii a mo soiseb. Kulengit, a kulengit, el kmo lak bom mechitechut a rengum el kirel a omelasem er kau el mo tebechedel tia el klou el telungalek. Ngii a klemera el Ikelesia er a Jesus Kristo.
Sel denguu er a deureng er kau me a mo suobel, e ng blechoel el ngar er ngii a belkul a blakelreng er a omelasem. Ng ngar er ngii a belkul a omelasem el mo meruul er a klechad er kau me a omerollem. A Rubak a medengei a ringel el om chelbangel. Ngii a medengelkau; Ngii a betik a rengul er kau, e Ngii a mo oldurokl er a re anghel el mo olengeseu er kau.
A Osobeled a melekoi el kmo: “Ak mo okiu medemiu. Ngii a mo ngara kadikm ma katur er kau, e a Reng er Ngii a mora chelsel a [rengum], e a reanghel er Ngii a iiliuekel er kau, el mo sobecheklid” (Doctrine and Covenants 84:88).
A ongerung el moktek er ngak el ouchais aika el tekoi el dilubech el merngak a mesterir a klumech el mo er a rokui el rechedal a Ikelesia—me er kid el rokui. Ng kired el medengei el kmo tia a diak el beot el mo er a rebeches el dirk ulebult a klaumerang er tir, dirk mlei el sechelid, me a tirke el tir a ngodech a teletelir el mo soiseb. A Rubak a medengei a ringel el chelbangel, e Ngii a osiik er a re anghel el tir a kldmokl el mo olengeseu. A Rubak a blechoel el osiik er a re kldmokl e semeriar el mo anghel er a klengar er a rebebil.
Rodam me a rodos, ke kongei el mo usbechall er a chimal a Rubak? Ke kongei el mo ta er tirka el anghel? El mo chad el omtechei, el modurokl er a Dios, er tia el beluu, er a chad el Ngii a le suebek a rengul kirel? Ng ousbech er kau. Tir a ousbech er kau.
Ng uaisei, ng sebeched el blechoel el ultuil er a remisionari. Te blechoel el ngar er sei, el tir a kot el mo kudmokl aika el urerir a reanghel. E ng di te ngesonges.
Sel bom ungil omes, el meliuekl er kau e ke mo mesterir a rebetok el ngsaul el kirel a ngeluir a reanghel. Tirka el chad a locha diak el oubail a becheleleu el saiang, mumu, me a lechub e ng bail er a mo er a ikelesia a le Sandei. Te locha di tir el dengchokl, el ngara kot el uriul er a ikelesia me a lechub eng blil omesuub, a lebebil e te melechesuar el diak el meues. Alta a cheiurir a telkib el blekuuk me a lechub e ng ngodech a omelekingir, e ng di, te melasem.
A rebebil a locha melebedebek el kmo: “Ng ungil di kulemolem el lemuut el mei? Ngungil di kulasem?” A rebebil a locha melebedebek el kmo alsekum e a ta er a taem e te mo melechesuar el le kongei er tir e oubeltik el reng el mo rtir. A Reanghel a usbechal, chelechal taem; a Reanghel el to a kongei el tuobed er sel ngara ungil besul omeruul e otngelii tir; [rechad el tir] a kmal lungil e kmal klikid ma reanghel a di chimol tekoi el mei er a uldesuek [sel kusaod er tir]” “(Jeffrey R. Holland, “The Ministry of Angels,” 30).
Rodam me a rodos, ak oumerang er a re anghel! Kid a ngar er tiang el rokui, el klou el soldau er a reanghel el ileakl er aika el uriul el klebesei, el mo olisechakl er a rebebil el odersel a chimal a oubeltik el reng el Ulemeob. Ak yaksok el kmo a lsekum e kid a kongei el mo mesiou, e a Rubak a mo meskid a techall el mo olisechakl el anghel. Ngii a medengelterir tirke el tir a ousbech a ngesou er a re anghel, e Ngii a mo olsiseb er tir er a roled. A Rubak a mo ngoititerir tirke el tir a ousbech a ngesuel a re anghel er a roled er a bek el sils.
Ak kmal dmeu a renguk el kirir a rebetok el reanghel er a Rubak el tir a mla soiseb er a rolek er a chelsel a klengar er ngak. Te mle usbechall. Ng kmal dmeu a renguk el kirel a ebangkelio er Ngii el olengeseu er kid el mo melodech er kid e meskid a techall el mo ungil.
Tiang a ebangkelio er a beltikelreng, el ebangkelio er a osisechakl. Aikang a kuuchais el loba ngklel a Jesus Kristo, bo le uaisei.