“Áko Shooh! Diyin God Álílee Yee É’éł’íinii Nishłį́“
Dííjį́ Jesus Christ yikéé’ deikáhígíí álílee, daat’íinii dóó da’ayóí ádaat’éii bitah dahólǫ́, shí dóó nihe’iiná biyi’.
Shik’is dóó shilahkéí, baa ahééhílį́ dííjį’ nihi’dááhdóó sézinígíí. T’áá íídą́ą́ hadahaasdzi’ígíí bił díí ntsaago áłah aleehgi, Jesus Christ t’áá aníí hiináago shił bééhózin. BiSodizin yiyołwoł; Nihinaat’áanii Russell M. Nelson, Diyin God yá’ yáłti’í, nilíigo yich’į’ yáłti’, áádóó Diyin God Yá’ąąshdi Hólóonii ba’áłchíní ayóó áyóní.
Díí Jesus bi’dizhchį́ Damóo góne’ nááhii’na’ígíí béédeelniih, nihiYisdá’iinííłii dóó niháNina’nídléí,1 Diyin God Bi’ayóó Át’éii, 2Áhodiilzééh Binaat’áanii.2 Ti’hooznii’, dóó nááhii’na’jį’ bił nahoolzhiizh ats’íís ndaha’nííłdi táá’ biiską́, éí diné binákéé’ náháne’ ayóó át’áo álílee át’éego baa hane’. “Áko shooh,” Bí ání, “Diyin God nishłį́; dóó Diyin God álílee yee é’éł’íinii nishłį́.”3
“Christ yá’ąąshgóó’ násdlį́įgo da’ álílee ninít’i’, dóó Diyin God binish’náájígo dahneezdá?”4 Diyin yá yáłti’í Mormon na’ídiłkid Naaltsoos Mormon Wolyéhígíí biyi’dóó. Bí ání, “Dooda; Diyin yá ndaalʼaʼí tʼahdii nihookáá’ dine’é bá’áłchíní yíká ańdaajah.”5
Ti’hooznii’ dóó bik’ijį’, Diyin Bóhólníihii bibá naal’a’í Mary dóó sáánii ła’ yaaníyá ats’íís ndaha’nííłdi Jesus bits’íís ak’ah diyinígíí yąąh ádeilééhgo. Diyin yánaal’a’í ádííniid:
“Ha’át’íí biniyé dahiinánígíí andahaaskai bitah hadanohtą́?6
“Doo kǫ́ǫ́ da: háálá náádiidzá.”7
Mormon Binaaltsoos wolyéí bii’ Abinadi éí álílee ahoodzaa yę́ę́ yaa hoolne’:
“Christ anoonééłdéé’ t’áadoo náádiidzáágóó, … doo náádahiidii’nááł da ńt’éé’.
