E Mafai ona E Faapotopotoina Isaraelu!
Ua ou matuai talitonu e mafai e outou le autalavou ona faia lenei mea ona o se mea e uiga i lo outou faasinomaga ma se mana maoae o i totonu o outou.
Ua toetoe atoa le tolu tausaga talu ai, na valaaulia ai e Peresitene Russell M. Nelson ia talavou uma o Le Ekalesia a Iesu Keriso o le Au Paia o Aso e Gata Ai ia auai i “le autau talavou e faapotopoto ia Isaraelu i itu uma e lua o le veli. Na ia saunoa, “O lena faapotopotoina o le mea aupito sili lea ona taua o loo tupu i le lalolagi i le taimi nei.”1 Ua ou matuai talitonu e mafai e outou le autalavou ona faia lenei mea---ma faia lelei---ona o (1) se mea e uiga i lo outou faasinomaga ma (2) se mana maoae o i totonu o outou.
Ua fasefulutasi tausaga talu ai, na lagona ai e ni faifeautalai se toalua mai la tatou Ekalesia le taitaiina atu i se fale i Niu Jersey i le Iunaite Setete. Na oo mai le taimi, na papatiso uma ai faavavega matua e toalua ma le fanau uma e toa 10. I upu a le perofeta, sa latou tuu atu “e faamuamua le Atua”2 i o latou olaga. E tatau ona ou fai atu “i o matou olaga.” O a’u o le lona tolu o le fanau. Sa 17 o’u tausaga ina ua tonu ia te a’u e osia se feagaiga tumau e mulimuli ia Iesu Keriso. Ae mate mai pe o le a le isi tonu na ou faia? O le a ou le faamisiona tala’i. Ua matua tele naua na mea. Ma e le mafai ona faamoemoeina lena mea mai ia te a’u, e sa’o? O a’u o se tagata fou a’ia’i o le Ekalesia. Sa leai sa’u tupe. E le gata i lea, e ui ina sa faatoa ou faauu mai le aoga maualuga aupito sili ona faigata i Filatelefia Sisifo ma sa faatoilaloina ni luitau faigata, ae sa ou fefe nana i le tuua o le aiga mo le lua tausaga atoa.
O Lou Faasinomaga Moni
Ae sa ou faatoa aoaoina faapea o a’u ma tagata uma na mau faatasi ma lo tatou Tama Faalelagi o Ona atalii ma afafine agaga ae tatou te le i fananau mai. Na manaomia e isi ona iloa, e faapei ona sa ou iloaina, e momoo o Ia mo Ana fanau uma ia olioli faatasi ma Ia i le ola e faavavau. O le mea lea, a o le’i i ai se tasi i le lalolagi, sa Ia folasia atu i tagata uma Lana fuafuaga atoatoa o le faaolataga ma le fiafia faatasi ma Iesu Keriso e avea ma o tatou Faaola. Ae paga lea, sa tetee Satani i le fuafuaga a le Atua.3 E tusa ai ma le tusi o Faaaliga, “sa i ai se taua i le lagi.”4 Sa faaseseina ma le faafiapoto e Satani se vaega e tasi vaetolu o fanau agaga a le Tama Faalelagi e tuu atu ia manumalo o ia nai lo le Atua.5 Ae le o outou! Sa vaaia e le Aposetolo o Ioane faapea na ou faatoilaloina Satani “i le upu o [la outou] molimau.”6
O le iloa ai o lo’u faasinomaga moni, sa fesoasoani mai o lo’u faamanuiaga faapeteriaka, na ou maua ai le lototoa ma le faatuatua e talia ai le valaaulia a Peresitene Spencer W. Kimbal e faapotopoto Isaraelu.7 O le a tutusa foi mo oe, a’u uo pele. O le iloa ai na e faatoilaloina muamua Satani e ala i le upu o lau molimau, o le a fesoasoani ai e te alofa, faasoa, ma valaaulia8 i le aso ma aso uma---e valaaulia isi e o mai ma vaai, o mai ma fesoasoani, ma o mai ma avea ai ma ni o, a o faifai pea le matamataita o lena taua mo agaga o fanau a le Atua
O Le Faatuatua Mamana i totonu ia te Oe
E faapefea le mana maoae o i totonu ia te oe? Mafaufau i le mea lenei: sa outou alalaga fiafia9 e o mai i se lalolagi pa’u lea o le a oo ai tagata uma i le oti faletino ma le faaleagaga. O le a le mafai lava ona tatou faatoilaloina se tasi o ia oti e i tatou lava. O le a le gata ina tatou pagatia mai a tatou lava agasala ae o agasala foi a isi. O le a oo le tagata e toetoe o ituaiga uma e ono mafaufauina o le lotonutimomoia ma le le fiafia10—o tagata uma ma se ufimata o e galo o mea uma i le muai olaga, ma le malosiaga e sili ona leaga o le lalolagi o loo faaauau pea ona lamalama ma faaosooso i tatou. O le faamoemoega uma mo le toefoi atu ua toetutu ma mama i le afioaga paia o le Atua, o loo taoto atoa i luga o le Tamaalii e toatasi o loo tausisia Ana folafolaga.11
