Jischáá’ Doo Ák’eh Deesdlį́į Da
T’áá aníí she’oodlą niháti’hooznii’go nihánina’nídlá dóó ayóó át’áo Jesus Christ Nááhii’na’, ájéí dadeesnihígíí neidoołdzih, ti’hoo’nííh hodeizyéél doo, dóó ani’ishtłish ha’ahóní dooleeł.
Dííjį́ Easter damóo ayóo áhonoołnin, niha’áłchíní bił dahózhǫ́ǫ dahat’aał, “Daan hootsogo, Jesus Christ ch’énádzid dóó jischáá’ niiłt’į́naadéé’ ch’iníyá; nanooneeł biiłsod yę́ę́ yik’ehdeesdlį́į́’.”1
Jesus Christ Náádiidzáago nihił béédahózinígíí ayóo’at’éego baa ahééh danidzin. Dóó ákót’ée ndi t’áá hoolzhiishgo, ayóo ííniiníníí ła’ nihits’ą́ą́ dahnídiidzáago nihijéí yididoołniih. Adahwiis’áago nihitah naałniihígíí biniina, t’óó ahonii’yóí ayóo adeinííninígíí dahnídadiikai—bił hadahshiijééh doodaii’ nihikwa’áhsiní.2 Akwiid t’ao bąąh adah’hasdiidgo atídadiniisdłi’ígíí bá sodadiilzin.
President Russell M. Nelson ádííniid:
“Béédááhai’ígíí doo baantsikeesda, ayóo ádeiníníínę́ę dóó ádaadinígíí baa deichah. Atídeezhnidleeh éí t’áá íiyisíí ayóo’ó’óní á’té. …
“Náasdi, baa hózhǫ́ǫgo ahína’iiłdeeh doo tsí’di alah baa ahééh hoonidzinda doo kad deichahgo nihits’ą́ą́ dahnídadiikaigo. Yíní anoonééł bii’ hailyáago ákót’áo ayóó’ó’oo’ni’ iiná bii’ hadiilyééł.”3
Jesus bik’is danilínígíí ákót’áo baa ntsííkees, yiká anájahgo yił t’ádíkaah ńt’éé’,4 Bi’diisyį́įgo deiyiiłts’ą́ągo dabidiisnáá’.5 Nihił béédahózingo “yaadaachah dóó yaa yínííł daazlį́į́’.”6 Tsin ałnáosdzoh yikáájį bidisyį́į́jį ayííłką́ągo, éí damóogo ahodooniłígíí doo bił béédahózin da, bini’ daasdiłgo bide’ádaadzaa, haash yit’áo náás yiikahdo Diyin Bóhólníihii t’áágeed daniizį́į́’. Ákót’ée ndi, yaa adáhalyą́ azhą́ bizéé hazlį́į́’ ndi.
Joseph Arimatheadéé’ éí Pilate Jesus bits’íís yaa neiyoozkan. Bits’íís adeiyíítí, na’atahí álinígíí yił yizdis, t’áá bí tsé bi’a’aan góne’ niiníł’tį́, dóó bijishcháá’ tsé ntsaa’ígíí yich’ą́ą́h yidéídiní’ą́.7
Nicodemus éí ak’ah ílíinii dóó azee’ yiníjaa’. Joseph yiká’alwod ats’íís dahyidiiłtį́ dóó na’atahí álíínii yił yizdis azee’ dahalchinígíí ałdó’.8
Mary Magdalene dóó ła’ sáanii Joseph dóó Nicodemus yikee’ níjéé’, Jesus bits’iis niilt’į́į́gih deiyiiłtsą́, dóó azee’ dahalchinígíínd dóó ak’ah yąąh ádeiyiilaa.9 Íídą́ą́’ bééhaz’áanii ayóó bik’eh da’áyee’go, ákó Damóo yázhí éí Damóogo biniinaa ats’íís hasht’eilnééh náás deideez’ą́.10 Áádóó, Damóo abíínígo, sití’néégo yíkai. Yisdá’iinííłii bits’íís ch’ééh hádeidee’į́į́’, bikee’ naazinígíí yił dahoolne’, éí Jesus bi’Naakits’áadah bikéé’ naazinígíí adaat’į́. Naakits’áadah danilinígíí tsénii’di yił yíkai dóó bii’ áhádin. T’áá ałtso dahdiijéé’ Mary Magdalene t’éiyá t’áá ákǫ́ǫ́, Yisdá’iiniiłii bits’íís haají shą́ nizingo yaa ntsékees.11