“Ákondi nááiiná éí hólǫ́, áko anoonééł doo honees’náa da, dóó Christ éí anoonééł yik’ehdeesdlį́į́’.”8
Christ áłtsé yikéé’ yikahę́ę Jesus Christ álílee áda’iilaa yę́ę́ deyiiłtsą́ kódadííniid: “Díí diné hait’éhígíí át’į́! háálá níyol dóó tó yich’į’ haadzihgo, bik’ehół’į́.”9
Áłtsé hastóí naakits’áada yę́ę́ Jesus Christ bina’nitin yee na’nitingo deidiizts’ą́ą́’, álílee lą’í deiyiłtsą́. Áko díí deiyiiłtsą́ “bináá’ ádaadinii da’oo’į́ ńdáásdlį́į́’, dóó naaljį́dí nidaaghá ńdáásdlį́į́’, biłóód doo ńdaadziihii hadaałt’é ńdáásdlį́į́’, dóó bijédaakał da’diits’a’ ńdáásdlį́į́’, daneeznánéé hiiná ńdáásdlį́į́’, áádóó baadahojoobá’ígíí Diyin bina’nitin bee ndaneestą́ą́’.”10
Dííjį́ Jesus Christ yikéé’ deikáhígíí álílee, daat’íinii dóó da’ayóí ádaat’éii bitah dahólǫ́, shí dóó nihe’iiná biyi’. Álíle éí diyingo e’él’į́, ił ííshją́ą́ e’da’al’į́, dóó Diyin God be’adziil doo ninít’i’’ yahalne’ ádaat’é dóó “adą́ą́dą́ą́, dííjį́, dóó ahool’áago doo łahgo ánáániiłii Nilį́.”11 Jesus Christ, tónteel áyiilaa, ahodiilzééhgo ánéyilį́į́h; doo da’oo’íinii da’oo’į́ ánéídle’ Yá’ąąshgóde díníít’į́į́’go ánhidoolííł; łóód hadaałt’é áyiilaa yę́ę́ nihiti’oo’nííh nahjį’ kwíídoolííł; ch’ééh át’íiniineidiyiłéii “Hoshdę́ę́’, shikéé’ wohááł,” bee na’nitini yee náánihidoołááł.12
Nohłą’ída álílee daałts’ą́ągo át’é, k’ad woh’ínígíí biláahgo. Jesus anoonééłéé’ naa’diilá bił ahąąh baa ntsííkeesgo ałts’íísí nahalin. Ákondi álílee doo ntsaago naasnish éí doo bóhólnííh da, t’óó Diyin God bits’ą́ą́déé’ ályaa nihił bééhózin doo. Ła’ álílee t’óó ádahooníiłii doodaii’ doo bééhózingo ha’nídééł át’é danízin. Ákondi Nephi Diyin yá yáłti’í “Diyin God bits’ą́ą́déé álílee dóó be’adziil ni’kódeił’ínígíí yich’ah hashké, áádóó t’áá bí bił éédahózin dóó yídahooł’ą́ą́’ ninádeinitin, áko yee da’at’į́’.”13
Álílee éí diyingo adziil yinahjį’ “ayóó át’áo yisdá’dooniłii” áyiilaa.14 Álílee éí Diyin God hool’áágóó bihoot’ááł bídééti’; álílee éí yá’ąąsh dóó nahasdzáánjį’ iiná be’atł’óól nahalingo bee anít’i’.
Aak’eedą́ą́’ nihilah Sister Rasband dóó shí Goshen, Utahgóó nshiit’áázh, éí adawiis’áágóó 600,000 dimííl ntsaa diné ánéélą́ą́go hast’ą́ą́’tsáadah saad ał’ąą át’éego áłah aleehgo nshiit’áázh.15 Jesus Christ bina’nitin ninályá baa dahane’, tsíłkéí adahwiis’áádę́ę́’ nda’ídíłkidgo. Sister Rasband dóó shí nda’ídíkid nihich’į’ ályaa; Joseph Smith Diyin God yá yáłti’í nilį́įgo baahwiilne’, nihe’iina’ ił ííshją́ą́ e’él’į́ bibe’adziil yił naalnish, Jesus Christ bina’nitin Ninályéí, dóó t’áá aníí ádaat’éii dóó bibeehaz’áanii da’ílíinii baahwiilne’. Nohłą’í díí jį́’ da’íísónółts’ą’ígíí eii éí álílee atah daołtsą́.
Hodiyingo haz’ą́ New Yorkdéé’ haalkid, áadi, Joseph Smith t’áá aníínii yaaholne’: “Naakigo asdzį́įgo yiiłtsą́, bits’á’dinílííd dóó bi’ayóó át’éii doo ła’ ákót’éégóó yiiłtsą́, niłch’i biyi’ shilááhdi dasizį́. Ła’ shich’į’ haadzíí’, shízhi’ yee shíizhi’ dóó koní, ła’ígíí yich’į’ dadóoníhgo—Díí ShíYe’ Ayóó’óosh’níinii át’į́. Deisínółts’ą́ą́’!”16 Éí, shilk’iské dóó shilahké, álílee át’é.