O le a se mea ua faamanaina ai oe e te agai i luma? Na aoao mai Peresitene Henry B. Eyring, “Na manaomia le faatuatua ia Iesu Keriso e lagolago ai le fuafuaga o le fiafia ma le tulaga o Iesu Keriso i le [fuafuaga] i le taimi sa itiiti ai lava ni mea na e iloaina e uiga i luitau o le a fetaiai ma oe i le olaga faitino.”12 Ina ua folafola mai e Iesu Keriso o le a afio mai o Ia i le olaga nei ma tuuina mai Lona soifua e faapotopoto13 ma laveai i tatou, sa le na ona e talitonu ia te Ia. Outou “agaga tamaalii””14 ua i ai se ‘faatuatua tele” ma sa outou vaai ai i Lana folafolaga o se mea mautinoa.15 E le mafai ona pepelo o Ia, o lea sa outou vaai ai ia te Ia e peiseai ua uma ona Ia faamaligiina Lona toto mo outou, a o lei taitai ona fanau mai o Ia.16
I upu faafaatusa a Ioane, na outou “manumalo [ia Satani] ona o le toto o le Tamai Mamoe.”17 Na aoao mai Peresitene Dallin H. Oaks e faapea i lena lalolagi “na outou vaai ai i le i’uga mai le amataga.”18
Pe a faapea la i se tasi aso ae e te lei tuua le fale mo le a’oga, ua faia e se tasi o ou matua se folafolaga moni faapea e mafai ona e maua lau meaai e te fiafia lava i ai pe a e foi mai i le fale! Ua e fiafia tele! A o i ai i le aoga, ua e mafaufau i le ‘aiga o lena meaai ma ua mafai lava ona e tofoina. Pei ona masani ai, ua e faasoa atu foi lau talafou manaia i isi. O le naunau e alu i le fale ua e matua fiafia ai lava ma o lea ua foliga ai ua mamasagia ia suega ma luitau o le a’oga. E leai se mea e mafai ona aveesea lou olioli pe faamasalosalo ai oe ona o lou talitonu lava i le folafolaga. E faapena foi, ae lei fananau mai outou o agaga tamaalii, sa outou aoao e vaai atu i folafolaga a Keriso i lea ala mautinoa, ma sa outou tofo i Lana faaolataga.19 O lou faatuatua tele e faapei o musele o le tele lava o lou faaaogaina e malolosi atu ai foi ma lapopo’a, ae o na lava ua i totonu ia te oe.
E mafai faapefea ona e fagua lou faatuatua maoae ia Keriso ma faaaoga e faapotopoto ai Isaraelu i le taimi nei ma toe manumalo ai foi ia Satani? E ala i le toe aoao e sagisagi atu ma vaai ma lena lava mautinoa o le folafolaga a le Alii e faapotopoto ma faasao le taimi nei. E masani lava na te faaaogaina le Tusi a Mamona ma Ana perofeta e aoao mai ai i tatou i le ala e fai ai. A o lei taitai oo mai Keriso, sa [faatauanau atu ai] perofeta, ma … ositaulaga. … o aoao sa Nifae [i tagata] ia latou tepa taulai i luma i le Mesia, ma talitonu o le a afio mai o ia e peiseai ua uma ona afio mai o ia.”20 Na aoao mai e le perofeta o Apinati, “Ma o lenei a na fai e lē afio mai Keriso i le lalolagi, i le tautala lea faatatau i mea o le a oo mai e peiseai ua uma ona oo mai, po ua leai se togiola.”21 Faapei o Alema, ”na tulimatai i luma ma le mata o le faatuatua “22 ma vaaia ai le folafolaga a le Atua i le faaolataga ua uma ona faataunuuina. Na latou “faatoilaloina [Satani] e ala i le toto o le Tamai Mamoe ma le upu o le molimau a o lei taitai ona soifua mai le Keriso, e faapei foi o outou. Ma sa tuuina atu e le Alii ia i latou le mana e valaaulia ai ma faapotopoto Isaraelu. O le a Ia faia le mea lava lea e tasi mo oe, pe a e tulimatai atu i le faatuatua, vaai o faapotopoto Isaraelu---i le lalolagi ma i a oe lava “li’o”23—ma vaaaulia tagata uma!