Mary Magdalene éí t’áá sáhí jishcháá’di sidá. T’áá naaki yiskánídą́ą́’, doodahági át’éego bikwaahásiní dóó biNa’nitiní bidisyį́į́go yiyiiłtsá. Bi’jishcháá’ doo siláhí da, dóó háájí shį́į́ ályaago doo bił bééhózin da. Yínííł yiih yítłizh, dóó yichah. Áájį́ o’oolkidgo, Yisdá’iinííłii náádiidzáago bich’̨i’ niníyá dóó abíłní ha’át’íísh biniyé nichah dóó háísh hádiní’į́į́’. Tł’oo’go hasht’edahósinígíí shich’̨i’ haadzíí niizį́į́’, áko neiyídeiłkid, áko shiBóhólníihii bits’íís’ísh dahdiniłt’į́ yiłní, akííndzaadą́ą́’ shił holne’ áko bikádeeshááł.12
Baa ntséskeesgo Bóhólníihii Mary Magdalene bine’ yínííł nizin dóó yik’ee biti’hoo’niih yaa ákoniidziih.13 Áádóó biizhi’ yee bich’į’ haadzíí’, áadóó Yich’į’ naahaayáádóó Yééhoos̨įid. Christ nááhiina’ígíí yiyiiłtsą́ dóó ayóó át’áo Náádiidzá yoo’íínii silį́į́’.14
BiBóhólníihii seesyį́į́go, shídó’ yínííł shii’ hadéíbįįd Mary Magdalene dóó bikwahásiní dóó shí yínííł daazli’ę́ę́’gi’ át’áo. Nahast’éí shinááhaigo, shínaaí ńt’éé’ ayóó át’éego ni’ nahasnáá’go nihits’ą́ą́ ádin. T’áá hooyání ahoodzaa’ígíí biniinaa, náás hodeeshzhiizhgo índa ahoodzaa’ígíí baa ákoniidzį́į́ da. Yínííl shijéí yiniisgaigo, dóó adi’dishní, “Shínaaí haash yidzaa? Háájí shą́? Háágóólá ííyá? T’áá daats’í neidiistsééł?”
Íídą́ą́’ Diyin God Yisdá’iildééh bihoot’ááł doo shił báhózin da ńt’éé’, dóó haadéé’ nihiikai’ígíí shił bééhódoozįįł niizįį’, ha’at’íísh biniyé iiná, dóó nihizee’ hazlį́įgo haash danihi’di’doolnííł. T’áá ániiltso’ ákódeiniidzin łeh ayóó ádeiyíníí’ninígíí adin yilééhgo doodaii’ nihi’iina’ bikee ti’dahwii’nííhgo?
T’áá dikwíí naahai yę́ę́dą́ą́, shínaaí łahgo át’áo baa tsídíkeez. Nihida’alkał neiniłtsingo nibiníshyęsh. Daadilkał ąą ííshį́į́’, áádę́ę́’ sizį́į łeh, dóó áshíłniih, “Doo dasítsą́ą da. Hiinishná. Naadeeshááłígíí doo shá bííghah da, ndi k’ad t’áá nił honishłǫ́ǫ́ doo dóó doo ntsą́ą́ dahnáádideeshdááł da.” Éí nibinishyęęshígíí, neiseeł nahalinígíí, nihits’ą́ą́’ dahnídiidzáahgo bik’ee ti’hooshnííh yę́ę́ bee bii’ hanáásdzá. Shíl hólǫ́ǫ doo’ígíí t’áá áłahjį’ baa ntséskees. Łahdi daadilkał bidiniishgęęzh łeh, daadilkał neididoołts’įįł dóó neideestsééł laanaa nisin.