Adahwiis’ą́ą́góó dikos ntsaa hazli’ígíí biniinaa Goshen, Utah, Jesus Christ bisodizin Dííjį́ Yikéé’ Naazíinii łah Jerusalem ałk’idą́ą́’ ahoot’éhę́ę́’, yééda’iidlaa, na’alkid biniyé. Nihilah dóó shí Goshen t’áá áyídígóó Damóo i’íi’ą́ągo deetazhíjigo łid hahíít’į́įgo yiiłtsą́. Hodook’ą́ą́ł lá, dóó áłah adooleeł da ni’kódoolnííł niizingo bich’į’ nihíni’ íí’á. T’áá aníí lá, naadiin dah alzhin hast’ą́ą́jį’ adooleełgo, áłah yiidleehgi, tsiniltł’ish neezsiz. Tsiniltł’ish neezsiz! Doo áłah yiidleeh da. Tsiniltł’ish bee ál’iní t’áá ła’ígíí daats’í ndoolnish daniizį́į́’, ákondi doo bééhózin da t’áá daats’í bee ndoonishígíí yiyoołwoł doo.
T’áá áníít’é, bik’ehgo nda’alkeedii, sin ádeidoolííłii dóó nda’doołkiłii—dóó naadin tsíłkéí t’áá shí shighan dóó’ígíí ndi—éí akwe’é áka’adoojah yich’į’ hasht’e’áda’diilyaa. Binákeeshto’ dadeezna’ dóó hahonííchaadgo bits’á níyá dóó Diyin Bóhólníihii álílee bee áká’a’ayeed bííkeed. “ShiTaa’ Yá’ąąshdi Honílóonii,” dishníigo sodiszin, “Álílee doo ahą́ą́h nínishkeed da, ákondi ła’ k’ad nííníshkeed. Díí áłah aleeh tsíłkéí t’áá át’é adahwiis’áágóó bá áhodoonííł. Adziilii bee náás áhodoonííł Ninízingo.”
Hastą́ą́ dóó tsosts’id dah alzhin bee bila’ooskidgo, t’áá hoosch’į’ ntsiniltł’ish ni’kódzaa’ígi’ át’áo, tsxį́į́łgo ndiiltłah. T’áá ałtso ndaalnish ndaasdlį́į́’ bee nda’anéhé dóó bee yáda’ati’í bee nda’alkidí dóó t’áá át’é bee nda’doonishjį’. Ndadiilnishjį’ iijéé’. Álílee nihił áhoodzaa.
Sister Rasband dóó shí hooghangóó nihił na’oolwołgo, Nihinaat’áanii dóó Nihilah Nelson nihich’į’ i’iilaa: “Ron, nihił bééhózin doo t’áá tsiniltł’ish neeztsiz hodoo’niidgo, álílee bíká sodeelzin.”
Dííjį́įdi Diyin bizaad kót’áo naasdzoh, “Shi, Diyin Bóhólníihii, yá’ąąsh bibe’adziil bee dahdeeshnii’; k’ad doo daah’į́į́ da, ákondi hodíína’go deidoołtsééł, dóó shí ásht’į́įgo nihił béédahodoozįįł, áádóó deesháał dóó shidine’é bił hweesh’ááł doo.”17
Díí t’áá aníigo behoolyaa. Diyin Bóhólníihii dahdiilNii’, dóó tsiniltł’ish n’diiltłah.
Álílee éí oodlą’ bidziilgo naalnish, éí President Nelson ałts’éédą́ą́ ałahsiidlíí’ yę́ędą́ą́’ bidziilgo yee nanihineeztą́ą́’. Diyin yá yáłti’í Moroni diné kót’áo yich’į’ haadzíí, “Nihookáá’ dine’é ba’áłchíní be’oodla’ doo bitah dahólǫ́ǫ́góó Diyin God álílee doo íídoolííł da; éí bąą, da’oosdląądgo índa yich’į’ ííshjání a’diilyaa.”