E faitau selau faifeautalai sa fausia i luga o lo latou faatuatua mamana i le muai olaga ia Keriso e ala i le vaai faalemafaufau ia i latou sa latou faafesoota’ia pe sa faiaoga ai a o oofu i laei papatiso ma le malumalu. I se saunoaga na faaulutala i le “Amata ma le Iuga i le Mafaufau,”24 na faasoa mai ai e Peresitene Nelson se faataitaiga patino o le faia o lenei mea ma faatonuina ia taitai o misiona e aoao atu o tatou faifeautalai e faia lea lava mea e tasi. I le iloa ai sa latou faaaogaina lenei faatuatua tele ia Iesu Keriso i le muai olaga, na matuai fesoasoani lea i o tatou faifeautalai pele e “faalogo ia te Ia”25 ma faaaoga lo latou faatuatua tele e faapotopoto ai Isaraelu e faapei ona folafola mai le Alii.
O le mea moni, o pepelo fatufua e faatama’ia ai le faatuatua.26 A’u uo e, o le vaai faalemafaufau ma le loto i ai po o le vaai atu i mea e feteenai ma lou lava tagata moni, aemaise o ponokalafi, o le a faavaivaia ai lou faatuatua ia Keriso ma a aunoa ma le salamo, e mafai ona faataumaoia ai. Faamolemole faaaoga ou mafaufauga e faatele ai le faatuatua ia Keriso, ae le faalaleagaina ai.
O Le Polokalama a Tamaiti ma le Autalavou
O le polokalama a Tamaiti ma le Autalavou o se meafaigaluega faaperofetaga e fesoasoani ia te oe le talavou e faateleina ai lou faatuatua tele. Na aoao mai Peresitene Oaks, “O lena polokalama ua mamanuina e fesoasoani ia te outou ia avea atili e pei o le Faaola i vaega e fa: faaleagaga, faaleagafesootai, faaletino ma faaleatamai.”27 A o taitai e outou le autalavou—taitai—i le ola i le talalelei, tausiga o isi, valaauliaina o tagata uma ia talia le talalelei, le tuufaatasia o aiga mo le faavavau, ma le faatulagaina o gaoioiga malie,28 o le faatuatua tele ia Keriso sa ia te outou i le muai olaga o le a toe tulai mai ma faamamanaina ai oe e faia le galuega a le Alii i lenei olaga!
E le gata i lea, o sini faaletagata lava ia, “aemaise ai sini mo taimi pupuu,”29 e fesoasoani e toe faaolaola ai lou faatuatua mamana. Pe a e faatuina se sini lelei ua e tulimatai atu i luma, e faapei ona sa e faia muamua, ma vaaia ai le mea e finagalo lou Tama Faalelagi ia te oe po o se isi e avea ai.30 Ona e galue malosi lea e ausia ai. Na aoao mai Elder Quentin L. Cook, “Aua lava nei manatu faatauvaa i le taua o le fuafuaina, faatuina o sini … , ma le [valaauliaina o isi]---e faia mea uma ma se mata o le faatuatua.”31
E pule oe i lau filifiliga! Na fetalai mai le Alii, “Ua i totonu ia te i latou le mana [e filifili ai].”32 Na faamalamalama mai e Elder Neil L. Andersen, “O le a le tuputupu ae faafuasei lo outou faatuatua, ae e ala i a outou filifiliga.”33 Na ia faaopoopo mai, “[Soo se] fesili faamaoni [atonu o i ai] … o le a taliina ma le onosai ma se mata o le faatuatua.”34
Ou te molimau atu (1) o lou faasinomaga moni ma (2) le mana maoae o le faatuatua ia Keriso o i totonu ia te oe, o le a e mafaia ai ona “fesoasoani e saunia le lalolagi mo le toe afio mai o le Faaola e ala i le valaauliaina o tagata uma ia o mai ia Keriso ma maua faamanuiaga o Lana Togiola.”35 Se’i o tatou faasoaina uma le olioli o le folafolaga mautinoa o le Tusi a Mamona.
“O e amiotonu e faalogo i upu a perofeta, ma … tetepa taulai i luma ia Keriso ma le tutumau mausali … e ui i sauaga uma—o le a lē fano.
“Ae peitai [o Keriso] … o le a faamalolo e ia i latou, ma o le a latou maua le filemu faatasi ma ia.”36
I le suafa o Iesu Keriso, amene.