Diizdiin daats’í naahai, Eastergo, Jesus Christ Nááhiina’ígíí baa ntséskeesgo shínaaí baa tsídíkééz. Ts’ídá ákohgo, shini’ yidiisnáá’. Shich’į’ yigááłgo binanishyęęsh.
Éí bijį́ baa ákóniidzíí’ Diyin Ii’sizíinii shił hodííshǫǫd ti’hooshnííhgo. Shił ííshjání ályaa shínaaí bii’sizíinii doo daaztsą́ą́ da; t’ah hiiná. Hool’áago bił haz’ą́ą́di t’ahdii ó’hooł’aah . K’ad shił bééhózin “[shí] naaí náádidoodááł”15 ayóí át’éego baa hoolzhiizhgo, Jesus Christ Nááhiina’ígíí biniinaa, t’áá ániiltso náádahidii’naał. Áádóó ałdó’, bił haijééh t’áá áltso bił ahínéídiikah bóhónéídzáago áyiilaa dóó hool’áago ił hózhǫ́ Diyin God hólǫ́ǫdi t’áá nihí ádeiniidzingo dóó Bił aha’diit’aah dadííníílzin doo.
President Nelson na’neezt’ą́ą́’:
“Ánoonééł t’áá íiyisíí hool’áago iiná bideet’i’. Doo ła’ bił bééhózin da hahgo shį́į́ áhodoonííł, ndi Diyin God Bi ił hózhǫ́ǫnii ayóí át’éii bihoot’aał bidiit’i’ . Diyin Bóhólníihii Niháti’hooznii’ígíí baa ahééh álį́, náá’ii’ná t’áá aníí dóó hool’áágóó iiná t’áá ałtso nihookáá’ dine’é bá át’é. …
“… Bits’ą́ą́’ ádahasdįįdígíí yínííł danilį́ … anoonééł bik’eh ashchį́į́’ éí Jesus Christ deiyoodlą́ągo yee dabidziil, ha’ahóní hadaałtéego bitsádi’nílííd, Diyin God dóó t’áá ałtso nihookáá’ dine’é ayóó ájóóníígo, dóó bika’adeeshwoł jinízin doo. Éí oodlą, éí ha’ahóní, éí ayóó’ó’óó’ní nihee hólǫ́ǫgo Diyin God bił yahindiikah hodiyindi dóó, hool’áago bił dahi’niináanii dóó nihikwaahásiní, Bił kééhoniit’į́į́ doo.”16
T’áá aníígo she’oodlą́ “Jesus Christ t’́aadoo daazts’ą́ą́déé’ náádiidzáago doodaii’ anoonééł doo yik’eh deesdlį́į́go jischáá’ doo bik’eh didoodliił da, doodaii’ anoonééł doo bik’eh ashchíí da doo ńt’ée’ áko náá’iiná adin doo ńt’éé’.
“́Ndi naa’iináh hólǫ́, áko jishcháá’ doo ak’eh deesdlį́į́’ da, dóó anoonééł bik’eh ashch’íí’ígíí Christ yik’eh dessdlį́į́’.
“Adinídíín nilį́ dóó nihookáá’ be’iiná nilį́; aoo’, adinídíín doo ídįįhii, éí doo dinóotsił da; aoo’, dóó ałdó’ iiná doo ninít’i’ da, ákó doo anoonééł da doo.”17
Jesus Christ t’áá bí ánááhodoo’niid, “Naa’iiná asht’į’, dóó iiná: háíshį́į́ shoodlanígíí, daats’ą́ą́ ndi, nááhiidoo’naał.”18
T’áá aníí she’oodlą niháti’hooznii’go nihánina’nídlá dóó ayóó át’áo Jesus Christ Nááhii’na’, ájéí dadeesnihígíí neidoołdzih, ti’hoo’nííh hodeizyéél doo, dóó ani’ishtłish ha’ahóní dooleeł. Bighaan Bee ajooba’ yee nihindoochił, hwił hasih doo, nihidziil doo, dóó t’áá ła’í niidzinígo nanihidoołzih. Jesus Christ bízhi’ bináhjį’, amen.