Áádóó Ánáádí’ní:
“Áko shooh, Alma dóó Amulek be’oodlą’ bee awáalyah ni’jį’ nááłdááz.
“Áko shooh, Nephi dóó Lehi be’oodlą’ bee Laman bidine’é łahgo ádaadzaa, Ii’sizį́ Diyinii dóó kǫ’ bee tó dabi’didoolzį́į́ł.
“Áko shooh, Ammon dóó bik’iské bee Laman bidine’é bitahgóó ayóó át’áo álílee azlį́į́’. …
“Áádóó doo łah ła’ álílee bił hoole’ da be’da’oodlą’ chodayoos’įįdgo índa; éí bąą áłtsé Diyin God biYe’ dayoosdląąd.”18
Diyin bizaad bee ha’oodzi’ígíí baa kódíshní, “Tsíłkéí áda’iilaa’ígíí, nda’ałkidígíí, sodizin da’atahígíí dóó binaat’áanii, Hastóí Naakits’áadah, dóó Diyin yáyáłti’ álílee t’áá íiyisíí deinízingo tsiniltł’ish náhásdlį́į’ Goshen, Utah na’alkid bił haz’ą́ądi.”
Álílee sodizin ndi yinahjį’ áhodoonííł. Niidzinígi’ át’áo dóó doo áhodooníłígi’ át’áo áhodoonííł da, ákondi Diyin Bóhólníihii ba’ííníídlį́įgo, áadi Hólǫ́ǫ doo, dóó t’áá aníí áníídoo. Álílee nizinígi’ át’áo ye’doolííł.
Diyin Bóhólníihii Be’adziil yéé nihiiłnííh biniyé álílee ííł’į́, ayóó ánihóní, yá’ąąshdéé’ dóó neildeeh’jį’ nihik’idééz’į́į́’, dóó ts’ídá ílį́įgo yee nanihidínóotįįł yinízin. “Bee na’asdziih yoodlánígíí,” 1831 yéédą́ą́’ akéé’ naazíinii yee yich’į’ Haadzíí’, éí dííjį́į́di ak’ihojídlíigo haadzí’ígíí t’ahdii beehooghááł, “anoonééł doo bee bánahoot’ánígíí, éí nideesdzih.”19 Yá’ąąshdi beehaz’áanii ádaalyaa, dóó éí áłahjį’ bik’edahoniil’į́į́ doo.
Łahda álílee baa laanaa daniidzin ayóó ádeiníiníínii ndoodzihgo, doo yá’át’ééhii łahgo ánálnééhgo, doodaii’ ii’sizį́ báháchį’go dóó doo ákót’éégóó ntsékeesgo. Ats’íseejí nihináá bee díníít’į́į́go, Diyin Bóhólníihii nihíká’adoolwoł niidzingo, dááchxǫ hast’endoolnííłgo. Oodlą́ binahjį’, álílee áká’adoolwoł, doo nihí niizinígi át’áo da doodaii’ nihídii’nínígi’ át’áo. Da’ éísh nihe’oodlą’ bee áłts’íísí doodaii’ yee áká’adoolwołígíí doo nihí nihá da? Dooda. Diyin Bóhólníihii ayóó ánihóní. Be’iina nihá ninéediní’ą́, dóó Ti’hooznii’ígíí áki’indahiilyéhígíí dóó nihibąąhígi’ ádaat’éii t’ahdii nihá nahjį’ kwííł’į́ ádaana’iikąąh dóó bił honiidlǫ́ǫgo.
Diyin Bóhólníihii yéénihiiłnííh, “Doodaii’ nihíjígoo’ígíí doo shigi’ át’ée da.”20 Kónihiłní, “Shaa hohkááh, t’áá ánółtso naanish baa ch’ééhdohkai’ígíí dóó nihiyéél danidaazii, dóó aaháyį́įh nihich’į’ kódeeshłííł”21—nihine’ nihide’ádaadzaa’ígíí, nihaandahookaadígíí, ndaałdzidígíí, doo akeh hojiłį́, ayóó ájóníinii baa yinííł hwindzin, yoo’ajííyá doodaii’ jinízin yę́ę hwits’ą́ą́’ ni’kódzaa bits’ą́ą́dóó’ háá’dooyį́h. Nihił halą́ągo dóó yínííł nohsingo ahodiilzééh éí álílee át’ée doo. Diyin Bóhólníihii bizaad béídaałniih: “Da’ ahodiilzééh nini’ biyi’ díí baa haasdzíí’? Haash yit’áo ayóó át’áo oo’íní nihee hólǫ́ǫ doo Diyin bits’ą́ą́déé’ t’éiyá?”22 Jesus Christ, Jehovah Ayóó At’éii, Aláahdi aYe’ nilíinii, ahodiilzééh nihich’į’ kwiił’į́ díí éí álílee át’é.
Mary da’ákehdi yich’į’ ííshją́ą́ á’diilyaa, bízhi’ yeeyiyízhi’, ne’oodlą’ chodeinoł’į́ nihiłní. Mary éí yándool’aał dóó yaa áhodooyąął nízin. Hait’áo Náádidzáhígíí doo nayólíi da ńt’éé’, ákondi ayóó át’áo ił hózhǫ́ bihoot’ááł bik’eh áhoodzaa.
“Tsin ałnáoz’áádéé’ adanináá.”26 dabiłní Calvarydi doo da’oodlání áłah danilíigo ída’ats’ihgo. Álílee íídoolííłgo shį́į́ yííghah. Ákóndi nihodooti’ dóó bee hahóóyá bił bééhózin ndi, Bizhe’é binahat’á yoodlą́ą́go ya’ólíí ńt’éé’. Éí na’nitin doo nihinahjį’ yóó’ádoolnííł da.
Nihich’į’ nahwii’náago Ánihiłní, “Shooshk’iizh baa ada’asgeed danół’į́, shilá dóó shikee’ yił adá’askaadgi ałdó’; iinidlą́, shi beehaz’áanii bik’eh dahonoł’į́, akó yá’ąąshdi shił haz’ą́ danihí doo.”24 That, brothers and sisters, is the miracle promised to us all.
Jesus Béé hániih góne’ nihi Diyin Bóhólníihii hiiná násdlį́’ígíí éí álílee át’é, Jesus Christ básézį́įgo bee ak’ihójídlí nihaanishłé be’adziil baa ákonohsingo hinohnáa doo, NihiTaa’ Yá’ąąshdi Hólóonii ndaahkąąhgo Jesus Christ bina’nitin ííshjání áyilaa yę́ę be’ayóó’ó’óní dóó át’į́įgo binahjį’ nihił hóone’ doo. Nihidziilgo nisoozį́į́go nihik’ijinishdliih dóó t’áá ałtso nik’ijį’ dooleełígíí bich’į’ da’iinohdlą́ą doo. Goshendi baa ákodaniidzi’ yę́ę́gi’ át’áo álílee bee nihik’ijinishdliih—Diyin Bóhólníihii íínízingo. Díí ak’idahojídlí yá’ąąshdéé’-hádasídóó’į́į́’ “díí Jesus Diyin yá yádaałti’ii dóó hastóí naakits’áadah yaa nda’íízoh hadanóhtáago, áko Diyin God aZhé’é nilíinii be’ajooba’, dóó ałdó’ Diyin Bóhólníihii Jesus Christ, dóó Ii’sizį́ Diyinii, éí t’áá áłah yaa dahalne’, éí nihił dóó nihíí’ hool’áago hólǫ́ǫ doo.”25 Jesus Christ bízhi’ binahjį’, amen.